Kungani Kufanele Utinikele KuJehova?

“Ngobe kulobusuku balamuhla ingilosi yaNkulunkulu, lengiwakhe . . . ime eceleni kwami.”—IMIS. 27:23

1. Ngutiphi tinyatselo letisuke titsetfwe ngulabo labafuna kutinikela futsi babhajatiswe, futsi loko kuphakamisa miphi imibuto?

“NGESISEKELO semhlatjelo waJesu Khristu, sewuphendvukile yini etonweni takho, watinikela kuJehova kute wente intsandvo yakhe?” Lona ngumunye wemibuto lemibili lephendvulwa ngulabo labatewubhajatiswa ekwephetseni kwenkhulumo yelubhabhatiso. Kungani emaKhristu kudzingeka atinikele kuJehova? Kusizuzisa ngani kutinikela kuNkulunkulu? Kungani umuntfu angeke akwati kukhonta Nkulunkulu ngendlela layemukelako ngephandle kwekutsi atinikele kuye? Kute sikwati kucondza timphendvulo talemibuto, kudzingeka sicale sati kutsi kusho kutsini kutinikela.

2. Kusho kutsini kutinikela kuJehova?

² Kusho kutsini kutinikela kuNkulunkulu? Naka indlela umphostoli Pawula labuchaza ngayo buhlobo bakhe naNkulunkulu. Wabita Jehova ngekutsi ‘nguNkulunkulu lengiwakhe’ embikwebantfu labanyenti labenabo emkhunjini lowawusengotini yekucwila. (Fundza Imisebenti 27:22-24.) Onkhe emaKhristu eliciniso aJehova. Ngalokwehlukile ngemhlaba wonkhe, wona “ungephansi kwemandla aLomubi.” (1 Joh. 5:19) EmaKhristu aba aJehova ngalesikhatsi atinikela kuye ngemthandazo. Kutinikela lokunjalo kusifungo lesentiwa ngumuntfu nemuntfu. Kulandzelwa lubhabhatiso lwemanti.

3. Kubhajatiswa kwaJesu bekumelelani, futsi balandzeli bakhe bangasilingisa njani sibonelo sakhe?

³ Jesu wasibekela sibonelo ngalesikhatsi akhetsa kwenta intsandvo yaNkulunkulu. Ngesizatfu sekutsi abetalelwe esiveni lesitinikele saka-Israyeli, abesavele atinikele kuNkulunkulu. Nobe kunjalo, ngekubhajatiswa kwakhe wenta lokungetulu kwaloko bekufunwa ngephansi kweMtsetfo. LiVi laNkulunkulu libonisa kutsi watsi: “Naku, ngilapha! Ngitekwenta intsandvo yakho, Nkulunkulu.” (Heb. 10:7; Luk. 3:21) Ngako kubhajatiswa kwaJesu kwakuluphawu lekutinikela kuNkulunkulu ngekwenta intsandvo yaBabe wakhe. Balandzeli bakhe balingisa sibonelo sakhe ngalesikhatsi nabo babhajatiswa. Kodvwa esimeni sabo, lubhabhatiso lwemanti lubonisa ngalokusebaleni kutsi sebatinikele kuNkulunkulu ngemthandazo.

Indlela Kutinikela Lokusizuzisa Ngayo

4. Bungani baDavide naJonathani busitjelani ngekwenta setsembiso?

⁴ Kutinikela kwemaKhristu kuyintfo lebaluleke kakhulu. Kungetulu kwekumane wente setsembiso lesingasho lutfo. Ngako-ke, kusizuzisa ngani kutinikela? Kute sikucatsanise, ase sifundze ngekutsi kuba nebuhlobo nalabanye bantfu kutiletsa njani tinzuzo. Lesinye sibonelo saloku, bungani. Kute ujabulele kuba nemngani kudzingeka wemukele umtfwalo wekuba ngumngani. Loku kufaka ekhatsi kwenta setsembiso—ube nesibopho sekukhatsalela umngani wakho. Bungani lobuhamba embili liBhayibheli lelikhuluma ngabo, ngulobo baDavide naJonathani. Laba lababili baze benta sivumelwane sekuba bangani. (Fundza 1 Samuweli 17:57; 18:1, 3.) Nanobe bungani lobunjalo bungakavami lamuhla, kodvwa buyakhula nangabe umuntfu nemuntfu atinikela nobe ativa anesibopho emnganini wakhe.—Taga 17:17; 18:24.

5. Sigcili sasingazuza njani ngekutsi sisebentele umtsengi waso kuphila kwaso konkhe?

⁵ Lomtsetfo Nkulunkulu lawunika ema-Israyeli uchaza lobunye budlelwane bantfu labebazuza kubo nabenta sivumelwane. Nangabe sigcili sasinemtsengi lolungile futsi sifuna sicinisekiso sekutsi ngaso sonkhe sikhatsi bayohlala banebudlelwane lobuhle, sasingenta naye sivumelwane. LoMtsetfo wawutsi: “Kodvwa nangabe lesigcili sikhuluma ngewaso umlomo sitsi: ‘Ngiyamtsandza umtsengi wami, nemkami, nebantfwabami, angifuni kukhululeka,’ ngako umtsengi waso kufanele asitsatse asimikise kuNkulunkulu endzaweni yekukhonta. Utawumenta eme eceleni kwemnyango nome kwensika yemnyango, abhobose indlebe yaso ngelusungulo. Sesiyawumsebentela simkhonte imphilo yaso yonkhe.”—Eks 21:5, 6.

6, 7. (a) Kubazuzisa ngani bantfu kutinikela? (b) Loko kubonisani ngebuhlobo betfu naJehova?

⁶ Umshado buhlobo lobudzinga kutinikela kwelizinga lelisetulu futsi usho kutinikela hhayi nje kumane wente sivumelwane lesibhalwe ephepheni, kodvwa kuloyo muntfu. Bantfu lababili labahlala ndzawonye bangakashadi angeke babe nako kulondzeka lokungiko sibili, ngisho nebantfwana babo angeke bakutfole. Kodvwa bantfu lababili labatibophele kulomunye nalomunye ngemshado, banetizatfu letiseBhayibhelini tekulwela kucatulula tinkinga tabo ngelutsandvo nativela.—Mat. 19:5, 6; 1 Khor. 13:7, 8; Heb. 13:4.

⁷ Endvulo, bantfu bebazuza ngekuba nesivumelwane lesibhalwe phasi ebhizinisini kanye nasemsebentini. (Mat. 20:1, 2, 8) Nalamuhla, kwenteka lokufananako. Ase sifananise: Siyazuza ngekuba nesivumelwane lesibhalwe phasi ngembi kwekuba sicale ibhizinisi nobe ngembi kwekuba sicale kusebentela inkampani letsite. Nangabe kutinikela kukhulisa budlelwane lobufanana nebungani, umshado, kanye nemsebenti, kangakanani-ke ngetinzuzo tekutinikela ebuhlotjeni naJehova! Nyalo ase sicabange ngendlela bantfu basendvulo labazuze ngayo ngekutinikela kuNkulunkulu Jehova, nekutsi loku bekungetulu kwekumane nje bente setsembiso.

Indlela Ema-Israyeli Lazuza ngayo Ngekutinikela KuNkulunkulu

8. Kutinikela kwema-Israyeli kuNkulunkulu bekusho kutsini?

⁸ Sonkhe sive saka-Israyeli satinikela kuJehova ngalesikhatsi senta sifungo kuye. Jehova watsi asibutsane edvute neNtsaba iSinayi, naku lakusho kuso: “Ngako-ke naniyawulilalela livi lami nigcine nesivumelwane sami, niyawuba ligugu lami emkhatsini wato tonkhe tive.” Bantfu baphendvula kanye kanye batsi: “Konkhe lokushiwo nguSimakadze [Jehova] siyawukwenta.” (Eks. 19:4-8) Kutinikela bekubaluleke kakhulu kuma-Israyeli kunekumane ente sivumelwane lesitsite lesingasho lutfo. Loko bekusho kutsi ema-Israyeli aJehova, futsi Jehova abewaphatsa njengalowo ‘laligugu lakhe.’

9. Ema-Israyeli azuza njani ngekutinikela kuNkulunkulu?

⁹ Ema-Israyeli azuza ngekuba aJehova. Jehova abetsembekile futsi awanakekela njengemtali lokhatsalela umntfwana wakhe. Naku Nkulunkulu lakusho kuma-Israyeli: “Umfati angalukhohlwa yini luswane lolusesebeleni lakhe nekutsi abete sihawu kumntfwana lamtalako? Nome angakhohlwa, kodvwa mine ngingeke ngikukhohlwe wena.” (Isa. 49:15) Jehova wawaniketa uMtsetfo kute uwacondzise, baphrofethi kute awakhutsate kanye netingilosi kute tiwavikele. Umhlabeleli wabhala watsi: “Wembula livi lakhe kuJakobe, timiso nemiyalo yakhe ku-Israyeli. Kute sive lake wenta njalo kuso.” (Hla. 147:19, 20; fundza Tihlabelelo 34:7, 19; 48:14.) Jehova abesikhatsalela sive sakhe endvulo, ngako uyabakhatsalela nalabo labatinikela kuye nalamuhla.

Lokusenta Sitinikele KuNkulunkulu

10, 11. Sitalelwe emndenini waNkulunkulu yini tsine? Chaza.

¹⁰ Ngalesikhatsi umKhristu asacabanga kutsi kufanele yini atinikele futsi abhajatiswe, angahle atibute: ‘Kungani ngingeke ngikwati kukhonta Nkulunkulu ngephandle kwekuba ngitinikele kuye?’ Sizatfu siyacaca nangabe sicaphela buhlobo betfu naNkulunkulu nyalo. Khumbula phela kutsi ngesono sa-Adamu, asizange sitalelwe emndenini waNkulunkulu. (Rom. 3:23; 5:12) Ngako kutinikela kuNkulunkulu kuyimfuneko lebaluleke kakhulu yekutsi semukeleke emndenini wakhe wemhlaba wonkhe. Ase sibone kutsi kungani.

¹¹ Kute ngisho namunye kitsi lonababe longasiletsela kuphila lokuphakadze njengobe Babe wetfu Nkulunkulu afise kanjalo. (1 Thim. 6:19) Asizange sitalwe njengemadvodzana aNkulunkulu ngobe ngalesikhatsi bantfu bekucala bona, bonkhe bantfu bahlukaniswa naBabe wabo longuMdali lonelutsandvo. (Catsanisa naDutheronomi 32:5.) Kusukela ngaleso sikhatsi, bantfu baphile ngephandle kwemndeni waJehova, behlukaniswa naNkulunkulu.

12. (a) Bantfu labangakapheleli bangaba njani ngemalunga emndeni waNkulunkulu? (b) Ngutiphi tinyatselo lokufanele sititsatse ngembi kwekuba sibhajatiswe?

¹² Nobe kunjalo, singacela kutsi ngabanye Nkulunkulu asemukele emndenini wetinceku takhe.a Kungenteka njani loko kitsi njengobe sitoni? Umphostoli Pawula wabhala: “Kwatsi sisetitsa satfola kubuyisana naNkulunkulu ngekufa kweNdvodzana yakhe.” (Rom. 5:10) Ngekubhajatiswa sisuke senta sicelo kuNkulunkulu sekuba nanembeza lohlantekile kute sitewukwati kwemukeleka kuye. (1 Phet. 3:21) Sisengakabhajatiswa, kunetinyatselo letitsite lokufanele sititsatse. Kufanele simati kahle Nkulunkulu, sifundze kumetsemba, siphendvuke, futsi sigucuke etindleleni tetfu tekuphila. (Joh. 17:3; Imis. 3:19; Heb. 11:6) Ngetulu kwaloko kunalokunye lokufanele sikwente ngembi kwekuba semukeleke emndenini waNkulunkulu. Yini?

13. Kungani kufanele umuntfu ente setsembiso sekutinikela kuNkulunkulu kute abe yincenye yemndeni wetinceku takhe latemukelako?

¹³ Ngembi kwekuba lotsite lobekangamati Nkulunkulu abe lilunga lemndeni wetinceku taNkulunkulu latemukele, kufanele acale ente setsembiso lesicinile kuJehova. Kute sicondze kutsi kungani, ase ucabange ngababe lohloniphekile lobonisa umusa nesitsakatelo emntfwaneni loyintsandzane futsi abe nesifiso sekumtsatsa abe lilunga lemndeni wakhe. Lobabe watiwa ngekutsi uyindvodza lelungile. Noko-ke, ngembi kwekutsi amukele lomntfwana njengendvodzana yakhe, lendvodza ifuna lomfana ente setsembiso kucala. Ngako itsi: “Ngembi kwekutsi ngikwemukele njengendvodzana yami, ngifuna kwati kutsi utangitsandza futsi ungihloniphe njengababe wakho yini?” Lendvodza itamemukela lomfana emndenini wayo kuphela nje nakatimisele kwenta leso setsembiso. Akusiko yini kucabangela loko? Ngendlela lefananako, Jehova emndenini wakhe wemukela kuphela labo labenta setsembiso sekutinikela kuye. LiBhayibheli litsi: “Nikelani imitimba yenu ibe ngumnikelo lophilako, nalongcwele, nalowemukeleka kuNkulunkulu.”—Rom. 12:1.

Sento Selutsandvo Nekukholwa

14. Yini lesenta sitsi kutinikela yindlela lesibonisa ngayo lutsandvo?

¹⁴ Kwenta setsembiso sekutinikela kuNkulunkulu yindlela lesikhombisa ngayo kutsi simtsandza ngalokusuka enhlitiyweni Jehova. Loku kufanana nesifungo semshado. Umkhwenyana longumKhristu ukhombisa lutsandvo lwakhe ngekufunga atsi utawutsembeka kumfati wakhe, nobe kukuhle nobe kukubi. Lesi kusuke kusifungo lesicinile hhayi nje setsembiso lesimelula sekwenta lokutsite. Umkhwenyana longumKhristu uyacondza kutsi angeke abe nelilungelo lekuhlala nemkakhe nangabe angakasenti sifungo semshado. Ngendlela lefananako, angeke sitijabulele tinzuzo tekuba ngemalunga emndeni waJehova ngephandle kwekwenta sifungo sekutinikela kuye. Ngako-ke, sitinikela kuNkulunkulu ngobe ngisho singakapheleli sinesifiso sekuba bakhe futsi setsembeke kuye, ngisho nobe kwentekani.—Mat. 22:37.

15. Kutinikela kusento sekukholwa ngayiphi indlela?

¹⁵ Nasitinikela kuNkulunkulu, sisuke sikhombisa kutsi sinekukholwa. Kungani sisho njalo? Kukholwa kwetfu kuJehova kusenta siciniseke kutsi kusondzela kuNkulunkulu kuyintfo lenhle kitsi. (Hla. 73:28) Siyati kutsi angeke kube melula ngaso sonkhe sikhatsi kuhamba naNkulunkulu njengobe siphila emkhatsini “wesitukulwane lesigwegwile nalesiphambene,” kodvwa setsembele kuNkulunkulu kutsi utasisekela njengobe setama kuhamba naye. (Fil. 2:15; 4:13) Siyati kutsi asikapheleli, kodvwa siyaciniseka kutsi Jehova utasibonisa sihawu nanobe senta emaphutsa. (Fundza Tihlabelelo 103:13, 14; Roma 7:21-25.) Siyakholwa kutsi Jehova utasibusisa ngekugcina kwetfu bucotfo.—Jobe 27:5.

Kutinikela KuNkulunkulu Kuholela Enjabulweni

16, 17. Kungani kutinikela kuJehova kuholela enjabulweni?

¹⁶ Kutinikela kuJehova kuphumela enjabulweni ngobe kufaka ekhatsi kutidzela. Jesu washo liciniso lelisisekelo nakatsi: “Kubusisiwe kupha kunekwemukela.” (Imis. 20:35) Ngesikhatsi semsebenti wakhe wasemhlabeni, Jesu wayitfola injabulo yekupha. Nakudzingekile, abengaphumuli, angadli, futsi angaphili imphilo lentofontofo kute nje asite labanye batfole indlela leya ekuphileni. (Joh. 4:34) Jesu wajabula ngekwenta inhlitiyo yaBabe wakhe ijabule. Waze watsi: “Sonkhe sikhatsi ngenta lokutsandzekako kuye.”—Joh. 8:29; Taga 27:11.

¹⁷ Ngako-ke, Jesu wakhomba balandzeli bakhe ekuphileni lokwenetisako nakatsi: “Umuntfu nakafuna kungilandzela, akatidzele.” (Mat. 16:24) Kwenta kanjalo, kusisondzeta edvute naJehova. Kukhona yini lomunye umuntfu lesingatinikela kuye longasikhatsalela ngelutsandvo lolungetulu kwalolu?

18. Kungani kuphila ngekuvumelana nekutinikela kwetfu kuJehova kusiletsela injabulo lenkhulu kunekutinikela kunome ngabe nguyiphi intfo nobe umuntfu?

¹⁸ Kutinikela kuJehova bese siphila ngekuvumelana nekutinikela kwetfu ngekwenta intsandvo yakhe, kuletsa injabulo lenkhulu kunekutinikela kunome nguyiphi intfo nobe umuntfu. Nasi sibonelo: Bantfu labanyenti banikela kuphila kwabo ekufuneni umcebo futsi abayitfoli injabulo sibili kanye nekwenetiseka. Kodvwa labo labatinikela kuJehova batfola injabulo lengapheli. (Mat. 6:24) Lilungelo lekuba ‘tisebenti taNkulunkulu’ libenta bajabule, abatinikeli emsebentini lotsite kodvwa kuNkulunkulu labamtsandzako. (1 Khor. 3:9) Kute ngisho namunye longatisa kutidzela kwabo ngaphandle kwaNkulunkulu. Utawubangela labo labetsembekile kutsi babe basha kute bazuze emalungiselelweni akhe kuze kube phakadze.—Jobe 33:25; fundza Hebheru 6:10.

19. Nguliphi lilungelo lelijatjulelwa ngulabo labatinikele kuJehova?

¹⁹ Kutinikela kuJehova kwenta ube nebudlelwane lobuhle naye. LiBhayibheli litsi: “Sondzelani kuNkulunkulu, naye utawusondzela kini.” (Jak. 4:8; Hla. 25:14) Esihlokweni lesilandzelako, sitawucoca ngekutsi kungani kufanele sijabule ngekutsi sikhetse kuba seluhlangotsini lwaJehova.

[Umbhalo longentasi]

Ungaphendvula Njani?

• Kusho kutsini kutinikela kuNkulunkulu?

• Kusizuzisa ngani kutinikela kuNkulunkulu?

• Kungani kufanele emaKhristu atinikele kuJehova?

[Sitfombe ekhasini 12]

Kuphila ngekuvumelana nekutinikela kwetfu kuholela enjabulweni lengapheli