Yini Jehova Layentile Kuze Akhulule Bantfu Esonweni Nasekufeni?

1-2. (a) Siyini sono, futsi singasincoba njani? (Buka “Inchazelo Yeligama.”) (b) Sitawucoca ngani kulesihloko nakuletinye letilandzelako letikulomagazini? (Buka nesihloko lesitsi “Umlayeto Lobhalelwe Bafundzi” lesikulomagazini.)

UNGATSANDZA yini kwati kutsi Jehova Nkulunkulu ukutsandza kakhulu kangakanani? Naku longakwenta kuze utfole imphendvulo: Tinikete sikhatsi sekufundza ngaloko lakwentile kuze akusindzise esonweni nasekufeni. Sonoa sitsa lesibi kakhulu, futsi ngeke ukhone kusincoba uwedvwana. Sonkhe siyona onkhe malanga futsi siyafa ngenca yesono. (Rom. 5:12) Kodvwa tikhona tindzaba letimnandzi. Ngekusitwa nguJehova, singasincoba sono. Ecinisweni, nakanjani sitasincoba!

² Sekuphele iminyaka lengaba ngu-6 000 Jehova Nkulunkulu asita bantfu kutsi balwe nesono. Ngasiphi sizatfu? Ngenca yekutsi uyasitsandza. Wabatsandza bantfu kusukela ekucaleni, ngako wente tintfo letinyenti kuze abasite. Nkulunkulu uyati kutsi sono siholela ekufeni, futsi akafuni kutsi sife. Ufuna siphile phakadze. (Rom. 6:23) Nguloko lakufunela kona nawe. Kulesihloko, sitawuphendvula nayi imibuto lemitsatfu: (1) Yini Jehova layentile kuze anikete bantfu labanesono litsemba? (2) Yini bantfu labanesono bangetikhatsi tekubhalwa kweliBhayibheli labayenta kuze bemukelwe nguJehova? (3) Yini Jesu layenta kuze asindzise bantfu esonweni nasekufeni?

YINI JEHOVA LAYENTA KUZE ANIKETE BANTFU LABANESONO LITSEMBA?

3. Kwenteka njani kutsi batali betfu bekucala bagcine banesono?

³ Ngesikhatsi Jehova adala indvodza yekucala nemfati wekucala, bekafuna bajabule. Wabaniketa likhaya lelihle, sipho semshado nemsebenti lojabulisako. Bekufanele bagcwalise umhlaba ngesitukulwane sabo, bente wonkhe umhlaba ube lipharadisi ufane nensimi yase-Edeni. Kodvwa kunye labatjela kutsi bangakwenti. Wabecwayisa kutsi nangabe behluleka kulalela loko labatjele kona ngekutsi bamvukele ngemabomu, sono sabo besitawuholela ekufeni. Siyati kutsi kwabese kwentekani. Lesinye sidalwa lesingumoya lebesingamtsandzi Nkulunkulu futsi nabo singabatsandzi, sabalinga kutsi bone. Bo-Adamu na-Eva basilalela lesidalwa. Ngenca yekutsi abazange bametsembe Babe wabo lonelutsandvo, bona. Njengobe sati, loko lokwashiwo nguJehova kwenteka. Kusukela ngalelo langa, bebatawubhekana nemiphumela yekona kwabo: bacala kuguga futsi ekugcineni bafa.​—Gen. 1:28, 29; 2:8, 9, 16-18; 3:1-6, 17-19, 24; 5:5.

4. Yini leyenta Jehova asenyanye sono futsi asisite kutsi silwe naso? (KubaseRoma 8:20, 21)

⁴ Jehova wenta kutsi lendzaba lebuhlungu ibhalwe eBhayibhelini kuze kusitakale tsine. Isisita sicondze kutsi yini leyenta asenyanye kangaka sono. Sono sisehlukanisa naBabe wetfu, futsi siholela ekufeni. (Isa. 59:2) Kungako Sathane lowasibangela yonkhe lenkinga asitsandza sono futsi asikhutsata. Kungenteka wacabanga kutsi sewuncobile ngaloko lokwenteka e-Edeni. Kodvwa bekangati kutsi Jehova usitsandza kangakanani. Nkulunkulu akazange ayishintje injongo yakhe ngesitukulwane sa-Adamu na-Eva. Uyabatsandza bantfu, ngako ngekushesha wabaniketa litsemba. (Fundza KubaseRoma 8:20, 21.) Jehova bekati kutsi labanye bebatawukhetsa kumtsandza futsi bebatawufuna lusito lwakhe kuze balwe nesono. Njengobe anguBabe wabo neMdali wabo, bekatawenta indlela yekubakhulula esonweni futsi basondzele kuye. Yini Jehova lebekatawuyenta kuze konkhe loku kwenteke?

5. Kunini lapho Jehova enta kutsi bantfu baphindze babe nelitsemba? Chaza. (Genesisi 3:15)

⁵ Fundza Genesisi 3:15. Litsemba labuya ngesikhatsi Jehova asho sigwebo saSathane. Nkulunkulu watsi bekutawuba “nentalelwane” lebeyitawudlala indzima lebalulekile kulelo tsemba. Ekugcineni lentalelwane beyitawufihlita Sathane, icedze bonkhe bubi lababunga e-Edeni. (1 Joh. 3:8) Kodvwa lentalelwane beyitawubhekana nebumatima. Sathane bekatayilimata, ayente kutsi ife. Loko bekumtamvisa buhlungu kakhulu Jehova. Kodvwa Jehova bekakulungele kuva lobuhlungu futsi avumele ‘lentalelwane’ kutsi ihlupheke kuze kusindziswe bantfu esonweni nasekufeni.

YINI BANTFU LABANESONO BANGETIKHATSI TEKUBHALWA KWELIBHAYIBHELI LABAYENTA KUZE BEMUKELWE NGUJEHOVA?

6. Yini bantfu labanekukholwa njenga-Abela naNowa labayenta kuze basondzelane naJehova?

⁶ Eminyakeni leyalandzela, kancane kancane Jehova wakwenta kwacaca kutsi yini bantfu labanesono labangayenta kuze basondzele kuye. Indvodzana yesibili ya-Adamu na-Eva, lokungu-Abela, yaba ngumuntfu wekucala lowakholwa kuJehova ngemuva kwaloko lokwenteka e-Edeni. Ngenca yekutsi Abela bekamtsandza Jehova, afuna kumjabulisa futsi asondzele kuye, wenta umhlatjelo. Bekangumelusi, ngako watsatsa lamanye emazinyane etimvu wawahlaba futsi wanikela ngawo kuJehova. Yini Jehova layenta? “Wamemukela Abela nemnikelo wakhe.” (Gen. 4:4) Jehova wayemukela nemihlatjelo leyentiwa nangulabanye bantfu lebebamtsandza futsi bametsemba, njengaNowa. (Gen. 8:20, 21) Ngekwemukela lemihlatjelo, Jehova bekakhombisa kutsi angabemukela bantfu labanesono futsi bangasondzelana naye.b

7. Yini lesiyifundza kuloko Abrahama bekalungele kukwenta?

⁷ Jehova wacela Abrahama, lebekayindvodza lenekukholwa lokucinile kutsi ente intfo lelukhuni kakhulu. Wamcela kutsi ente umhlatjelo ngendvodzana yakhe Isaka. Lena bekuyintfo lematima nalebuhlungu kakhulu ku-Abrahama. Nobe kunjalo, wamlalela Jehova. Kodvwa Nkulunkulu wamvimba sekusele kancane nje kutsi abulale lendvodzana yakhe. Lesibonelo sifundzisa bonkhe bantfu labanekukholwa sifundvo lesibalulekile. Jehova bekatawuvuma kunikela ngeNdvodzana yakhe layitsandzako kutsi ibe ngumnikelo. Nguleyo-ke indlela labatsandza ngayo bantfu!​—Gen. 22:1-18.

8. Beyikhombisani imihlatjelo lebekufanele yentiwe ngekusho kweMtsetfo? (Levithikhusi 4:27-29; 17:11)

⁸ Eminyakeni leminyenti leyalandzela, uMtsetfo lowaniketwa sive sema-Israyeli bewufuna kwentiwe iminikelo leminyenti kuze bantfu baNkulunkulu bacolelwe tono tabo. (Fundza Levithikhusi 4:27-29; 17:11.) Lemihlatjelo beyikhombisa kutsi Jehova bekatawenta umhlatjelo loncono kakhulu lebewutabasindzisa ngalokuphelele bantfu esonweni. Baphrofethi baNkulunkulu baphefumulelwa kutsi bachaze kutsi lentalelwane leyetsenjisiwe, lokuyiNdvodzana yaNkulunkulu lekhetsekile, bekutawudzingeka ihlupheke futsi ibulawe. Beyitawuhlatjwa njengemvu yemhlatjelo. (Isa. 53:1-12) Cabanga nje: Jehova bekatawuhlela kutsi kunikelwe ngeNdvodzana yakhe layitsandzako kutsi ibe ngumhlatjelo kuze kusindziswe bantfu esonweni nasekufeni, lokufaka ekhatsi nawe!

YINI JESU LAYENTA KUZE ASINDZISE BANTFU?

9. Yini Johane uMbhabhatisi layisho ngaJesu? (KumaHebheru 9:22; 10:1-4, 12)

⁹ Nga-29 C.E., Johane uMbhabhatisi lebekasikhonti saNkulunkulu wakhomba Jesu waseNazaretha, wabese utsi: “Bukani, nalo liWundlu laNkulunkulu lelisusa sono selive!” (Joh. 1:29) Lamavi laphefumulelwe akhombisa kutsi Jesu bekangulentalelwane lebekukhulunywe ngayo kusukela kadzeni. Bekatawuba ngulomhlatjelo lowetsenjisiwe. Nyalo beselikhanya bha litsemba lebantfu labanesono, sono besesitawuncotjwa ngalokuphelele!​—Fundza KumaHebheru 9:22; 10:1-4, 12.

10. Jesu wakhombisa njani kutsi utele ‘kutewubita toni’?

¹⁰ Jesu wanaka kakhulu bantfu lebebacindzetelwe sono futsi watsi ababe balandzeli bakhe. Bekati kutsi sono ngiso lesibangela kuhlupheka kwebantfu. Ngako wasita emadvodza nebafati lebebatiwa ngekutsi batoni. Asebentisa umfanekiso, wachaza watsi: “Bantfu labaphilile abamdzingi dokotela, kodvwa ngulabagulako labamdzingako.” Wachubeka watsi: “Angiketeli kutewubita bantfu labalungile, kodvwa ngitewubita toni.” (Mat. 9:12, 13) Jesu wakwenta loko lakusho. Waticolela tono talomunye wesifazane lowamgeza tinyawo ngetinyembeti takhe. (Luk. 7:37-50) Wafundzisa lomunye umfati longumSamariya lamtfola emtfonjeni emaciniso labalulekile nanobe bekati kutsi utiphatsa kabi. (Joh. 4:7, 17-19, 25, 26) Nkulunkulu waphindze wanika Jesu emandla ekucedza umphumela wesono, lokukufa. Kanjani? Jesu wavusa bantfu ekufeni, lokufaka ekhatsi labadvuna nalabasikati, bantfwana nalasebakhulile.​—Mat. 11:5.

11. Yini leyenta bantfu labanesono kutsi bamtsandze Jesu?

¹¹ Kungako singamangali kutsi ngisho nebantfu lebebenta tintfo letimbi bebamtsandza Jesu. Wabakhombisa umusa neluvelo. Bebativa bakhululekile kusondzela kuye. (Luk. 15:1, 2) Jesu wabancoma futsi wabanika umvuzo labantfu labakhombisa kutsi banekukholwa kuye. (Luk. 19:1-10) Wawuveta kahle kakhulu umusa waBabe wakhe. (Joh. 14:9) Ngaloko lakusho nalakwenta, wakhombisa kutsi Babe wakhe loneluvelo nemusa uyabatsandza bantfu futsi ufuna kusita umuntfu ngamunye kutsi asincobe sono. Jesu wasita bantfu labanesono kutsi bafune kushintja tindlela tabo futsi bamlandzele.​—Luk. 5:27, 28.

12. Yini Jesu layisho ngekufa kwakhe?

¹² Jesu bekakwati loko lebekusetakwenteka kuye. Watjela balandzeli bakhe emahlandla kutsi bekatawutsengiswa futsi abulawe elugodvweni. (Mat. 17:22; 20:18, 19) Bekati kutsi umhlatjelo wakhe bewutawususa sono eveni, njengobe bekuphrofethe Johane nalabanye baphrofethi. Jesu waphindze wafundzisa kutsi ngemuva kwekunikela ngekuphila kwakhe, ‘bekatawudvonsela tonkhe tinhlobo tebantfu’ kuye. (Joh. 12:32) Bantfu labanesono bebangamjabulisa Jehova ngekutsi bemukele Jesu kutsi abe yiNkhosi yabo futsi balandzele etinyatselweni takhe. Nabenta njalo, ‘bebatawukhululwa esonweni.’ (Rom. 6:14, 18, 22; Joh. 8:32) Ngako ngekutidzela nangesibindzi, Jesu wavuma kubulawa kabuhlungu.​—Joh. 10:17, 18.

13. Yini leyenteka ngaphambi kwekutsi Jesu afe, futsi kufa kwakhe kusifundzisani ngaJehova Nkulunkulu? (Buka nesitfombe.)

¹³ Jesu watsengiswa, waboshwa, wetfukwa, wanyundzelwa, walahlwa ngelicala futsi waphatfwa ngesibhuku. Emasotja aya naye endzaweni lebekatawubulawelwa kuyo futsi afike ambetsela elugodvweni. Njengobe abeketelela bonkhe lobuhlungu lobungaka ngekwetsembeka, bekukhona lebekeva buhlungu kakhulu. BekunguJehova Nkulunkulu. Bekanawo emandla futsi bekangakhona kusita iNdvodzana yakhe kutsi ingahlupheki kodvwa akazange akwente loko. Ngasiphi sizatfu? Yini lebeyingenta Babe lonelutsandvo kutsi ente ngalendlela? Kalula nje, lutsandvo. Jesu watsi: “Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.”​—Joh. 3:16.

14. Ukufundzisani umhlatjelo waJesu?

¹⁴ Umhlatjelo waJesu ubufakazi lobuhamba embili bekutsi Jehova usitsandza kakhulu kangakanani situkulwane sa-Adamu na-Eva. Ubufakazi bekutsi Jehova ukutsandza kakhulu. Wanikela ngeNdvodzana yakhe layitsandzako kutsi ibe ngumhlatjelo futsi wabeketelela buhlungu lobungachazeki kuze akusindzise esonweni nasekufeni. (1 Joh. 4:9, 10) Ufuna kusita ngamunye wetfu kutsi alwe nesono futsi asincobe!

15. Yini lokufanele siyente kuze sizuze kulesipho saNkulunkulu lesiyinhlawulo yaJesu?

¹⁵ Sipho saNkulunkulu, lokuyinhlawulo yeNdvodzana yakhe lekuphela kwayo, senta kutsi sicolelwe tono tetfu. Kodvwa kuze Nkulunkulu asicolele, kufanele sente lokutsite. Kuyini? Johane uMbhabhatisi naJesu Khristu bayisho imphendvulo, batsi: “Phendvukani, ngobe uMbuso wemazulu sewusondzele.” (Mat. 3:1, 2; 4:17) Ngako kuphendvuka kubaluleke kakhulu nangabe sifuna kulwisana nesono futsi sisondzelane naBabe wetfu lositsandzako. Kodvwa kufaka ekhatsi ini kuphendvuka, futsi kusisita njani kutsi silwisane nesono? Sihloko lesilandzelako sitasiphendvula.