Kubalulekile Yini Kwati Timphendvulo?
“Niyawulati liciniso, neliciniso liyawunikhulula.”—JOHANE 8:32.
LIBHAYIBHELI licuketse liciniso lelingasikhulula ekudidekeni nome etinkholelweni letidukisako letimayelana naJesu. Kubalulekile yini loko lesikukholelwako ngaye? Yebo. Kubalulekile kuJehova. Kubalulekile kuJesu. Kubalulekile ngisho nakitsi.
● Kungani Kubalulekile KuJehova? Kafishane nje, kungobe “Nkulunkulu ulutsandvo.” (1 Johane 4:8) Jehova ufuna kutsi siphile phakadze ngenjabulo. Jesu watsi: “Nkulunkulu walitsandza live [bantfu] kakhulu kangangekutsi wadzimate wanikela ngeNdvodzana yakhe lekukuphela kwayo, kuze kutsi nome ngubani lokholwa ngiyo . . . abe nekuphila lokuphakadze.” (Johane 3:16) Nkulunkulu watfumela iNdvodzana yakhe kutsi itosihlenga iphindze isivulele nendlela yekutfola kuphila lokuphakadze emhlabeni lolipharadisi, njengobe loko kuvumelana nenjongo yakhe yasekucaleni. (Genesisi 1:28) Nkulunkulu uyakulangatelela kubaniketa sipho lesikuphila phakadze labo labafundza liciniso ngeNdvodzana yakhe baphindze bente ngekuvumelana nalo.—Roma 6:23.
● Kungani kubalulekile kuJesu? NjengaNkulunkulu, Jesu naye uyabatsandza bantfu. Wakhombisa lutsandvo lwekutidzela ngekusifela ngekutitsandzela. (Johane 15:13) Bekati kutsi ngekwenta njalo bekasivulela indlela lekungiyo yodvwa lesiholela ekusindzisweni. (Johane 14:6) Akukafanele yini kusijabulise kutsi Jesu ufuna kutsi bantfu labanyenti bazuze kulomhlatjelo wakhe wenhlawulo? Kungaleso sizatfu atfume balandzeli bakhe beliciniso kutsi bafundzise bantfu emhlabeni wonkhe ngentsandvo nangenjongo yaNkulunkulu.—Matewu 24:14; 28:19, 20.
● Kungani kubalulekile kitsi? Ase ucabange ngetintfo letibaluleke kakhulu kuwe—imphilo yakho kanye nemndeni wakho. Uyakulangatelela yini kutsi wena kanye nalobatsandzako nibe nemphilo lenhle kanye nalencono? NgaJesu, Jehova utsembisa wena kanye nalobatsandzako litfuba lekuba nemphilo lengenakugula nalengeke iphele. Nitawuphila sebungekho buhlungu nekuhlupheka emhlabeni lomusha. (Tihlabelelo 37:11, 29; Sembulo 21:3, 4) Ungatsandza yini kuphila emhlabeni lonjalo? Nangabe kunjalo, kunalokutsite lokudzingeka ukwente.
Phindze ufundze umbhalo lohambisana nesihloko lesitsi: “Niyawulati liciniso, neliciniso liyawunikhulula.” Liciniso ngaJesu kanye nendzima yakhe ekugcwalisekeni kwenjongo yaNkulunkulu kungasikhulula ebugcilini lobukhulu kunabo bonkhe—sono kanye nekufa. Kodvwa-ke, kute utfole lokukhululeka, kufanele ‘ulati liciniso.’ Kungaba njani nawungafundza kabanti ngaleliciniso kanye nangendlela wena nalobatsandzako leningazuza ngayo kulo. Bofakazi baJehova bangakujabulela kukusita kutsi wente njalo.