LiBhayibheli Liyakugucula Kuphila

YINI leyenta indvodza letsite kutsi iphindze ibuyele endleleni yekukholwa lebeyikhuliswe ngayo? Lijaha lelitsite lamtfola njani babe lebelisolo lifisa kumtfola kuko konkhe kuphila kwalo? Fundza lokulandzisa kwabo.

“Bengikudzinga Kubuyela KuJehova.”—ELIE KHALIL

UMNYAKA LATALWA NGAWO: 1976

LIVE LATALELWA KULO: CYPRUS

UMLANDVO WAKHE: YINDVODZANA LEYABHUNGUKA

KUPHILA KWAMI KWESIKHATSI LESENGCILE: Ngatalelwa eCyprus kodvwa ngakhulela e-Australia. Batali bami baboFakazi BaJehova futsi benta konkhe lobekusemandleni abo kutsi bangifundzise kutsandza Jehova kanye neliVi lakhe liBhayibheli. Nobe kunjalo, nangiseminyakeni yekutfomba ngacala kuba lihlongandlebe. Bengivele ngiphume endlini ebusuku ngihambe ngivakashele bontsanga yetfu. Beseba timoto futsi sangena etinkingeni letinyenti.

Ekucaleni, bengikwenta loko ngifihla ngobe ngesaba kudvumata batali bami. Kancane kancane kwaphela loko kwesaba. Ngatakhela bungani nebantfu labadzala kunami labebangamtsandzi Jehova futsi bangifundzisa imikhuba lemibi. Ekugcineni, ngatjela batali bami kutsi angisafuni lutfo loluphatselene nenkholo yabo. Betama ngesineke kungisita kodvwa ngayala yonkhe leyometamo yabo. Batali bami beva buhlungu lobukhulu.

Ngemuva kwekuhamba ekhaya, ngacala kudla tidzakamiva futsi bengilima ngiphindze ngitsengise insangu lenyenti. Bengitiphatsa kabi futsi bengicitsa sikhatsi lesinyenti ngisemaphathini nasemibutsanweni yasebusuku. Ngacala nekusheshe ngicansuke. Bekutsi nangabe lotsite asho nobe enta intfo letsite lengingayitsandzi, ngivele ngitfukutsele ngigcwale kokana ngize ngitsetsise bantfu ngiphindze ngibashaye. Ngakwenta cishe konkhe lebengifundziswe kutsi ngingakwenti nangingumKhristu.

INDLELA LIBHAYIBHELI LELAKUGUCULA NGAYO KUPHILA KWAMI: Ngaba ngumngani lomkhulu walomunye lebesidla naye tidzakamiva lowashonelwa ngubabe wakhe asemncane. Besivamise kucoca kuze kube sebusuku kakhulu. Kulobunye balobo busuku, abekhuluma ngekutsi abemkhumbula kakhulu kangakanani babe wakhe. Njengobe ngakhula ngati ngelitsemba lekuvuswa kwalabafile, ngatikhandza sengimtjela ngaJesu kutsi wabavusa labafile nekutsi utsembisa kuphindze abavuse esikhatsini lesitako. (Johane 5:28, 29) Bengiyaye ngitsi “Ase uticabange uphindze ubona babe wakho. Sonkhe singaphila phakadze emhlabeni loliPharadisi.” Lawo mavi amtsintsa umngani wami.

Ngaletinye tikhatsi, bekafuna sicoce mayelana nemalanga ekugcina nobe ngenkholelo yaMtsatfu Amunye. Bengitsatsa liBhayibheli lakhe ngimkhombise emavesi lehlukehlukene laveta liciniso ngaNkulunkulu Jehova, ngaJesu kanye nangemalanga ekugcina. (Johane 14:28; 2 Thimothi 3:1-5) Bekutsi nangimcocela ngaJehova, bese ngimcabanga kakhulu Jehova.

Kancane kancane, inhlanyelo yeliciniso leliBhayibheli lebeyivaleleke enhlitiyweni yami—inhlanyelo batali bami labebetame ngawo onkhe emandla abo kuyihlanyela—yacala kumila. Sibonelo saloku kutsi ngaletinye tikhatsi nangisephathini sidla tidzakamiva nebangani bami, bengivele ngicale kucabanga ngaJehova. Bangani bami labanyenti bebatsi bayamtsandza Nkulunkulu kodvwa kutiphatsa kwabo bekungahambisani nalabakushoko. Njengobe bengingafuni kufanana nabo, ngabona kutsi yini lobekudzingeka ngiyente. Bengikudzinga kubuyela kuJehova.

Kukwati lokudzingeka ukwente kanye nekukwenta kutintfo letimbili letingafanani. Bekumelula kwenta letinye tingucuko ngobe akuzange kube lukhuni kakhulu kuyekela kudla tidzakamiva. Ngabashiya bangani bami futsi ngacala kutadisha liBhayibheli nalomdzala longumKhristu.

Nanobe kunjalo, kwenta letinye taletingucuko bekulukhuni kakhulu. Bekumatima kakhulu kubamba intfukutselo yami. Ngaletinye tikhatsi, bengikhona kuyibamba kodvwa kuphindze kungehlule. Bengiphatseka kabi nakwenteka loko ngize ngicabange kutsi ngisehluleki. Nangidvumatekile ngesizatfu saloko, bengikhuluma nalona lomdzala lobekangifundzela liBhayibheli. Waba sikhutsato kimi ngekutsi abehlale anesineke nemusa. Ngalelinye lilanga, watsi angifundze Sicongosekulindza lesinesihloko lesimayelana nekubaluleka kwekuphikelela.a Sacoca ngetintfo lebengingatenta nangifikelwa kutfukutsela. Kancane kancane, ngakhona kuyibamba intfukutselo yami ngekusitwa ngulengakufundza kule-Sicongosekulindza kanye nekuthandaza kuJehova. Ekugcineni, nga-April 2000, ngabhajatiswa ngaba ngulomunye waboFakazi BaJehova. Loku-ke kwabajabulisa kakhulu batali bami.

INDLELA LENGIZUZE NGAYO: Nyalo senginekuthula kwengcondvo nanembeza lomsulwa, ngekwati kutsi angisawungcolisi umtimba wami ngetidzakamiva nobe ngekutiphatsa kabi. Kunobe ngabe yini lengiyentako ngiyajabula, kungaba kutsi ngiyasebenta, ngisemihlanganweni yebuKhristu nome ngiyatijabulisa. Kuphila kwami sekunenjongo.

Ngiyambonga Jehova ngebatali bami labangazange bayekele kungisita. Ngicabanga nangemavi aJesu laku-Johane 6:44 latsi: “Kute umuntfu longeta kimi nangabe Babe, lokunguyena angitfumile, angamdvonsi.” Ngiyajabula ngekutsi ngikhonile kubuyela kuJehova ngobe yena ungidvonsile.

“Bengifisa Kuba Nababe.”—MARCO ANTONIO ALVAREZ SOTO

UMNYAKA LATALWA NGAWO: 1977

LIVE LATALELWA KULO: CHILE

UMLANDVO WAKHE: ABELILUNGA LEBHENDI YEMCULO LONESIGCI LESINEMANDLA KAKHULU

KUPHILA KWAMI KWESIKHATSI LESENGCILE: Ngakhuliswa ngumake wami edolobheni lelihle iPunta Arenas, leliku-Strait of Magellan ngaseningizimu ye-South America. Batali bami behlukana nangineminyaka lesihlanu, loko kwangenta ngativa ngilahliwe. Bengifisa kuba nababe.

Make wami wafundza liBhayibheli naboFakazi BaJehova futsi bekaya nami emihlanganweni eHholweni leMbuso. Bengikwenyanya kuya kulemihlangano futsi bekungitfukutselisa kakhulu kuya kuyo. Ngatsi nasengineminyaka lengu-13 ngayekela kuya kuyo.

Ngaleso sikhatsi besengicale kutsandza umculo futsi ngatibona kutsi nginelikhono kuwo. Nangineminyaka lengu-15 besengidlala umculo lonesigci lesinemandla kakhulu emibutsanweni yemculo, emashibhini kanye nasemibutsanweni lekhetsekile. Kutihlanganisa nebahlabeli labanelikhono, kwangenta ngatsandza umculo we-classic. Ngacala kufundzela umculo esikolweni salabafundzela umculo. Nangineminyaka lengu-20 ngatfutsela edolobheni lelikhulu laseSantiago, kute ngichubeke netifundvo tami. Ngachubeka nekubasemabhendini ladlala umculo lonesigci lesinemandla kakhulu.

Kuto tonkhe letikhatsi bengihlushwa yimiva yekungajabuli. Kute nginciphise leyo miva bengidzakwa futsi ngidle tidzakamiva ngikanye nebangani bami basebhendini, lebengibatsatsa njengemndeni wakitsi. Benginemoya wekuvukela, lokwabonakala endleleni lengangibukeka ngayo. Bengigcoka timphahla letimnyama kuphela, silevu sami ngasiyekela saba ngumbhebhenene netinwele tami takhula tacishe tefika elukhalo.

Etikhatsini letinyenti, lomkhuba wami wekuvukela bewungenta kutsi ngilwe futsi ngicabane nemaphoyisa. Ngalelinye lilanga ngidzakiwe, ngahlasela licembu lalabatsengisa tidzakamiva lebebasihlupha nebangani bami. Labatsengisi betidzakamiva bangishaya kwadzimate kwafafabuka litsambo lemhlatsi wami.

Buhlungu lobukhulu kakhulu ngabuviswa bangani bami labakhulu. Ngalelinye lilanga, ngatfola kutsi intfombi yami beyisolo idlala ngami iminyaka leminyenti, itsandzana nemngani wami lomkhulu futsi bangani bami bonkhe bebangifihlela leyondzaba. Loko kwangephula umoya.

Ngabuyela ePunta Arenas, lapho ngefike ngafundzisa khona umculo futsi umsebenti wami kwaba kudlala i-cello, lokulithuluzi lekudlala umculo. Ngachubeka nekudlala nekutsebula emabhendini emculo lonesigci lesinemandla kakhulu. Ngatsandzana nentfombatana lenhle libito layo bekungu-Sussan, futsi saba bomasihlalisane. Ngemva kwesikhatsi, Sussan watfola kutsi make wakhe ukholelwa emfundzisweni yaMtsatfu Amunye kodvwa mine bengingakholelwa kuyo. Wangibuta kutsi “Manje, litsini-ke liciniso ngalendzaba?” Ngatsi, ngiyati kutsi imfundziso yaMtsatfu Amunye ingemanga kepha bengingati kutsi kutfolakala kuphi eBhayibhelini. Noko-ke bengati kutsi bobani labangamsita. Ngamtjela kutsi boFakazi BaJehova bangamchazela ngeliciniso leliseBhayibhelini. Ngemuva kwaloko, ngenta intfo lebekukadze ngagcina kuyenta—ngathandaza kuNkulunkulu ngamcela kutsi angisite.

Ngemuva kwemalanga lambalwa ngabona lenye indvodza lebekungatsi angicali kuyibona, ngayibuta kutsi ingulomunye waboFakazi BaJehova yini. Nanobe beyibonakala yetfuswe yindlela lebengibukeka ngayo, yayiphendvula ngendlela lenemusa yonkhe imibuto yami mayelana nemihlangano yaseHholweni leMbuso. Ngaciniseka kutsi kuhlangana nalendvodza bekuyimphendvulo yemthandazo wami. Ngaya eHholweni leMbuso ngefika ngahlala emuva kute ngingabonwa ngulabanye. Nobe kunjalo, labanyenti bangikhumbula ngisengumntfwana lobekaba khona emihlanganweni. Bangemukela ngelutsandvo bangigaca futsi ngativa nginekuthula lokukhulu. Bekungatsi sengisekhaya. Ngalesikhatsi ngibona lendvodza leyangifundzisa liBhayibheli ngisemncane, ngayicela kutsi iphindze ingifundzele.

INDLELA LIBHAYIBHELI LELAKUGUCULA NGAYO KUPHILA KWAMI: Ngalelinye lilanga ngafundza incwadzi yeTaga 27:11 letsi: “Ndvodzana yami, hlakanipha, khona ngitewujabula.” Kwangijabulisa kubona kutsi umuntfu wasemhlabeni angamjabulisa uMdali wato tonkhe tintfo. Ngabona kutsi Jehova unguBabe lebengisolo ngimfuna kuphila kwami konkhe.

Benginesifiso sekujabulisa Babe wami wasezulwini futsi ngifuna kwenta nentsandvo yakhe, kodvwa bengisolo ngisigcili setidzakamiva nesetjwala iminyaka leminyenti. Ngabese ngiyayicondza imfundziso yaJesu lekuMatewu 6:24 letsi “kute umuntfu longakhonta emakhosi lamabili.” Njengobe bengetama kwenta tingucuko, sangitsintsa kakhulu simiso lesiku-1 Khorinte 15:33 lesitsi: “Bangani lababi bonakalisa similo lesihle.” Ngabona kutsi bengingeke ngikhone kuyiyekela lemikhuba yami lemibi nangabe ngisachubeka ngiya etindzaweni lebesivame kuya kuto nebangani bami. Leseluleko seliBhayibheli besicacile: Bekufanele ngitsatse tinyatselo leticatsa kute ngikwati kuphunyula kulemikhuba lebeyingibuyisela emuva.—Matewu 5:30, NW.

Indlela lebengiwutsandza ngayo umculo yenta kuyekela kudlala lomculo lonesigci lesinemandla kakhulu kube sincumo lesimatima lebekufanele ngisente. Ngekusitwa bangani bami basebandleni, ekugcineni ngakhona kuphunyuka emikhubeni lemibi. Ngakuyekela kunatsa kakhulu nekudla tidzakamiva. Ngahhula tinwele, ngashefa nesilevu ngabese ngiyakuyekela kugcoka timpahla letimnyama kuphela. Ngalesikhatsi ngitjela Sussan kutsi ngifuna kuhhula wafuna kwati kutsi yini kangaka. Watsi, “ngihamba nawe, ngifuna kubona kutsi yini lena leyenteka leHholweni leMbuso!” Wakutsandza lobekwentiwa khona, futsi naye wabese ucala kufundza liBhayibheli. Ngekuhamba kwesikhatsi, sinaSussan sashada. Nga-2008 sabhajatiswa saba boFakazi BaJehova. Siyajabula kuba munye namake ekukhonteni Jehova.

INDLELA LENGIZUZE NGAYO: Sengikhululekile eveni lenjabulo mbumbulu nakubangani bemanga. Ngisawutsandza umculo, kodvwa nyalo sengiyawukhetsa. Lokuhlangenwe nako kwami ngikucocela emalunga emndeni nalabanye ikakhulukati bantfu labasha. Ngifuna kubasita babone kutsi lokunyenti lokuvela kulelive kungabonakala kukuhle kodvwa kumane-nje kufanana ‘netibi.’—Filiphi 3:8.

Sengitfole bangani labetsembekile ebandleni lebuKhristu, lapho kunekuthula mbamba khona nelutsandvo lweliciniso. Ngetulu kwako konkhe, ngekusondzela kuJehova, sengigcine ngimtfolile Babe wami.

[Umbhalo longentansi]

[Emavi lacashuniwe lasekhasini 13]

“Ngikhonile kubuyela kuJehova ngobe wangidvonsa”