“Angeke Siyikhohlwe,” Yefika Ngesikhatsi Lesifanele

“ANGEKE SIYIKHOHLWE!” Nguloko lokwashiwo bantfu labanyenti nabachaza i-“Creation Drama.” Yefika ngesikhatsi lesifanele futsi labo labayibukela abazange bayikhohlwe. Kuliciniso kutsi i-“Creation Drama” yaniketa bufakazi lobukhulu kute kudvunyiswe Jehova ngembikwekutsi umbuso waHitler ucale kubahlupha kamatima bantfu baKhe eYurophu. Beyiyini i-“Creation Drama”?

Nga-1914, indlunkhulu yebantfu baJehova eBrooklyn, eNew York, eMelika, yakhulula i-“Photo-Drama of Creation.” Lena bekuyi-drama letsatsa ema-awa lasiphohlongo inema-slides etitfombe letinyakatako, letinemibala nemisindvo leyehlukehlukene. Yabukelwa tigidzi tebantfu emhlabeni wonkhe. Nga-1914, kwaphindze kwakhululwa neluhlelo lwale-drama lolutsatsa sikhatsi lesincane, lobelunesihloko lesitsi “Eureka Drama.” Kodvwa kwatsi ngabo-1920, abesagugile lama-slides, emafilimu nemishini yekuveta titfombe. Nobe kunjalo, bantfu bebasafuna kuyibukela i-“Photo-Drama.” Nasi sibonelo: Takhamuti taseLudwigsburg, eJalimane, tabuta tatsi: “Itawuphindze ibukelwe nini i-‘Photo-Drama’?” Bekutawentiwa njani?

Kute kwenetiswe sidzingo sekubukela le-Drama, ngabo-1920 bameleli bemndeni waseBethel yaseMagdeburg, eJalimane, batsenga emafilimu kulenye inkampani yetindzaba eParis, eFulansi, nema-slides enkampaneni lesebenta ngetitfombe eLeipzig naseDresden. Letintfo tahlanganiswa nalamanye ema-slides e-“Photo-Drama” labesasebenta.

Umzalwane Erich Frost, lobekanelikhono lemculo, wacamba tingoma lebetitawuhambisana nalamafilimu nema-slides. Lokunye kulandzisa kwale-drama bekutsetfwe encwadzini letsi Creation. Ngaleso sizatfu, loluhlelo lolubuketiwe lwe-“Photo-Drama” lwabitwa ngekutsi yi-“Creation Drama.”

Le-Drama lensha beyitsatsa sikhatsi lesilingana nese-“Photo-Drama”—ema-awa lasiphohlongo—futsi beyibukelwa ngetincenye letehlukene ngekulandzelana ngetikhatsi tantsambama. Beyiveta imininingwane lemangalisako ngemalanga ekudala, yabuketa umlandvo weliBhayibheli nenkholo yaphindze yaveta kutsi inkholo yemanga beyehlulekile kucondzisa bantfu. Le-“Creation Drama” yabukelwa e-Austria, eJalimane, eLuxemburg naseSwitzerland, nakuletinye tindzawo lebetinebantfu labakhuluma siJalimane.

Erich Frost uyachaza: “Nakubukelwa le-Drama, bengikhutsata lebengikanye nabo, ikakhulukati labo labebadlala tinsimbi temculo kutsi basebentise sikhatsi selikhefu kute banikete tibukeli letinye tincwadzi tetfu netincwajana. Sahambisa tincwadzi letinyenti kakhulu kunaleto lebesitihambisa emtini ngemuti.” Johannes Rauthe, lobekahlela kubukelwa kwale-drama ePoland nasendzaweni lamuhla lebitwa ngekutsi yiCzech Republic, uyakhumbula kutsi bantfu labanyenti labebakhona bebashiya emakheli abo kute bavakashelwe. Lawo makheli abesetjentiswa kute kubuyelwe kulabo bantfu futsi kucocwe ngeliBhayibheli.

Nakucala bo-1930, i-“Creation Drama” beseyibukelwa bantfu labanyenti, futsi emadolobheni besekukhulunywa ngaboFakazi BaJehova. Nga-1933, besekunebantfu labacishe babe sigidzi lababakhona nayibukelwa etindzaweni lebetihlelwe lihhovisi leligatja laseJalimane. Käthe Krauss utsi: “Kute sibukele le-Drama kulamalanga lasihlanu, besihamba emakhilomitha lalishumi nasiya khona, sendlule emahlatsini futsi sehla senyuka etintsabeni nasetigodzini.” Else Billharz utsi: “I-‘Creation Drama’ yaba sisekelo selutsandvo lwami ngeliciniso.”

Alfred Almendinger uyachaza kutsi ngesikhatsi make wakhe abukela le-Drama, “wajabula kakhulu waze watsenga liBhayibheli, afuna kubona kutsi liyakhuluma yini ngekuhlushwa kwebantfu labafile ngembikwekutsi baye ezulwini.” Njengobe angazange akutfola loko eBhayibhelini, wayekela kuya esontfweni futsi wabhajatiswa. Erich Frost uyakhumbula: “Bantfu labanyenti balemukela liciniso ngemuva kwekubukela i-‘Creation Drama.’”—3 Joh. 1-3.

Ngesikhatsi i-“Creation Drama” ibukelwa bantfu labanyenti, licembu lemaNazi eYurophu beselicala kuba nemandla futsi lihlupha. Kusukela nga-1933, imisebenti yaboFakazi eJalimane yavinjelwa. Kusukela ngaleso sikhatsi kuchubeke kwaze kwaba sekupheleni kwemphi yelive yesibili nga-1945, tinceku taJehova eYurophu tabhekana nekuhlushwa lokukhulu. Erich Frost wacitsa iminyaka lengaba siphohlongo aboshiwe. Kodwva wasindza kuloko wase ukhonta eBethel yaseWiesbaden, eJalimane. Kuyajabulisa kutsi le-“Creation Drama” yefika ngesikhatsi kute icinise sibindzi semaKhristu lamanyenti labekatawubhekana nekuvivinywa kwekukholwa kwawo ngeMphi Yelive Yesibili—Lokuvela emtatjeni wetfu eJalimane.