Ludvonsi Lwekufa

Kufa kuyindzaba lengatsandzeki. Bantfu labanyenti banconota kungakhulumi ngako. Noma kunjalo, nome nini kungasehlela. Ludvonsi lwekufa luntinyela kabuhlungu.

Kute lokungasenta sikulungele ngalokuphelele kushonelwa ngumtali, umlingani wemshado noma umntfwana. Kufa kungafika kungakalindzeleki nome kuhlasele kuphindzelele. Kunome ngukuphi, ngeke sibubalekele buhlungu bekufelwa futsi bungabangela kucindzeteleka lokukhulu.

Antonio lowashonelwa nguyise engotini yemgwaco, utsi: “Kushonelwa kufanana nekutsi umuntfu lotsite akhiye indlu yakho ahambe netikhiya. Ngeke usakhona kuphindze ungene kuyo, ngisho sikhashana nje. Usala unenkhumbulo nje kuphela. Loku kusuke kusimo lesisha lokufanele ubhekane naso. Nome ungatsatsa shengatsi akukenteki lutfo, njengobe kuyintfo lengemukeleki, kodvwa kusuke sekute longakwenta.”

Ngesikhatsi naDorothy aba ngumfelokati aneminyaka lengu-47, watimisela kutfola timphendvulo. Njengobe anguthishela wakuSontfo sikolwa, abecabanga kutsi kufa akusiso siphetfo, kodvwa abengacondzi kutsi kwentekani vele kitsi nasifa. Lowo mbuto wawubuta umfundisi wakhe waseSheshi, yena lowamphendvula watsi: “Kute lowati kahle, kutawudzingeka silindze sibone kutsi kutakwentekani.”

Ingabe lesingakwenta kumane “silindze sibone kutsi kutakwentekani”? Ikhona yini indlela lesingati ngayo kutsi vele kufa kusiphetfo sako konkhe yini?