Lokungakusita Kute Uphile Ngemali Lencane
OBED lonebantfwana lababili usebente ehhotela lelisezingeni lelisetulu iminyaka lelishumi edolobheni lelikhulu lelise-Afrika. Bekete nalencane inkinga yekwentela umndeni wakhe nome ngabe yini loyifunako. Ngaletinye tikhatsi, bekahamba nemndeni wakhe bativakashele endzaweni yekugcina tilwane leseveni lakubo bayotijabulisa. Konkhe loku kwaphela ngalesikhatsi aphelelwa ngumsebenti ngesizatfu sekutsi lihhotela labesebenta kulo beselinemakhasimende lamancane.
Stephen usebente iminyaka lengetulu kwalengu-22 waze wagcina sekasesikhundleni lesisetulu ebhange lelikhulu. Emsebentini bamniketa indlu, imoto, tisebenti tasendlini futsi bamfundzisela bantfwabakhe etikolweni letisembili. Ngalesikhatsi lelibhange lishintja indlela yekusebenta kwetisebenti, yena wavele waphelelwa ngumsebenti. Utsi: “Mine nemndeni wami setfuka kakhulu. Ngeva buhlungu lobukhulu, ngatfukutsela futsi ngacindzeteleka.”
Tintfo letinjena tihlale tibehlela bantfu. Kuwa kwemnotfo lokuchubekako emhlabeni wonkhe kwente tinkhulungwane tebantfu lebebahola kahle baphelelwa ngumsebenti. Bantfu labanyenti labakhone kutfola umsebenti bavumile kuhola imali lencane naloku tintfo tichubeka nekudula. Nome ngabe live litfutfukile nome cha, kute ngisho linye live emhlabeni lelite tinkinga temnotfo.
Kudzingeka Kuhlakanipha
Nangabe sihola imali lencane nobe siphelelwe ngumsebenti, simo lesinjalo singasicindzetela kakhulu. Kuliciniso kutsi umuntfu angeke atibalekele letinye tintfo leticindzetelako letenteka ekuphileni. Indvodza lehlakaniphile yatsi: “Nawukhubatela ngesikhatsi lesibucayi, usuke unemandla lamancane.” (Taga 24:10) Esikhundleni sekutsi sikhatsateke nangabe umnotfo uwa, kufanele sihlole liVi laNkulunkulu kute ‘sihlakaniphe.’—Taga 2:7.
Nanobe liBhayibheli lingesiyo incwadzi yetimali, seluleko salo mayelana nendlela yekusebentisa imali sisite tigidzi tebantfu emhlabeni wonkhe. Ase sihlole letinye tato mayelana nalendzaba.
Bala tindleko. Cabanga ngemavi aJesu laku-Lukha 14:28 latsi: “Ngubani emkhatsini wenu longatsi afuna kwakha sitezi lesikhulu, angahlali phansi kucala, abale tindleko, abukisise kutsi unayo yini imali leyenele kutsi angasicedza lesitezi?” Kwenta lokushiwo nguleseluleko kusho kutsi kufanele utentele luhlelo lwetintfo lofuna kutitsenga (budget) futsi ungatitsengi tintfo longakahleli kutitsenga. Kwenta loku kungase kube yinsayeya njengobe na-Obed asho. Utsi: “Ngalesikhatsi ngisasebenta kahle besihlale sitsenga tintfo lesingatidzingi. Besingalwenti luhlelo lwetintfo lesifuna kutitsenga ngobe besihlale sinemali yekutsenga nome yini lesiyifunako.” Kuyihlela kahle imali leninayo manje, kutawukwenta kutsi niyisebentise etintfweni lenitidzingako emndenini.
Tivumelanise nesimo lesishintjile. Kwemukela kuphila lokuphansi kunaloku bewukwetayele, kungaba yinsayeya kodvwa kufanele ukwemukele. Saga seliBhayibheli sitsi: “Umuntfu lohlakaniphile ingoti uyibona iseta, bese uyayibalekela.” Stephen utsi: “Kuze songe imali, bekufanele siyohlala endlini yetfu lencane lebeyingakapheli kwakhiwa ngekhatsi. Bantfwana besekufanele bayofundza etikolweni letingakaduli kakhulu kodvwa nato betinemfundvo lesezingeni lelisetulu.”
Kucocisana njengemndeni kubalulekile kute niphumelele ekuvumelaneni nendlela lensha yekuphila. Austin losebente enhlanganweni yetimali iminyaka leyimfica asengakaphelelwa ngumsebenti, utsi: “Mine nemfati wami sahlala phansi sabhala tintfo lesitidzinga kakhulu. Bekufanele singasakutsengi kudla lokudulile, singasacitsi imali lenyenti ekuvakasheni nasekutsengeni timphahla letinsha njalo. Ngiyajabula ngekutsi umndeni wami wabambisana nami kuto tonkhe letingucuko.” Kuliciniso kutsi bantfwana labancane bangase bangasiboni sizatfu lesenta kudzingeke kwentiwe letingucuko kodvwa njengebatali ningabasita bakubone loko.
Timisele kwemukela leminye imisebenti. Nangabe bewetayele kusebenta ehhovisini, kusebenta umsebenti lodzinga emandla kungabonakala kumatima. Austin utsi: “Bekumatima kutsi ngemukele umsebenti lophansi kantsi bengingumphatsi labengisebenta khona.” Esimeni lesinjalo, kuTaga 29:25 liBhayibheli litsi: “Kwesaba bantfu kulugibe.” Kuhlale ucabanga kutsi bantfu batawutsini, ngeke kukunikete imali yekondla umndeni wakho. Yini lengakusita kutsi ulwe nemicabango lenjalo?
Kudzingeka utfobeke. Ngemuva kwekuphelelwa ngumsebenti Obed wacashwa ngulomunye labekasebenta naye ehhotela loneligalaji lelilungisa timoto. Lomsebenti bewudzinga kutsi ahambe emabanga lamadze emgwacweni lonetintfuli kute ayotsatsa bopende betimoto naletinye tintfo. Obed utsi: “Bengingawutsandzi lomsebenti kodvwa bekute emasito. Kutfobeka kwangisita kutsi ngetayele kuhola imali lencane lebeyingafiki ngisho ekoteni yemali lebengiyihola langake ngasebenta khona kucala kodvwa beyenele kute nginakekele tidzingo temndeni wami.” Wena kungakusita yini kumlingisa?
Yeneliseka. Nasichaza umuntfu lowenelisekako lesinye sichazamagama sitsi “uyajabula futsi uyasemukela simo lakuso.” Inchazelo lenjalo ingase ibonakale ingesilo liciniso kumuntfu lonetinkinga temali. Nanobe kunjalo, cabanga ngemavi emphostoli Pawula lobekasitfunywa selivangeli lesikwatiko kweswela. Watsi: “Sengifundze kutsi ngeneliseke nome ngikusiphi simo. Ngiyakwati kuba phansi, kantsi futsi ngiyakwati nekubusa.”—Filiphi 4:11, 12.
Simo setfu kungenteka sibe ncono kodvwa kuletikhatsi letishintjashintjako, singase sibe sibi kakhulu. Singazuza kakhulu nasitsatsa seluleko saPawula lesiseBhayibhelini lesitsi: “Vele kuyinzuzo lenkhulu kwesaba Nkulunkulu kanye nekweneliseka. Kodvwa nasinekudla nekwekwembatsa, aseneliseke.” Pawula abengakhutsati kuvilapha kodvwa abesikhombisa tintfo letibalulekile ekuphileni.—1 Thimothi 6:6, 8.
Tfola Injabulo Lengiyo
Injabulo sibili ayitfolakali ngekuba nato tonkhe tintfo lotifunako futsi ayitfolakali ngekuphila lokuntofontofo. Jesu watsi: “Kubusisiwe kupha kunekwemukela.” Injabulo nekweneliseka kutfolakala ngekusita labanye ngalesinako nangekubakhutsata.—Imisebenti 20:35.
UMdali wetfu, Nkulunkulu Jehova, uyati kutsi yini lesiyidzingako. NgeliVi lakhe liBhayibheli, usiniketa seluleko lesisite bantfu labanyenti kutsi bente kuphila kwabo kube ncono futsi bangacindzeteleki. Kuliciniso kutsi simo setimali ngeke sisheshe silunge. Bantfu ‘labafuna kucala umbuso waNkulunkulu kanye nekulunga kwakhe,’ Jesu wabacinisekisa ngekutsi tonkhe tidzingo tabo titawunakekelwa.—Matewu 6:33.