Imetamo Yebantfu Yekuncoba Kufa

Kufa kusitsa lesesabekako. Senta konkhe lokusemandleni etfu kute sikuncobe. Singase singakhoni kukwemukela kufa kwemuntfu lesimtsandzako. Noma, nasisebasha sisenemandla, singase sicabange kutsi lesitsa asiyuze sisitfole. Loko litsemba lelingekho lesihlale sitinika lona uma nje sisaphila.

Bambalwa bantfu labake bacabanga ngekuphila phakadze kwendlula boFaro basendvulo. LaboFaro bacitsa sikhatsi sekuphila kwabo lesinyenti kanye nesetinkhulungwane tetisebenti betama kuncoba kufa. Emaphiramidi labawakha abufakazi bekutsi bayenta imetamo kodvwa behluleka.

Emakhosi aseShayina nawo etama kuncoba kufa kodvwa wona asebentisa lenye indlela. Abenatsa lokutsite labekholelwa kutsi kutawenta angafi. Inkhosi Qin Shi Huang yatjela bososayensi bayo kutsi bente sinatfo lesisimangaliso lebesitawuvikela kufa. Kodvwa linyenti laletinatfo labatakha betine-mercury lengushevu, futsi kungenteka kutsi lenkhosi yabulawa ngulesinye sato.

Ngemnyaka wa-1513, Juan Ponce de León wase-Spain lobekavama kuhamba ahlola emave, wahamba ngemkhumbi elwandle i-Caribbean afuna kutfola umtfombo wemanti lobekukholelwa kutsi enta umuntfu ahlale amusha. Kuloluhambo lwakhe wafike wakhangwa yindzawo yaseMelika lokutsiwa yi-Florida wase uhlala khona, kodvwa wafa eminyakeni lembalwa ngemuva kwekulwa nebantfu baseMelika. Kute umtfombo wemanti lenta umuntfu ahlale amusha lowake watfolakala.

BoFaro, emakhosi, kanye nebahloli bemave, bonkhe bebafuna kuncoba kufa. Ukhona yini emkhatsini wetfu lobekangawubukela phansi lomgomo wabo, ngisho noma bekungatsiwa asititsandzi letindlela labatisebentisa? Sonkhe ekujuleni kwetinhlitiyo tetfu, sinesifiso lesingokwemvelo sekungafi.

KUNGANCOTJWA YINI KUFA?

Sentiwa yini kutsi silwe nekufa? LiBhayibheli lisinika sizatfu saloko. Nalikhuluma ngaJehova,a Nkulunkulu longuMdali wetfu, litsi: “Konkhe ukwente kwalungela sikhatsi sako. Uphindze wabeka liphakadze etinhlitiyweni tebantfu.” (Umshumayeli 3:11) Singajabula kubona buhle bemhlaba phakadze, hhayi nje iminyaka lengaba ngu-80. (Tihlabelelo 90:10) Nguleso sifiso lesinaso.

Nkulunkulu walifakelani “liphakadze” etinhlitiyweni tetfu? Abemane asidvunga ingcondvo yini? Cha akusinjalo. Nkulunkulu usetsembisa kutsi siyeta sikhatsi sekuncoba kufa. LiBhayibheli likhuluma kanyenti ngekucedvwa kwekufa nangesetsembiso saNkulunkulu sekuphila phakadze.—Fundza sihloko lesitsi, “Kuncotjwa Kwekufa.”

Jesu Khristu wakusho kwacaca kutsi: “Kukwati wena lokuphela kwaNkulunkulu weliciniso naloyo lowamtfuma, lokunguJesu Khristu, kuholela ekuphileni lokuphakadze.” (Johane 17:3) Ngako lisekhona litsemba lekutsi kutawuncotjwa kufa. Jesu wasicinisekisa kutsi nguNkulunkulu kuphela longasincobela kufa.