July

Kufanele sibe nebuhlobo lobuhle naJesu kuze imithantazo yetfu iphendvulwe. Loko kusho kutsi kufanele sente lokungetulu nje kunekumane sitsi “egameni laJesu” nasiphetsa imithantazo yetfu. Kufanele sati kutsi Jehova umsebentisa njani Jesu kuze aphendvule imithantazo yetfu. Jesu watjela baphostoli watsi: “Nobe yini leniyicela egameni lami ngitawuyenta.” (Joh. 14:13) Nanobe kunguJehova lolalela aphindze aphendvule imithantazo yetfu, unikete Jesu ligunya lekutsi afeze tinjongo takhe. Ngaphambi kwekutsi Jehova aphendvule imithantazo yetfu, uyanaka kutsi siyasisebentisa yini seluleko Jesu lasiniketa sona. Nasi sibonelo, Jesu watsi: “Nangabe nitsetselela labanye tono tabo, neYihlo losezulwini utanitsetselela; kodvwa nangabe ningabatsetseleli labanye tono tabo, neYihlo losezulwini ngeke anitsetselele tono tenu.” (Mat. 6:14, 15) Kubaluleke kakhulu kutsi siphatse labanye ngemusa silingise Jehova naJesu! w20.04 22 ¶6

Umphostoli Pawula wabona kutsi yini letsandvwa tilaleli takhe, futsi wetama kukhuluma ngaloko lebetikutsandza. Sibonelo saloko kutsi, wakhuluma nesicumbi sebantfu lebesise-Listra lebesinelwati loluncane ngemiBhalo nobe lebesite sanhlobo. Ngako Pawula wakhuluma ngetintfo lebebatawuvumelana ngato. Wakhuluma ngenala nangekujabulela kuphila. Wasebentisa emagama netibonelo lebetitawucondvwa tilaleli takhe. Hlakanipha kuze ukucondze loko bantfu labasensimini yakini labakutsandzako bese ukhuluma ngekuvumelana nako. Ungenta njani kuze ukubone loko umuntfu lakutsandzako nawucoca naye nobe nawungena ekhaya lakhe? Bani ngumuntfu lonakako. Kungenteka umnikati welikhaya ulungisa ingadze, ufundza incwadzi, ulungisa imoto yakhe nobe wenta lokunye nje. Nangabe ungakhona, calisa incociswano yakho ngekukhuluma ngaloko lakwentako. (Joh. 4:7) Indlela umuntfu lagcoke ngayo ingasho lokutsite ngaye, mhlawumbe ingaveta buve bakhe,umsebenti lawentako, nobe licembu letemidlalo lalitsandzako. w20.04 11 ¶11-12

Ngenca yekukhatsateka kakhulu, labanye bazalwane nabodzadzewetfu abakhululeki nangabe banalabanye bantfu. Kungenteka kube matima ngabo kutsi babe semkhatsini webantfu labanyenti, kodvwa bayachubeka baya emihlanganweni yelibandla, emihlanganweni lemincane kanye nasemihlanganweni lemikhulu. Kuba matima kutsi bakhulume nebantfu labangabati, kodvwa bayakhona kukhuluma nalabanye babo nabasemsebentini wekushumayela. Nangabe simo sakho sinjalo, ciniseka kutsi awusiwedvwa. Banyenti bantfu labativa njengawe. Khumbula kutsi Jehova uyajabula ngemsebenti lomentela wona ngekutimisela. Lokutsi usengakaphelelwa ngemandla, kubufakazi bekutsi uyakubusisa futsi uyakunika emandla lowadzingako. (Fil. 4:6, 7) Nangabe ukhonta Jehova ngisho nobe ugula nobe ukhatsatekile, ciniseka kutsi loko kuyamjabulisa. Labanyenti betfu baphila nekugula lokutsite, kodvwa bayachubeka bacinisela. (2 Khor. 4:16) Nangabe sisitwa nguJehova, sitawukhona kugijima size siyoshaya intsambo! w20.04 31 ¶20-21

Kuhlakanipha kwaJehova kubonakala ngalokucacile endleleni ladale ngayo likhaya letfu lelingumhlaba. (Heb. 3:4) Umhlaba wehlukile ngobe unato tonkhe tintfo letidzingekako kuze bantfu baphile. Umhlaba singawufananisa nemkhumbi loselwandle. Kodvwa kunemehluko lobalulekile emkhatsini wemhlaba nemkhumbi lowakhiwe ngumuntfu futsi logcwele bantfu. Nasi sibonelo, bantfu labagibele umkhumbi bangaphila sikhatsi lesinganani kube bekungadzingeka batentele yabo i-oxygen, kudla nemanti futsi kutsiwe abalahli lutfo lolusebentile lolungekhatsi emkhunjini? Labantfu labakulomkhumbi bangasheshe bafe. Ngalokwehlukile, umhlaba uyakhona kugcina tigidzigidzi tebantfu netilwane kuphila. Umhlaba uyakhona kukhicita i-oxygen, kudla nemanti lesiwadzingako, futsi akwenteki kutsi letintfo letibalulekile tiphele. Ngisho nobe tintfo letisetjentisiwe tilahlwa emhlabeni, umhlaba uyachubeka umuhle futsi bantfu netilwane bayakhona kuchubeka baphila kuwo. Kwenteka njani loku? Jehova wadala umhlaba kuze tintfo letilahliwe tikhone kushintja tibe yintfo lekahle lengaphindze isetjentiswe. w20.05 20 ¶3-4

Sathane bekatjela Eva kutsi Jehova ungumcambimanga. Ngaleyo ndlela, Sathane waba nguDeveli nobe umkhohlisi. Eva wayengwa mbamba futsi wamkholwa Sathane. (1 Thim. 2:14) Wetsemba Sathane kakhulu kunaJehova. Loko kwenta kwaba melula nga-Eva kutsi ente sincumo lesibi. Wakhetsa kungamlaleli Jehova. Wadla sitselo Jehova labekatsite angasidli. Ngemuva kwaloko, wanika na-Adamu. (Gen. 3:6) Asewucabange ngaloko Eva lobekufanele akusho kuSathane. Cabanga nje kube watsi: “Angikwati kutsi wena ungubani, ngati Babe wami Jehova, ngiyamtsandza futsi ngiyametsemba. Mine na-Adamu usinikete konkhe lesinako. Ungatisho njani nje letintfo letimbi kanjena ngaye? Suka la!” Jehova bekatawujabula kuva emavi lamnandzi kanjena aphuma kumtfwana wakhe lamtsandzako! (Taga 27:11) Bo-Adamu na-Eva abazange betsembeke kuJehova. Ngenca yekutsi bebangaketsembeki kubabe wabo, bo-Adamu na-Eva behluleka kulilwela libito lakhe ngesikhatsi Sathane alihlambalata. w20.06 4 ¶10-11

Bodzadzewetfu badzinga kubongwa ngako konkhe labakwentela Jehova. Loko kufaka ekhatsi kwakha nekulungisa takhiwo, kusekela emacembu aletinye tilwimi nekuyosita eBethel. Bayasita nakuvele tehlakalo, bahumushe tincwadzi tetfu futsi babe mahlahlandlela netitfunywa telivangeli. Ngetulu kwaloko, bafati basita emadvodza abo kuze ente imisebenti yelibandla neyenhlangano yaJehova. Labazalwane ‘batipho letibantfu’ futsi benta tintfo letinyenti kuze basite labanye. Nobe kunjalo, bekungaba matima kuwenta lomsebenti kube bafati babo ababasiti. (Ef. 4:8) Labadzala belibandla labahlakaniphile bayati kutsi bodzadze ‘basicumbi lesikhulu’ sebafati labafunako kusebenta futsi bavamile kuba nelikhono lekufundzisa ngetindzaba letimnandzi. Ngetulu kwaloko, labadzala bayati kutsi bodzadze labetsembekile futsi lasebakhulile banelikhono lekusita bodzadze labasebasha nabanetinkinga. (Thit. 2:3-5) Ngako-ke kufanele sibatsandze futsi sibabonge bodzadzewetfu! w20.09 23-24 ¶13-14

Jehova akabakhohlwa bantfu labake bamkhonta futsi lababese bayayekela kutihlanganisa nelibandla kwesikhashana. Akawukhohlwa nemsebenti labamentele wona. (Heb. 6:10) Umphrofethi Isaya wabhala ngesibonelo lesikhombisa indlela Jehova labanakekela ngayo bantfu bakhe. Watsi: “Ugona emazinyane akhe ngemikhono yakhe, awasondzete edvutane nenhlitiyo yakhe.” (Isa. 40:11) Jehova longuMelusi Lomkhulu utiva njani nangabe munye wetikhonti takhe ayekela kumkhonta? Jesu wayiveta indlela Jehova lativa ngayo ngesikhatsi abuta bafundzi bakhe atsi: “Nicabangani? Nangabe indvodza letsite inetimvu letilikhulu bese yinye yato iyalahleka, ngeke yini itishiye etintsabeni leti letingemashumi layimfica nemfica, ihambe iyewufuna lena lelahlekile? Ngiyanitjela ngitsi nangabe iyitfola, ijabula kakhulu ngayo kwendlula leti letingemashumi layimfica nemfica lebetingakalahleki.”​—Mat. 18:12, 13. w20.06 19-20 ¶8-9

Kulilungelo kukhonta Jehova nganobe nguyiphi indlela lesingakhona ngayo. (Hla. 27:4; 84:10) Kuyintfo lenhle kutsi umzalwane abe nesifiso sekwenta lokunyenti enhlanganweni yaJehova. Nobe kunjalo, nangabe atfola sabelo kufanele angaticabangi amkhulu kunalo langiko. (Luk. 17:7-10) Umgomo wakhe kufanele kube kusita labanye ngekutfobeka. (2 Khor. 12:15) LiBhayibheli linetibonelo tebantfu lebebaticabanga babakhulu kunaloko lebebangiko. Diyotrefesi bekangakatfobeki, wetama kuba sembili ebandleni. (3 Joh. 9) Uziya wetama kwenta umsebenti Jehova lebekangakasho kutsi awente. (2 Khr. 26:16-21) Absalomu bekafuna kuba yinkhosi, ngako wenta shengatsi uyabatsandza bantfu kuze batomsekela kulelisu lakhe. (2 Sam. 15:2-6) Letindzaba letiseBhayibhelini tikhombisa ngalokucacile kutsi Jehova akajabuli ngebantfu labatifunela bona ludvumo. (Taga 25:27) Ngekuhamba kwesikhatsi, bantfu labatigcabhako futsi labafuna kunakwa ngulabanye batawuba netinkinga.​—Taga 16:18. w20.07 4 ¶7-8

Leminye imindeni yemaKhristu itfutsele kulelinye live ngesizatfu sekutsi ibalekele timo letimatima eveni layo, nobe kuze ifune imisebenti. Ngesizatfu saloko, bantfwana babo kungase kudzingeke bafundziswe lulwimi lwalelo live. Nebatali kungase kudzingeke bafundze lulwimi lwalelo live kuze batfole umsebenti. Yini labangayenta nangabe kunelibandla lelidvutane lelikhuluma lulwimi lwabo? Nguliphi libandla lokufanele baye kulo? Kufanele baye kulelibandla lelikhuluma lulwimi lwalendzawo yini nobe baye kulelibandla lelikhuluma lulwimi lwabo? Inhloko yemndeni kufanele incume kutsi umndeni wayo utawuya kuliphi libandla. Ngesizatfu sekutsi lena yindzaba letsintsa umuntfu ngamunye, kufanele incume kutsi yini letawulungela umndeni wayo. Kufanele sisihloniphe sincumo lesentiwe yinhloko yemndeni. Kunobe yini layincumako, kufanele sisemukele sincumo sakhe, ngekutsi siwemukele futsi siwutsandze lomndeni.​—Rom. 15:7. w20.08 30 ¶17-18

Nangabe sifuna kutsi Jehova asiphe emandla, akukafanele sicabange kutsi emandla, imfundvo, emasiko etfu nobe umcebo ngiko lokutawuveta indlela lesibaluleke ngayo. Letintfo atisenti sibe bantfu lababalulekile kuJehova. Ecinisweni, “abasibanyenti labahlakaniphile ngembono webantfu, abasibanyenti nalabahlonipheke ngekutalwa.” (1 Khor. 1:26) Ngako-ke, nanobe ute letintfo lesesikhulume ngato, usengamkhonta Jehova. Sibuke ngendlela lekahle simo lokuso. Nasi sibonelo, nangabe ubesaba bantfu labakuphikisako, thantaza kuJehova umcele akuphe sibindzi sekukhuluma. (Ef. 6:19, 20) Nangabe ugula, cela Jehova kutsi akuphe emandla ekuhlala umatasa emsebentini wakhe. Nobe nini lapho ubona Jehova akusita, kukholwa kwakho kutawucina futsi utawuba nemandla. w20.07 16 ¶9

Nangabe sifuna uMbuso waNkulunkulu ute kucala ekuphileni kwetfu, kufanele sibe njenga-Abrahama, lobekahlale akulungele kutidzela kuze ajabulise Nkulunkulu. (Mak. 10:28-30; Heb. 11:8-10) Ungalindzeli kutsi imphilo yakho ibe bete tinkinga. Ngisho nalabo labatinikela kuJehova kuze bamkhonte kuphila kwabo konkhe, bayabhekana netinkinga. (Jak. 1:2; 1 Phet. 5:9) Lamuhla sinetizatfu letinyenti tekucabanga ngelikusasa. Tintfo letenteka kulomhlaba tikhombisa kutsi sesiphila ekupheleni kwemalanga ekugcina. Lokunye lokutawusenta sijabule ngephansi kweMbuso waNkulunkulu, kubona tihlobo tetfu tivuswa ekufeni. Ngaleso sikhatsi, Jehova utawunika Abrahama umvuzo wekukholwa kwakhe nekubeketela kwakhe ngekutsi amvuse yena nemndeni wakhe. Utawuba khona yini kuze ubemukele? Ungaba khona nawungalingisa Abrahama, utidzele ngenca yeMbuso waNkulunkulu, uchubeke ukholwa ngisho ubhekana netinkinga futsi ulindzele Jehova ngekubeketela.​—Mik. 7:7. w20.08 5-6 ¶13-14; 7 ¶17

Siyati kutsi Jehova utawuphindze asivuse nangabe titsa tetfu tisibulala. Siyati kutsi kute labangakwenta lokungasiyekelisa kukhonta Jehova. (Rom. 8:35-39) Jehova ukhombisile kutsi uhlakaniphile ngekusinika litsemba leluvuko! Ngesizatfu salelitsemba lesinalo, asesabi nangabe bantfu labacondziswa nguSathane basetsembisa kusibulala nangabe singakwenti loko labakufunako, futsi lelitsemba lisinika sibindzi sekuhlala setsembekile kuJehova. Nangabe titsa taJehova tikwetsembisa kukubulala, uyaciniseka yini kutsi Jehova utakuvusa? Yini lengakwenta kutsi umetsembe? Lenye indlela kutibuta, ‘Tincumo letincane lengitenta onkhe malanga tiyakhombisa yini kutsi ngetsembele kuJehova?’ (Luk. 16:10) ‘Indlela lengiphila ngayo iyakhombisa yini kutsi ngiyatetsemba tetsembiso taJehova tekutsi utatinakekela tidzingo tami nangifuna kucala uMbuso?’ (Mat. 6:31-33) Nangabe imphendvulo yakho kulemibuto ingu-yebo, utakulungela kubhekana nanobe ngubuphi bumatima esikhatsini lesitako.​—Taga 3:5, 6. w20.08 17-18 ¶15-16

Kufanele sikwati kulisebentisa kahle liVi laNkulunkulu. Singafundza letinye taletindlela emihlanganweni yelibandla. Kodvwa nangabe sifuna labanye betsembe kutsi liciniso leliseBhayibhelini lingabasita, kufanele sihlale silitadisha. Kufanele sisebentise liVi laNkulunkulu kuze sicinise kukholwa kwetfu. Loko kusho lokungetulu nje kwekumane sifundze liBhayibheli. Kusho kutsi kufanele sizindle ngaloko lesikufundzako futsi sicwaninge etincwadzini tetfu kuze siyicondze kahle imiBhalo futsi siyisebentise. (1 Thim. 4:13-15) Nasenta njalo, sitawukhona kusebentisa liVi laNkulunkulu nasifundzisa labanye. Loko kusho kutsi angeke sigcine nje ngekubafundzela emavesi. Kunaloko, sitawetama kwenta labo labasilalele kutsi bawacondze futsi babone kutsi bangawasebentisa njani. Ngako nasihlale sitadisha liBhayibheli, sitawutfutfuka endleleni lesifundzisa ngayo labanye.​—2 Thim. 3:16, 17. w20.09 28 ¶12

Singahlale sinake umsebenti wekushumayela nasicabanga ngako konkhe Jehova lakwentako kuze asisite. Nasi sibonelo, usinike tincwadzi letibhaliwe naletitfolakala etintfweni tebucwephesha, lokulalelwako nalokubukelwako kanye neMsakato we-JW. Cabanga nje: Ku-website yetfu kutfolakala kwatiswa ngetilwimi letingetulu kwa-1 000! (Mat. 24:45-47) Lenye indlela lengasisita kutsi sihlale sinake umsebenti wekushumayela, kulandzela sibonelo saJesu. Kute lebekakuvumela kutsi kumphatamise ekwenteni umsebenti wekushumayela. (Joh. 18:37) Akazange alingeke ngesikhatsi Sathane afuna kumnika “yonkhe imibuso yemhlaba kanye nebuhle bayo,” nobe alingeke ngesikhatsi labanye bafuna kumenta inkhosi. (Mat. 4:8, 9; Joh. 6:15) Akazange abe nesifiso sekunjinga nobe esatjiswe kuphikiswa kamatima. (Luk. 9:58; Joh. 8:59) Nangabe kukholwa kwetfu kuvivinywa, kukhumbula seluleko semphostoli Pawula lesikulamavi lakulomBhalo welusuku walamuhla kutasisita sihlale sinake umsebenti wekushumayela. w20.09 9-10 ¶6-7

Sijabula kakhulu ngekuba nabodzadze labanyenti labasebenta kamatima emabandleni! Bayaphendvula emihlanganweni, babeka tinkhulumo futsi benta nemsebenti wekushumayela. Labanye bayasita ekunakekeleni emaHholwa eMbuso futsi bakhombisa kutsi bayabatsandza bazalwane nabodzadze. Kodvwa nabo baba netinkinga. Labanye babo banakekela batali babo lasebakhulile. Labanye babeketelela kuphikiswa ngemalunga emndeni. Labanye labakhulisa bantfwana babodvwa, basebenta kamatima kuze banakekele labantfwababo. Kungani kufanele sikhutsate bodzadze? Kungenca yekutsi labanye bantfu ababahloniphi labasikati. Kodvwa liBhayibheli lisikhutsata kutsi sibasekele. Nasi sibonelo, umphostoli Pawula watjela libandla laseRoma kutsi lemukele Foyibe futsi ‘lumnike nobe nguluphi lusito langahle aludzinge.’ (Rom. 16:1, 2) Pawula bekachumuka esiveni lebesikholelwa kutsi labasikati abakabaluleki. Kodvwa njengobe bekangumKhristu, walingisa sibonelo saJesu, futsi waphatsa bafati ngenhlonipho nangemusa. w20.09 20 ¶1-2

Kuze sisite bafundzi kutsi babe nesifiso sekushumayela tindzaba letimnandzi singase sibute imibuto lenjengalena: “Kusebentisa loko lokufundzako eBhayibhelini kukushintje njani kuphila kwakho? Ucabanga kutsi kufanele yini labanye bawuve lomlayeto loseBhayibhelini? Yini longayenta kuze ubasite?” (Taga 3:27; Mat. 9:37, 38) Kufanele sihlale sikhumbula kutsi Jesu wasiyala kutsi sifundzise labanye ‘kugcina konkhe lasitjele kona.’ Loko kufaka ekhatsi imiyalo lemibili lemikhulu, kutsandza Nkulunkulu nekutsandza makhelwane, futsi yomibili lemiyalo iyahambisana nekushumayela kanye nemsebenti wekwenta bafundzi. (Mat. 22:37-39) Intfo leyinhloko lesenta sishumayele lutsandvo. Kuliciniso kutsi labanye lesibafundzela liBhayibheli kungenteka besabe kushumayela. Kodvwa singabacinisekisa kutsi kancane kancane Jehova utawubasita kutsi bagcine bangasesabi.​—Hla. 18:1-3; Taga 29:25. w20.11 3 ¶6-8

Nawulungiselela kuyofundza nalotsite liBhayibheli, mthantazele lona lomfundzelako futsi uthantazele netidzingo takhe. Cela Jehova akusite umfundzise liBhayibheli ngendlela letawutsintsa inhlitiyo yakhe. Hlale ukhumbula kutsi umgomo wakho kumsita kutsi atfutfuke agcine abhajatisiwe. Lomfundzi kufanele akhulume naJehova. Kanjani? Ngekutsi alalele Jehova futsi akhulume naye. Angamlalela Nkulunkulu ngekutsi afundze liBhayibheli onkhe malanga. (Josh. 1:8; Hla. 1:1-3) Ngekutsi athantaze kuJehova onkhe malanga. Ngako thantaza ngalokusuka enhlitiyweni nanicalisa sifundvo nalapho nisiphetsa futsi ulifake ligama lakhe nawuthantaza. Njengobe alalela imithantazo yakho, utawufundza kuthantaza ngalokusuka enhlitiyweni futsi athantaze kuJehova Nkulunkulu ngeligama laJesu Khristu. (Mat. 6:9; Joh. 15:16) Kufundza liBhayibheli onkhe malanga (kulalela Jehova) nekuthantaza (kukhuluma naJehova) kutamsita lomfundzi kutsi asondzelane naNkulunkulu!​—Jak. 4:8. w20.10 8 ¶8; 9 ¶10-11

Inhlangano yaJehova isebenta kamatima kuze igcine kuhleleka nekuthula emabandleni ebuKhristu njengobe beyenta ngesikhatsi semaKhristu ekucala. (Imis. 16:4, 5) Sibonelo saloko kutsi nawungaya kulelinye libandla, kungaba seveni lakho nobe kulelinye live, futsi ukhandze kuSifundvo seSicongosekulindza, uyati kutsi sitawube sichutjwa kanjani nekutsi kutawube kufundvwa siphi sihloko. Ngekushesha nje, ungavele utive usekhaya! Ngumoya waNkulunkulu kuphela longenta kutsi kube nalobunye. (Zef. 3:9) Yini longayenta? Tibute: ‘Ngiyabutfutfukisa yini bunye nekuthula ebandleni? Ngiyabalalela yini labaholako? Labanye bangetsembela yini kimi, ikakhulukati nangiphatsiswe imisebenti letsite ebandleni? Ngiyasibamba yini sikhatsi, ngilusito yini futsi ngihlale ngikulungele yini kukhonta labanye?’ (Jak. 3:17) Nangabe ubona kutsi kukhona lapho ungatfutfukisa khona, thantazela umoya longcwele. Nawuchubeka uwuvumela kutsi uceceshe buntfu bakho netento takho, bazalwane nabodzadze batakutsandza. w20.10 23 ¶12-13

LiVi laNkulunkulu lingafanana nesibuko kitsi. (Jak. 1:23-25) Linyenti letfu litibuka esibukweni njalo ekuseni ngaphambi kwekutsi lihambe. Ngaleyondlela, siyabuka kutsi kute yini lasingatilungisa khona ngaphambi kwekutsi labanye basibone. Ngendlela lefanako, nasilifundza onkhe malanga liBhayibheli, sitawubona tindlela lesingalungisa ngato kucabanga kwetfu. Labanyenti kuyabasita kufundza umBhalo welusuku njalo ekuseni bangakahambi. Bavumela loko labakufundzako kutsi kushintje indlela labacabanga ngayo. Ngako lilanga nalichubeka, babuka tindlela labangasisebentisa ngaso seluleko labasitfole eVini laNkulunkulu. Ngetulu kwaloko, kufanele sifundze liVi laNkulunkulu onkhe malanga futsi sizindle ngalo. Loku kungabonaka kumelula, kodvwa lena ngulenye yetintfo letibalulekile letingasisita kutsi sichubeke sihamba kulendlela lencane leya ekuphileni. Njenge X-ray, liVi laNkulunkulu lingasenta sibone loko lokungekhatsi. Kodvwa kudzingeka sitfobeke nasifuna kuzuza eselulekweni lesiseBhayibhelini nobe etikhontini taNkulunkulu. w20.11 18 ¶3; 20 ¶8

Ngisho nobe emaKhristu ekucala bekaphatfwa kabi, bekanato tikhatsi tekuthula. LamaKhristu asisebentisa njani leso sikhatsi? Lamadvodza nebafati labetsembekile bachubeka bashumayela tindzaba letimnandzi. Incwadzi yeMisebenti itsi ‘bahamba ngekwesaba Jehova.’ Bachubeka bashumayela tindzaba letimnandzi futsi umphumela waloko waba kutsi ‘bachubeka bandza.’ Kusebaleni kutsi Jehova wababusisa ngekushumayela ngemdlandla ngetikhatsi tekuthula. (Imis. 9:26-31) EmaKhristu ekucala asebentisa onkhe ematfuba kuze ashumayele tindzaba letimnandzi. Nasi sibonelo, ngesikhatsi Pawula abona kutsi bekangashumayela bantfu labanyenti e-Efesu wahlala kulelo dolobha futsi washumayela khona. (1 Khor. 16:8, 9) LamaKhristu asebenta kamatima ashumayela “tindzaba letimnandzi letimayelana nelivi laJehova.” (Imis. 15:30-35) Waba yini umphumela? Emavi emBhalo welusuku walamuhla ayasitjela. w20.09 16 ¶6-8

Ngesikhatsi Adamu ona, watiletsela kufa, yena netitukulwane takhe. Nalamuhla, solo siyayiva imiphumela lebuhlungu yekungalaleli kwakhe. Kodvwa ngenca yekutsi Nkulunkulu wavusa indvodzana yakhe, singaba nelikusasa lelihle. “Nekuvuswa kwalabafile nako kuvela ngemuntfu,” lokunguJesu. Umphostoli Pawula watsi: “Njengobe ku-Adamu bonkhe bayafa, nakuKhristu bonkhe batawutfola kuphila.” (1 Khor. 15:22) Pawula bekasho kutsini nakatsi “ku-Adamu bonkhe bayafa”? Pawula bekakhuluma ngabo bonkhe bantfu labatfola sono ngenca ya-Adamu futsi bayafa ngenca yaso. (Rom. 5:12) Adamu akekho emkhatsini walabo ‘labatawutfola kuphila.’ Inhlawulo yaKhristu ayimhlengi Adamu ngobe bekete sono futsi watikhetsela yena kungamlaleli Nkulunkulu. Loko lokwenteka ku-Adamu, kutawufana naloko lokutakwenteka kulabo “iNdvodzana yemuntfu” letawubehlulela ‘njengetimbuti’ lokungulabo ‘labatawubhujiswa ngalokuphelele.’​—Mat. 25:31-33, 46; Heb. 5:9. w20.12 5 ¶13-14

Nangabe singasitfoli sabelo lesitsite, kufanele sicabange ngesibonelo setingilosi letetsembekile. Jehova wake wacela tingilosi kutsi tivete imibono yato ngekuyenga inkhosi lembi Ahabi. Letinye tingilosi taveta imibono yato. Kodvwa Nkulunkulu wakhetsa ingilosi yinye futsi wayitjela kutsi umbono wayo utawusebenta. (1 Khos. 22:19-22) Tadvumateka yini leletinye tingilosi, taze tacabanga kutsi, ‘Kungani ngicitse sikhatsi sami ngaveta umbono wami?’ Atizange. Tingilosi titfobekile futsi tifuna kutsi lonkhe ludvumo luye kuJehova. (Khu. 13:16-18; Semb. 19:10) Khumbula kutsi lilungelo lelikhulu lesinalo kuba BoFakazi BaJehova nekushumayela ngeMbuso wakhe. Tabelo akusito letisenta sibe ligugu kuNkulunkulu. Kodvwa nangabe sitfobekile, sitawuba ligugu kuJehova nakubazalwane. Ngako cela Jehova kutsi akusite uhlale utfobekile. Cabanga ngato tonkhe tibonelo letinhle tetikhonti taJehova letitfobekile lokukhulunywa ngato eBhayibhelini. Ngekutitsandzela, sita bazalwane bakho nganobe nguyiphi indlela longakhona ngayo.​—1 Phet. 5:5. w20.12 26 ¶16-17

Sigcoko sekutivikela lesiyinsindziso litsemba Jehova lasiniketa lona lekutsi utasisindzisa ekufeni futsi abanikete umvuzo labo labenta intsandvo yakhe. (1 Thes. 5:8; 1 Thim. 4:10; Thit. 1:1, 2) Litsemba letfu lensindziso livikela indlela lesicabanga ngayo. Lisenta sihlale sinake tetsembiso taNkulunkulu futsi singancotjwa tinkinga tetfu. Sigcoka lesigcoko ngekutsi sihlale sicabanga ngendlela Nkulunkulu lacabanga ngayo. Sibonelo saloko kutsi asilibeki litsemba letfu emcebeni, kodvwa silibeka kuNkulunkulu. (Hla. 26:2; 104:34; 1 Thim. 6:17) Inkemba yemoya liVi laNkulunkulu liBhayibheli. Lenkemba inemandla ekuwabeka ebaleni emanga, ngaleyondlela ikhulule bantfu etimfundzisweni temanga nasemikhubeni lemibi. (2 Khor. 10:4, 5; 2 Thim. 3:16, 17; Heb. 4:12) Sifundza kuyisebentisa lenkemba nasitidadishela liBhayibheli nalapho sitfola kuceceshwa enhlanganweni yaNkulunkulu.​—2 Thim. 2:15. w21.03 27 ¶4; 29 ¶10-11

Ngisho nalapho aboshiwe ngenca yekushumayela ngaJesu, umphostoli Johane wakhombisa kutsi bekabatsandza labanye. Sibonelo saloko kutsi wabhala incwadzi yeSembulo layitfumelela emabandla kuze ati kutsi yini ‘lebeyitawenteka masinyane.’ (Semb. 1:1) Kungenteka nekutsi ngemuva kwekukhululwa ePhatmose, Johane wabhala liVangeli lebelikhuluma ngekuphila kwaJesu nemsebenti wakhe. Waphindze wabhala tincwadzi letintsatfu kuze akhutsate futsi acinise bazalwane nabodzadze wakhe. Ungayilingisa indlela yekuphila yaJohane yekutinikela futsi ukhombise kutsi uyabatsandza bantfu ngaloko lokhetsa kukwenta ngekuphila kwakho. Lelive laSathane lifuna kutsi usebentise sonkhe sikhatsi sakho nemandla akho utinaka wena futsi wetama kwakha imali lenyenti nobe kuba ngumuntfu lodvumile. Kodvwa emaKhristu lasemhlabeni wonkhe asebentisa sonkhe sikhatsi sawo kanye nemandla awo kuze ashumayele tindzaba letimnandzi futsi asite bantfu basondzelane naJehova. w21.01 10 ¶9-10

Jonathani bekangaba nemona ngaDavide. Njengobe bekayindvodzana yeNkhosi Sawula, Jonathani bekangatsi nguye lokufanele abe yinkhosi ngemuva kwaSawula. (1 Sam. 20:31) Kodvwa Jonathani bekatfobekile futsi etsembekile kuJehova. Ngako wasisekela sincumo saJehova sekukhetsa Davide kutsi abe yinkhosi lelandzelako. Wetsembeka kuDavide ngisho nobe loko kwamtfukutselisa kakhulu Sawula. (1 Sam. 20:32-34) Jonathani bekamtsandza kakhulu Davide, ngako akazange abe nemona ngaye. Jonathani bekanelikhono lelihle lekusebentisa butjoki futsi bekalichawe lelinesibindzi. Bantfu bebatsi yena nababe wakhe Sawula “bebanematubane kwendlula lusweti” futsi ‘banemandla kwendlula emabhubesi.’ (2 Sam. 1:22, 23) Ngako Jonathani bekangatigcabha ngetintfo lebekatentile. Nobe kunjalo, Jonathani akazange etame kutenta loncono kunaDavide futsi bekete umona ngetintfo letinhle Davide lebekatentile. Kunaloko, Jonathani wancoma Davide ngekuba nesibindzi kwakhe kanye nekwetsembela kwakhe kuJehova. Ecinisweni, ngemuva kwekutsi Davide abulale Goliyathi, Jonathani wacala kumtsandza kakhulu Davide. w21.01 21 ¶6; 22 ¶8-9

Onkhe emaKhristu angephansi kweligunya laJesu Khristu, longumholi lote sono. Kodvwa nangabe dzadze ashada, uba ngephansi kweligunya lendvodza yakhe lenesono. Loko ngeke kube melula ngaso sonkhe sikhatsi. Ngako nakacabanga kushada nemzalwane lotsite, kufanele atibute: ‘Yini lekhombisa kutsi lomzalwane utawuba yinhloko yemndeni lekahle? Kukhonta Jehova kuta kucala yini ekuphileni kwakhe? Nangabe kungeti kucala, yini lengenta ngicabange kutsi lomzalwane utasisita kutsi sibe nebuhlobo lobuhle naJehova nasesishadile?’ Kuliciniso kutsi nadzadze angatibuta: ‘Ngubuphi buntfu lenginabo lobutawuzuzisa umshado wetfu? Ngiyabeketela futsi ngiyephana yini? Nginebuhlobo lobucinile yini naJehova?’ (Shu. 4:9, 12) Nangabe dzadze enta tincumo letikahle ngaphambi kwekutsi ashade, loko kutawenta kutsi umshado wakhe uphumelele futsi ujabulise. Tigidzi tabodzadze labangemaKhristu labahlonipha emadvodza abo basibonelo lesihle. Kufanele babongwe! w21.02 8 ¶1-2

Kuleminyaka, bamemeteli labanyenti batibekele umgomo wekufundza lolunye lulwimi kuze batfutfukise umsebenti wabo wekushumayela, futsi bakhonte kulamanye emabandla lakhuluma lolunye lulwimi lapho kunesidzingo sebamemeteli beMbuso khona. LamaKhristu ente lesincumo kuze akhonte Jehova sikhatsi sonkhe. Ngisho nobe kungatsatsa iminyaka leminyenti kutsi balukhulume kahle lulwimi lolusha, basita libandla ngetindlela letinyenti. Buntfu babo lobuhle netintfo letenteke ekuphileni kwabo, kuyalicinisa libandla. Sibatsandza kakhulu labazalwane nabodzadze labahlale bakulungele kusita! Sigungu salabadzala akukafaneli sincume kutsi umzalwane angeke abe ngulomdzala nobe abe yinceku lesebentako ngesizatfu sekutsi akalukhulumi kahle lulwimi lwendzawo. Labadzala batawusebentisa timiso teliBhayibheli letimayelana nekutsi labadzala nobe tinceku letisebentako kufanele babe bantfu labanjani, hhayi kutsi ulukhuluma kahle yini lulwimi lwendzawo.​—1 Thim. 3:1-10, 12, 13; Thit. 1:5-9. w20.08 30 ¶15-16

Bantfu bangase bacabange kutsi bangajabula kuphela nangabe baphilile emtimbeni, banemali lenyenti futsi banemndeni lojabulako. Kodvwa injabulo Jakobe labhala ngayo isitselo semoya waNkulunkulu futsi isenta sijabule ngisho nobe kwentekani ekuphileni kwetfu. (Gal. 5:22) UmKhristu angajabula mbamba nangabe ati kutsi ujabulisa Jehova futsi ulandzela sibonelo saJesu. (Luk. 6:22, 23; Khol. 1:10, 11) Njengelilangabi lelivutsa esibaneni, nenjabulo ivutsa ngekhatsi enhlitiyweni yemKhristu. Lenjabulo ayipheli ngisho nobe sigula nobe sinemali lencane. Ayipheli ngisho nobe bantfu basiphikisa, lokufaka ekhatsi netihlobo tetfu. Sijabula kakhulu nangabe bantfu betama kusicedzela injabulo. Letinkinga lesibhekana nato ngenca yekukholwa kwetfu tiyasicinisekisa kutsi sibafundzi baKhristu beliciniso. (Mat. 10:22; 24:9; Joh. 15:20) Kungako Jakobe abhala lamavi lakulomBhalo welusuku walamuhla. w21.02 28 ¶6

Nangabe utfola emavesi lakhombisa kutsi kubalulekile kwetsembela kuJehova futsi ungesabi, yetama kuwabamba ngenhloko. Kuze ukhone kuwabamba ngenhloko, ungawafundza uphimisele nobe uwabhale phansi futsi uhle uwafundza. Jehova watjela Joshuwa kutsi afundze incwadzi yeMtsetfo ngaso sonkhe sikhatsi kuze ente tintfo ngekuhlakanipha. Loko lebekatakufundza encwadzini yeMtsetfo bekutamsita kutsi angesabi kodvwa abe nesibindzi sekuhola bantfu baNkulunkulu. (Josh. 1:8, 9) Emavesi lamanyenti laseVini laNkulunkulu angakusita kutsi ungesabi nawubhekene netimo letingakwenta kutsi ukhatsateke nobe wesabe. (Hla. 27:1-3; Taga 3:25, 26) Emihlanganweni, siyazuza etinkhulumeni, etimphendvulweni tebazalwane nabodzadzewetfu futsi siphindze sikhutsateke nasicoca nebazalwane nabodzadzewetfu. (Heb. 10:24, 25) Singaphindze sikhutsateke nasitjela bangani betfu labasedvute ebandleni ngaloko lokusikhatsatako. w21.01 6 ¶15-16

Ngesikhatsi ubhajatiswa, wakhombisa kutsi uyakholwa nekutsi uyametsemba Jehova, futsi wajabula kakhulu kukwemukela emndenini wakhe. Lokufanele ukwente nyalo kutsi uchubeke wetsembela kuye. Kungabonakala kumelula kwetsembela kuJehova nangabe kufanele wente tincumo letibalulekile. Kodvwa kutsiwani ngaletinye tikhatsi? Kubaluleke kakhulu kutsi wetsembele kuJehova nawenta tincumo letifaka ekhatsi letimayelana nekutijabulisa, umsebenti wekutiphilisa, nemigomo lotibekele yona ekuphileni! Ungetsembeli ekuhlakanipheni kwakho, kunaloko buka timiso letiseBhayibhelini letingakusita kutsi wente sincumo futsi usisebentise. (Taga 3:5, 6) Nawenta njalo, utawujabulisa Jehova, futsi nalabanye ebandleni batakuhlonipha. Sonkhe sinesono, futsi ngaletinye tikhatsi nawe utawenta emaphutsa. Nanobe kunjalo, loko kufanele kungakuvimbi kutsi wente konkhe longakwenta emsebentini waJehova. w21.03 6 ¶14-15

Umndeni wakho uyakuphikisa yini ngenca yekutsi ukhonta Jehova? Uhlala eveni lapho uvinjelwe khona yini umsebenti waBoFakazi BaJehova? Nangabe kunjalo, kungakukhutsata kufundza 2 KuThimothi 1:12-16 nesehluko 4:6-11, 17-22. Umphostoli Pawula wabhala lamavesi ngesikhatsi aboshiwe. Ngaphambi kwekutsi ufundze lamavesi, tjela Jehova ngenkinga yakho nendlela lotiva ngayo. Thantaza ngendlela lecondzile. Ngemuva kwaloko, cela Jehova akusite utfole timiso letikulendzaba yaPawula letingakusita wati loko lokufanele ukwente kulenkinga. Jehova bekamecwayisile Pawula kutsi bekutawudzingeka abeketelele kuphatfwa kabi ngenca yekuba ngumKhristu. (Imis. 21:11-13) Jehova wamsita njani Pawula? Wayiphendvula imithantazo yakhe futsi ngekuhamba kwesikhatsi wamnika emandla. Pawula watjelwa kutsi utawemukela lomvuzo lebekasebente kamatima kuze awutfole. Jehova waphindze wasebentisa bangani baPawula lebebetsembekile kuze bamsite. w21.03 17-18 ¶14-15, 19