‘Chubeka Uhamba Ecinisweni’

1. Kusisita ngani kucoca ngekutsi salitfola njani ‘liciniso’?

“WALITFOLA njani liciniso?” Kungenteka sewuwuphendvule tikhatsi letinyenti lombuto. Lona ngumbuto wekucala lesivame kuwubuta bazalwane betfu nabodzadze nasifuna kubati kancono. Siyatsandza kubeva basitjela kutsi bamati njani Jehova naloko lokwabenta bamtsandza. Natsi siyatsandza kubacocela kutsi yini leyasenta salitsandza liciniso. (Rom. 1:11) Kucoca ngaloku kusikhumbuta kutsi libaluleke kanganani liciniso kitsi. Kuphindze kusisite sitimisele kakhulu ‘kuchubeka sihamba ecinisweni,’ lokusho kuchubeka siphila ngendlela letawenta Jehova asibusise futsi asemukele.​—3 Joh. 4.

2. Sitawucoca ngani kulesihloko?

² Kulesihloko, sitawucoca ngaletinye tizatfu letenta silitsandze liciniso. Sitawubese sicoca ngekutsi yini lesingayenta kuze sichubeke sikhombisa kutsi siyasitsandza lesipho lesiligugu. Siyaciniseka kutsi kucoca ngaloku kutawusenta simbonge kakhulu Jehova ngekusidvonsela ecinisweni. (Joh. 6:44) Lesihloko sitawuphindze sisisite kutsi sitimisele kakhulu kucocela labanye ngeliciniso.

YINI LEYENTA SILITSANDZE ‘LICINISO’?

3. Ngusiphi sizatfu lesihamba embili lesisenta selitsandze liciniso?

³ Sinetizatfu letinyenti tekulitsandza liciniso. Lesihamba embili kutsi siyamtsandza Jehova Nkulunkulu longuMtfombo weliciniso. EVini lakhe liBhayibheli, asigcini nje ngekufundza kutsi unguMdali lonemandla welizulu nemhlaba, kodvwa siphindze sifundze kutsi unguBabe wetfu wasezulwini lositsandzako nalosikhatsalela kakhulu. (1 Phet. 5:7) Siyati kutsi Nkulunkulu wetfu ‘unesihawu neluvelo, uyephuta kutfukutsela futsi uchichima lutsandvo lolucotfo neliciniso.’ (Eks. 34:6) Jehova uyakutsandza kulunga. (Isa. 61:8) Kumvisa buhlungu kusibona sihlupheka futsi uyakulangatelela kukucedza konkhe kuhlupheka. (Jer. 29:11) Sisibuke ngalabovu leso sikhatsi! Kungako simtsandza kangaka Jehova!

4-5. Yini leyenta umphostoli Pawula wafananisa litsemba letfu nelihhuka lemkhumbi?

⁴ Ngusiphi lesinye sizatfu lesisenta silitsandze liciniso? Liciniso lisisita kakhulu. Cabanga nganasi sibonelo. Liciniso leliseBhayibhelini, lifaka ekhatsi litsemba letfu ngelikusasa. Kuze umphostoli Pawula afananise kubaluleka kwalelitsemba, wabhala watsi: “Sinalelitsemba lelinjengelihhuka lemkhumbi emiphefumulweni yetfu. Lelitsemba licinisekisiwe futsi licinile.” (Heb. 6:19) Njengobe lihhuka lemkhumbi liwubamba, litsemba letfu lelisekelwe eBhayibhelini lingasicinisa nasibhekene netinkinga ekuphileni.

⁵ Kulelivesi, Pawula bekakhuluma ngelitsemba lemaKhristu lagcotjiwe lekuphila ezulwini. Kodvwa loko lakusho kuyasebenta nakumaKhristu lanelitsembba lekuphila phakadze emhlabeni lolipharadisi. (Joh. 3:16) Kufundza ngelitsemba lekuphila phakadze emhlabeni kwente kuphila kwetfu kwaba nenjongo.

6-7. Kumsite njani Yvonne kufundza liciniso mayelana nelikusasa?

⁶ Cabanga ngalokwenteka kulomunye dzadze lokutsiwa nguYvonne. Akazange akhulele ecinisweni, futsi ngesikhatsi asengumntfwana bekakwesaba kufa. Ukhumbula lamanye emavi lawafundza, lahlala engcondvweni yakhe lebekatsi: “Ngalelinye lilanga angeke kuse.” Utsi: “Lamavi bekangenta ngingalali ebusuku ngicabanga ngelikusasa. Bengicabanga ngitsi: ‘Kufanele kube kuphila akupheleli lana. Ngiphilelani?’ Bengingafuni kufa!”

⁷ Nakaseminyakeni yekutfomba, Yvonne wahlangana naBoFakazi BaJehova. Utsi: “Ngacala kukholelwa kutsi ngingaba nalo litsemba lekuphila phakadze emhlabeni loliPharadisi.” Kumsite njani lodzadzewetfu kufundza liciniso? Uchubeka utsi: “Nyalo akusenteki ngingalali ebusuku solo ngicabanga ngelikusasa nobe ngekufa.” Liciniso liligugu kakhulu kuYvonne, futsi uyakujabulela kucocela labanye ngelitsemba lakhe lesikhatsi lesitako.​—1 Thim. 4:16.

8-9. (a) Kulomuntfu lokukhulunywa ngaye emfanekisweni waJesu, bewubaluleke kangakanani umcebo lawutfola? (b) Libaluleke kanganani liciniso kuwe?

⁸ Liciniso leliseBhayibhelini liphindze lifake ekhatsi tindzaba letimnandzi teMbuso waNkulunkulu. Jesu wafananisa leliciniso leMbuso nemcebo lofihliwe. KuMatewu 13:44 Jesu watsi: “UMbuso wemazulu ufana nemcebo lofihlwe ensimini, umuntfu lawutfola wase uyawufihla, futsi ngenca yekutsi abejabulile, wahamba watsengisa konkhe lanako wase utsenga leyo nsimu.” Naka kutsi lomuntfu bekangahambi afuna lomcebo. Kodvwa watsi nakawutfola wadzela tintfo letinyenti kuze ube wakhe. Ecinisweni watsengisa konkhe lebekanako. Ngasiphi sizatfu? Ngobe bekati kutsi lomcebo uligugu kangakanani. Bewubaluleke kakhulu kwendlula nobe yini lebekatayidzela.

⁹ Utiva kanjalo yini nawe ngeliciniso? Siyaciniseka kutsi utiva kanjalo! Loko sikusho ngobe kute lutfo kulelive lokubaluleke kakhulu kwendlula injabulo lesiyitfola ngekukhonta Jehova nyalo sinelitsemba lekuphila phakadze ngephansi kweMbuso waNkulunkulu. Buhlobo lobuhle lesinabo naJehova bubaluleke kakhulu kitsi kwendlula nobe ngabe yini lesingahle siyidzele. Sitfola injabulo lenkhulu ‘ngekumjabulisa ngalokuphelele.’​—Khol. 1:10.

10-11. Yini leyenta Michael wenta lushintjo ekuphileni kwakhe?

¹⁰ Linyenti letfu lidzele tintfo letinyenti kuze semukelwe nguJehova. Labanye bashiye imisebenti lebeyiholela kahle kulelive. Labanye bayekele kwetama kuba nemali lenyenti. Kantsi labanye batsite nabafundza ngaJehova bashintja indlela lebebaphila ngayo. Nguloko lokwentiwa nguMichael. Akazange akhulele ecinisweni. Nakaselijaha, wafundzela ikaraji. Utsi: “Bekubaluleke kakhulu kimi kutsi ngihlale ngicinile. Ngaletinye tikhatsi bengiva ngatsi kute longangehlula.” Kodvwa ngesikhatsi Michael acala kudadisha liBhayibheli, wafundza indlela Jehova lativa ngayo ngebudlova. (Hla. 11:5) Michael nakakhuluma ngalabashadene lebebadadisha naye liBhayibheli, utsi: “Abazange bangitjele kutsi ngiyekele ikaraji, bachubeka bangifundzisa liciniso leliseBhayibhelini.”

¹¹ Njengobe bekachubeka afundza ngaJehova, lakhula lizinga lebekamtsandza ngalo. Lwamtsintsa kakhulu luvelo Jehova lalukhombisa labo labamkhontako. Ngekuhamba kwesikhatsi, Michael wabona kutsi bekudzingeka ente sincumo lesibalulekile ekuphileni kwakhe. Utsi: “Bengati kutsi kuyekela ikaraji bekutawuba matima kakhulu kwendlula nobe yini lengike ngetama kuyiyekela ekuphileni kwami. Kodvwa bengati nekutsi bekutamjabulisa Jehova futsi bengiciniseka kutsi kumkhonta kubaluleke kakhulu kwendlula nobe yini lengingayidzela.” Liciniso lebekalitfolile beliligugu kakhulu, kungako bekatimisele kwenta lushintjo lolukhulu ekuphileni kwakhe.​—Jak. 1:25.

12-13. Lamsita njani Mayli liciniso leliseBhayibhelini?

¹² Kuze sibone kubaluleka kweliciniso, liBhayibheli lilifananisa nesibane lesikhanyisa ebumnyameni. (Hla. 119:105; Ef. 5:8) Mayli, wase-Azerbaijan, ujabula kakhulu ngendlela liVi laNkulunkulu lelimsite ngayo. Wakhulela emndenini lonetinkholo letehlukene. Babe wakhe abengum-Muslim, make wakhe angumJuda. Utsi: “Nanobe bengati kutsi Nkulunkulu ukhona, kodvwa benginemibuto leminyenti. Bengitibuta: ‘Nkulunkulu wabadalelani bantfu, futsi kusita ngani kutsi umuntfu ahlupheke kuphila kwakhe konkhe bese kutsi angafa ahlushwe esihogweni kuze kube phakadze?’ Ngenca yekutsi bantfu batsi konkhe lokwentekako kuyintsandvo yaNkulunkulu, bengitibuta: ‘Kungenteka yini kutsi Nkulunkulu ulawula kuphila kwebantfu bese-ke uyababukelela bahlupheke?’”

¹³ Mayli wachubeka afuna timphendvulo temibuto yakhe. Ngekuhamba kwesikhatsi, wemukela sifundvo seliBhayibheli futsi wemukela neliciniso. Utsi: “Tintfo letishiwo liBhayibheli tinengcondvo futsi loko kwangenta ngajabula. Indlela lecacile lelichaza ngayo tintfo yangenta ngaba nekuthula.” NjengaMayli, sonkhe siyamdvumisa Jehova ‘lowasibita saphuma ebumnyameni sangena ekukhanyeni kwakhe lokumangalisako.’​—1 Phet. 2:9.

14. Yini lesingayenta kuze sichubeke silitsandza liciniso? (Buka nelibhokisi lelitsi “Letinye Tintfo Lesingalifananisa Nato Liciniso LeliseBhayibhelini.”)

¹⁴ Leti tizatfu letimbalwa kuletinyenti letiveta kubaluleka kweliciniso. Siyaciniseka kutsi tikhona letinye loticabangako. Kungaba njani nawutidadishela liBhayibheli ufune letinye tizatfu letingasenta silitsandze liciniso? Nawuchubeka ulitsandza liciniso, utawutfola tindlela letinyenti tekukukhombisa loko.

INDLELA LESIKHOMBISA NGAYO KUTSI SIYALITSANDZA LICINISO

15. Singakhombisa njani kutsi siyalitsandza liciniso?

¹⁵ Singakhombisa kutsi siyalitsandza liciniso ngekutsi sidadishe liBhayibheli njalo kanye netincwadzi letisekelwe kulo. Ngetulu kwako konkhe, ngisho nobe sesinesikhatsi lesidze kangakanani sisecinisweni, kusekunyenti lesingakufundza. Magazini wekucala we-Sicongosekulindza watsi: “Kunemanga lamanyenti kulelive kangangekutsi kumatima kubona liciniso. Kuze ulitfole, kufanele uhlale ulifuna. . . . Kufanele uhlale wenta imetamo kuze ulitfole. Hlale wetama kamatima. . . . kutfola emaciniso lamanyenti laseBhayibhelini.” Kudadisha kungumsebenti kodvwa angeke utisole ngemetamo loyentako.

16. Nguyiphi indlela lekusebentelako nawudadisha liBhayibheli? (Taga 2:4-6)

¹⁶ Akusitsi sonkhe lesikutsandzako kufundza nekudadisha. Kodvwa Jehova usitjela kutsi ‘sichubeke sifuna’ futsi ‘sichubeke simba’ kuze sitalicondza kancono liciniso. (Fundza Taga 2:4-6.) Sitawusitakala nasenta njalo. Nakakhuluma ngekufundza liBhayibheli, Corey utsi unaka livesi linye ngesikhatsi sinye. Utsi: “Ngifundza yonkhe imibhalo lengentansi, ngibuke onkhe emavesi lahambisana nalo ngiphindze ngicwaninge. . . . Ngifundza lokunyenti nangisebentisa lendlela!” Ngisho nobe sisebentisa lendlela nobe lenye, sisuke sikhombisa kutsi siyalitsandza liciniso nasisebentisa sikhatsi setfu nemandla kuze sidadishe.​—Hla. 1:1-3.

17. Kusho kutsini kuphila ngekuvumelana neliciniso? (Jakobe 1:25)

¹⁷ Siyati kutsi akukeneli kufundza liciniso. Kuze sisitakale kakhulu, kufanele sikusebentise loko lesikufundzako ekuphileni kwetfu. Nasenta njalo, liciniso litawusenta sijabule mbamba. (Fundza Jakobe 1:25.) Yini lesingayenta kuze siciniseke kutsi siphila ngekuvumelana neliciniso? Lomunye umzalwane watsi singatihlola kuze sibone kutsi siyakusebentisa yini loko lesikufundzako ekuphileni kwetfu, sihlole nalapho kufanele sitfutfukise khona. Umphostoli Pawula watsi: “Ngelizinga lesesitfutfuke ngalo, asichubekeleni embili ngendlela lefanako.”​—Fil. 3:16.

18. Yini leyenta sente konkhe lesingakwenta kuze ‘sichubeke sihamba ecinisweni’?

¹⁸ Cabanga nje kutsi sisitakala kangakanani nasenta konkhe lesingakwenta kuze ‘sichubeke sihamba ecinisweni’! Akugcini nje ngekwenta imphilo yetfu ibe ncono, kodvwa siphindze sijabulise Jehova nebazalwane betfu nabodzadze. (Taga 27:11; 3 Joh. 4) Leti tizatfu letibalulekile tekutsandza liciniso nekuphila ngekuvumelana neliciniso.