December

Ngaletinye tikhatsi singase singakucondzi loko lokuseVini laNkulunkulu. Kungenteka Jehova angayiphendvuli imithantazo yetfu ngendlela lebesifise ngayo. Loko kungasenta singabate kakhulu. Kungaciniseki kunganciphisa kukholwa kwetfu futsi kulimate nebuhlobo lobuhle lesinabo naJehova. (Jak. 1:7, 8) Kungaphindze kusente silahlekelwe litsemba lesinalo ngelikusasa. Umphostoli Pawula wafananisa litsemba lesinalo ngelikusasa nelihhuka lemkhumbi. (Heb. 6:19) Lihhuka liyawusimisa umkhumbi nakunesiphepho futsi liwuvikele kutsi ungashayisi ematjeni. Kodvwa lelihhuka lisebenta kahle nangabe liketane lelihlangisa lelihhuka nalomkhumbi licinile. Njengobe kutfomba kuligugisa liketane, nekungaciniseki kuyakunciphisa kukholwa kwetfu. Nakanetinkinga, umuntfu longaciniseki angalahlekelwa kukholwa kutsi Jehova utatigcwalisa tetsembiso takhe. Nasite kukholwa, sibabete nelitsemba. Umuntfu lonjalo angeke ajabule. w21.02 30 ¶14-15

Abrahama besekaneminyaka lengetulu kwalengu-70 ngesikhatsi yena nemndeni wakhe bashiya i-Uri. (Gen. 11:31–12:4) Kwaphela iminyaka lengu-100 ahlala emathendeni futsi ahamba kulo lonkhe live laseKhenani. Abrahama wafa aneminyaka lengu-175. (Gen. 25:7) Kodvwa akazange abone Jehova afeza setsembiso sekunika situkulwane sakhe lelive lebekahlala kulo. Akazange abone lokwakhiwa kwalelidolobha lokunguMbuso waNkulunkulu. Nobe kunjalo, kutsiwa Abrahama wafa “asamdzala kakhulu asenelisekile.” (Gen. 25:8) Ngisho nobe kwadzingeka kutsi Abrahama abeketelele bumatima lobunyenti, kukholwa kwakhe kwahlala kucinile futsi bekajabulile alindzele Jehova. Yini leyamsita wakhona kubeketela? Kungobe Jehova bekamvikela kuko konkhe kuphila kwakhe futsi bekamtsatsa njengemngani wakhe. (Gen. 15:1; Isa. 41:8; Jak. 2:22) Njenga-Abrahama natsi silindzele lidolobha lelinetisekelo leticinile, kodvwa asikalindzeli kutsi lakhiwe. (Heb. 11:10) UMbuso waNkulunkulu wamiswa nga-1914 futsi sewucalile kubusa ezulwini. (Semb. 12:7-10) Silindzele kutsi ucale kubusa nasemhlabeni wonkhe. w20.08 4-5 ¶11-12

Kuze sibalalelisise labanye kufanele sitfobeke futsi sibeketele. Loko kubalulekile ngenca yetizatfu letintsatfu. Sekucala, ngeke sisheshe sibe nemibono lekabi ngalabanye bantfu. Sesibili, singakhona kuyicondza indlela umzalwane wetfu lativa ngayo, nekutsi kungani enta tintfo letitsite, futsi loko kutasisita kutsi simvele. Sizatfu sesitsatfu, nasivumela umzalwane wetfu kutsi akhulume, kungenteka afundze lokutsite ngaye. Ngaletinye tikhatsi kuyenteka kutsi natsi singayicondzi indlela lesitiva ngayo kuze kube ngulapho sikhuluma khona. Kuba matima ngalabanye bazalwane nabodzadzewetfu kukhuluma ngendlela labativa ngayo ngenca yendlela labakhule ngayo, emasiko abo nobe buntfu babo. Kungenteka kutsatse sikhatsi ngebazalwane nabodzadzewetfu kutsi bative bakhululekile kukhuluma natsi, futsi nasebakhona kukhuluma natsi ngekukhululeka sitawukhona kuyicondza indlela labativa ngayo. Nangabe silingisa Jehova ngekutsi sibeketele, batawusetsemba. Ngako nasebakulungele kusho indlela labativa ngayo, kufanele sibalalelisise. w20.04 15-16 ¶6-7

Tinhlanti tivame kuhlala emantini letiwatsandzako nalapho kugcwele khona kudla. Kunendzaba yini kutsi umdwebi uye kuyodweba ngasiphi sikhatsi? Lesinye sitfunywa selivangeli lesihlala esihlengeni sasePacific, safundza kutsi kunesikhatsi lesikahle sekubamba tinhlanti. Fakazi wendzawo wasimema kutsi baye kuyodweba. Lesitfunywa selivangeli satsi: “Sitawuhlangana ekuseni nga-9.” Lomzalwane watsi: “Akwentiwa kanjalo. Siya ngesikhatsi lesikahle lesingabamba ngaso tinhlanti, hhayi ngesikhatsi lesilungela tsine.” Ngendlela lefanako, bafundzi baJesu lebebabadwebi bebantfu, bebaya lapho kutfolakala khona bantfu nangesikhatsi labatfolakala ngaso. Nasi sibonelo, balandzeli baJesu bebashumayela emasinagogeni, emtini ngemuti kanye nasetimakethe. (Imis. 5:42; 17:17; 18:4) Natsi kufanele sati kutsi singabatfola nini bantfu emakhaya. Kufanele sikulungele kuya etindzaweni labatfolakala kuto nangesikhatsi labatfolakala ngaso.​—1 Khor. 9:19-23. w20.09 4 ¶8-9

Lenye indlela lesingakha ngayo bungani naJesu kutsi sisekele emalungiselelo lentiwa yinhlangano yaJehova. Siba bangani labakhulu naJesu loyinhloko yelibandla nangabe sibambisana nalabo lababeke kutsi basinakekele. (Ef. 4:16) Sibonelo saloko kutsi nyalo siyaciniseka kutsi siwasebentisa kahle emaHholwa etfu eMbuso. Kungako lamanye emabandla ahlanganiswe nalamanye. Ngalendlela, inhlangano ikhonile konga iminikelo yebazalwane. Nobe kunjalo, labanye bamemeteli kudzingeke kutsi bavumelanise timo tabo nalolushintjo. Kungenteka labamemeteli labetsembekile besebakhonte iminyaka leminyenti ebandleni lelitsite futsi besebabangani nebazalwane nabodzadze. Kodvwa manje sebacelwa kutsi batfutsele kulelinye libandla. Jesu ujabula kakhulu nakabona labafundzi labetsembekile bavumelana nalolushintjo! w20.04 24 ¶14

Inkhosi yasenyakatfo nenkhosi yaseningizimu atawuchubeka ahlaselana ngobe omabili afuna kuba yimibuso lenemandla emhlabeni. Nasi sibonelo, ngemuva kweMphi Yelive Yesibili, i-Soviet Union yacala kubusa tindzawo letinyenti e-Europe. Ngako inkhosi yaseningizimu yakha bungani nalamanye emave kuze kuhlanganiswe libutfo lemphi lebelitakulwa nenkhosi yasenyakatfo. Lenhlangano ibitwa ngekutsi yi-NATO. Inkhosi yasenyakatfo nenkhosi yaseningizimu ayachubeka asebentisa imali lenyenti kuze naleyo ibe nelibutfo lemphi lelinemandla emhlabeni. Ayahlaselana ngekutsi asekele emave latitsa talenye yalamakhosi lamabili etimphini letise-Africa, e-Asia nase-Latin America. Eminyakeni leyendlulile, i-Russia kanye nemave layisekelako ibe nemandla emhlabeni. Iyachubeka ihlaselana nenkhosi yaseningizimu isebentisa ema-computer (cyber warfare). Inkhosi yasenyakatfo nenkhosi yaseningizimu ayachubeka ahlaselana asebentisa tinhlelo letiyingoti letikuma-computer kuze aphatamise temnotfo kanye nendlela yekubusa. Njengobe Danyela abiketela, inkhosi yasenyakatfo iyachubeka ihlasela bantfu baNkulunkulu.​—Dan. 11:41. w20.05 13 ¶5-6

“Umfati angalukhohlwa yini luswane lolusebeleni lakhe?” Lona ngumbuto Jehova lawubuta ngemalanga emphrofethi Isaya. Nkulunkulu watjela bantfu bakhe watsi: “Nome angakhohlwa, kodvwa mine ngingeke ngikukhohlwe wena.” (Isa. 49:15) Nkulunkulu akakavami kuticatsanisa nemfati, kodvwa wakwenta loko. Jehova wasebentisa lutsandvo make lanalo ngemntfwana wakhe kuze avete indlela latitsandza ngayo tikhonti takhe. Bomake labanyenti bativa ngendlela lefanako nadzadze lokutsiwa nguJasmin lowatsi, “Nangabe umunyisa umntfwana wakho, usuke wakha buhlobo lobusedvute kakhulu naye lobutawuhlala sikhatsi lesidze.” Jehova uyabona nangabe munye webantfwana bakhe ayekela kutihlanganisa nelibandla lebuKhristu futsi ayekela nekwenta umsebenti wekushumayela. Labanyenti bazalwane nabodzadze wetfu lasebapholile bayabuya ebandleni futsi siyajabula nababuya. Jehova ufuna kutsi babuye, natsi sifuna kutsi babuye.​—1 Phet. 2:25. w20.06 18 ¶1-3

Akusito tonkhe tintfo lesingatibona. Ecinisweni, tintfo letingabonakali ngito letiligugu kakhulu. ENshumayelweni yakhe yaseNtsabeni, Jesu watsi umcebo losezulwini ngiwo lobaluleke kakhulu kwendlula imali. Waphindze watsi: “Lapho kunemcebo wakho khona, kulapho nenhlitiyo yakho itawuba khona.” (Mat. 6:19-21) Nangabe sitsatsa intfo njengalebaluleke kakhulu, loko kutawusenta kutsi setame kuyitfola. Sitibekela “umcebo ezulwini” ngekutsi sibe nebuhlobo lobuhle naNkulunkulu. Jesu watsi umcebo lonjalo ngeke webiwe nobe wonakale. Umphostoli Pawula usikhutsata kutsi ‘sihlale sibuke tintfo letingabonwa.’ (2 Khor. 4:17, 18) Letintfo letingabonwa tingumcebo lofaka ekhatsi tibusiso lesitatijabulela emhlabeni lomusha lesiwetsenjisiwe. Siyakhombisa yini kutsi siyabonga ngaletintfo lesingatiboni? w20.05 26 ¶1-2

Loko Mosi lakufundzisa ema-Israyeli kwakucinisa kukholwa kwawo futsi kwawakhutsata njengalapho litulu lelina kahle likhulisa tihlahla. Yini lesingayenta kuze siciniseke kutsi kufundzisa kwetfu kufana nalelitulu lelina kahle? Nasishumayela, singalisebentisa liBhayibheli kuze sikhombise bantfu libito laNkulunkulu lelitsi Jehova. Singabaniketa tincwadzi tetfu, sibakhombise ema-video futsi sibakhombise tintfo letitfolakala ku-website yetfu letidvumisa Jehova. Nasisemsebentini, esikolweni nobe sigibele tintfo tekutfutsa sive, singawatfola ematfuba ekukhuluma nebantfu ngaNkulunkulu wetfu lesimtsandzako nekutsi ungumuntfu lonjani. Singabatjela ngetintfo letinhle Jehova latawusentela tona lapha emhlabeni, futsi nabativa letintfo bangabona kutsi Jehova usitsandza kanganani. Nasitjela labanye liciniso ngaBabe wetfu lositsandzako sisuke singcwelisa libito lakhe. Sisuke sisita bantfu bacondze kutsi bebasolo bafundziswa emanga ngaNkulunkulu. Sifundzisa bantfu imfundvo lebaluleke kakhulu futsi lebakhutsata mbamba.​—Isa. 65:13, 14. w20.06 10 ¶8-9

Ngubuphi buntfu lokufanele sibe nabo nasifuna kusita labo labafuna kubuyela kuJehova? Naka tifundvo lesingatitfola emfanekisweni waJesu wendvodzana leyahamba ekhaya. (Luk. 15:17-24) Lendvodzana yabese iyabona kutsi beyente sincumo lesikabi, yase ibuyela ekhaya. Lobabe wagijima waya kulendvodzana yakhe wafike wayigaca ayicinisekisa kutsi uyayitsandza. Lendvodzana yativa inelicala ngaloku lebeyikwentile futsi beyicabanga kutsi ayisakufanelekeli kuphatfwa njengendvodzana. Lobabe wayivela lendvodzana yakhe njengobe beyiveta indlela lebeyitiva ngayo. Lobabe wenta lokutsite kuze acinisekise indvodzana yakhe kutsi uyayemukela ekhaya njengelilunga lemndeni lelitsandvwako. Kuze acinisekise kutsi uyayitsandza indvodzana yakhe futsi uyayemukela, lobabe wenta lidzili futsi wayilungisela netimphahla letinhle tekugcoka. Kulomfanekiso, singasho kutsi Jehova ungubabe. Uyabatsandza bazalwane nabodzadze lesebapholile futsi labafuna kubuyela kuye. Nasilingisa Jehova singakhona kubasita babuye. Kuze sikhone kwenta kanjalo, kufanele sibeketele, sibe neluvelo, umusa nelutsandvo. w20.06 25-26 ¶8-9

Jesu watsi labanye bebatawemukela liciniso “ngenjabulo,” kodvwa kukholwa kwabo bekutawuba butsakatsaka nabahlangabetana netinkinga. (Mat. 13:3-6, 20, 21) Kungenteka labanye bebangacondzi kutsi kulandzela Jesu bekutawubaletsela tinkinga kanye nebumatima. (Mat. 16:24) Kungenteka bebacabanga nekutsi kuba ngumKhristu kusho kuphila imphilo lete tinkinga nobe lenetibusiso kuphela. Nobe kunjalo, titawuba khona tinkinga kulelive lesiphila kulo lamuhla. Timo tingahle tishintje, tisibangele kutsi singasajabuli sikhatsi lesitsite. (Hla. 6:6; Shu. 9:11) Kungani sitsi bazalwane betfu nabodzadzewetfu labanyenti bayaciniseka kutsi liciniso bayalati? Kungobe nangabe umzalwane nobe dzadze abavise buhlungu nobe ente sono lesitsite, abangabati kutsi liciniso bayalati. (Hla. 119:165) Ngaso sonkhe sikhatsi nabanetinkinga, kukholwa kwabo kuyacina. (Jak. 1:2-4) Natsi kufanele sibe nekukholwa lokucinile lokunjalo. w20.07 8 ¶1; 9 ¶4-5

Ngaphambi kwekutsi ucale kufundza liBhayibheli, cela Jehova akusite ubone indlela longazuza ngayo kuloku lokufundzako. Nasi sibonelo, nangabe ufuna seluleko sekutsi ungabhekana njani nenkinga letsite, cela Jehova akusite utfole timiso letiseVini lakhe letingakucondzisa. (Fil. 4:6, 7) Jehova usinikete likhono lelimangalisako lekucabanga ngetintfo. Kuze indzaba leseBhayibhelini ibe yindzaba mbamba kuwe, tibone ngeliso lengcondvo tintfo letentekako futsi uticabange ungulomuntfu lofundza ngaye. Yetama kubona tintfo latibonako futsi wetame kutiva ngendlela naye bekativa ngayo. Ngemuva kwaloko, zindla. Kuzindla kusho kucabangisisa ngaloko lokufundzako nekutsi kukutsintsa njani. Kusisita kutsi sihlanganise imicondvo futsi sikucondze kancono loko lesikufundzako. Kufundza liBhayibheli kepha ungazindli kufana nekupheka kudla kodvwa ungatifaki tonkhe tintfo letingenta lokudla kube mnandzi. Kuzindla kusisita kutsi silitfole kahle liphuzu. w21.03 15 ¶3-5

Umphostoli Pawula abengacabanga ngesikhatsi lesendlulile, kutsi kube bekangasuye umKhristu loshisekako ngabe akakaboshwa. Bekangawatfukutselela lamadvodza asesifundzeni sase-Asiya lamlahla, futsi bekungenteka angasabetsembi nalalabanye bangani bakhe. Kodvwa Pawula akazange ente njalo. Nanobe bekati kutsi utawufa ngekushesha, kodvwa akazange akhohlwe kutsi kubaluleke kakhulu kuniketa Jehova ludvumo. Wachubeka acabanga ngekutsi abetawubakhutsata njani labanye. Wetsembela kuJehova ngekutsi ahlale athantaza. Kunekutsi ahlale anake labo labamshiya, wakhombisa kubonga kubangani bakhe labamsekela ngelutsandvo futsi bamsita. Ngetulu kwaloko, wachubeka adadisha liVi laNkulunkulu. (2 Thim. 3:16, 17; 4:13) Lokubaluleke kakhulu kutsi bekaciniseka mbamba kutsi Jehova naJesu bayamtsandza. w21.03 18 ¶17-18

Ngelikhulu lesibili C.E., bantfu labanyenti lebebatenta emaKhristu bangena ebandleni lebuKhristu. Bafundzisa emanga futsi bafihla nemaciniso laseBhayibhelini. Kusukela ngaleso sikhatsi kwaze kwaba likhulu lesi-19, Nkulunkulu bekete inhlangano lapha emhlabeni. EmaKhristu mbumbulu aba manyenti njengelukhula ensimini futsi ngenca yaloko kwaba matima kubona emaKhristu eliciniso. (Mat. 13:36-43) Kungani kubalulekile kukwati loko? Kungobe kukhombisa kutsi loko lesikufundza kuDanyela sehluko 11 mayelana nenkhosi yasenyakatfo nenkhosi yaseningizimu bekangeke abuse nobe abe nguhulumende ngelikhulu lesibili kuze kuyofika encenyeni yesibili yelikhulu lesi-19. Bekute licembu lelihlelekile lebantfu baNkulunkulu lebebangalihlasela. Nobe kunjalo, bekulindzelekile kutsi inkhosi yasenyakatfo nenkhosi yaseningizimu iphindze ivele ekupheleni kwelikhulu lesi-19. w20.05 3 ¶5

Joweli wabiketela kutsi libulo lesikhonyane belitawubhubhisa live laka-Israyeli, lidle konkhe lokumila emhlabeni! (Jow. 1:4) Sekuphele iminyaka leminyenti lesiphrofetho sisicondza ngekutsi simelela bantfu baJehova labachubeka bashumayela ngekutimisela njengalelibulo lesikhonyane lesinemandla. Siyacondza kutsi loku lokwentiwa ngulesikhonyane kunemiphumela lemibi ‘eveni’ nobe kubantfu labacondziswa baholi benkholo. Nobe kunjalo, nasicabangisisa ngasosonkhe lesiphrofetho, kubese kuyabonakala kutsi kufanele sisicondze ngalenye indlela. Naka setsembiso Jehova lasenta ngalokucondzene nalelibutfo lesikhonyane, watsi: “Imphi yesitsa sangasenyakatfo [sikhonyane] ngitayicosha isuke kini.” (Jow. 2:20) Kube lesikhonyane simelela BoFakazi BaJehova labalalela umyalo waJesu wekushumayela nekwenta bafundzi, kungani Jehova etsembisa kusicosha? (Hez. 33:7-9; Mat. 28:19, 20) Kuyacaca kutsi Jehova akacoshi tikhonti takhe letetsembekile, kodwa ucosha umuntfu lotsite lonelunya kubantfu bakhe. w20.04 3 ¶3-5

Yini lesingayenta nasiva shengatsi Jehova akayiphendvuli ngekushesha imithantazo yetfu? Jakobe utsi kufanele ‘sichubeke sikucela’ kuNkulunkulu. Jehova akacansuki nasichubeka sicela kuhlakanipha kuye. Angeke asitfukutselele. Nasithantaza, Babe wetfu losezulwini ‘usipha ngesandla lesivulekile’ kuhlakanipha kuze sibeketelele tinkinga tetfu. (Hla. 25:12, 13) Uyatibona tinkinga lesinato, futsi uva buhlungu nasihlupheka, uyafuna nekusisita. Loko kusenta sijabule! Kodvwa Jehova usipha njani kuhlakanipha? Usebentisa liVi lakhe. (Taga 2:6) Kuze sitfole kuhlakanipha, kufanele sidadishe liVi laNkulunkulu netincwadzi tetfu. Kodvwa kufanele sente lokungetulu kwekumane nje sidadishe. Kufanele sikwente loko Nkulunkulu lasitjela kona. Jakobe wabhala watsi: “Banini benti belivi ningabi nje ngulabalivako kuphela.” (Jak. 1:22) Nasisebentisa seluleko saNkulunkulu, siba nekuthula, sicabangele futsi sibe nemusa. (Jak. 3:17) Lobuntfu busenta sibeketelele nobe ngabe ngutiphi tinkinga futsi singalahlekelwa yinjabulo yetfu. w21.02 29 ¶10-11

Manyenti ematfuba ekutsi umuntfu lofundziswa liBhayibheli achubeke atfutfuka aze abhajatiswe nangabe asitwa nangulabanye ebandleni. Bonkhe bamemeteli bangabasita labasandza kucala kuta emihlanganweni kutsi babe yincenye yelibandla. Lelinye lihlahlandlela litsi: “Kunesaga lesitsi: Wonkhe muntfu emmangweni angasita ekukhuliseni umntfwana. Ngicabanga kutsi kungulokufanako nangekwenta bafundzi; kudzingeka libandla libambisane kuze lisite umuntfu emukele liciniso.” Emalunga emndeni, bangani kanye nabothishela badlala indzima lenkhulu kuze basite umntfwana akhule. Loku bakwenta ngekutsi bamkhutsate baphindze bamfundzise tifundvo letibalulekile. Ngendlela lefanako, bamemeteli bangameluleka umuntfu lofundziswa liBhayibheli, bamkhutsate futsi bambekele sibonelo lesihle, loko kungamsita atfutfuke aze abhajatiswe. (Taga 15:22) Kungani ummemeteli lochuba sifundvo seliBhayibheli kufanele ajabule nangabe labanye bamemeteli basita umfundzi? Kungobe banyenti labangafaka sandla kuze umfundzi atfutfuke. w21.03 8 ¶1-3

Onkhe emaKhristu, lasemasha nalasakhulile, kufanele acaphele kuze angenti shengatsi akhonta Jehova kantsi enta tintfo letimbi. Umphostoli Johane waveta kutsi angeke sihambe ecinisweni futsi ngesikhatsi lesifanako sibe sitiphatsa kabi. (1 Joh. 1:6) Nangabe sifuna kwemukelwa nguNkulunkulu nyalo nasesikhatsini lesitako, kufanele sikhumbule kutsi Jehova ukubona konkhe lesikwentako. Ngisho nobe bantfu bangakuboni lesikwenta emasitseleni, Jehova ubona konkhe. (Heb. 4:13) Kufanele singawemukeli umbono walelive mayelana nesono. Ngesikhatsi kusaphila Johane, bafundzisi bemanga bebatsi umuntfu bekangatenta tintfo letimbi kodvwa achubeke angumngani waNkulunkulu. Lamuhla siphila nebantfu labanembono lofanako. Labanyenti batsi bayakholelwa kuNkulunkulu, kodvwa abavumelani naloko Jehova lakushoko ngekuya ecasini. Loko Jehova latsi kusono, bona batsi kuyindlela lekahle yekuphila futsi kusuke kuyintfo umuntfu latikhetsele yona. w20.07 22 ¶7-8

Uyabavikela yini bodzadze nakunesidzingo? Cabanga nganasi sibonelo. Labanye bamemeteli bayanaka kutsi lomunye dzadze lonendvodza lengasuye Fakazi uyephuta kufika emihlanganweni futsi ahambe ngekushesha nje nayiphela. Bayanaka nekutsi akavami kuta nebantfwabakhe. Ngako bayamsola ngobe bacabanga kutsi kufanele ente konkhe lokusemandleni akhe kuze ente indvodza yakhe imvumele ete nabantfwabakhe emihlanganweni. Kodvwa abati kutsi lodzadze wenta konkhe langakhona kukwenta. Minyenti kakhulu imisebenti lanayo, futsi akusuye lotsatsa sincumo ngebantfwabakhe. Nangabe umncoma lodzadze ngemsebenti lawentako futsi utjela labanye ngemsebenti wakhe lomuhle lawentako, loko kungenta kutsi labanye bayekele kumsola. Labadzala bayati kutsi Jehova ufuna baphatfwe kahle bodzadze. (Jak. 1:27) Labadzala balingisa Jesu futsi bayacabangela, loko bakwenta ngekutsi bangabeki imitsetfo nangabe kudzingeka kutsi babe nemusa futsi babe nekucondza kuleso simo. (Mat. 15:22-28) Nangabe labadzala benta imetamo kuze babasite, bodzadze bativa batsandvwa nguJehova nayinhlangano yakhe. w20.09 24-25 ¶17-19

Umphrofethi Danyela bekatfobekile futsi bekahlale acela sicondziso saJehova. Nasi sibonelo, ngesikhatsi asetjentiswa nguJehova kuze achaze liphupho laNebukhadnezari, Danyela akazange atidvumise ngekutsi ukhonile kulichaza. Kunaloko, lonkhe ludvumo walinika Jehova. (Dan. 2:26-28) Ngusiphi sifundvo lesisitfolako? Nangabe bazalwane bakujabulela kulalela tinkhulumo tetfu nobe nangabe siphumelela emsebentini wekushumayela, sifuna kukhumbula kutsi lonkhe ludvumo silunike Jehova. Ngekutfobeka, kufanele sivume kutsi ngeke sesikhone kwenta letintfo ngaphandle kwelusito lwaJehova. (Fil. 4:13) Nasenta njalo, sisuke silingisa sibonelo saJesu lesihle. Jesu wetsembela kuJehova. (Joh. 5:19, 30) Akazange afune kulingana naBabe wakhe losezulwini. Filiphi 2:6 usitjela kutsi Jesu akazange acabange “kuchwaga, lokukutsi alingane naNkulunkulu.” NjengeNdvodzana yaNkulunkulu lelalelako, Jesu bekakwati loko lobekufanele akwente futsi bekalihlonipha lilungelo laBabe wakhe. w20.08 11 ¶12-13

Labanye labagijima kulomgwaco loya ekuphileni balwisana netinkinga letingatiwa ngulabanye bantfu. Nangabe unebutsakatsaka lobutsite futsi uva shengatsi bantfu abasicondzi simo lokuso, lokwenteka kuMefiboshethi kungakukhutsata. (2 Sam. 4:4) Mefiboshethi bekakhubatekile, futsi iNkhosi Davide yetsemba indzaba lengemanga ngaye. Nobe kunjalo, akazange atfukutsele, bekajabula ngetintfo letinhle lebetenteka kuye. Bekajabula ngendlela Davide lebekamphatse kahle ngayo esikhatsini lesendlulile. (2 Sam. 9:6-10) Ngesikhatsi Davide etsemba indzaba lengemanga ngaye, wetama kucabangisisa ngalesimo. Akazange avumele liphutsa laDavide kutsi limtfukutselise futsi akazange amsole Jehova ngalobekwentiwe nguDavide. Mefiboshethi wanaka loko lebekangakhona kukwenta kuze asekele iNkhosi lebeyibekwe nguJehova. (2 Sam. 16:1-4; 19:24-30) Jehova wenta kutsi sibonelo lesihle saMefiboshethi sibhalwe eVini laKhe kuze sizuze.​—Rom. 15:4. w20.04 26 ¶3; 30 ¶18-19

Labanye ebandleni babekwa kutsi babe titfunywa telivangeli, emahlahlandlela lakhetsekile nobe emahlahlandlela lavamile. Bakhetse kwenta umsebenti wekushumayela sikhatsi sonkhe. Ngisho nobe letikhonti taJehova tasikhatsi sonkhe tite imali lenyenti nobe umcebo, Jehova utinike tintfo letinyenti letinhle. (Mak. 10:29, 30) Sibatsandza kakhulu labazalwane betfu nabozadzewetfu, futsi siyajabula kutsi bayincenye yelibandla! Bazalwane lababekiwe nalabo labasemsebentini wasikhatsi sonkhe, ngibo kuphela yini labanemsebenti ebandleni? Cha! Bonkhe bamemeteli betindzaba letimnandzi babalulekile kuNkulunkulu nasebandleni. (Rom. 10:15; 1 Khor. 3:6-8) Ecinisweni, umgomo loyinhloko welibandla kwenta bafundzi baJesu Khristu. (Mat. 28:19, 20; 1 Thim. 2:4) Bonkhe labashumayela tindzaba letimnandzi, kungaba bamemeteli lababhajatisiwe nobe labangakabhajatiswa, bayetama kwenta lomsebenti ute kucala ekuphileni kwabo.​—Mat. 24:14. w20.08 21 ¶7-8

Jesu utasisita nasinetinkinga njengobe lamavi lakulombhalo welusuku asho. Ecinisweni, lamavi aJesu ayasicinisa. Leni? Ngobe ngaletinye tikhatsi kuba matima. Sibonelo saloko kutsi nasishonelwa ngumuntfu lesimtsandzako, kufanele sibhekane nalobo buhlungu iminyaka leminyenti. Labanye babhekana netinkinga tekukhula ngeminyaka. Labanye bahle bativa bacindzetelekile. Nobe kunjalo, siyakhona kubeketela ngobe siyati kutsi Jesu unatsi “onkhe emalanga,” ngisho nangetikhatsi letimatima. (Mat. 11:28-30) LiVi laNkulunkulu lisicinisekisa ngekutsi Jehova usebentisa tingilosi takhe kuze asisite. (Heb. 1:7, 14) Nasi sibonelo, tingilosi tiyasisekela futsi tiyasicondzisa njengobe sishumayela “tindzaba letimnandzi teMbuso” kubantfu ‘bato tonkhe tive, tinhlanga netilwimi.’​—Mat. 24:13, 14; Semb. 14:6. w20.11 13-14 ¶6-7

Sifuna umfundzi ati kutsi loku lakufundzako kuseBhayibhelini. (1 Thes. 2:13) Singakwenta njani loko? Khutsata lomfundzi kutsi acoce ngetintfo latifundzako. Esikhundleni sekutsi kube nguwe lohlale umchazela emavesi, mcele akuchazele lamanye. Msite abone kutsi liVi laNkulunkulu likhuluma naye ngalokucondzile. Mbute imibuto letawuveta loko lakucabangako nendlela lativa ngayo ngemibhalo layifundzako. (Luk. 10:25-28) Nasi sibonelo, ungambuta: “Lombhalo ukusita njani kutsi ubone buntfu baJehova?” “Tingakusita njani letintfo losandza kutifundza eBhayibhelini?” “Utiva njani ngaloku losandza kukufundza?” Lokubaluleke kakhulu akusiko nje kutsi lomfundzi wati kanganani, kodvwa kutsi loku lakwatiko uyakutsandza yini nekutsi uyakusebentisa yini. Sebentisa liBhayibheli nawufundzisa. Kufanele utfobeke nawufuna kutfutfukisa likhono lakho lekufundzisa. w20.10 15 ¶5-6

Siyaciniseka kutsi umsebenti wekushumayela ngeMbuso, utawuphela ngesikhatsi lesifanele. Cabanga ngaloko lokwenteka ngesikhatsi saNowa. Jehova wakhombisa kutsi tonkhe tintfo utenta ngesikhatsi lesikahle. Jehova wancuma kusesele iminyaka lengu-120 kutsi Zamcolo utawucala nini. Ngemuva kweminyaka leminyenti, Jehova watjela Nowa kutsi akhe umkhumbi. Nowa wachubeka asebenta kamatima iminyaka lengaba ngu-40 nobe 50 ngaphambi kwaZamcolo. Ngisho nobe bantfu bebangamlaleli, wachubeka ashumayela umlayeto losecwayiso kwaze kwaba sikhatsi lapho Jehova atsi abangene emkhunjini. Ngesikhatsi lesifanele, “[Jehova] wavala umnyango.” (Gen. 6:3; 7:1, 2, 16) Ngekushesha, Jehova utasitjela kutsi sekuphelile kushumayela tindzaba letimnandzi teMbuso. Ngemuva kwaloko, utawubhubhisa lelive lelibi laSathane futsi utawuletsa live lelisha lelitawugcwala bantfu labamlalelako. Kodvwa sisengakefiki leso sikhatsi, shengatsi singalingisa Nowa, kanye labanye labangazange bayekele kusebenta. Shengatsi singahlale sinake umsebenti wekushumayela, sibe nesineke futsi sibe nekukholwa lokucinile kuJehova nasetetsembisweni takhe. w20.09 13 ¶18-19

Kube bekungacaci kutsi ngubani loneligunya, umndeni waJehova bewungeke uhleleke futsi bewungeke ujabule. Nasi sibonelo, kute lobekatakwati kutsi ngubani lokufanele ente tincumo nekutsi ngubani lokufanele aciniseke kutsi loko lokuncunyiwe kuyenteka. Nangabe kukuhle kutsi emadvodza abe neligunya emindenini yawo, kwentiwa yini kutsi bafati labanyenti beve shengatsi emadvodza abo ayabacindzetela? Sizatfu saloko kutsi emadvodza lamanyenti akayilaleli imitsetfo yaJehova lemayelana nemindeni, kunaloko akhetsa kulandzela emasiko endzawo. Angaphindze abaphatse kabi bafati bawo kuze nje ative ajabulile. Nasi sibonelo, indvodza ingamphatsa kabi umfati wayo kuze nje itive ibalulekile nobe kuze ikhombise labanye kutsi “iyindvodza sibili.” Ingase icabange kutsi angeke imphocelele umfati wayo kutsi ayitsandze kodvwa ingamenta kutsi ayesabe. Ingasebentisa lokwesaba kuze imentise nobe yini leyifunako. Emadvodza lacabanga ngalendlela futsi lenta tintfo ngalendlela awenti kahle, akabahloniphi bafati bawo futsi enta lokuphambene naloko lokufunwa nguJehova.​—Ef. 5:25, 28. w21.02 3 ¶6-7

Nangabe unenkinga lekukhatsatako, ungathantaza kuJehova umcele akusite. Jehova angayiphendvula imithantazo yakho ngekukunika “kuthula kwaNkulunkulu lokwendlula konkhe kucondza.” (Fil. 4:6, 7) Jehova utakunika kuthula asebentisa umoya wakhe longcwele lonemandla. (Gal. 5:22) Nawuthantaza kuJehova, mtjele indlela lotiva ngayo. Mtjele kutsi yini inkinga yakho futsi umchazele kutsi utiva njani ngayo. Nangabe ikhona indlela yekucatulula lenkinga, mcele kutsi akuphe kuhlakanipha kuze wati kutsi yini lokufanele uyente futsi akuphe emandla ekukwenta. Kodvwa nangabe kute longakwenta kuze ucatulule lenkinga, cela Jehova akusite kuze ungakhatsateki kakhulu. Nawuyisho ngalokucondzile inkinga yakho nawuthantaza, ngekuhamba kwesikhatsi utawubona kahle kutsi Jehova uwuphendvule njani lomthantazo. Nangabe imphendvulo ungayitfoli ngekushesha ngemuva kwekuthantaza, ungayekeli kuthantaza. Jehova akagcini nje ngekufuna kutsi siyisho ngalokucondzile inkinga lesinayo, kodvwa ufuna nekutsi sichubeke sithantaza ngayo.​—Luk. 11:8-10. w21.01 3 ¶6-7

Lamuhla, libandla linebantfu labashadile nemindeni. Kodvwa liphindze libe nebazalwane nabodzadze labanyenti labangakashadi. Kufanele sibaphatse njani labo labangakashadi? Kufanele silingise indlela Jesu labaphatsa ngayo. Jesu akazange ashade ngesikhatsi alapha emhlabeni. Wahlala angakashadi kuze anake umsebenti wakhe wekushumayela. Akazange afundzise kutsi emaKhristu kufanele ashade nobe angashadi. Nanobe kunjalo, washo kutsi lamanye emaKhristu angakhetsa kuhlala angashadi. (Mat. 19:12) Jesu bekabahlonipha labo lebebangakashadi. Akazange ababukele phansi bantfu labangakashadi nobe acabange kutsi kukhona lokushodako ekuphileni kwabo ngesizatfu sekutsi bebangakashadi. NjengaJesu, umphostoli Pawula wahlala angakashadi nakenta umsebenti wakhe wekushumayela. Pawula akazange afundzise kutsi nangabe umKhristu ashada bekenta kabi. Bekati kutsi loko bekusincumo semuntfu ngamunye. w20.08 28 ¶7-8

Umphostoli Johane waphila iminyaka leminyenti, futsi tinyenti tintfo letijabulisako letenteka ekuphileni kwakhe. Wabhekana nebumatima lobunyenti lobebungenta kukholwa kwakhe kube butsakatsaka. Nobe kunjalo, bekatimisela kulalela imiyalo yaJesu lefaka ekhatsi kutsandza bazalwane nabodzadze. Loku kwacinisekisa Johane kutsi Jehova naJesu bayamtsandza nekutsi bebatamniketa emandla ekubeketelela timo letimatima. (Joh. 14:15-17; 15:10) Sathane kanye nalelive lakhe bebangeke bakhone kuyekelisa Johane kutsandza bazalwane bakhe nabodzadzewakhe, kumyekelisa kwenta tintfo letinhle kanye nekusho lokuhle ngabo. NjengaJohane, siphila eveni lelibuswa nguSathane futsi longabatsandzi bantfu. (1 Joh. 3:1, 10) Njengobe afuna kusiyekelisa kutsandza bazalwane nabodzadzewetfu, angeke akhone kukwenta loko nangabe singamvumeli. Shengatsi singachubeka sibatsandza bazalwane nabodzadzewetfu, futsi loko sikukhombise ngalesikushoko nalesikwentako. Nasibatsandza labanye, sitawujabula ngekuba yincenye yemndeni waJehova, futsi sitakujabulela kakhulu kuphila.​—1 Joh. 4:7. w21.01 13 ¶18-19

Kumatima kuphila kulelive lelibuswa nguSathane, futsi ngalesinye sikhatsi asati nekutsi sente njani. (2 Thim. 3:1) Kodvwa akudzingeki kutsi sikhatsateke nobe sesabe. Jehova uyatati tinkinga lesibhekene nato. Nakwenteka siwa, wetsembisa kusibamba ngesandla sakhe lesinemandla. (Isa. 41:10, 13) Siyaciniseka kutsi Jehova utasisita, futsi liBhayibheli lisinika emandla lesiwadzingako kuze sibeketelele nobe nguyiphi inkinga. Ema-video etfu, ema-drama lalalelwako kanye netindzaba letingephansi kwesihloko lesitsi “Lingisa Kukholwa Kwabo” tenta kutsi tintfo lokukhulunywa ngato eBhayibhelini tibe yintfo mbamba. Ngaphambi kwekutsi ubukele, ulalele nobe ufundze letindzaba, cela Jehova akusite utfole tifundvo longatisebentisa. Ticabange ungulomuntfu lokukhulunywa ngaye kulendzaba. Zindla ngalokwentiwa nguletinceku taJehova letetsembekile nekutsi watisita njani kuze tincobe tinkinga lebetibhekene nato. Ngemuva kwaloko, sebentisa letifundvo kulenkinga lonayo. Bonga Jehova ngaloko lasakusite ngako. Khombisa kutsi uyabonga ngalolusito ngekutsi ufune tindlela longakhutsata futsi usekele ngato labanye. w21.03 19 ¶22-23

Nangabe nishadile futsi nifuna kuba nebantfwana, tibuteni: ‘Sibantfu labatfobekile yini labatsandza Jehova neliVi lakhe? Jehova angasikhetsa yini kutsi sinakekele luswane loluligugu?’ (Hla. 127:4) Nangabe sewungumtali, tibute: ‘Bantfwana bami ngiyabafundzisa yini kutsi kuhle kusebenta kamatima?’ (Shu. 3:12, 13) ‘Ngenta konkhe lokusemandleni yini kuze ngivikele bantfwana bami etintfweni letiyingoti?’ (Taga 22:3) Ngeke ukhone kuvikela bantfwana bakho kuto tonkhe tinkinga. Kodvwa ungakhona kubalungiselela tinkinga labatawubhekana nato ekuphileni, ngekutsi uchubeke ubafundzisa ngendlela lenelutsandvo kutsi betsembele eBhayibhelini kuze batfole seluleko. (Taga 2:1-6) Nangabe sihlobo senu siyekela kukhonta Jehova, sita bantfwana bakho bafundze eVini laNkulunkulu kutsi kungani kubalulekile kuhlala wetsembekile kuJehova. (Hla. 31:23) Nangabe kufa sihlobo senu lenisitsandzako, khombisa bantfwana bakho emavesi laseBhayibhelini langabasita babeketelele lusizi futsi batfole kuthula.​—2 Khor. 1:3, 4; 2 Thim. 3:16. w20.10 27 ¶7