Kusebalulekile Yini Vele Kukhuluma Liciniso?

Ubona shengatsi sekulukhuni yini kwehlukanisa emkhatsini walokuliciniso nalokungemanga? Lamuhla, tintfo bantfu labatikholelwako tiya ngekutsi bativa njani nobe bacabangani, hhayi ngekutsi liciniso litsini. Bantfu labanyenti emhlabeni wonkhe bakholelwa kutsi kute liciniso.

Akucali kutsi bantfu bative ngalendlela. Eminyakeni lecishe ibe ngu-2 000 leyendlulile, uMbusi wemaRoma Phontiyuse Pilatu, wabuta Jesu ngekwedzelela watsi: “Liyini liciniso?” (Johane 18:38) Nanobe Pilatu angayilindzanga imphendvulo, lombuto wakhe bewubalulekile. LiBhayibheli lingakusita utfole imphendvulo lengakwenetisa futsi wati loko lokuliciniso nobe lokungemanga kulelive leligcwele bantfu labadidekile.

Likhona yini vele liciniso?

Yebo. LiBhayibheli lisebentisa ligama lelitsi “liciniso” nalibhekisela entfweni lekhona mbamba nobe lekahle. Lifundzisa kutsi Jehovaa Nkulunkulu unguMtfombo weliciniso, lize limbite ngekutsi ‘nguNkulunkulu weliciniso.’ (Tihlabelelo 31:5; umbhalo longentasi) LiBhayibheli licuketse liciniso lelivela kuNkulunkulu futsi lilifananisa nekukhanya lokusicondzisako kulelive leligcwele bantfu labadidekile.​—Tihlabelelo 43:3; Johane 17:17.

Ungalitfola njani liciniso?

Nkulunkulu akafuni semukele liciniso leliseBhayibhelini singakacabangisisi ngalo. Kunaloko, usimema kutsi sisebentise emandla etfu ekucabanga kunekuya ngendlela lesitiva ngayo. (KubaseRoma 12:1) Ufuna simati siphindze simtsandze ‘ngayo yonkhe ingcondvo yetfu,’ futsi usikhutsata kutsi sitihlolisisele tsine kutsi loko lesikufundza eBhayibhelini kuliciniso yini.​—Matewu 22:37, 38; Imisebenti 17:11.

Avelaphi emanga?

LiBhayibheli litsi emanga acala ngesitsa saNkulunkulu lesinguSathane Develi, loyo liBhayibheli lelimbita ngekutsi ‘ngubabe wemanga.’ (Johane 8:44) Wacala emanga ngaNkulunkulu kubantfu bekucala. (Genesisi 3:1-6, 13, 17-19; 5:5) Kusukela lapho, Sathane uchubekile nekusakata emanga kanye nekufihlela bantfu liciniso ngaNkulunkulu.​—Sembulo 12:9.

Yini leyenta emanga andze kangaka lamuhla?

Kulesikhatsi setfu, liBhayibheli lelisibita ngekusi ‘ngemalanga ekugcina,’ sebanyenti kakhulu bantfu Sathane labadukisako. Ngalokuvamile, bantfu bakhuluma emanga kuze badukise labanye futsi babayenge. (2 KuThimothi 3:1, 13) Emanga avamile ngisho nasemasontfweni lamanyenti lamuhla. LiBhayibheli laphrofetha kutsi esikhatsini setfu bantfu bebatatifunela “bafundzisi kuze babakitate tindlebe,” futsi bakhetse kuyekela “kulalela liciniso.”​—2 KuThimothi 4:3, 4.

Libaluleke ngani liciniso?

Bantfu badzinga kukhuluma liciniso kuze betsembane. Kungetsembani kucedza bungani futsi kwehlukanise bantfu. LiBhayibheli litsi Nkulunkulu ufuna simkhonte ngeliciniso. ‘Labo labakhonta Nkulunkulu kufanele bamkhonte ngemoya nangeliciniso.’ (Johane 4:24) Kuze utfole kutsi liciniso leliseBhayibhelini lingakusita njani ubone emanga lafundziswa yinkholo futsi ungawavumeli kutsi alawule kuphila kwakho, fundza luchungechunge lwetihloko letitsi “Yimaphi Amanga Aqhelisa Abantu KuNkulunkulu,” letitfolakla ngesiZulu.

Yini leyenta Nkulunkulu afune ngati liciniso?

Nkulunkulu ufuna siphile phakadze, futsi kuze sikutfole, sidzinga kwati liciniso ngaye. (1 KuThimothi 2:4) Nawufundza ngetimiso taNkulunkulu talokulungile nalokungakalungi futsi uphila ngato, utawuba ngumngani wakhe. (Tihlabelelo 15:1, 2) Kuze asite bantfu bafundze liciniso, Nkulunkulu watfumela Jesu emhlabeni futsi ufuna kutsi silalele loko Jesu lakufundzisa.​—Matewu 17:5; Johane 18:37.

Nkulunkulu utabacedza yini bantfu labacala emanga?

Yebo. Nkulunkulu uyabenyanya bantfu labacala emanga kuze badukise labanye. Wetsembise kutsi utabacedza bantfu labachubeka bacala emanga. (Tihlabelelo 5:6) Nkulunkulu nakacedza bantfu labakhuluma emanga, utawugcwalisa setsembiso sakhe lesitsi: “Imilomo lekhuluma liciniso itawuhlala ikhona kuze kube phakadze.”​—Taga 12:19.