Umlandvo Wekuphila
“Esandleni Sakho Sangesekudla Kunekujabula Phakadze Naphakadze”
Njengobe ilandziswa ngu-Lois Didur
Uwasho kangakhi lamavi latsi: ‘Ngifisa shengatsi ngabe angikukhetsanga loko lengakukhetsa.’ Ngemuva kweminyaka lengu-50 ngisemsebentini wasikhatsi sonkhe, kute imiphumela lemibi lengibe nayo ngesizatfu sekukhonta Jehova. Ase ngikucocele kutsi kungani.
NGATALWA ngemnyaka wa-1939, ngakhulela endzaweni yasemakhaya eSaskatchewan, eCanada, nginabosisi labane nabhuti munye. Beyimnandzi sibili imphilo kulamapulazini aleyondzawo. Ngalelinye lilanga boFakazi BaJehova beta ekhaya bafike bacoca nababe, ngabese ngiyababuta kutsi Nkulunkulu unalo yini libito. Basikhombisa libito lelitsi Jehova kuTihlabelelo 83:18. Loko kwangenta ngafuna kwati kabanti ngaNkulunkulu nangeliVi lakhe.
Ngaleyo minyaka, bantfwana labebahlala emapulazini bebafundza ekilasini linye badzimate bafike ebangeni lesitfupha. Bebagibela emahhashi nobe bahambe ngetinyawo emakhilomitha lamanyenti nabaya esikolweni. Tidzingo tabothishela betinakekelwa ngimindeni yakuleso sigodzi. Ngalomunye umnyaka besekuligema lebatali bami lekutsi banakekele thishela John Didur lobekamusha kulesikolwa.
Bengingati kutsi lelijaha nalo belinelilukuluku etindzabeni letiphatselene neliVi laNkulunkulu. Ngalelinye lilanga bengikhuluma ngemsebenti lomuhle lowentiwa bukhomanisi kanye nekwekwabelana, futsi nababe abengisekela kuloko bengikusho. John waphendvula ngekushesha watsi: “Kute umuntfu lonelilungelo lekubusa lomunye, nguNkulunkulu kuphela lonalelo lungelo.” Loko kwaphumela ekutseni sicoce ngetintfo letinyenti letijabulisako.
Njengobe abetalwe nga-1931, John bekake weva ngebumatima lobabangelwa yimphi. Nakusuka iMphi yaseKorea nga-1950, wabuta bafundisi labanyenti kutsi kungani bangenela imphi. Bonkhe bamphendvula ngekutsi kuvumelekile kuya emphini ngisho nobe ungumKhristu. Ngemuva kwesikhatsi wawubuta boFakazi BaJehova lombuto. Bamtjela ngaloko lokusemBhalweni lokwentiwa ngemaKhristu angesikhatsi lesendlulile nakutiwa etindzabeni temphi. John wabhajatiswa nga-1955. Ngemnyaka lolandzelako nami ngabhajatiswa. Sobabili besati kutsi sifuna kukhonta Jehova ngekuphila kwetfu nangemandla etfu. (Hla. 37:3, 4) Nga-July 1957, mine naJohn sashada.
Bekuvamile kutsi lilanga lesashada ngalo licondzane nemhlangano. Besikujabulela kakhulu kuba semkhatsini wetinkhulungwane tebantfu letiwuhloniphako umshado. Umhlangano wetfu wekucala wetive lesaya kuwo bewunga-1958. Sasisihlanu sihamba ngemoto siya eNew York City sisuka eSaskatchewan. Sahamba liviki lonkhe, kutsi nakuhlwa silale ethendeni. Samangala kakhulu ngalesikhatsi lomunye umzalwane lesamtfola eBethlehem, ePennsylvania, asimema kutsi siyewulala kakhe ngalobo busuku. Umusa wakhe lomkhulu wenta kutsi sifike eNew York City sihlobile futsi sitilungise kahle. Lomhlangano wetive wasikhutsata kutsi silijabulele lilungelo lelikhulu lekukhonta Jehova. Njengobe umhlabeli abhala watsi: “Esandleni sakho sangesekudla kunekujabula phakadze naphakadze.”—Hla. 16:11.
KUBA NGEMAHLAHLANDLELA
Nga-1959, sasingemahlahlandlela sihlala kumahambanendlwana lomncane lowawusetulu egcumeni laseSaskatchewan. Nawukuleligcuma, wawubona tindzawo letikhweshe ngemakhilomitha lamanyenti, lamanye alamakhilomitha bewahlanganisa nensimi lebesitawuyishumayela.
Ngalelinye lilanga satfola incwadzi lejabulisako levela ehhovisini leligatja. Ngagijima ngaya lapho John bekalungisela khona sigulumba. Lencwadzi beyisimemela kutsi sibe ngemahlahlandlela lakhetsekile eRed Lake, e-Ontario. Singati nekutsi sitawuphuma sibheke kuphi nasiya kuleyondzawo, ngekushesha satfola libalave kute sitfole kutsi ikuphi.
Lendzawo yayehlukile kuleyo lebesihlala kuyo. Besesihlala endzaweni lenemahlatsi kanye nemadolobha lamancane labekakhiwe ngasetimayini teligolide. Njengobe besifuna indzawo yekuhlala ngalelilanga lesafika ngalo, lenye intfombatanyana yasiva nasikhuluma namakhelwane wayo. Yagijima yaya ekhaya kumake wayo yafike yamtjela kutsi sifuna indzawo yekuhlala. Lomake walentfombatanyana wasivumela kutsi silale kakhe ngalobo busuku. Wasilalisa endzaweni yemathulusi lengcolile. Ngakusasa, sayitfola indzawo yekuhlala lebeyinemakamelo lamabili kodvwa yayite emanti netintfo tasendlini, lokwakukhona nje kwakuyimbawula. Satsenga tintfo letimbalwa esitolo semasekeni futsi senetiseka ngekushesha ngaloko lesasinako.
Kusuka lapho besihlala khona, wawuhamba emakhilomitha langu-209 solo ungalitfoli libandla. Tisebenti letinyenti lebetisebenta emayini yeligolide betisuka eYurophu. Betisicela kutsi sitinike emaBhayibheli ngelulwimi lwato. Ngesikhashana nje lesincane, sase sinetifundvo teliBhayibheli letingu-30 letatichubeka kahle. Kungakapheli ngisho netinyanga letisitfupha, kwasungulwa libandla lelincane kuleyondzawo.
Indvodza yalomunye make lesasimfundzela, yashayela umphristi wayo lucingo kute atewuchazela umfati wayo kutsi loko lesasimfundzisa kona kwakungasilo liciniso. Sisachubeka nekucocisana, lomphristi wasitjela kutsi kufanele sifundzise nangaMtsatfu Amunye. Lomake wavele wahamba wayotsatsa liBhayibheli lemaKatolika wacela lomphristi kutsi asekele loko labekusho. Lomphristi watsatsa leliBhayibheli walijikijela ngale kwelitafula, watsi asikho sidzingo sekutsi asekele loko lakushoko. Nasekahamba wakhuluma ngesi-Ukraine watsi kufanele basicoshe lapha ekhaya futsi bangaphindze basivumele kutsi sibuye. Abengati kutsi John uyasiva si-Ukraine.
Ngekushesha ngemuva kwaloko, sesuka eRed Lake ngobe John besekufanele ahambe ayewuceceshelwa umsebenti wekujikeleta. Kwatsi ngemuva kwemnyaka John etfula inkhulumo yelubhabhatiso emhlanganweni wesigodzi, indvodza yalomake lesasimfundzela yayikulabo labatewubhajatiswa. Kucocisana lesaba nako nalomphristi kwenta kutsi lendvodza icale kufundza liBhayibheli.
KUBA MATASATASA EMSEBENTINI WEKUJIKELETA
Emsebentini wekujikeleta, sajabulela kuhlala nemindeni leyehlukehlukene. Sasondzelana kakhulu nalabo lesasifikela emitini yabo. Ngalelinye lilanga sake saba sendlini yetfu sodvwa lebandzako kungusebusika. Ekuseni kuseluvivi, sasiva lodzadze losakhulile lesasihlala kakhe angena kulendlu lebesihlala kuyo kute atewubasa umlilo. Bekaphindze abuye ngekushesha sekaphetse indishi kanye nemanti lashisako lesitawugeza ngawo kute silungele lusuku. Kunyenti lengakufundza kuye.
Umsebenti wekujikeleta wangisita ngasondzelana naJehova. Lesinye sifundza e-Alberta sasihlanganisa lidolobha lelinemayini leseNyakatfo, lapho kwakuhlala khona lomunye dzadze. Inhlangano yaJehova beyimtsatsa njani lodzadze lobekahlala kuleyondzawo? Njalo ngemuva kwetinyanga letisitfupha, sasiya kuye sifike sihlale liviki lonkhe siye naye ensimini siphindze sibambe naye imihlangano ngendlela lefanana naleyo lesenta ngayo emabandleni lamakhulu. Loku kwakusikhumbuto lesihle sekutsi Jehova utinakekela ngelutsandvo tonkhe timvu takhe.
Sachubeka sichumana nalabanyenti lebesilala kubo. Loko kwangikhumbuta ngesipho John langipha sona—libhokisana lelihle lebeligcwele emaphepha. Sakujabulela kakhulu kuchumana nebangani betfu ngekubhalelana tincwadzi, sisebentisa lawo maphepha. Nanyalo lelibhokisi alisuki engcondvweni yami.
Nasisesifundzeni saseToronto, umzalwane loseBethel yaseCanada wasibuta kutsi singakucabangela yini kuta sitewusebenta eBethel. Abefuna simphendvule nini? Abefuna simphendvule ngakusasa. Ngelilanga lelilandzelako, savuma.
KUBA SEBETHEL
Tonkhe tabelo letinsha lesasishintjelwa kuto tasikhombisa tici letehlukehlukene letijabulisako letivela esandleni saJehova. Loko saphindze sakubona nasitfutsela eBethel nga-1977. Kutihlanganisa nalabanye labagcotjiwe akuzange kwente kutsi sati buntfu babo lobehlukehlukene nje kuphela, kodvwa saphindze sati nendlela labalihlonipha ngayo liVi laNkulunkulu.
Yasijabulisa indlela lensha yekwenta tintfo lesayifundza eBethel. Njengekutsi timphahla tetfu bese tihlala emadrowini kunekutsi tihlale emaputumendeni, futsi sativa sisekhaya. Ngaphandle kwekwenta umsebenti lebengabelwe wona, kuhambisa tivakashi ngitikhombise iBethel kwakungijabulisa. Bengitichazela ngemsebenti lowentiwa khona, ngiphindze ngitilalele natisho lokutsite ngeBethel futsi ngiphendvule nemibuto yato.
Ngemuva kweminyaka letsite, nga-1997, John wamenywa kutsi aye eSikolweni Semalunga Ekomidi Yeligatja ePatterson, eNew York. Ngemuva kwaloko basibuta kutsi singakucabangela yini kutfutsela e-Ukraine. Sakhutsatwa kutsi siyicabangisise ngemthandazo lendzaba. Kusihlwa ngalelolanga, besati kutsi sitawuvuma kuya e-Ukraine.
LESINYE SABELO—E-UKRAINE
Nga-1992 saya emhlanganweni wetive lobewuse St. Petersburg, eRussia, kwatsi nga-1993 saya kulowawuseKiev, e-Ukraine. Lemihlangano yasenta sabatsandza bazalwane baseMpumalanga yeYurophu. Indzawo lesasihlala kuyo eLviv, e-Ukraine, bekuyindlu lendzala. Emafasitelo ayo abebuke lijalidi lelinengadze lencane, lebeyinelicudze kanye nemantjwele esikhukhukati. Kwaba shengatsi ngisepulazini laseSaskatchewan. Sasilishumi nakubili lebesihlala kulendlu. Onkhe malanga ekuseni besindlula edolobheni laseLviv siyewusebenta eBethel.
Sativa njani ngekuba se-Ukraine? Kwakudvudvuta kuba semkhatsini webantfu labake babhekana netilingo, kuvinjelwa emsebentini wekushumayela nalabake baboshwa. Nanobe babhekana naleto tilingo, bahlala bacinile ekukholweni. Nasibancoma ngaloko, bebavele batsi: “Loko sasikwentela Jehova.” Abazange bative shengatsi balahliwe. Ngisho nanyalo, nawubonga lotsite ngemusa wakhe, angahle aphendvule atsi: “Bonga Jehova,” ngesizatfu sekutsi uyacaphela kutsi nguye longuMtfombo wato tonkhe tintfo letinhle.
E-Ukraine, bantfu labanyenti bahamba ngetinyawo nabaya emihlanganweni, ngako baba nesikhatsi sekucoca baphindze bakhutsatane. Bahamba li-awa nobe ngetulu. Kunemabandla langetulu kwa-50 eLviv. NgemaSontfo, kuyajabulisa kubona bazalwane beta emihlanganweni.
Sasheshe setayelana nebazalwane kanye nabodzadze labebanemoya lomuhle futsi labanelilukuluku lekusita labanye. Bebangibeketelela njengobe nganginenkinga yekuva lulwimi lwabo. Simo sabo sebuso besikhuluma kwendlula loko labebakusho.
Sibonelo lesihamba embili sekwetsemba bazalwane betfu ngasibona emhlanganweni wetive lobewuse-Kiev nga-2003. Sasehlele endzaweni lengephansi yesiteshi sesitimela lesiphitsitelako ngalesikhatsi intfombatanyana ita kitsi itsi: “Ngilahlekile, angimboni gogo wami.” Lentfombatanyana yayibone emabheji etfu futsi yati kutsi siboFakazi. Yayinesibindzi futsi ingakhali. Umfati wembonisi lojikeletako lesasinaye, wayitsatsa wayiyisa enkhundleni yemhlangano eHhovisini Lalokulahlekile Kwaphindze Kwatfolakala. Ngekushesha gogo wayo wayitfola. Kusetsemba kwalentfombatanyana ngisho nasemkhatsini kwesicumbi lesikhulu sebantfu, kwangitsintsa kakhulu.
Bazalwane labachamuka emaveni lehlukehlukene beta e-Ukraine nga-May 2001 ngalesikhatsi kuniketelwa letinye takhiwo letinsha teligatja letfu. Ngemuva kwenkhulumo lekhetsekile leyetfulwa ngeliSontfo ekuseni enkhundleni yemidlalo, bazalwane nabodzadze labanyenti bebahamba ngemgwaco batewubona iBethel lensha. Angikukhohlwa loko lengakubona ngalelolanga! Ngajabula kakhulu kubona labazalwane labebahlelekile, futsi loko kwajulisa kubonga kwami ngenjabulo letfolakala ngekukhonta Nkulunkulu.
LUSHINTJO LOLUKHULU
Kuyadzabukisa kutsi nga-2004, John watfolakala anesifo semdlavuza. Saya eCanada kute ayowelashwa. Emakhemikhali labebawasebentisa nabamelapha kwekucala abemgulisa kakhulu, futsi kwaphela emaviki asendzaweni yalabagula kakhulu. Kuyajabulisa kutsi waphindze waphaphama. Nanobe abengakwati kukhuluma, emehlo akhe abe khombisa kutsi uyabajabulela bonkhe labo labebamvakashela.
John akazange elulame futsi washona. Ngativa shengatsi kukhona lokushodako kimi. Mine kanye naJohn sakujabulela kakhulu kukhonta Jehova sikanyekanye. Bengitawenta njani-ke nyalo? Ngakhetsa kubuyela e-Ukraine. Ngajabula kakhulu ngelutsandvo lengaluboniswa ngemalunga emndeni waseBethel newasebandleni.
Ekuphileni kwetfu asizange sitisole ngetincumo lesatenta. Saphila imphilo lejabulisako, futsi satihlanganisa nebantfu labakahle. Ngiyati kutsi kusenalokunyenti lokufanele ngikufundze ngebuhle baJehova futsi ngiyetsemba kutsi ngitawuchubeka ngenta umsebenti wakhe kuphila kwami konkhe ngobe ‘esandleni saJehova sangesekudla ngitfole injabulo.’
[Emavi lahambisana nesitfombe ekhasini 6]
“Ekuphileni kwetfu asizange sitisole ngetincumo lesatenta”
[Sitfombe ekhasini 3]
Ngalesikhatsi ngishada naJohn
[Sitfombe ekhasini 4]
Ngalesikhatsi ngilihlahlandlela lelikhetsekile eRed Lake, e-Ontario
[Sitfombe ekhasini 5]
NginaJohn e-Ukraine, nga-2002