“Kuyawudzimate Kube Ngunini Solo Ngikhala Ngicela Lusito?”
Jayne wakhala watsi: “Ngifuna mane lobuhlungu buphele!” Abenesifo sekhensa, futsi kancane kancane sasandza sigcwala wonke umtimba wakhe. Tihlobo nebangani bebafisa shengatsi bangavele baselaphe lesifo futsi babucedze lobuhlungu lobukhulu kangaka lobebumphetse. Bathandaza kuNkulunkulu kute amsite. Bekabeva yini? Kwakumkhatsata yini loko?
NKULUNKULU uyasati simo semndeni webantfu. LiVi lakhe liBhayibheli litsi: “Indalo yonkhe iyabubula ngebuhlungu lobufana nemhelo.” (Roma 8:22) Nkulunkulu uyati kutsi kunemakhulu etigidzi tebantfu labafanana naJayne, labeva buhlungu onkhe malanga, kungaba buhlungu basemtimbeni, bemivelo nobe bengcondvo. Nkulunkulu uyatibona letigidzi tebantfu letingu-800 letilala tingakadli onkhe malanga, tigidzi talabo labahlukunyetwa ngemlunga emndeni wabo, nebatali labanyenti labakhatsatekile ngelikusasa kanye nemphilo lenhle yebantfwana babo. Uke watibuta yini nangu umbuto: Kukhona yini Nkulunkulu latawukwenta kute acatulule letinkinga letingaka? Liciniso likutsi, njengobe sifuna kusita labo lesibatsandzako, Nkulunkulu angeke yini sekafune kusita umndeni webantfu, tidalwa takhe?
Nangabe uke watibuta leyo mibuto, ciniseka kutsi nalabanye bake batibuta yona. Eminyakeni lengu-2 600 leyendlulile, indvodza leyetsembekile, Habakhuki, yativa ngendlela lefanana naleyo labanyenti betfu labativa ngayo esikhatsini salamuhla. Yabuta Nkulunkulu: “Kuyawudzimate kube ngunini solo ngikhala ngicela lusito, kodvwa wena solomane ungalaleli? Kuyawudzimate kube ngunini ngimemeta ngikhala kuwe ngitsi: ‘Budlwangudlwangu!’ kodvwa wena ungasindzisi? Wentelani kutsi ngibone bubi lobungaka? Ukubeketelelelani kuhlushwa kwalabacindzetelekile? Imbhubhiso nebudlwangudlwangu busembikwami njalo; kukhona kulwa nekubanga lokunyenti.” (Habakhuki 1:2, 3) Habakhuki, umphrofethi longumHebheru, wabona tento letingenangcondvo futsi letishwacisa lugogo tebudlova ngesikhatsi sakhe. Tento letinjalo lamuhla setingemahlala khona, futsi tibavisa buhlungu kakhulu labo labanesifiso sekusita labahluphekile.
Nkulunkulu kwamcansula yini lokukhatsateka kwaHabakhuki? Cha, akuzange. Wayilalela imibuto yaHabakhuki lesuka ekujuleni kwenhlitiyo futsi wayidvudvuta lendvodza leyayikhatsatekile. Nkulunkulu Jehova wacinisa kukholwa kwaHabakhuki ngekutsi ametsembise kutsi utawucedza konkhe kuhlupheka. Nawe lesetsembiso saNkulunkulu singakucinisa, njengobe kwenteka nakuJayne nemndeni wakhe. Letihloko letilandzelako titawuphendvula lemibuto: Singaciniseka njani kutsi Nkulunkulu uyasikhatsalela? Yini Nkulunkulu latawuyenta kute acedze kuhlupheka, futsi loko utawukwenta nini?