Jehova Ufuna Kutsi Bonkhe Bantfu Baphendvuke

1. Kusho kutsini kuphendvuka?

NANGABE sente lokubi, kubalulekile kutsi siphendvuke. EBhayibhelini, umuntfu lophendvukako ushintja indlela lebekacabanga ngayo ngentfo letsite lebekayenta, ayiyekele futsi atimisele kungayiphindzi.​—Buka Tinchazelo Temagama LaseBhayibhelini, “Kuphendvuka.”

2. Kubaluleke ngani kutsi sonkhe sifundze ngekuphendvuka? (Nehemiya 8:9-11)

² Wonkhe umuntfu lophilako kufanele afundze ngekuphendvuka. Ngasiphi sizatfu? Ngenca yekutsi sonkhe siyona onkhe malanga. Njengobe sisitukulwane sa-Adamu na-Eva, ngamunye wetfu watfola sono nekufa. (Rom. 3:23; 5:12) Kute ngisho namunye lowaphunyula kuloku. Ngisho nebantfu lebebanekukholwa lokucinile, njengemphostoli Pawula, bebalwa nesono. (Rom. 7:21-24) Loku kusho kutsi sekufanele sihlale silusizi yini ngenca yetono tetfu? Cha. Jehova unemusa futsi ufuna sijabule. Cabanga ngaloko lokwenteka kumaJuda ngesikhatsi saNehemiya. (Fundza Nehemiya 8:9-11.) Jehova bekangafuni kutsi bahlale baselusizini ngenca yetono labatenta esikhatsini lesendlulile, kodvwa bekafuna bajabule njengobe bamkhonta. Jehova uyati kutsi kuphendvuka kwenta umuntfu ajabule. Kungako asifundzisa ngako. Nangabe siphendvuka etonweni tetfu, singaciniseka kutsi Babe wetfu lonemusa utasicolela.

3. Sitawucoca ngani kulesihloko?

³ Ase sicoce kabanti ngekuphendvuka. Kulesihloko, sitawucoca ngetintfo letintsatfu. Kwekucala, sitawufundza kutsi yini Jehova layifundzisa ema-Israyeli mayelana nekuphendvuka. Sitawubese sicoca ngaloko Jehova lakwentile kuze asite bantfu kutsi baphendvuke. Ekugcineni, sitawufundza ngaloko Jesu lakufundzisa balandzeli bakhe mayelana nekuphendvuka.

YINI JEHOVA LAYIFUNDZISA EMA-ISRAYELI NGEKUPHENDVUKA?

4. Yini Jehova layifundzisa sive sema-Israyeli mayelana nekuphendvuka?

⁴ Ngesikhatsi Jehova ahlela ema-Israyeli kutsi abe sive, wenta sivumelwane nawo. Nangabe bekatawulalela imitsetfo yakhe, bekatawavikela futsi awabusise. Mayelana nalemitsetfo wawacinisekisa watsi: “Lomtsetfo lenginitjela wona lamuhla awusilukhuni kakhulu kini, futsi awukho khashane nani.” (Dut. 30:11, 16) Kodvwa nangabe bekatamvukela, mhlawumbe ngekutsi akhetse kukhonta labanye bonkulunkulu, bekatawuyekela kuwabusisa futsi bekatawuhlupheka. Nanobe kunjalo bekangaphindze awemukele. ‘Bekangabuyela kuJehova Nkulunkulu wawo futsi alalele livi lakhe.’ (Dut. 30:1-3, 17-20) Ngalamanye emavi, bewangaphendvuka. Nakenta njalo, Jehova bekatawusondzela kuwo futsi aphindze awabusise.

5. Jehova wakhombisa njani kutsi bekangakabalahli bantfu bakhe? (2 Emakhosi 17:13, 14)

⁵ Bantfu baJehova labakhetsiwe bebahlale bamvukela. Ngetulu nje kwekukhonta tithico, benta naletinye tintfo letenyanyekako. Loko kwenta kutsi bahlupheke. Kodvwa Jehova akazange abalahle labantfu bakhe labangalaleli. Bekachubeka atfumela baphrofethi bakhe kutsi bancenge labantfu kutsi baphendvuke futsi babuyele kuye.​—Fundza 2 Emakhosi 17:13, 14.

6. Jehova wabasebentisa njani baphrofethi bakhe kuze afundzise bantfu bakhe ngekubaluleka kwekuphendvuka? (Buka nesitfombe.)

⁶ Jehova bekavame kusebentisa baphrofethi bakhe kuze ecwayise bantfu bakhe futsi abekhute. Sibonelo nje, asebentisa Jeremiya Nkulunkulu watsi: “Buya wena Israyeli losihlubuki . . . Angeke ngikuswacele, ngobe ngetsembekile . . . Angeke ngihlale ngikutfukutselele kuze kube phakadze. Mane nje uvume licala lakho, ngobe uvukele Jehova.” (Jer. 3:12, 13) Asebentisa Joweli Jehova watsi: “Nisengabuyela kimi ngayo yonkhe inhlitiyo yenu.” (Jow. 2:12, 13) Watjela Isaya kutsi abhale atsi: ‘Tenteni nihlanteke; susani tento tenu letimbi embikwami; yekelani kwenta lokubi.’ (Isa. 1:16-19) Asebentisa Hezekeli, Jehova wabuta watsi: “Ngiyajabula yini mine ngekufa kwalomubi? . . . Angifisi yini kutsi aphendvuke etindleleni takhe letimbi, futsi achubeke aphila? Angijabuli ngekufa kwemuntfu. Ngako phendvukani kuze niphile.” (Hez. 18:23, 32) Jehova uyajabula nakabona bantfu baphendvuka ngobe ufuna bachubeke baphila kuze kube phakadze! Ngako Jehova akamane nje eme agadze bantfu labonile kutsi bashintje ngaphambi kwekutsi abasite. Ase sibone kutsi ukwenta njani loko.

7. Yini Jehova layifundzisa bantfu bakhe asebentisa indzaba yemphrofethi Hoseya nemkakhe?

⁷ Naka loko Jehova lakufundzisa bantfu bakhe asebentisa loko lokwenteka mbamba, lokusibonelo saGomeri umfati wemphrofethi Hoseya. Ngemuva kwekuphinga, washiya Hoseya futsi waya kulamanye emadvodza. Bekangeke asasitakala yini? Jehova lokhonako kufundza tinhlitiyo watjela Hoseya watsi: “Hamba ubuyele kumfati wakho, uphindze umtsandze nanobe asatsandvwa ngulenye indvodza futsi aphinga, njengobe nje naJehova abatsandza bantfu baka-Israyeli nanobe sebagucukele kulabanye bonkulunkulu.” (Hos. 3:1; Taga 16:2) Naka kutsi umfati waHoseya bekasolo enta sono lesikhulu. Nanobe kunjalo, Jehova watjela Hoseya kutsi aye kuye amtjele kutsi utamcolela futsi acele kubuyisana naye.a Ngendlela lefanako, Jehova bekangakalilahli lithawula ngebantfu bakhe. Nanobe bebenta tono letinkhulu, bekasolo abatsandza futsi wachubeka atfumela baphrofethi bakhe kuze babasite baphendvuke futsi bashintje kuphila kwabo. Loku lokwenteka kukhombisa kutsi Jehova ‘lohlolisisa tinhlitiyo,’ utawetama yini kusita umuntfu losolo enta sono lesikhulu kutsi aphendvuke? (Taga 17:3) Asesibone.

INDLELA JEHOVA LETAMA NGAYO KUSITA BANTFU KUTSI BAPHENDVUKE

8. Yini Jehova layenta kuze asite Khayini kutsi aphendvuke? (Genesisi 4:3-7) (Buka nesitfombe.)

⁸ Khayini bekayindvodzana yekucala ya-Adamu na-Eva. Watfola lufuto lwekufuna kwenta lokubi kubatali bakhe. Ngetulu kwaloko, liBhayibheli nalikhuluma ngaye litsi: “Imisebenti yakhe beyimibi.” (1 Joh. 3:12) Mhlawumbe nguloko lokwenta Jehova ‘angamemukeli Khayini nemnikelo wakhe’ ngesikhatsi ente umnikelo. Kunekutsi ashintje indlela bekenta ngayo, Khayini “watfukutsela wabila futsi wajabha.” Yini Jehova labese uyayenta? Wakhuluma naKhayini. (Fundza Genesisi 4:3-7.) Naka kutsi Jehova wakhuluma naye ngemusa, wamnika litsemba futsi wamecwayisa ngengoti yekwenta sono. Lokubuhlungu kutsi Khayini wala kulalela. Akazange avumele Jehova kutsi amsite aphendvuke. Ngemuva kwekutsi Khayini angamlaleli Nkulunkulu, Jehova wabese uyayekela yini kwetama kusita labanye bantfu labonile kutsi baphendvuke? Cha!

9. Yini Jehova layenta kuze asite Davide kutsi aphendvuke?

⁹ Jehova bekayitsandza kakhulu iNkhosi Davide. Waze wayibita ngekutsi ‘ingumuntfu lotsandzekako enhlitiyweni’ yakhe. (Imis. 13:22) Kodvwa Davide wenta tono letinkhulu, letifaka ekhatsi kuphinga nekubulala. Ngekusho kweMtsetfo waMosi, Davide bekufanele abulawe. (Lev. 20:10; Num. 35:31) Nanobe kunjalo, ngemusa Jehova wangenela.b Watfumela umphrofethi Nathani kutsi avakashele lenkhosi ngisho nobe beyisengakatikhombisi timphawu tekutsi iphendvukile. Nathani wasebentisa umfanekiso lobewentelwe kutsi utsintse inhlitiyo yaDavide. Atsintsekile, Davide waphendvuka. (2 Sam. 12:1-14) Wabhala sihlabelelo lebesisuka enhlitiyweni lebesiveta indlela bekaphendvuke ngayo. (Hla. 51, umbhalo longenhla) Lesihlabelelo sidvudvute bantfu labanyenti labonile futsi sabakhutsata kutsi baphendvuke. Asijabuli yini ngekutsi Jehova wasita lenkhosi ngelutsandvo kutsi iphendvuke?

10. Utiva njani nawucabanga ngekutsi Jehova uyasibeketelela futsi uyasicolela?

¹⁰ Jehova uyasenyanya sono, futsi akasemukeli ngisho nobe sinjani. (Hla. 5:4, 5) Nanobe kunjalo, uyati kutsi sonkhe sinesono futsi ngenca yekutsi uyasitsandza ukhetsa kusisita kutsi silwe naso. Uhlale etama kusita ngisho nalabo labente tono letinkhulu kutsi baphendvuke futsi basondzelane naye. Kuyadvudvuta kwati loko! Njengobe sicabanga ngekubeketela kwaJehova kanye nekucolela kwakhe, sitimisele kuhlale setsembekile kuye futsi sisheshe siphendvuke nasonile. Nyalo asesifundze kutsi yini Jesu layifundzisa balandzeli bakhe ngekuphendvuka.

YINI JESU LAYIFUNDZISA BALANDZELI BAKHE NGEKUPHENDVUKA?

11-12. Yini Jesu layifundzisa labo lebebamlalele mayelana nekucolela kwaBabe wakhe? (Buka sitfombe.)

¹¹ Nga-29 C.E., besekusikhatsi sekutsi Mesiya afike. Njengobe kuvetiwe esihlokweni lesendlulile, Jehova wasebentisa Johane uMbhabhatisi naJesu Khristu kutsi bafundzise bantfu ngekutsi kubaluleke kangakanani kuphendvuka.​—Mat. 3:1, 2; 4:17.

¹² Kuso sonkhe lesikhatsi Jesu enta umsebenti wekushumayela, wafundzisa labo bebamlalele kutsi Babe wakhe uyacolela. Loko wakwenta ngendlela letsintsa inhlitiyo ngesikhatsi akhuluma ngemfanekiso lomayelana nendvodzana leyahamba ekhaya. Lelijaha lakhetsa kwenta sono sikhatsi lesitsite. Nanobe kunjalo, ‘lasanguluka’ futsi labuyela ekhaya. Wenta njani babe walendvodzana? Jesu watsi “Babe wayo wayibona isesekhashane, wayihawukela, wagijima wefika wayigaca futsi wayanga.” Lendvodzana beyifuna kucela kutsi ibe sisebenti sababe wayo, kodvwa yena wayibita ngekutsi ‘yindvodzana yakhe’ futsi wayiniketa sigaba sayo emndenini wakhe. Lobabe watsi: “Beyilahlekile kodvwa seyitfolakele.” (Luk. 15:11-32) Ngesikhatsi Jesu asezulwini ngaphambi kwekutsi ete emhlabeni, bekambonile Babe wakhe abakhombisa umusa bantfu labanyenti lebebonile futsi lebebaphendvukile. Lendzaba yaJesu isidvudvuta kakhulu futsi iyasikhombisa kutsi Babe wetfu Jehova unemusa kangakanani!

13-14. Yini umphostoli Phetro layifundza ngekuphendvuka, futsi yini layifundzisa labanye ngako? (Buka nesitfombe.)

¹³ Kunyenti umphostoli Phetro lakufundza kuJesu mayelana nekuphendvuka kanye nekucolela. Esikhatsini lesinyenti Phetro bekadzinga kucolelwa futsi Jesu bekahlale amcolela. Sibonelo nje, ngemuva kwekutsi Phetro aphike iNkhosi yakhe tikhatsi letintsatfu, weva buhlungu kakhulu. (Mat. 26:34, 35, 69-75) Kodvwa ngemuva kwekutsi Jesu sekavusiwe, wabonakala kuPhetro, mhlawumbe ayedvwana. (Luk. 24:33, 34; 1 Khor. 15:3-5) Siyaciniseka kutsi ngaleso sikhatsi, ngelutsandvo, Jesu wamcinisekisa lomphostoli lophendvukile kutsi umcolele.

¹⁴ Ngenca yekutsi Phetro bekake waba kulesimo, besekangabafundzisa labanye mayelana nekuphendvuka nekucolela. Ngemuva kwemkhosi weliPhentekhoste, Phetro wakhuluma nesicumbi semaJuda lebesingamkhonti Nkulunkulu, wasichazela kutsi besibulele Mesiya. Nanobe kunjalo, ngelutsandvo wasincenga watsi: “Ngako-ke phendvukani futsi nigucuke, khona tono tenu titowesulwa, kuze kufike sikhatsi sekuvuseleleka lesivela kuJehova.” (Imis. 3:14, 15, 17, 19) Ngako Phetro wakhombisa kutsi kuphendvuka kwenta lowonile kutsi agucuke, ashintje indlela lacabanga ngayo futsi ente ngendlela lensha, lejabulisa Nkulunkulu. Lomphostoli waphindze wakhombisa kutsi Jehova bekatawutesula tono tabo nobe atente tingaphindzi tibe khona. Ngemuva kweminyaka, Phetro wacinisekisa emaKhristu watsi: “Jehova . . . uyanibeketelela ngobe akafisi kutsi kubhubhe ngisho namunye, kepha ufisa kutsi bonkhe bantfu baphendvuke.” (2 Phet. 3:9) Leli litsemba lelihle kumaKhristu nangabe ente tono, ngisho nalapho kutono letinkhulu!

15-16. (a) Yini leyenteka kumphostoli Pawula leyamfundzisa ngekucolela? (1 KuThimothi 1:12-15) (b) Sitawucoca ngani esihlokweni lesilandzelako?

¹⁵ Bambalwa bantfu labadzinge kuphendvuka nekucolelwa kwendlula Sawula waseThasusi. Bekabaphatsa ngelunya balandzeli baKhristu. Kungenteka emaKhristu lamanyenti bekacabanga kutsi akayuze ashintje. Nanobe kunjalo, Jesu lebekavusiwe bekati kutsi Sawula angashintja futsi aphendvuke. Yena naBabe wakhe babona lokuhle kuSawula. Jesu watsi: “Lomuntfu usitja sami lengisikhetsile.” (Imis. 9:15) Jesu waze wasebentisa simangaliso kuze asite Sawula kutsi aphendvuke. (Imis. 7:58–8:3; 9:1-9, 17-20) Ngemuva kwekutsi Sawula abe ngumKhristu, futsi ngekuhamba kwesikhatsi atiwe ngekutsi ngumphostoli Pawula, bekavame kubonga ngendlela lakhonjiswe ngayo umusa nebubele. (Fundza 1 KuThimothi 1:12-15.) Lomphostoli lebekabonga, waze watsi: “Ngalomusa wakhe, Nkulunkulu ufuna kukwenta uphendvuke.”​—Rom. 2:4.

¹⁶ Yini Pawula layenta ngesikhatsi eva ngenkinga lebeyikhona ebandleni laseKhorinte lemayelana nekutiphatsa lokubi? Loko lakwenta kusifundzisa lokukhulu mayelana nesijeziso saJehova lesinelutsandvo kanye nekubaluleka kwekukhombisa umusa. Sitawucoca kabanti ngalendzaba esihlokweni lesilandzelako.