Nakuvela Timo Letibuhlungu

Ngisho nobe ungetama kangakanani kujabula emshadweni nasemndenini wakho, tintfo letingakalindzeleki tingenteka futsi tente kube matima kutsi nihlale nijabulile. (Umshumayeli 9:11) Ngelutsandvo lwakhe, Nkulunkulu usiniketa lusito nasihlangabetana netimo letimatima. Nawusebentisa letimiso temiBhalo letilandzelako, wena nemndeni wakho nitawukhona kubeketelela ngisho netimo letimatima kakhulu.

1 YETSEMBELA KUJEHOVA

LOKO LOKUSHIWO LIBHAYIBHELI: “Phonsani konkhe kukhatsateka kwenu kuye, ngobe uyanikhatsalela.” (1 Phetro 5:7) Ngaso sonkhe sikhatsi, khumbula kutsi akukafaneli umsole Nkulunkulu ngetilingo lobhekana nato. (Jakobe 1:13) Njengobe usondzela kuye, utakusita ngendlela lencono kakhulu. (Isaya 41:10) “Tfululelani kuye tinhlitiyo tenu.”​—Tihlabelelo 62:8.

Utawuphindze utfole indvudvuto nangabe ufundza futsi udadisha liBhayibheli malanga onkhe. Nawenta njalo, utayibona indlela Jehova ‘lasidvudvuta ngayo kuko konkhe kuhlupheka kwetfu.’ (2 Khorinte 1:3, 4; Roma 15:4) Wetsembisa kukunika ‘kuthula kwakhe lokwendlula konkhe kucondza.’​—Filiphi 4:6, 7, 13.

LONGAKWENTA:

• Thantaza kuJehova kute akusite ungakhatsateki kakhulu futsi ukhone kucabanga kahle

• Hlatiya konkhe lokucabangile bese ukhetsa indlela lencono kakhulu kuwe

2 TINAKEKELE UPHINDZE UNAKEKELE UMNDENI WAKHO

LOKO LOKUSHIWO LIBHAYIBHELI: “Umuntfu lonengcondvo leyehlukanisako uyaluzuza lwati, nendlebe yalohlakaniphile ifunana nelwati.” (Taga 18:15) Tfola onkhe emaciniso. Tfola kutsi yini lilunga lemndeni ngalinye leliyidzingako. Khuluma nemalunga emndeni wakho, futsi uwalalele.​—Taga 20:5.

Yini longayenta nakushona lotsandzekako? Ungesabi kuveta indlela lotiva ngayo. Khumbula kutsi ngisho naJesu “wakhala tinyembeti.” (Johane 11:35; Umshumayeli 3:4) Kuphumula ngalokwenele nekulala kahle nako kubalulekile. (Umshumayeli 4:6) Loku kungenta kubemelula kubhekana nesimo lesicindzetelako.

LONGAKWENTA:

• Ngaphambi kwekutsi kuvele timo letibuhlungu, tetayete kukhulumisana nemndeni wakho. Nakuvela tinkinga, batawukhululeka kukhuluma nawe

• Khuluma nalabanye lokungenteka bake babhekana nesimo lesifanako

3 TFOLA LUSITO LOLUDZINGAKO

LOKO LOKUSHIWO LIBHAYIBHELI: “Umngani unelutsandvo ngaso sonkhe sikhatsi; kantsi umnakenu utalelwe kutsi netfwalisane naye tinhlupheko.” (Taga 17:17) Bangani bakho bangafuna kukusita, kodvwa bangase bangati kutsi benteni. Ungesabi kubatjela loko lokudzingako. (Taga 12:25) Ngetulu kwaloko, funa sikhutsato lesiseBhayibhelini kulabo labalicondza kahle. Sicondziso labangakunika sona lesivela eBhayibhelini sitakusita.​—Jakobe 5:14.

Utawutfola lusito loludzingako nangabe utihlanganisa njalo nebantfu labanekukholwa kuNkulunkulu futsi labatetsembako tetsembiso takhe. Utawuphindze utfole indvudvuto lenkhulu nawusita labanye labadzinga sikhutsato. Bacocele ngetinkholelo takho nangetetsembiso taJehova. Hlale umatasatasa ngekutsi usite bantfu labeswele, futsi ungatehlukanisi nalabo labakutsandzako nalabakukhatsalelako.​—Taga 18:1; 1 Khorinte 15:58.

LONGAKWENTA:

• Khuluma nemngani losedvute kuze akusite

• Yetsembeka futsi utisho ngalokucacile tidzingo takho