Khonta Jehova, INkhosi Yaphakadze

1, 2. (a) Ngubani “iNkhosi yaphakadze,” futsi kungani siyifanela lesicu? (Buka sitfombe lesisekucaleni kwalesihloko.) (b) Kungani sifuna kutsi Jehova asibuse?

INKHOSI SOBHUZA II yaseSwatini yabusa cishe iminyaka lengu-61. Lena kwaba yincophamlandvo yekubusa kwenkhosi esikhatsini sanyalo. Nanobe umangalisa umgamu wesikhatsi sekubusa kweNkhosi Sobhuza, kunenkhosi lengabusi sikhatsi lesifishane njengebantfu. LiBhayibheli liyibita ngekutsi ‘yiNkhosi yaphakadze.’ (1 Thim. 1:17) Umhlabeli ubita iNkhosi Lephakeme ngelibito, utsi: “[Jehova] uyiNkhosi, phakadze naphakadze.”—Hla. 10:16.

² Sikhatsi sekubusa kwaNkulunkulu senta kubusa kwakhe kungafani nekwemuntfu. Indlela yaJehova yekubusa ngiyo lesidvonsela kuye. Inkhosi leyabusa iminyaka lengu-40 ka-Israyeli wasendvulo, yadvumisa Nkulunkulu yatsi: “Simakadze unemusa nesihawu, uyephuta kutfukutsela, andze ngemusa. Simakadze wasimisa ezulwini sihlalo sakhe sebukhosi, konkhe lokukhona kungaphansi kwembuso wakhe.” (Hla. 103:8, 19) Jehova akasiyo iNkhosi yetfu nje kuphela, uphindze abe nguBabe wetfu futsi unguBabe wetfu lonelutsandvo wasezulwini. Loko kuphakamisa nayi imibuto lemibili: Ngutiphi tindlela Jehova lakhombise ngato kutsi unguBabe? Jehova ukukhombise njani kubusa kwakhe kusukela ekuhlubukeni kwase-Edeni? Timphendvulo talemibuto titawusenta kutsi sisondzele kakhulu kuJehova siphindze simkhonte ngenhlitiyo yetfu yonkhe.

INKHOSI YAPHAKADZE YENTA UMNDENI WENDZAWO YONKHE

3. Ngubani litibulo emndenini waJehova wendzawo yonkhe, futsi bobani labanye labadalwa baba ‘ngemadvodzana’ aNkulunkulu?

³ Asingabati kutsi Jehova wajabula kakhulu ngemuva kwekudala iNdvodzana yakhe lekuphela kwayo. Nkulunkulu akazange aphatse lelitibulo lakhe njengemuntfu longakabaluleki. Kunaloko, wayitsandza iNdvodzana yakhe futsi wasebenta nayo ngenjabulo ekudaleni letinye tidalwa letite sono. (Khol. 1:15-17) Letidalwa tafaka ekhatsi tigidzigidzi tetingilosi. Njengobe tibitwa ngekutsi ‘tikhonti takhe letenta intsandvo yakhe,’ letingilosi tikhonta Nkulunkulu ngenjabulo, futsi utibeka esigabeni lesiphakeme ngekutibita ngekutsi ‘tingemadvodzana’ akhe. Tingemalunga emndeni waJehova wendzawo yonkhe.—Hla. 103:20-22; Jobe 38:7, NW.

4. Kwenteka njani kutsi bantfu babe ngemalunga emndeni waJehova wendzawo yonkhe?

⁴ Ngemuva kwekudala emazulu nemhlaba, Jehova wawandzisa umndeni wakhe wendzawo yonkhe. Nasekacedze kulungisa umhlaba wawenta waba likhaya lelihle lelikwati kunakekela tintfo letiphilako, Jehova wawenta waba muhle kakhulu umsebenti wakhe emhlabeni ngekudala umuntfu wekucala, Adamu, ngemfanekiso waKhe. (Gen. 1:26-28) Njengobe anguMdali, Jehova abengalindzela kufanele kutsi Adamu amlalele. Njengobe anguBabe, Jehova wendlulisela yonkhe imiyalo yakhe ngelutsandvo nemusa. Akazange anike bantfu imiyalo lecinile lebenta bangabi nayo inkhululeko.—Fundza Genesisi 2:15-17.

5. Nguliphi lilungiselelo Nkulunkulu lalenta kute agcwalise umhlaba ngebantfu?

⁵ Ngalokungafani nekubusa kwemakhosi lamanyenti labantfu, Jehova uyakujabulela kuniketa bantfu lababusako imisebenti letsite futsi ubaphatsisa kwemalunga emndeni wakhe lawetsembako. Sibonelo saloko kutsi waniketa Adamu ligunya lekubusa letinye tidalwa, waze wamnika nemsebenti lojabulisako futsi loyinsayeya wekwetsa tilwane emagama. (Gen. 1:26; 2:19, 20) Nkulunkulu akazange atidale tigidzigidzi tebantfu emhlabeni. Esikhundleni saloko, wakhetsa kudalela Adamu umsiti, wesifazane longu-Eva. (Gen. 2:21, 22) Ngemuva kwaloko wabanika litfuba lekugcwalisa umhlaba ngebantfwana babo. Bantfu bebangakhona kwenweba imincele yePharadisi ize ifike emhlabeni wonkhe, baphile imphilo lekahle. Bebangakhonta Jehova phakadze njengencenye yemndeni wakhe wemhlaba wonkhe kanye netingilosi ezulwini. Leli litsemba lelimangalisa kakhulu sibili, futsi lisikhombisa kutsi Jehova ungubabe lonelutsandvo.

EMADVODZANA LAVUKELAKO ALA BUKHOSI BANKULUNKULU

6. (a) Kwacala njani kuvukela emndenini waNkulunkulu? (b) Kungani kuvukela kungasho kutsi Jehova wehlulekile kubusa?

⁶ Kuyadzabukisa kutsi Adamu na-Eva abazange benetiswe nguJehova njengeMbusi wabo. Esikhundleni saloko bakhetsa kulandzela indvodzana yaNkulunkulu leyamvukela, Sathane. (Gen. 3:1-6) Kuphila ngaphandle kwekubuswa nguNkulunkulu kwabaletsela lusizi, kuhlupheka nekufa bona nebantfwana babo. (Gen. 3:16-19; Rom. 5:12) Nkulunkulu besekete bantfu labamlalelako emhlabeni. Loko kusho kutsi bekehlulekile yini kubusa umhlaba nebantfu nako konkhe lokuphila kuwo? Cha akusinjalo. Wasebentisa ligunya lakhe wabacosha ensimini yase-Edeni futsi kute bangabuyi, wabeka emakherubhi kutsi agadze ekungeneni. (Gen. 3:23, 24) Ngesikhatsi lesifanako Nkulunkulu wakhombisa lutsandvo lwakhe ngekuniketa bufakazi bekutsi kuyinjongo yakhe kuba nemndeni wendzawo yonkhe lonemadvodzana emoya kanye nemadvodzana labantfu. Wetsembisa kutsi ‘intalo’ beyitawucedza Sathane kanye nemiphumela yesono sa-Adamu.—Fundza Genesisi 3:15.

7, 8. (a) Babunjani bubi ngesikhatsi saNowa? (b) Ngumaphi emalungiselelo Jehova lawenta kute ahlante umhlaba futsi alondvolote bantfu?

⁷ Emakhulwini eminyaka leyalandzela, labanye bantfu bakhetsa kwetsembeka kuJehova. Labantfu bafaka ekhatsi Abela na-Enoki kodvwa inchumbi yebantfu bamala Jehova njengaBabe neNkhosi yabo. Ngesikhatsi saNowa, “umhlaba wawugcwele budlova.” (Gen. 6:11) Loko kusho kutsi Jehova abengasawubusi yini umhlaba? Lokulandzisa lokungumlandvo kwembulani?

⁸ Cabanga ngendzaba yaNowa. Jehova wamniketa emapulani lanemininingwane kanye neticondziso tekwakha umkhumbi lomkhulu kakhulu lobewutawusindzisa Nowa nemndeni wakhe. Nkulunkulu waphindze wakhombisa lutsandvo lolukhulu ngebantfu ngesikhatsi atfuma Nowa kutsi abe ‘ngumshumayeli wekulunga.’ (2 Phet. 2:5) Asingabati kutsi umlayeto waNowa wawuhambisana nekucela bantfu kutsi baphendvuke kanye nesecwayiso sembhubhiso lebeyitawufika, kodvwa bantfu abazange bamlalele. Nowa nemndeni wakhe bebaphila nebantfu labanebudlova futsi labebatiphatsa kabi emashumi eminyaka. Jehova njengobe unguBabe lokhatsalelako, wayivikela waphindze wayibusisa lemiphefumulo lesiphohlongo. Ngekuletsa Zamcolo lowabhubhisa umhlaba wonkhe, Jehova wakhombisa kutsi unemandla kwendlula bantfu labavukelako kanye netingilosi letimbi. Asingabati kutsi nguJehova lobekalawula.—Gen. 7:17-24.

BUKHOSI BAJEHOVA NGEMUVA KWAZAMCOLO

9. Nguliphi litfuba Jehova lalinika bantfu ngemuva kwaZamcolo?

⁹ Njengobe Nowa nemndeni wakhe baphumela emhlabeni lohlobile futsi bahogela umoya lohlantekile, tinhlitiyo tabo tagcwala injabulo ngekutsi Jehova wabanakekela futsi wabavikela. Nowa wakha lilati ngekushesha wase unikela imihlatjelo kute akhonte Jehova. Nkulunkulu wambusisa Nowa nemndeni wakhe wase ubanika ticondziso tekutsi ‘batalane bandze, bagcwalise umhlaba.’ (Gen. 8:20–9:1) Ngenca yaloko, bantfu baphindze baba nelitfuba lekuba munye ekukhonteni Nkulunkulu nelekugcwalisa umhlaba.

10. (a) Kwacala kuphi kuvukela Jehova ngemuva kwaZamcolo, futsi kwacala njani? (b) Yini Jehova layenta kute aciniseke kutsi intsandvo yakhe iyenteka?

¹⁰ Nome kunjalo, Zamcolo awuzange usicedze sono futsi bantfu bekusafanele bamelane nekulawula kwaSathane lokungabonakali kanye netingilosi letivukelako. Ngekushesha, bantfu baphindze bacala kuvukela kubusa kwaJehova lokunelutsandvo. Sibonelo saloko kutsi umtukulu waNowa longuNimrodi wamelana nekubusa kwaJehova ngelizinga leliphakeme. Nimrodi ubitwa ngekutsi ‘ngumtingeli lonemandla kakhulu embikwaSimakadze.’ Wakha emadolobha lamakhulu, lafaka ekhatsi iBhabheli futsi watibeka kutsi abeyinkhosi ‘eveni laseShinari.’ (Gen. 10:8-12) Ngusiphi sinyatselo iNkhosi yaphakadze lebeyitasitsatsela lenkhosi levukelako nemetamo yayo yekuvimba injongo yaNkulunkulu ‘yekugcwalisa umhlaba’? Nkulunkulu wasanganisa lulwimi lwebantfu, wabangela kutsi bantfu lababuswa nguNimrodi badvumale futsi basakateke ‘emhlabeni wonkhe.’ Bahamba nekukhonta kwabo kwemanga kanye nendlela yekubusa kwebantfu.—Gen. 11:1-9.

11. Jehova wamkhombisa njani umngani wakhe Abrahama kutsi wetsembekile?

¹¹ Nanobe bantfu labanyenti bakhonta bonkulunkulu bemanga ngemuva kwaZamcolo, lamanye emadvodza achubeka nekukhonta Jehova. Lomunye wawo bekungu-Abrahama lowashiya imphilo lentofontofo yasedolobheni lakubo e-Uri wayawuhlala emathendeni iminyaka leminyenti. (Gen. 11:31; Heb. 11:8, 9) Ngesikhatsi Abrahama ahamba ahlala aphindze atfutse, abevame kuba sedvute nemakhosi labantfu, lamanyenti awo abehlala emadolobheni labiyelwe ngetibondza. Kodvwa Jehova wamvikela Abrahama nemndeni wakhe. Nakakhuluma ngekuvikela kwaJehova lokufana nekwababe, umhlabeli watsi: “[Nkulunkulu] akavumelanga muntfu kutsi abahluphe, ngenca yabo wajezisa ngisho emakhosi.” (Hla. 105:13, 14) Ngenca yekutsi Jehova abetsembekile kumngani wakhe Abrahama wametsembisa watsi: ‘Labanye kuwe bayawuba ngemakhosi.’—Gen. 17:6; Jak. 2:23.

12. Jehova wabukhombisa njani bukhosi bakhe eGibhithe, futsi loko kwaba namuphi umphumela kubantfu bakhe lebekabakhetsile?

¹² Nkulunkulu waphindza lesetsembiso sekubabusisa ku-Isaka indvodzana ya-Abrahama nakumtukulu wakhe Jakobe, lebesitawufaka ekhatsi kutalwa kwemakhosi etitukulwaneni tabo. (Gen. 26:3-5; 35:11) Nome kunjalo, titukulwane taJakobe taba tigcili eGibhithe ngaphambi kwekutala emakhosi. Loko bekusho kutsi Jehova abengeke yini asigcwalise lesetsembiso sakhe nome bekusho kutsi wehlulekile kubusa umhlaba? Cha akusinjalo. Ngesikhatsi sakhe lesifanele, Jehova wakhombisa emandla akhe kanye nebukhosi bakhe kuFaro lobekanenkhani. Ema-Israyeli labetigcili etsembela kuJehova futsi wawakhulula ngendlela lesimangaliso eLwandle Lolubovu. Kuyacaca-ke kutsi Jehova abesolo anguMbusi Wendzawo Yonkhe futsi njengobe anguBabe lonakekelako, wasebentisa emandla akhe lamakhulu kute avikele bantfu bakhe.—Fundza Eksodusi 14:13, 14.

JEHOVA UBA YINKHOSI YEMA-ISRAYELI

13, 14. (a) Engomeni layihlabela, yini ema-Israyeli layisho ngebukhosi baJehova? (b) Ngusiphi setsembiso lesimayelana nekubusa Nkulunkulu lasenta kuDavide?

¹³ Ngekushesha nje ngemuva kwekukhululwa kwawo ngalokusimangaliso eGibhithe, ema-Israyeli ahlabela ingoma yekuncoba lebeyidvumisa Jehova. Lengoma lebhalwe ku-Eksodusi sehluko 15, kuvesi 18 inalesimemetelo lesitsi: “Simakadze uyawubusa phakadze naphakadze.” Nembala Jehova waba yiNkhosi yalesive lesisha. (Dut. 33:5) Nanome kunjalo, lesive asenetisekanga ngekuba naJehova njengobe abenguMbusi waso longabonakali. Cishe ngemuva kweminyaka lengu-400 siphumile eGibhithe, sacela kutsi Nkulunkulu asibekele inkhosi lengumuntfu, njengobe nabomakhelwane baso labangemacaba bebanayo. (1 Sam. 8:5) Ngetulu kwako konkhe loku, Jehova abesolo ayiNkhosi, futsi loko kwabonakala ngalesikhatsi kubusa Davide inkhosi yesibili ka-Israyeli lebeyingumuntfu.

¹⁴ Davide waletsa libhokisi lesivumelwano lelingcwele eJerusalema. Kulesikhatsi lesijabulisako, emaLevi ahlabela ingoma yekudvumisa lebeyinanawa emavi laphawulekako labhalwe ku-1 Tikhronike 16:31: “Tjelani tive nitsi: ‘Simakadze uyabusa!’” Lomunye angahle atibute kutsi: ‘Njengobe Jehova ayiNkhosi yaphakadze, kwenteka njani kutsi abe yiNkhosi ngalesosikhatsi?’ Jehova uba yiNkhosi nakakhombisa kubusa kwakhe nome nakamisa sisebenti lesitammelela ngesikhatsi lesitsite nobe kute sisingatse simo lesitsite. Ngenca yaletizatfu, Jehova uba yinkhosi lephakeme. Ngaphambi kwekufa kwaDavide, Jehova bekametsembise kutsi bukhosi bakhe butawuhlala kuze kube nini nanini, watsi: “Ngiyawuvusa umliba wakho kutsi uhlale esihlalweni sakho sebukhosi, loyo loyawuphuma elukhalweni lwakho, ngiyakuwumisa umbuso wakhe.” (2 Sam. 7:12, 13) Lesetsembiso sagcwaliseka kwekugcina ngesikhatsi ‘intalelwane yakhe’ nome indvodzana yaDavide ivela eminyakeni lengetulu kwa-1 000 leyalandzela. Kwaba ngubani, futsi abetawucala nini kuba yiNkhosi?

JEHOVA UBEKA INKHOSI LENSHA

15, 16. Jesu wagcotjwa nini kutsi abe yiNkhosi yesikhatsi lesitako? Ngalesikhatsi alapha emhlabeni yini layenta alungiselela kubusa kwakhe?

¹⁵ Ngemnyaka wa-29 C.E., Johane uMbhabhatisi wacala kushumayela kutsi “uMbuso welizulu sewusondzele.” (Mat. 3:2) Ngalesikhatsi Jesu abhajatiswa nguJohane, Jehova wagcoba Jesu kutsi abe nguMesiya lowetsenjisiwe neNkhosi yeMbuso waNkulunkulu esikhatsini lesitako. Jehova wakhombisa lutsandvo ngaJesu lolufana nelwababe, nakatsi: “Lena yiNdvodzana yami, letsandzekako, lengijabula ngayo.”—Mat. 3:17.

¹⁶ Kuwo wonkhe umsebenti wakhe wekushumayela, Jesu wakhatimulisa Babe wakhe. (Joh. 17:4) Loku wakwenta ngekutsi ashumayele ngeMbuso waNkulunkulu. (Luk. 4:43) Wafundzisa ngisho nebafundzi bakhe kutsi bawuthantazele loMbuso kutsi ute. (Mat. 6:10) Njengobe ayiNkhosi Leyakhetfwa, Jesu abengatjela baphikisi bakhe kutsi: “UMbuso waNkulunkulu usemkhatsini wenu.” (Luk. 17:21) Ngalentsambama yangaphambi kwekufa kwakhe, Jesu wenta “sivumelwane sembuso” nebalandzeli bakhe. Wanika labanye bafundzi bakhe labetsembekile litsemba lekubusa naye njengemakhosi eMbusweni waNkulunkulu.—Fundza Lukha 22:28-30.

17. Jesu wacala kubusa ngayiphi indlela ngelikhulu lekucala leminyaka, kodvwa yini lebekusafanele ayilindze?

¹⁷ Jesu abetawucala nini kuba yiNkhosi eMbusweni waNkulunkulu? Abengeke abe ngiyo ngekushesha. Ngentsambama lelandzelako, Jesu wabulawa futsi balandzeli bakhe bahlakateka. (Joh. 16:32) Nanobe kunjalo, Jehova wachubeka abusa njengasetikhatsini letendlulile. Ngelilanga lesitsatfu wayivusa iNdvodzana yakhe ekufeni futsi ngelilanga lePhentekhoste ngelikhulu lekucala leminyaka, Jesu wacala kubusa ebandleni lebuKhristu. (Khol. 1:13) Nome kunjalo, Jesu kwakufanele alindze kute atfole emandla ngalokugcwele ekubusa emhlabeni njengobe ‘ayintalo’ lebeyetsenjisiwe. Jehova watjela iNdvodzana yakhe kutsi: “Hlala lapha ngesekudla sami, ngize ngifake titsa takho ngaphansi kwetinyawo takho.”—Hla. 110:1.

KHONTA INKHOSI YAPHAKADZE

18, 19. Yini lesikhutsateka kutsi siyente, futsi sitawufundza ngani esihlokweni lesilandzelako?

¹⁸ Sekuyiminyaka letinkhulungwane bukhosi baJehova babekelwa insayeya ezulwini nasemhlabeni. Jehova akwenteki alahle kubusa kwakhe, uyachubeka abusa. Njengobe anguBabe lonelutsandvo wavikela futsi wanakekela bantfwana bakhe labetsembekile lokufaka ekhatsi Nowa, Abrahama naDavide. Loku akusenti yini kutsi sititfobe eNkhosini yetfu futsi sisondzele kakhudlwana kuyo?

¹⁹ Nyalo singatibuta kutsi: Jehova ube kanjani yiNkhosi esikhatsini setfu? Singakhombisa njani kutsi sitikhonti teMbuso waJehova letetsembekile futsi sibe ngemadvodzana lalalelako emndenini wakhe wendzawo yonkhe? Kusho kutsini kuthantaza sicela uMbuso waNkulunkulu kutsi ute? Lemibuto itawuphendvulwa esihlokweni lesilandzelako.