May

Ngesikhatsi Jesu asesemusha, wakhetsa kulalela batali bakhe. Akazange abedzelele batali bakhe ngobe acabanga kutsi yena wati kakhulu kunabo. Jesu wenta konkhe lokusemandleni akhe kuze ayente kahle imisebenti lobekufanele ayente njengobe bekayindvodzana lendzala. Wasebenta kamatima kuze afundze kubata kuJosefa khona atewunakekela umndeni wakubo. Kungenteka batali baJesu bamtjela ngesimangaliso lesenteka kuze atalwe nangaloko titfunywa taNkulunkulu letakusho ngaye. (Luk. 2:8-19, 25-38) Jesu akenetiswanga nguloko latjelwa kona, waphindze watitadishela yena imiBhalo. Sati njani kutsi Jesu bekangumfundzi lokhutsele weliVi laNkulunkulu? Kungobe ngesikhatsi asengumfanyana, bafundzisi baseJerusalema “bamangaliswa kucondza kwakhe kanye netimphendvulo takhe.” (Luk. 2:46, 47) Ngesikhatsi aneminyaka lengu-12, Jesu besekatibonele kutsi Jehova unguBabe wakhe.​—Luk. 2:42, 43, 49. w20.10 29-30 ¶13-14

Kukholwa kutsi Jesu wavuswa kusiniketa sizatfu sekutsi sikholwe kutsi nalabanye batawuvuswa. Ngesikhatsi Pawula acala kubhala ngekuvuswa kwalabafile, wakhuluma ngemaciniso lamatsatfu: (1) “Khristu wafela tono tetfu.” (2) “Wangcwatjwa.” (3) “Wavuswa ngelilanga lesitsatfu njengobe imiBhalo isho.” (1 Khor. 15:3, 4) Kufa kwaJesu, kungcwatjwa kwakhe nekuvuswa kwakhe, kusho kutsini kitsi? Umphrofethi Isaya wabiketela kutsi Mesiya ‘bekatawuncunywa eveni lalabaphilako’ futsi ‘anikwe indzawo yekungcwatjwa kanye nalababi.’ Kodvwa bekunalokunye lobekutawenteka. Isaya waphindze washo kutsi Mesiya bekatawetfwala “sono sebantfu labanyenti.” Jesu wakwenta loko ngekutsi abe yinhlawulo. (Isa. 53:8, 9, 12; Mat. 20:28; Rom. 5:8) Jesu usinikete tizatfu letinhle tekuciniseka kutsi singakhululeka esonweni nasekufeni futsi siphindze sihlangane netihlobo tetfu lesetafa. w20.12 2-3 ¶4-6; 5 ¶11

Umphostoli Pawula bekavame kushumayela emasinagogeni emaJuda. Sibonelo saloko kutsi ngesikhatsi asesinagogeni leliseThesalonika, “wabonisana nabo [emaJuda] ngemiBhalo emasabatha lamatsatfu.” (Imis. 17:1, 2) Kungenteka Pawula bekakhululeka nakasesinagogeni. Wakhuliswa njengemJuda. (Imis. 26:4, 5) Pawula bekawacondza emaJuda, ngako bekakhona kuwashumayela ngesibindzi. (Fil. 3:5) Ngemuva kwekutsi Pawula aphocelelwe baphikisi kutsi ahambe eThesalonika naseBheriya, waya e-Athene. Waphindze ‘wabonisana nemaJuda lebekasesinagogeni kanye nalabanye lebebakhonta Nkulunkulu.’ (Imis. 17:17) Nobe kunjalo, ngesikhatsi Pawula ashumayela etimakethe, watfola luhlobo lwebantfu lolwehlukile. Emkhatsini walabantfu, bekunetati tefilosofi nebantfu betive lebebatsatsa umlayeto lobewushunyayelwa nguPawula ‘njengemfundziso lensha.’ Batsi kuye: “Ukhuluma ngetintfo lesicalako kutiva ngetindlebe tetfu.”​—Imis. 17:18-20. w20.04 9 ¶5-6

Ungacabangi kutsi awusilutfo nangabe ukutfola kumatima kwenta lokulungile. Ngenca yekutsi sonkhe siyawenta emaphutsa, siyawudzinga umusa waJehova, lasipha wona ngenhlawulo. (Ef. 1:7; 1 Joh. 4:10) Bazalwane nabodzadze ebandleni, bangasikhutsata! Bangasilalela nangabe sifuna kusho lokutsite, futsi bangasikhutsata. (Taga 12:25; 1 Thes. 5:14) Dzadze waseNigeria lokutsiwa nguJoy loke wabhekana nekudvumateka, utsi: “Bazalwane nabodzadze bangisite kakhulu kutsi ngibhekane nekudvumateka. Sikhutsato labanginiketa sona sangikhombisa kutsi Jehova uyayiphendvula imithantazo yami. Ngifundzile kubo indlela yekukhutsata labanye labadvumatekile.” Kodvwa kufanele sihlale sikhumbula kutsi bazalwane nabodzadze ngeke bahlale bati nangabe sidzinga sikhutsato. Ngako, kungadzingeka kutsi siye kumzalwane nobe dzadze losanesikhatsi akhonta Jehova, futsi simtjele kutsi sidzinga lusito. w20.12 23-24 ¶7-8

Ngalokuvamile, kuze ube ngumngani nemuntfu lotsite, kufanele ucitse sikhatsi naye. Nanicoca ngalenikucabangako nangendlela lenitiva ngayo, niba bangani. Nasifuna kuba bangani baJesu, ngaletinye tikhatsi sibhekana netinkinga. Lenye yato kutsi asikase simbone Jesu. EmaKhristu lamanyenti angelikhulu lekucala bekangakase ambone. Nobe kunjalo, umphostoli Phetro watsi: “Nanobe ningakake nambona, niyamtsandza. Nanobe ningamboni kwanyalo, niyakholwa kuye.” (1 Phet. 1:8) Ngako-ke singaba bangani baJesu nanobe singakase simbone. Siphindze singakhoni kukhuluma naJesu. Nangabe sithantaza, imithantazo yetfu siyicondzisa kuJehova. Kuliciniso kutsi sithantaza egameni laJesu, kodvwa sisuke singakhulumi naye. Ecinisweni, Jesu akafuni sithantaze kuye. Leni? Ngobe umthantazo ungulenye indlela yekukhonta, futsi nguJehova kuphela lokufanele simkhonte. (Mat. 4:10) Nobe kunjalo, singakhombisa kutsi siyamtsandza Jesu. w20.04 20 ¶1-3

Tingijimi lebetiba khona emidlalweni lebeyiba seGrisi, betibhekana netinkinga letitsite, letifaka ekhatsi kudzinwa nebuhlungu. Intfo lobekufanele tetsembele kuyo bekukuceceshwa kwato kanye nekubeketela kwato. Natsi sifanana naletingijimi, siyaceceshwa ngendlela lokufanele sigijime ngayo kulomncintiswane. Kodvwa kunalokwehlukile ngatsi kuletingijimi mbamba. Singawatfola emandla langapheli kuJehova. Nangabe simetsemba Jehova, uyasetsembisa kutsi utasicecesha aphindze asicinise! Umphostoli Pawula wabhekana netinkinga letinyenti. Ngetulu kwekwetfukwa nekuhlushwa bantfu, ngaletinye tikhatsi bekaphelelwa ngemandla futsi bekufanele abhekane nentfo layibita ngekutsi “linyeva enyameni.” (2 Khor. 12:7) Kunekutsi atsatse letinkinga njengesizatfu sekuyekela kukhonta Jehova, watitsatsa njengelitfuba lekumetsemba. (2 Khor. 12:9, 10) Ngenca yekutsi Pawula waba nembono lokahle, Jehova wamsita kuto tonkhe tinkinga lebekabhekana nato. w20.04 29 ¶13-14

Sinesipho lesiligugu lesingasiboni ‘sekusebenta’ naJehova, naJesu kanye netingilosi. (2 Khor. 6:1) Sisebenta kanye nabo nasenta umsebenti wekwenta bafundzi. Ngesikhatsi Pawula akhuluma ngaye kanye nangalabenta umsebenti wekushumayela, watsi: “Sitisebenti letikanye naNkulunkulu.” (1 Khor. 3:9) Nasenta umsebenti wekushumayela, sisuke sikhombisa kutsi sitisebenti letikanye naJesu. Khumbula kutsi ngemuva kwekuyala balandzeli bakhe kutsi bente bantfu ‘bato tonkhe tive babe bafundzi,’ Jesu watsi kubo: “Mine nginani.” (Mat. 28:19, 20) Tingilosi tisisita ngani? Kusibusiso lesikhulu kucondziswa tingilosi njengobe simemetela ‘tindzaba letimnandzi taphakadze kulabo labahlala emhlabeni’! (Semb. 14:6) Lolusito loluvela ezulwini lesilutfolako lusisita kutsi sikhone kwentani? Njengobe sihlanyela umlayeto weMbuso, lenye inhlanyelo iwela enhlitiyweni levumako futsi ikhule. (Mat. 13:18, 23) Ngubani lowenta lenhlanyelo yeliciniso kutsi ikhule futsi itsele titselo? Jesu uyakuphendvula loko emBhalweni welusuku walamuhla. w20.05 30 ¶14-15

Batali labanyenti lamuhla badivosile. Leminye imindeni lehlala ndzawonye kungenteka ingasondzelani. Lomunye loweluleka imindeni utsi: “Make, babe nebantfwana abakhulumisani futsi bacitsa sikhatsi lesinyenti bakuma-computer, basebentisa ema-tablet, tincingo tabo nobe badlala ema-video games. Ngisho nobe bahlala endlini yinye kodvwa abatani.” Asifuni kufana nebantfu balelive labete lutsandvo. Kunaloko, sifuna kuwatsandza kakhulu emalunga emindeni yetfu kanye nebazalwane nabodzadze ebandleni. (Rom. 12:10) Hlobo luni lwelutsandvo lolu? Lutsandvo emalunga emndeni lasondzelene laba nalo kuze ahlale abangani. Lolu lutsandvo lokufanele sibe nalo ngebazalwane nabodzadze ebandleni. Nasinalolutsandvo, sisita bonkhe bantfu kutsi bakhonte Jehova bajabulile.​—Mik. 2:12. w21.01 20 ¶1-2

Licembu letemidlalo lelinebunye livame kuphumelela kunalelo lelite bunye. Inhlitiyo yakho ingafana nalelicembu leliphumelelako nangabe indlela locabanga ngayo, tifiso takho nendlela lotiva ngayo kubambisana kuze ukhonte Jehova. Khumbula kutsi Sathane ufuna kwehlukanisa inhlitiyo yakho. Ufuna kutsi imicabango yakho, tifiso takho nendlela lotiva ngayo kungavumelani netimiso taJehova. Nobe kunjalo, kufanele sikhonte Jehova ngenhlitiyo yetfu yonkhe. (Mat. 22:36-38) Ungamvumeli Sathane kutsi ehlukanise inhlitiyo yakho! Thantaza kuJehova njengobe kwenta Davide, umcele kutsi ente inhlitiyo yakho ihlose intfo yinye, kwesaba libito lakhe. Yenta konkhe longakwenta kuze usebentise lomthantazo ekuphileni kwakho. Onkhe malanga timisele kutsi tonkhe tincumo lotentako, kungaba nguletincane nobe letinkhulu tikhombise kutsi uyalihlonipha libito laJehova lelingcwele. Njengobe unguFakazi waJehova, nawenta njalo utawube ulimelela kahle libito lakhe. (Taga 27:11) Njengemphrofethi Mikha, sonkhe sitawutsi: “Siyawukhonta Jehova Nkulunkulu wetfu phakadze naphakadze.”​—Mik. 4:5. w20.06 13 ¶17-18

Lokuhlasela kwenkhosi yasenyakatfo ikanye nayo yonkhe leminye imibuso yemhlaba, kutawutfukutselisa Nkulunkulu longuSomandla futsi imphi ye-Armagedoni itawubese iyacala. (Semb. 16:14, 16) Ngaleso sikhatsi, inkhosi yasenyakatfo kanye nayo yonkhe leminye imibuso lenguGogi wakaMagogi, itawubhujiswa futsi “kute namunye loyawuyilamulela.” (Dan. 11:45) Sehluko lesilandzelako kulesiphrofetho saDanyela sisiniketa imininingwane leyengetiwe mayelana nekutsi inkhosi yasenyakatfo kanye naleminye imibuso itawubhujiswa njani nekutsi tsine sitawusindziswa njani. (Dan. 12:1) Lisho kutsini lelivesi? Mikhayeli ngulelinye ligama leNkhosi yetfu lebusako, Jesu Khristu. Bekasolo ‘angumvikeli’ webantfu baNkulunkulu kusukela nga-1914 ngesikhatsi aba yiNkhosi yeMbuso waNkulunkulu ezulwini. Ngekushesha ‘utawuvela,’ nobe abhubhise titsa takhe emphini ye-Armagedoni. Lemphi itawuba nguloko Danyela lakubita ngekutsi “sikhatsi sekuhlupheka lokukhulu” emlandvweni.​—Semb. 6:2; 7:14. w20.05 15-16 ¶15-17

Ngesikhatsi Josefa asigcili futsi aboshiwe, bekute lebekangakwenta ngesimo lebekakuso. Wasitwa yini kuze ahlale anembono lokahle? Kunekutsi acabange ngetintfo lebekangeke akhone kutenta, bekawenta kahle umsebenti lebekanikwe wona. Josefa bekahlale anake kujabulisa Jehova. Ngenca yaloko, Jehova wakubusisa konkhe lobekwentiwa nguJosefa. (Gen. 39:21-23) Indzaba yaJosefa isikhumbuta kutsi lelive linelunya nekutsi bantfu batasiphatsa kabi. Umzalwane nobe dzadze angasivisa buhlungu. Nangabe sitsatsa Jehova njeLidvwala letfu nobe uMsindzisi wetfu, angeke sidvumateke nobe siyekele kumkhonta. (Hla. 62:6, 7; 1 Phet. 5:10) Khumbula kutsi naJosefa bekaneminyaka lecishe ibe ngu-17 ngesikhatsi Jehova amniketa emaphupho. Ngako Jehova uyatetsemba tikhonti takhe letisetincane. Lamuhla, banyenti labasebancane labafana naJosefa. Nabo banekukholwa kuJehova. Labanye babo baze baboshwa ngenca yekungayekeli kukhonta Nkulunkulu.​—Hla. 110:3. w20.12 16 ¶3; 17 ¶5, 7

Umphostoli Phetro nemphostoli Johane bakutsatsa njengelilungelo kuphatfwa kabi ngenca yekutsi bebalandzela Jesu, futsi bafundzisa labanye ngaye. (Imis. 4:18-21; 5:27-29, 41, 42) Labafundzi bebete emahloni. Ngekuhamba kwesikhatsi, lamaKhristu angelikhulu lekucala lebekatfobekile enta tintfo letinyenti letinhle kunaleto letentiwa baphikisi bawo kuze asite bantfu. Nasi sibonelo, tincwadzi letiphefumulelwe teliBhayibheli letabhalwa ngulamanye alamaKhristu tiyachubeka tisita tigidzi tebantfu futsi tibanika nelitsemba. LoMbuso lebekashumayela ngawo uyabusa nyalo futsi ngekushesha utawubusa emhlabeni wonkhe. (Mat. 24:14) Ngalokwehlukile, umbuso lonemandla waseRoma yakadzeni awuzange ube khona sikhatsi lesidze, kodvwa lamaKhristu letsembekile nyalo ayabusa ezulwini. Nobe kunjalo, labantfu lebebawaphikisa sebafa futsi nakutawenteka bavuswe, batawubuswa nguloMbuso lebebawenyanya, lowo lamaKhristu lebekashumayela ngawo.​—Semb. 5:10. w20.07 15 ¶4

Abrahama bekanekukholwa lokucinile etetsembisweni taNkulunkulu, bekungatsi utambona Logcotjiwe, nobe Mesiya, lobekatawuba yiNkhosi yeMbuso waNkulunkulu. Kungako Jesu atjela emaJuda lebekaphila ngesikhatsi sakhe watsi: “Uyihlo Abrahama wajabula kakhulu nakutsiwa utawubona lilanga lami, ngako walibona futsi loko kwamjabulisa.” (Joh. 8:56) Kuyacaca kutsi Abrahama bekati kutsi situkulwane sakhe besitawuba yincenye yaloMbuso lobewutawumiswa nguJehova, futsi bekalindzele kutsi Jehova agcwalise lesetsembiso. Abrahama wakhombisa njani kutsi bekalindzele “lidolobha” nobe uMbuso lobewakhiwe nguNkulunkulu? Kwekucala, Abrahama akazange abe sakhamuti sanobe ngumuphi umbuso wasemhlabeni. Tinyenti tindzawo lahlala kuto, bekete likhaya futsi akazange asekele nobe nguyiphi inkhosi lengumuntfu. Ngetulu kwaloko, Abrahama akazange etame kutakhela wakhe umbuso. Kunaloko, bekahlale alalela Jehova futsi alindzele kutsi agcwalise tetsembiso takhe. Ngekwenta kanjalo, Abrahama wakhombisa kutsi bekanekukholwa lokucinile kuJehova. w20.08 3 ¶4-5

Jehova usetsembisa kutsi ePharadesi kute lotawutsi: “Ngiyagula.” (Isa. 33:24) Ngako labo labatawuvuswa ekufeni batawuba nemitimba lephilile. Nobe kunjalo, ngeke basheshe babe bete sono. Nabangavuswa bete sono, imindeni yabo nebangani ngeke sebababone. Kubonakala shengatsi kancane kancane sintfu sitawuba bete sono ngesikhatsi Sekubusa KwaKhristu Kweminyaka Leyinkhulungwane. Nasekuphele leminyaka leyinkhulungwane, Jesu utawubuyisela uMbuso kuBabe wakhe. UMbuso utawube socedzile kwenta loko Jehova lakufunako, lokufaka ekhatsi kwenta bantfu kutsi babe bete sono. (1 Khor. 15:25-28; Semb. 20:1-3) Cabanga kutsi kutawuba njani kuphindze sivusele tihlobo tetfu lesititsandzako. Injabulo lotawuba nayo itakwenta ukhale yini nobe uhleke? Utawujabula kakhulu yini uze uhlabele udvumise Jehova? Siyaciniseka kutsi sitamtsandza kakhulu Babe wetfu losinakekelako neNdvodzana yakhe labente lilungiselelo leluvuko. w20.08 16-17 ¶9-10

Umphostoli Pawula wakhutsata emaKhristu kutsi akucabangele kukhonta Jehova angakashadi. (1 Khor. 7:8, 9) Kuyacaca kutsi Pawula akazange awabukele phansi emaKhristu langakashadi. Ecinisweni, wakhetsa Thimothi lobekasemusha, futsi lobekangakashadi, kutsi ente umsebenti lobalulekile emsebentini waJehova. (Fil. 2:19-22) Akukafaneli sibuke kutsi umzalwane ushadile yini nobe akakashadi kuze akhone kwenta imisebenti letsite. (1 Khor. 7:32-35, 38) Jesu nemphostoli Pawula abazange bafundzise kutsi emaKhristu kufanele ashade nobe angashadi. Ngako, yini lesingayisho mayelana nekushada nekungashadi? Sicongosekulindza sa-October 1, 2012 siwuphendvula kahle lombuto. Sitsi: “Ecinisweni, kushada nekungashadi kungachazwa njengetipho letivela kuNkulunkulu. . . . Jehova akakutsatsi njengelihlazo kungashadi nobe njengentfo lengenta umuntfu eve buhlungu.” Ngako kufanele siwahloniphe emaKhristu langakashadi ebandleni. w20.08 28 ¶8-9

Kulamanye emave, bantfu labanyenti bayafuna kufundza ngetindzaba letimnandzi, tinguloko lebebasolo bakulindzele! Kantsi kulamanye emave, bantfu abanandzaba naNkulunkulu nobe liBhayibheli. Bantfu labasendzaweni lohlala kuyo batitsatsa njani tindzaba letimnandzi? Ngisho nobe batitsatsa ngayiphi indlela, Jehova ufuna sichubeke sishumayela aze atsi sekwanele. Jehova sewuvele uncumile kutsi utawuphela nini umsebenti wekushumayela. Ngemuva kwaloko, ‘kuphela kutawuse kuyefika.’ (Mat. 24:14) Jesu watjela bafundzi bakhe kutsi bantfu bebatawuba njani emalangeni ekugcina nekutsi bekutakwentekani. Bekati kutsi letintfo betingahle tente balandzeli bakhe bangasawunaki umsebenti wekushumayela. Watjela bafundzi bakhe kutsi ‘bahlale balindzile.’ (Mat. 24:42) Ngemalanga aNowa, betitinyenti tintfo lebetenta bantfu bangasinaki secwayiso Nowa lebekabatjela sona. Letintfo tingasiphatamisa natsi lamuhla. (Mat. 24:37-39; 2 Phet. 2:5) Kungako sifuna kuhlale sinake umsebenti Jehova lasinike wona. w20.09 8 ¶1-2, 4

Sathane ‘utfukutsele kakhulu’ futsi sitawube siyatiyenga nasitsi sitawukhona kubalekela lolulaka lwakhe. (Semb. 12:12) Ngekushesha nje kukholwa kwetfu sonkhe kutawuvivinywa. Kutawuba “nekuhlupheka lokukhulu lokungazange sekwenteke kusukela kwaba khona umhlaba.” (Mat. 24:21) Ngaleso sikhatsi, emalunga emindeni yetfu kungenteka asiphikise futsi nemsebenti wetfu uvinjelwe. (Mat. 10:35, 36) Sitawulingisa iNkhosi Asa yini ngekutsi natsi setsembele kuJehova kutsi asisite futsi asivikele? (2 Khr. 14:11) Jehova bekasolo asicecesha kuze kukholwa kwetfu kuhlale kucinile. Usebentisa ‘sisebenti lesetsembekile nalesihlakaniphile’ kuze sisinike “kudla ngesikhatsi lesifanele” khona sitoba nako konkhe lesikudzingako kuze sihlale sicinile. (Mat. 24:45) Kodvwa sonkhe kufanele sente konkhe lokusemandleni etfu kuze sihlale sinekukholwa lokucinile kuJehova.​—Heb. 10:38, 39. w20.09 18 ¶16-18

Nangabe kuhambisana nentsandvo yakhe, Jehova angasebentisa umoya wakhe longcwele kuze ente bantfu labasemagunyeni kutsi bente loko lakufunako. Bantfu bangawugubha umsele kuze baphambukise emanti aye lapho bafuna khona. Ngendlela lefanako, Jehova angasebentisa umoya wakhe kuze ente babusi kutsi bente loko lokuhambisana nenjongo yakhe. Nakwenteka loko, bantfu labasemagunyeni babese benta tincumo letitawusita bantfu baNkulunkulu. (Catsanisa na-Ezra 7:21, 25, 26.) Yini lesingayenta? Singawathantazela “emakhosi nabo bonkhe labasetikhundleni letiphakeme” nangabe kudzingeka bente tincumo letitawutsintsa kuphila kwetfu nemsebenti wetfu wekushumayela njengemaKhristu. (1 Thim. 2:1, 2; Neh. 1:11) Njengobe emaKhristu ekucala enta, natsi singabathantazela ngalokusuka enhlitiyweni bazalwane nabodzadzewetfu labasemajele.​—Imis. 12:5; Heb. 13:3. w20.11 15 ¶13-14

Nangabe umuntfu bekafundzelwa nguwe, ujabula kakhulu nawumbona abhajatiswa! (1 Thes. 2:19, 20) Bafundzi labasandza kubhajatiswa ‘batincwadzi tekusincoma,’ hhayi nje talaba lebebafundza nabo kuphela kodvwa talo lonkhe libandla. (2 Khor. 3:1-3) Kuyajabulisa kutsi eminyakeni lemine, bekubikwa bantfu labacishe babe ngu-10 000 000 labafundzelwa liBhayibheli njalo ngenyanga emhlabeni wonkhe. Kuleyo minyaka, bantfu labangetulu kwa-280 000 babhajatiswa futsi baba BoFakazi BaJehova kanye nebafundzi baJesu labasha. Singatisita njani letigidzi tebantfu letifundzelwa liBhayibheli kutsi tibhajatiswe? Jehova usanika bantfu litfuba lekutsi babe boFakazi bakhe, kungako senta konkhe lokusemandleni etfu kuze sibasite batfutfuke futsi babhajatiswe ngekushesha. Sikhatsi siyaphela!​—1 Khor. 7:29a; 1 Phet. 4:7. w20.10 6 ¶1-2

INkhosi Sawula ayizange imlalele Jehova. Ngesikhatsi umphrofethi Samuweli ayibuta ngalokungalaleli kwakhe, Sawula akazange alivume liphutsa lakhe. Kunaloko, watsi lena bekungasiyo inkinga lenkhulu futsi ngulabantfu lebebamphocelele kutsi akwente. (1 Sam. 15:13-24) Sawula bekangacali kwenta intfo lefana nalena. (1 Sam. 13:10-14) Lokubuhlungu kutsi besekatigcabha. Akazange ayishintje indlela lebekacabanga ngayo, ngako Jehova wamsola futsi wamshiya. Kuze sifundze esibonelweni saSawula, senta kahle ngekutibuta nayi imibuto: ‘Nangifundza seluleko eVini laNkulunkulu, ngetama kutfola tizatfu tekungasilaleli yini? Ngicabanga kutsi lengikwentako akusiko kubi kangako yini? Ngisola labanye yini ngaloko lengikwentako?’ Nangabe imphendvulo yetfu kulemibuto ingu-yebo, kufanele silungise indlela lesicabanga ngayo. Nasingenti njalo, singatigcabha kangangekutsi Jehova ayekele kuba ngumngani wetfu. w20.11 20 ¶4-5

Nine labasebasha, khetsani kutsi nitawukhonta bani. Kufanele nititfolele nine kutsi ungubani Jehova, iyini intsandvo yakhe nekutsi utayenta njani ekuphileni kwenu. (Rom. 12:2) Nitawubese niyakhona kwenta sincumo lesibalulekile ekuphileni kwenu, lokusincumo sekukhonta Jehova. (Josh. 24:15) Nangabe nichubeka nilifundza njalo liBhayibheli futsi nilitadisha, indlela lenimtsandza ngayo Jehova itawuchubeka ikhula futsi nekukholwa kwenu kutawucina. Khetsani kwenta intsandvo yaJehova ite kucala ekuphileni kwenu. Live laSathane litsi nangabe usebentisa emakhono akho kuze utizuzise wena, utawujabula. Kodvwa siyati kutsi labo labatimisele ngekunjinga “batigwaza yonkhe indzawo ngebuhlungu lobunyenti.” (1 Thim. 6:9, 10) Kodvwa nangabe nikhetsa kulalela Jehova nekwenta intsandvo yakhe ite kucala ekuphileni kwenu, nitawuphumelela futsi ‘kube kuhle kini.’​—Josh. 1:8. w20.10 30-31 ¶17-18

Ngesikhatsi semaKhristu ekucala, umlayeto Jesu lawushumayela waniketa litsemba kubo bonkhe bantfu. Wayala balandzeli bakhe kutsi bachubeke nalomsebenti lebesekawucalile, lokukufaza kuto “tonkhe tincenye temhlaba.” (Imis. 1:8) Kuliciniso kutsi lomsebenti bebangeke bakhone kuwenta ngemandla abo. Bebatawudzinga umoya longcwele, ‘lokungumsiti’ Jesu labetsembisa wona. (Joh. 14:26; Zak. 4:6) Balandzeli baJesu batfola umoya longcwele ngeliPhentekhoste langa-33 C.E. Bacala kushumayela ngekushesha basitwa ngumoya longcwele, futsi ngesikhashana nje tinkhulungwane tebantfu temukela tindzaba letimnandzi. (Imis. 2:41; 4:4) Ngesikhatsi bacala kuphikiswa, labafundzi abazange besabe kodvwa bacela lusito kuNkulunkulu. Bathantaza batsi: ‘Yenta tinceku takho tichubeke tikhuluma livi lakho ngesibindzi.’ Ngako babese batfola umoya longcwele futsi bachubeka ‘bakhuluma livi laNkulunkulu ngesibindzi.’​—Imis. 4:18-20, 29, 31. w20.10 21 ¶4-5

Yini lengasenta siciniseke kutsi Jehova wamvusa Jesu? Banyenti bantfu labambona Jesu nasavusiwe futsi batjela labanye ngako. (1 Khor. 15:5-7) Umuntfu wekucala umphostoli Pawula lakhuluma ngaye ngumphostoli Phetro (Khefase). Sicumbi sebafundzi sasho kutsi Phetro umbonile Jesu lovusiwe. (Luk. 24:33, 34) Ngetulu kwaloko, ‘baphostoli labangu-12’ bambona Jesu nasavusiwe. Ngemuva kwaloko, Khristu “wabonakala ngesikhatsi sinye kubazalwane labangetulu kwa-500,” lokungenteka emhlanganweni lobewuseGalile, lokukhulunywa ngawo kuMatewu 28:16-20. Jesu waphindze “wabonakala kuJakobe,” lokungenteka bekungumnakaboJesu, lowacale wangakholwa kutsi Jesu unguMesiya. (Joh. 7:5) Ngemuva kwekubona Jesu lovusiwe, Jakobe wabese uyakholwa. Nga-55 C.E. ngesikhatsi Pawula abhala lencwadzi, labanyenti lababona Jesu ngemuva kwekuvuswa kwakhe bebasaphila. Ngako nobe ngubani lobekangabata kutsi Jesu uvusiwe, bekangakhuluma nalabo bantfu. w20.12 3 ¶5, 7-8

Nangabe sekuphele sikhatsi lesidze solo sigula, singase sikutfole kumatima kucabanga ngendlela lefanele. Ngako, yetsembela kuJehova kuze akusite. Ngisho nobe angeke asiphilise ngalokusimangaliso nyalo, uyasidvudvuta futsi angasiniketa nemandla lesiwadzingako kuze sicinisele. (Hla. 94:19) Nasi sibonelo, angenta bazalwane nabodzadze kutsi basisite ngemisebenti yasekhaya. Angenta kutsi bazalwane betfu bathantaze natsi. Angasisita nekutsi sikhumbule tintfo letidvudvutako letitfolakala eVini lakhe, njengelitsemba lekuphila lokute sono, lokute kugula nebuhlungu emhlabeni lomusha lotako. (Rom. 15:4) Nobe kunjalo, kungenteka singasakhoni kushumayela ngelizinga lesifise kushumayela ngalo. Dzadze lokutsiwa nguLaurel kwadzingeka kutsi ahlale alele emshinini lobewumsita kutsi aphefumule iminyaka lengu-37! Bekaphindze anamdlavuza, wahlindvwa tikhatsi letinyenti futsi anenkinga yesikhumba. Kodvwa letimo atizange timente ayekele kushumayela. Washumayela bonesi nalabo lebebamsita ekhaya lakhe,futsi wasita bantfu labangaba ngu-17 kutsi bafundze ngaJehova! w20.12 24 ¶9; 25 ¶12

Umphostoli Pawula bekaludzinga lusito. Cishe nga-56 C.E., sicumbi sebantfu samhudvulela ngephandle eJerusalema futsi setama kumbulala. Ngelilanga lelilandzelako, ngesikhatsi Pawula amikiswa eNkantolo Lenkhulu YemaJuda, titsa takhe betimshaye taphose tambulala. (Imis. 21:30-32; 22:30; 23:6-10) Ngaleso sikhatsi, kungenteka Pawula watibuta kutsi ‘Ngitakubeketelela sikhatsi lesinganani lokuphatfwa kabi?’ Jesu wamsita njani Pawula? Ngemuva kwebusuku Pawula laboshwa ngabo, Jesu “iNkhosi,” wema ngakuye watsi: “Bani nesibindzi! Ngobe njengobe ufakaze ngalokuphelele ngami eJerusalema, kufanele wente lokufanako naseRoma.” (Imis. 23:11) Lesikhutsato safika ngesikhatsi! Jesu wamncoma Pawula ngemsebenti lomuhle wekushumayela lebekawente eJerusalema. Wetsembisa Pawula kutsi bekatawufika eRoma aphephile futsi achubeke ashumayele khona. Ngemuva kwekutfola lesicinisekiso, kungenteka Pawula wativa aphephile njengemntfwana logodlwe ngubabe wakhe. w20.11 12 ¶1, 3; 13 ¶4

Litsemba lesinalo ngeMbuso ‘linjengelihhuka lemkhumbi emiphefumulweni,’ futsi lisenta sikhone kubhekana netimo letimatima nobe imicabango lesikhatsatako. Zindla ngelikusasa Jehova lasetsembisa lona. Ngaleso sikhatsi kute lokutasikhatsata. (Isa. 65:17) Ticabange usemhlabeni lomusha lonekuthula, lapho khona tingeke tenteke tintfo letimbi. (Mik. 4:4) Litsemba lakho litawucina nawutjela labanye ngemhlaba lomusha. Yenta konkhe longakwenta emsebentini wekushumayela newekwenta bafundzi. Nawenta njalo, ungaciniseka ‘ngalokuphelele ngelitsemba letfu kuze kube sekugcineni.’ (Heb. 6:11) Njengobe sesiya ekupheleni kwalelive, sitawuba netinkinga letinyenti letitawusenta sikhatsateke. Sitawukhona kubhekana naletinkinga, singatetsembi tsine kodvwa setsembele kuJehova. Asikhombise ngetento tetfu kutsi siyawetsemba emavi aJehova latsi: “Nitawuba nemandla nangabe ningeke nesabe futsi nitawetsembela kimi.”​—Isa. 30:15. w21.01 7 ¶17-18

Naka kutsi Jakobe 5:11 usitjela nangalobunye buntfu baJehova lobuhle lobusenta sisondzele kuye, lokungumusa wakhe. (Eks. 34:6) Lenye indlela Jehova lasikhombisa ngayo umusa wakhe kutsi uyasicolela emaphutsa lesiwentako. (Hla. 51:1) EBhayibhelini, umusa usho lokungetulu nje kwekumane ucolele umuntfu lowente intfo lembi. Umusa usho indlela umuntfu lativa ngayo nakabona lotsite acindzetelekile bese wetama kumsita. Jehova utsi sifiso lanaso sekusisita singetulu ngisho kwendlela umtali lativa ngayo ngemntfwana wakhe. (Isa. 49:15) Nangabe sicindzetelekile, umusa Jehova lanawo wenta kutsi asisite. (Hla. 37:39; 1 Khor. 10:13) Singaba nemusa kubazalwane nabodzadzewetfu ngekutsi sibacolele futsi singahlali sibatfukutselele nangabe basiphetse kabi. (Ef. 4:32) Indlela leyinhloko lesingakhombisa ngayo umusa kubazalwane nabodzadzewetfu kutsi sibasekele nababhekene nebumatima. Nasenta njalo sitawube silingisa Jehova losibonelo lesingasilingisa.​—Ef. 5:1. w21.01 21 ¶5

Kunentfo lokufanele ingayenti inhloko yemndeni. Akukafaneli icitse sikhatsi sayo lesinyenti isemsebentini wekutiphilisa bese ayisakhoni kusita umndeni wayo kutsi ube nebuhlobo lobuhle naJehova nekuwucinisekisa kutsi iyawutsandza futsi iwuceceshe. Jehova uyasicecesha futsi asiyale ngobe ufuna kusisita. (Heb. 12:7-9) NjengaBabe wakhe, Jesu ubacecesha ngelutsandvo labangephansi kweligunya lakhe. (Joh. 15:14, 15) Uniketa seluleko lesicinile kodvwa ngendlela lenemusa. (Mat. 20:24-28) Uyati kutsi sinesono nekutsi sitawuhlale siwenta emaphutsa. (Mat. 26:41) Inhloko yemndeni lelingisa Jehova naJesu ihlale ikhumbula kutsi umfati wayo nebantfwana banesono. ‘Ayibatfukutseleli’ kakhulu. (Khol. 3:19) Kunaloko, isebentisa simiso lesiKubaseGalathiya 6:1 futsi yetame kubasita “ngemoya lophansi,” ibe ikhumbula kutsi nayo inesono. NjengaJesu, iyati kutsi indlela lekahle yekubafundzisa kutsi ibabekele sibonelo. w21.02 6-7 ¶16-18

Asebentisa inhlawulo, Jehova watsenga kuphila kwabo bonkhe bantfu ebandleni nekwalabo labanekukholwa kuJesu. (Mak. 10:45; Imis. 20:28; 1 Khor. 15:21, 22) Jehova wancuma kahle ngekukhetsa Jesu lowanikela ngekuphila kwakhe kutsi abe yinhloko yelibandla. Kungako Jesu aneligunya lekubeka imitsetfo mayelana nekutsi bantfu, imindeni nalo lonkhe libandla kufanele benteni, futsi unelilungelo lekuciniseka kutsi siyayilalela lemitsetfo. (Gal. 6:2) Kodvwa Jesu akagcini nje ngekusibekela imitsetfo, uyasinakekela futsi usitsandza kakhulu. (Ef. 5:29) Bodzadze bakhombisa kutsi bayamhlonipha Khristu ngekulandzela sicondziso labasinikwa ngemadvodza labekwe kutsi abanakekele. Bazalwane bakhombisa kutsi bayalihlonipha ligunya labanalo ngekutsi bahloniphe bodzadze. Nangabe bonkhe ebandleni babuhlonipha bunhloko, libandla liba nekuthula. Lokubaluleke kakhulu kutsi sisuke sidvumisa Babe wetfu lonelutsandvo, Jehova. w21.02 18-19 ¶14-17

Ngesikhatsi abalekela Sawula, Davide kanye nemadvodza labekanawo bashiya imindeni yabo bayokulwa. Nabasengekho, kwefika sitsa sahlasela labebahlala khona futsi satfumba imindeni yabo. Ngenca yekutsi Davide abelichawe, abengahle acabange kutsi abengakhona kukhulula lemindeni yabo lebeyitfunjiwe. Kunaloko, Davide wacela Jehova kutsi amcondzise. Davide wabuta kuJehova watsi: “Ngiwacoshe yini lamasotja langihlaselako?” Jehova watjela Davide kutsi akawacoshe futsi utawuphumelela. (1 Sam. 30:7-10) Ufundzani kulendzaba? Nine labasha celani seluleko kulabanye ngaphambi kwekutsi nente tincumo. Khulumani nebatali benu. Ningasitfola neseluleko lesihle nanikhuluma nalabadzala belibandla. Jehova uyawetsemba lamadvodza futsi nani uyanetsemba. KuJehova lamadvodza “atipho” telibandla. (Ef. 4:8) Nanilalela teluleko tawo letinhle, nitawukhona kwenta tincumo letikahle futsi niulingise kukholwa kwawo. w21.03 4-5 ¶10-11

Jesu watsi nangabe singakusebentisi loko lesikufundzako, sifana nendvodza leyakha indlu yayo esihlabatsini. Isebenta kamatima, kodvwa imosha emandla ayo. Kungani? Ngobe nakungafika siphepho nobe sikhukhula ingadzilika lendlu. (Mat. 7:24-27) Ngendlela lefanako, nangabe singakusebentisi loko lesikufundzako sitawube sidlala ngemandla etfu. Ngako nangabe sinetinkinga nobe siphatfwa kabi, kukholwa kwetfu kutawuba butsakatsaka. Kodvwa nangabe sidadisha futsi sikusebentisa loko lesikufundzako, sitawenta tincumo letikahle, sibe nekuthula kanye nekukholwa lokucinile. (Isa. 48:17, 18) Kuze sihlale setsembekile kuJehova nasinetinkinga, kufanele sichubeke sithantaza futsi sihlale sidadisha liVi lakhe. Kufanele sihlale sikhumbula kutsi lokubaluleke kakhulu kuniketa Jehova ludvumo. Singaciniseka ngekutsi Jehova akayuze asilahle nekutsi kute lokungamenta angasasitsandzi.​—Heb. 13:5, 6. w21.03 15 ¶6; 18 ¶20