Sondzela KuNkulunkulu

“Sicela Usivumele Sibuyele Ekhaya”

Wake wamkhonta yini Jehova? Uke wacabanga yini ngekuphindze umkhonte kodvwa watibuta kutsi utawukwemukela yini? Sicela usifundze ngekucophelela lesihloko kanye nalesilandzelako. Letihloko tilungiselelwe wena.

“NGATHANDAZA kuJehova ngimcela kutsi angivumele kutsi ngibuyele ekhaya futsi angitsetselele ngobe ngamvisa buhlungu.” Washo njalo lomunye wesifazane lobekashiye indlela yebuKhristu lakhuliswa ngayo. Wena umvela buhlungu yini lowesifazane? Kuyenteka yini utibute kutsi, ‘Nkulunkulu utiva njani ngalabo labake bamkhonta? Uyabakhumbula yini? Jehova, usafuna yini kutsi ‘babuyele ekhaya’?’ Kute siphendvule lemibuto, asesihlole emavi labhalwa nguJeremiya. Asingabati kutsi timphendvulo tayo titakujabulisa.—Fundza Jeremiya 31:18-20.

Asewucabange ngemsuka wemavi aJeremiya. Nga-740 B.C.E., emashumini eminyaka ngembikwekutalwa kwaJeremiya, Jehova wavumela kutsi umbuso wetive letilishumi taka-Israyeli utfunjwe ngema-Asiriya.a Nkulunkulu wavumela loku kutsi kwenteke njengesijeziso ngesizatfu sekutsi bantfu bakhe besebone kakhulu ngekungatinaki tecwayiso tebaphrofethi bakhe nanobe bebabecwayisa kanyenti. (2 Emakhosi 17:5-18) Kuhlangabetana nebumatima ekutfunjweni kwabenta bashintja yini labantfu, njengobe besebehlukanisiwe naNkulunkulu futsi bakhashane nelive labo? Jehova wabese uyakhohlwa yini ngabo? Abengeke yini asabemukela nababuyela ekhaya?

“Ngatisola”

Labantfu baphaphama engcondvweni futsi loko kwabenta baphendvuka ngalesikhatsi batfunjiwe. Jehova wakubona kutisola kwabo lokwakusuka enhlitiyweni. Lalela njengobe Jehova achaza simo sengcondvo kanye nendlela labetiva ngayo lama-Israyeli latfunjiwe, labebitwa nangekutsi ngu-Efrayimu.

Jehova utsi: “Impela ngikuvile kububula kwa-Efrayimu.” (Kuvesi 18) Waweva ema-Israyeli nakakhaliswa yimiphumela yekona kwawo. Lesinye sati sitsi, emavi latsi “kububula” angase asho “sento sekunyakata nobe kukhuhluteka.” Bebafanana nendvodzana lelihlongandlebe lekhombisa kutisola ngekunikina inhloko njengobe ikhumbula bumatima letibangele bona futsi ikhumbula imphilo lemnandzi yasekhaya. (Lukha 15:11-17) Bebatsini labantfu?

‘Wangicondzisa njengelitfole lelisichomoketi.’ (Kuvesi 18) Labantfu bebati kutsi siyabafanela lesijeziso, ngobe bona bebafanana nelitfole lelisichomoketi. Lenye incwadzi itsi lesifananiso singase sisho kutsi bebanjengelitfole lebelingeke “libuve buhlungu belijoka nangabe lingakazubi.”

“Ngibuyisele, ngitawubuyela, ngobe wena unguSimakadze longuNkulunkulu wami.” (Kuvesi 18) Tinhlitiyo tabo tatfobeka futsi base bayambita Nkulunkulu. Bebasolo benta sono kodvwa bacela kuye kutsi abasite kute bakwati kutfola umusa wakhe. Lelinye lihumusho litsi: “UnguNkulunkulu wetfu, sicela usivumele sibuyele ekhaya.”—Contemporary English Version.

“Ngatisola. . . . Ngadliwa ngemahloni, ngatfotjiswa.” (Kuvesi 19) Labantfu batisola ngesizatfu sekutsi bebente sono. Bakwemukela kusolwa futsi bavuma kutsi bonile. Kwafanana nekungatsi batitsintsa sifuba, baba nemahloni futsi batijika phansi.—Lukha 15:18, 19, 21.

Ema-Israyeli abesaphendvukile. Eva buhlungu kakhulu, avuma tono tawo kuNkulunkulu futsi ashiya netindlela tawo letimbi. Kuphendvuka kwawo kwemukeleka yini kuNkulunkulu? Abetawavumela yini kutsi abuyele ekhaya?

“Nginesihawu Lesikhulu Ngaye”

Jehova bekasondzelene kakhulu nema-Israyeli. Watsi: “Mine nginguyise wa-Israyeli, Efrayimu uyindvodzana yami yematubulo.” (Jeremiya 31:9) Babe lonelutsandvo angala njani kwemukela indvodzana yakhe lephendvuke mbamba? Asewunake indlela Jehova laveta ngayo imiva yakhe lefanana neyaBabe kubantfu bakhe.

“Efrayimu akasiyo yini indvodzana yami letsandzekako, umntfwana lengijabulako ngaye? Nome ngivamise kukhuluma ngimelane naye, kodvwa noko ngisamkhumbula.” (Kuvesi 20) Maye amnandzi lamavi! Njengemtali longatototisi kodvwa lonelutsandvo, Nkulunkulu bekufanele ‘amelane’ nebantfwana bakhe ngekubecwayisa kanyenti ngekona kwabo. Ngesikhatsi bala ngenkhani kumlalela, wakuvumela kutsi batfunjwe, lokwenta kutsi bashiye likhaya labo. Nanobe bekufanele abajezise, akazange abakhohlwe. Abengeke acale akwente loko. Babe lonelutsandvo akabakhohlwa bantfwana bakhe. Kodvwa-ke Jehova wativa njani nakabona bantfwana bakhe baphendvuka mbamba?

“Inhlitiyo yami iyamlangatelela.” (Kuvesi 20.) Jehova wabahawukela kakhulu bantfwana bakhe. Kuphendvuka kwabo lokucotfo kwayitsintsa inhlitiyo yakhe futsi kwamenta wafisa kubabuyisela kuye. Njengababe losemfanekisweni waJesu wendvodzana yelulahleko, ‘inhlitiyo yaJehova yagcwala sihawu, wabahawukela’ futsi bekafisa nekuphindze abemukele bantfwana bakhe.—Lukha 15:20.

“Jehova Ngicela Ungivumele Ngibuyele Ekhaya!”

Emavi lakuJeremiya 31:18-20 asenta sisicondze sihawu saJehova kanye nemusa wakhe. Nkulunkulu akabakhohlwa labo labake bamkhonta. Kufanele bente njani labanjalo nangabe bafuna kubuyela kuye? Nkulunkulu ‘ukulungele kubatsetselela.’ (Tihlabelelo 86:5) Angeke abafulatsele labo labeta kuye ngetinhlitiyo letiphendvukile. (Tihlabelelo 51:17) Uyakujabulela kuphindze abemukele.—Lukha 15:22-24.

Lowesifazane lekukhulunywe ngaye ekucaleni kwalesihloko watsatsa sinyatselo kucala sekubuyela kuJehova futsi wavakashela libandla laboFakazi BaJehova lasendzaweni yakubo. Ekucaleni kwadzingeka alwe nemiva yakhe yekutikhobosa. Nakakhumbula utsi: “ngangitiva ngingafaneleki.” Kodvwa labadzala belibandla bamkhutsata futsi bamsita kutsi aphindze abe nebuhlobo lobuhle naNkulunkulu. Ngenhlitiyo legcwele kubonga utsi, “kuyintfo lenhle kakhulu kutsi Jehova ungivumele kutsi ngibuyele ekhaya!”

Nangabe wake wakhonta Jehova futsi sewufisa kuphindze umkhonte, siyakumema kutsi uvakashele libandla laboFakazi BaJehova lelilapho uhlala khona. Khumbula kutsi Jehova uba nebubele kanye nemusa kulabo labaphendvukako, nabamncenga batsi, “Sicela usivumele sibuyele ekhaya.”

[Umbhalo longentansi]