“Ngacala Kucabangisisa Ngesiphetfo Semphilo Lebengiyiphila”

KUPHILA KWAMI KWESIKHATSI LESENGCILE:

Ngakhululela eWarialda, lidolobha lelincane lelise-New South Wales. I-Warialda, yindzawo lenetindlela letehlukehlukene tekulima nekufuya lokwentiwako, lokufaka ekhatsi kufuya timvu netinkhomo, nekulima lokutinhlavu kanye naletinye tilimo. Lelidolobha lihlobile futsi lite nebugebengu kangako.

Njengobe ngingulomdzala kubantfwana bakitsi labalishumi, ngatsi nangineminyaka lengu-13 ngacala kusebenta kuze ngisite ekunakekeleni tidzingo temndeni wakitsi. Njengobe ngingafundzanga lokuyaphi, ngasebenta emapulazini. Nangineminyaka lengu-15, bengisebenta kwelusa, ngicecesha emahhashi esiganga kutsi ejwayele kuphila nebantfu.

Kusebenta emapulazini, bekunetinhlangotsi letimbili letehlukene. Eluhlangotsini lwekucala, bengiwujabulela umsebenti lebengiwenta kanye nendzawo lebengisebentela kuyo. Bengihlala esigangeni ebusuku, ngotse umlilo futsi ngibuke inyanga kanye nesibhakabhaka lesigcwele tinkhanyenti njengobe umoya wasebusuku uphephetsa liphunga lelimnandzi letihlahla lebetikuleyondzawo uliletsa ngakimi. Ngikhumbula ngicabanga kutsi kufanele kube kunalotsite lowadala tonkhe letintfo letinhle. Ngakulolunye luhlangotsi, kulendzawo bekunemikhuba lemibi lebengingatikhandza sengingene kuyo. Ngangivame kuva tinhlamba futsi kumelula ngami kutfola bosikilidi. Masinyane, kubhema nekwetfuka kwangingena umkhono nesiphanga.

Nangiba neminyaka lengu-18, ngatfutsela eSydney. Ngetama kungena ebutfweni lemasotja kodvwa bangala ngoba bengingakafundzi lokuyaphi. Ngatfola umsebenti ngase ngihlala eSydney umnyaka munye. Kungaleso sikhatsi lapho ngahlangana kwekucala ngca naboFakazi baJehova. Bangimemela kulomunye wemihlangano yabo, ngaya futsi ngekushesha ngacaphela kutsi timfundziso tabo tivakala tiliciniso.

Masinyane ngemuva kwaloko, ngancuma kubuyela emapulazini. Ngagcina sengiseGoondiwindi, eQueensland. Ngatfola umsebenti ngase ngiyashada, kodvwa ngelishwa ngacala kunatsa tjwala.

Mine nemfati wami, saba nebantfwana lababili. Ngemuva kwekutalwa kwalamadvodzana ami, ngacala kucabangisisa ngesiphetfo semphilo lebengiyiphila. Ngakhumbula loko lebengikuve emhlanganweni waboFakazi eSydney futsi ngancuma kwenta lokutsite ngako.

Ngatfola Sicongosekulindza lesidzala lebesinelikheli lelihhovisi leligatja laboFakazi baJehova lase-Australia. Ngababhalela incwadzi ngicela lusito. Bangiphendvula ngekutsi bangitfumelele Fakazi lonemusa nelutsandvo kutsi angivakashele. Masinyane wacala kutadisha nami liBhayibheli.

INDLELA LIBHAYIBHELI LELAKUGUCULA NGAYO KUPHILA KWAMI:

Njengobe bengitadisha liBhayibheli, ngabona kutsi kudzingeka ngente lushintjo lolukhulu emphilweni yami. Lelinye lemavesi lebelingishaya kakhulu bekungu-2 Khorinte 7:1. Lelivesi lisikhutsata kutsi ‘sitihlante kuko konkhe lokungcolisa umtimba.’

Ngancuma kutsi ngitawuyekela kubhema kanye nekusebentisa kabi tjwala. Kwakungesilula kwenta loloshintjo njengobe lemikhuba besekusikhatsi lesidze ingingene umkhono nesiphanga. Kodvwa ngangitimisele kuphila ngendlela lejabulisa Nkulunkulu. Lokwangisita kakhulu kwaba kusebentisa simiso lesiku-Roma 12:2 lesitsi: “Ningalilingisi lelive, kodvwa niguculwe ngekwentiwa kabusha kwengcondvo yenu.” Ngacaphela kutsi kuze ngishintje imikhuba yami, bekudzingeka ngishintje indlela lengicabanga ngayo, futsi njengaNkulunkulu ngiyibone lemikhuba lebengiyenta kutsi iyingoti. Ngelusito lwakhe, ngaphumelela kuyekela kubhema nekudzakwa.

Lebekumatima kakhulu bekukuyekela inhlamba. Bengisati seluleko seliBhayibheli lesibhalwe ku-Efesu 4:29, lesitsi: “Akungabe kusaphuma nalinye livi lelibolile emlonyeni wenu.” Nanome kunjalo, angizange ngikhone kuyiyekela ngekushesha inhlamba. Ngakutfola kulusito kuzindla ngemavi laku-Isaya 40:26. Nalikhuluma ngemazulu lagcwele tinkhanyeti, lelivesi litsi: “Phakamiselani emehlo enu ezulwini: Ngubani lowadala konkhe loku? Nguye lokhipha emabutfo etinkhanyeti ngayinye ngayinye, atibite tonkhe tinkhanyeti nguleyo naleyo ngelibito layo. Ngenca yemandla akhe lamakhulu nangebukhulu bemandla akhe, kute nome yinye lesilelako.” Ngacabanga ngatsi, nangabe Nkulunkulu anawo emandla ekudala emazulu lamakhulu kangaka, lengize ngikujabulele kuwabuka, akungabateki kutsi anganginiketa emandla ekwenta tingucuko kuze ngimjabulise yena. Ngekusitwa yimithantazo nemetamo lebengiyenta, kancane kancane ngakhona kulawula lulwimi lwami.

INDLELA LENGIZUZE NGAYO:

Nangisengumelusi, bengingalitfoli litfuba lelingako lekucoca nebantfu, njengobe bebabancane bantfu lebebakhona kulawo mapulazi lebengisebenta kuwo. Nome kunjalo, ngekuceceshwa lokutfolakala emihlanganweni yaboFakazi baJehova, sengikufundzile kukhuluma. Kunyenti lokunye lengisitakele ngako kulemihlangano. Lokunye kwako kutsi ingiceceshile kuze ngikhone kukhuluma nalabanye ngetindzaba letimnandzi teMbuso waNkulunkulu.—Matewu 6:9, 10; 24:14.

Kuleminyaka leminengana leyendlulile, ngijabulele kuba ngulomdzala ebandleni. Ngikutsatsa njengesibusiso kwenta noma yini lengingayenta kuze ngisite labo lengikhonta kanye nabo. Sibusiso sami lesikhulu kutsi ngikhonte Jehova ngikanye nemfati wami lowetsembekile futsi longitsandzako kanye nebantfwabetfu labangemakhwa.

Ngibonga Jehova ngekuvumela umuntfu lonjengami, longakafundzi lokuyaphi, kutsi afundziswe nguye. (Isaya 54:13) Ngivumelana ngalokuphelele nemavi lakuTaga 10:22, latsi: “Sibusiso saSimakadze lesenta umuntfu acebe, akengeti kuhlupheka kuso.” Mine nemndeni wami sitimisele kuchubeka sifundza ngaJehova futsi simkhonte kuze kube phakadze.