Kuhlanganiswa Kwetinkholo Kuluhlelo LwaNkulunkulu Yini?

NOMA kunjalo, labo labasekela kuhlanganiswa kwetinkholo banembono lowehluke kakhulu kulendzaba. Eboo Patel, longumsunguli walenye yetinhlangano tekuhlanganiswa kwetinkholo lokutsiwa yi-Interfaith Youth Core, wabuta watsi: “Ikhona yini inkholo lengenandzaba nekukhombisa luvelo. . . , lengenandzaba nekunakekelwa kwemvelo . . . , nalengenandzaba nekwemukela ngemusa labanye bantfu?”

Ema-Buddha, emaKatolika, EmaPhrothestani, Ema-Hindu, Moslem kanye naletiningi letinye tinkholo tiye tasebenta ngekubambisana ekulweni nebuphuya, kulwela emalungelo ebantfu, kulwela kuvala kuhlanyelwa kwemabhomu, noma kunakekelwa kwemvelo. Tinkholo letehlukehlukene tihlangene ndzawonye kute tikhutsatane tiphindze tibonisane kutsi tingakutfutfukisa njani kuvana phakatsi kwato. Tihalalisa kuhlukahluka lokusemkhatsini wato ngekutsi tibe nemikhosi yekukhanyisa emakhandlela, tindumezulu, umculo, umthantazo kanye nalokunye.

Lokuhlangana lokunjalo kwetinkholo kuyakucedza yini kungevani lokusemkhatsini wato? Kuhlanganiswa kwetinkholo kuluhlelo lwaNkulunkulu lekwenta umhlaba ube yindzawo lencono yini?

KWETAMA KWAKHA BUNYE KUBE NAMIPHI IMIPHUMELA?

Lenye yetinhlangano letinkhulu letibuke kuhlanganiswa kwetinkholo itishaya sifuba itsi emalunga ayo achamuka etinkholweni letehlukene letingetulu kwa-200, nekutsi lenhlangano yabo itfolakala emaveni langu-76. Umngomo wayo lomkhulu ‘kukhutsata kutsi tinkholo tichubeke tihlangana tiphindze tibambisana.’ Kodvwa loko kube melula kukusho kunekukwenta. Sibonelo saloko kutsi ngekusho kwebahleli baletinhlangano, libhuku lemtsetfo sisekelo wato kuye kwadzingeka libhalwe ngekucophelela kute loko lokukulo kungatikhubi letinye tinkholo nato letilisayinile. Kungani kunjalo? Lesinye sizatfu kutsi kwakuke kwaba nekuphikisana mayelana nekutsi kufanele yini ligama laNkulunkulu lifakwe kulomtsetfo sisekelo. Lokwabese kubanga kutsi leligama lingafakwa nhlobo kulomtsetfo.

Kukholwa kuba nayiphi-ke indzima nangabe Nkulunkulu ashiyelwa ngephandle? Kantsi lokunye, singatsi kwehluke ngani-ke lokuhlangana ngalendlela kwaletinkholo kuloko lokwentiwa tinhlangano letinakekela bantfu labahluphekile? Kungako lenhlangano lesesikhulume ngayo ingatichazi ngekutsi ilicembu lenkholo, kunaloko itsi “iyinhlangano letfutfukisa kuthula.”

KWENELE YINI KUTSI INKHOLO IGCINE NGEKUKHUTSATA BUNTFU LOBUHLE?

Dalai Lama, umsekeli lovelele wekuhlanganiswa kwetinkholo utsi: “Tonkhe tinkholo tikhutsata intfo lefanako: kuba nelutsandvo, luvelo kanye nekutsetselelana. Lokumcoka kutsi loku kwentiwe kube yindlela yetfu yekuphila kwamalanga onkhe.”

Kuliciniso kona kutsi kubaluleke kakhulu kuba nelutsandvo, luvelo kanye nekutsetselela. Naku Jesu lakusho emavini lasekabitwa ngekutsi ngumtsetfo weligolide: “Tonkhe tintfo lenifuna bantfu batente kini, nani tenteni kubo.” (Matewu 7:12) Kodvwa engabe kukholwa lokungiko kugcina nje ngekukhutsata lokuhle?

Mayelana nalabanyenti labebatsi bakhonta Nkulunkulu, umphostoli Pawulu watsi: “Ngobe ngiyabafakazela kutsi banenshisekelo ngaNkulunkulu, kodvwa beswele lwati lolungulonalona.” Yayikuphi inkinga? Pawula wachubeka watsi: “Ngobe abati kutsi yini leyenta Nkulunkulu atsi umuntfu ulungile, bafuna kutiveta balungile ngendlela yabo.” (Roma 10:2, 3) Inshisekelo kanye nekukholwa kwabo kwakungasho lutfo, ngoba babengakwati kahle loko Nkulunkulu lakufunako.​—Matewu 7:21-23.

UMBONO WELIBHAYIBHELI NGEKUHLANGANISA TINKHOLO

Jesu watsi: “Bayajabula labo labatsandza kuthula.” (Matewu 5:9) Jesu bekenta loko labekufundzisa ngekungalukhutsati ludlame nangekushumayela livangeli lekuthula kubantfu labebavela etinkholweni letehlukahlukene. (Matewu 26:52) Labo labebamlalela, bebadvonseleka elutsandvweni, lolusibopho sebunye. (Kholose 3:14) Ingabe umgomo waJesu bekukumane ahlanganise bantfu labanemasiko ekuphila lahlukene kute nje bahlalisane ngebunye? Ikhona yini inkholo latihlanganisa nayo, waze wagcina ngisho nemihambo yayo?

Baholi betinkholo tebaFarisi nebaSadusi bamphikisa ngelunya lolukhulu, baze bafuna ngisho nekumbulala. Wenta njani Jesu ngaloko? Watjela bafundzi bakhe watsi: “Bayekeleni. Babaholi labatimphumphutse.” (Matewu 15:14) Jesu akavumanga kutihlanganisa nebantfu labanjalo.

Ngekuhamba kwesikhatsi, kwamiswa libandla lebuKhristu eKhorinte lese-Greece, indzawo lebeyigcwele tinhlangano tepolitiki netinkholo letitinhlobonhlobo. Bekatawenta njani emaKhristu lahlala kuleyondzawo? Umphostoli Pawula wawabhalela watsi: “Ningaboshelwa ejokeni linye nebantfu labangakholwa.” Achaza sizatfu saloko, Pawula wachubeka watsi: Khristu unabudlelwane buni naBheliyali? Umuntfu lowetsembekile ufana ngani nemuntfu longakholwa?” Ngemuva kwaloko wakhipha nasi secwayiso: “Ngako-ke phumani kubo, nitehlukanise nabo.”​—2 Khorinte 6:14, 15, 17.

Kuyacaca kutsi liBhayibheli alikusekeli kuhlanganiswa kwetinkholo. Kepha ungake utibute kutsi ‘Bungatfolakala kanjani bunye lobungiko?’

KWAKHA KUTHULA LOKUNGIKO

Tinkapane tekwakha tinetisebenti letiningi. Leto tisebenti tingawenta yini umsebenti wato uma tingavumelani ngepulani yaleso sakhiwo?

Ngalokuvamile, nguloko namuhla lokwentekako nakuzanywa kuhlanganiswa tinkholo. Nanome tifundziswa kubambisana kanye nenhlonipho, tihlale tingavumelani ngaloko lokufanele tikwente kute tisimame ekukholweni. Ngenca yaloko, kutsi tihlale tiphikisana etindzabeni tekutiphatsa kanye nangetinkholelo tato.

LiBhayibheli licuketse timiso taNkulunkulu letifanana nepulani. Singasekela kuphila kwetfu kuloko lokushiwo liBhayibheli. Labo labalusebentisile bakhonile kuncoba lubandlululo lwebuhlanga kanye nelwenkholo, baphindze bafundza kusebenta ndzawonye ngekuthula nangebunye. Nkulunkulu nakabiketela loku, watsi: “Tindzebe tetive ngiyawube sengiyatihlambulula-ke, kuze kutsi bonkhe lababite libito laSimakadze, bacela lusito kuye, bamkhonte bahlangene lihlombe ngelihlombe.” Lobunye bubangelwa ngulolulwimi ‘loluhlambulukile,’ loko lokusho timiso tekukhonta Nkulunkulu.​—Zefaniya 3:9; Isaya 2:2-4.

BoFakazi BaJehova bayakumema kutsi uvakashe eHholeni LeMbuso lelidvute nalapho uhlala khona kute utibonele wena kuthula nebunye labanako.​—Tihlabelelo 133:1.