Liciniso Lembuso​—Kukhipha Kudla Lokuvela KuNkulunkulu

UMUNTFU lomfundzela liBhayibheli uvula emehlo, akhombisa kumangala njengobe atfola inchazelo yembhalo lenisandza kuwufundza. Ngekunamula utsi: “Usho kutsi liBhayibheli lifundzisa kutsi sitawuphila phakadze ePharadisi, khona lapha emhlabeni?” Umuntfu lohamba naye ensimini uyamomotseka bese utsi: “Yebo, angitsi vele nguloko losandza kukufundza eBhayibhelini?” Ngekumangala, lomuntfu lomfundzelako uvuma ngenhloko, bese utsi: “Uyati kuyangimangalisa kutsi kute umuntfu loke wangitjela loku ngaphambili!” Njengobe lomfundzi asho loku, wena uyakhumbula kutsi emavikini lambalwa lengcile ngesikhatsi afundza kwekucala kutsi libito laNkulunkulu nguJehova, washo intfo lefanako.

Kuke kwenteka yini kuwe loku? Kuke kwenteka kubantfu baNkulunkulu labanyenti. Timbalwa tintfo letisikhumbuta ngalokucacile ngesipho lesiligugu lesinikwe sona​—lokulwati lweliciniso! Asewume kancane ucabange: Wasitfola njani lesipho? Kulencenye sitawuhlolisisa lombuto. Indlela bantfu baNkulunkulu lebebasolo batfola ngayo kukhanya lokumayelana naYe, ibufakazi lobucacile bekutsi uMbuso waNkulunkulu uyintfo sibili. Sekuphele likhulu leminyaka iNkhosi yaloMbuso, Jesu Khristu, isolo isebenta kute icinisekise kutsi bantfu baNkulunkulu bafundziswa emaciniso.