Kufika Kwekukhanya Eveni Lekuphuma Kwelilanga

NGASEPTEMBER 6, 1926, umbonisi lojikeletako lowatalwa eJapan futsi lobekaseMelika wabuyela eJapan asasitfunywa selivangeli. Umuntfu lobekete kutemhlangabeta bekunguye yedvwa lobekabhalisele kutfola Sicongosekulindza njalo, futsi abecalise licembu lekutadisha liBhayibheli eKobe. Kulelo dolobha, Bafundzi beliBhayibheli baba nemhlangano wabo wesigodzi wekucala ngaJanuary 2, 1927. Bekunebantfu labangu-36 futsi kwabhajatiswa labangu-8. Lesi bekusicalo lesihle, kodvwa lelicembu lelincane kangaka belitawukhona njani kufinyelela bantfu labaseJapan labatigidzi letingu-60 lebekusadzingeka babone kukhanya kweliciniso leliseBhayibhelini?

NgaMay 1927, Bafundzi beliBhayibheli labakhutsele bacalisa umkhankaso wekushumayela etindzaweni tawonkhe wonkhe kute bakhangise ngeluchungechunge lwetinkhulumo letisekelwe eBhayibhelini. Nabakhangisa ngenkhulumo yekucala lebeyitawubanjelwa e-Osaka, labazalwane babeka emabhodi eceleni kwemgwaco kanye nemabhodi lamakhulu kulo lonkhe lelidolobha futsi batfumela timemo letingu-3 000 kubantfu labasetikhundleni letisetulu. Bahambisa timemo letingu-150 000 futsi bakhangisa ngalenkhulumo emaphephandzabeni ladvumile ase-Osaka nasemathikithini etitimela langu-400 000. Ngelilanga lalenkhulumo, kwandiza tindiza letimbili kulelidolobha tasakata timemo letingu-100 000. Bantfu labangaba ngu-2 300 bagcwala eHholweni lase-Osaka Asahi kute batewulalela inkhulumo lenesihloko lesitsi “UMbuso WaNkulunkulu Usedvute.” Labanye labangaba yinkhulungwane kwadzingeka kutsi bajikiswe. Ngemuva kwalenkhulumo, bantfu labebetile labangetulu kwa-600 bahlala nakusachubeka incenye yemibuto netimphendvulo. Etinyangeni letalandzela, kwetfulwa tinkhulumo telinyenti letisekelwe eBhayibhelini eKyoto nakulamanye emadolobha lasenshonalanga yeJapan.

Nga-October 1927, Bafundzi beliBhayibheli bahlela kutsi kube netinkhulumo eTokyo. Baphindze batfumela timemo kubantfu lababalulekile​—lokufaka ekhatsi ndvunankhulu, emalunga asephalamende, baholi benkholo nebaholi bembutfo wemasotja. Kwasetjentiswa emaphepha lanamekwa etingodvweni, emaphephandzaba netimemo letingu-710 000 futsi bantfu labangu-4 800 babakhona etinkhulumeni letintsatfu letetfulwa enhloko dolobha yaseJapan.

EMAHLAHLANDLELA LAKHUTSELE

Emahlahlandlela adlala indzima lebalulekile ekumikiseni umlayeto weMbuso emakhaya ebantfu. Matsue Ishii, lobekangulomunye wemahlahlandlela ekucala eJapan, kanye nendvodza yakhe Jizo, bahlanganisa tincenye letintsatfu kuletine talelive, kusuka eSapporo lesenyakatfo kuya eSendai, eTokyo, eYokohama, eNagoya, e-Osaka, eKyoto, e-Okayama, naseTokushima. Dzadze Ishii nalomunye dzadze losakhulile lokutsiwa nguSakiko Tanaka, bagcoka timphahla tabo letihloniphekile kute baye etikhulwini tahulumende. Lesinye sato sacela tincwadzi letingu-300 letinesihloko lesitsi “The Harp of God” nalesitsi “Deliverance” kute itifake emtatjeni wetincwadzi wasejele.

Katsuo naHagino Miura batsatsa tincwadzi kuDzadze Ishii futsi ngekushesha balibona liciniso. Babhajatiswa nga-1931 futsi baba ngemahlahlandlela. Haruichi naTane Yamada, kanye netihlobo tabo letinyenti bemukela umlayeto weMbuso esikhatsini lesitsite ngaphambi kwa-1930. LabakaYamada baba ngemahlahlandlela, futsi Yukiko indvodzakati yabo wahamba wayokhonta eBethel yaseTokyo.

“BOJEHU”​—LABANCANE NALABAKHULU

Ngaleso sikhatsi, timoto betidule kakhulu kantsi nemigwaco beyimibi. Ngako Kazumi Minoura nalamanye emahlahlandlela lasemasha basebentisa tinkalishi lebetite injini. Batetsa ngelibito laJehu, lobekangumshayeli wencola logijimisako, lowaba ngulenye yemakhosi aka-Israyeli. (2 Khos. 10:15, 16) Ngamunye kulaboJehu Labakhulu labatsatfu bekangemamitha langu-2.2 budze, emamitha langu-1.9 bubanti, nemamitha langu-1.9 kuphakama futsi bekungahlala emahlahlandlela lasitfupha kuJehu ngamunye. Ngetulu kwaloko, egatjeni laseJapan kwakhiwa boJehu Labancane labangu-11 labachutjwa ngelibhayisikili, futsi bekungahlala bantfu lababili kuJehu ngamunye. Kiichi Iwasaki, lowasita ekwakheni laboJehu watsi: “Ngamunye kulaboJehu abenelithende nelibhetri lemoto lebelisetjentiselwa kukhanyisa gezi.” Emahlahlandlela abeletsa kukhanya kweliciniso kuyo yonkhe iJapan, ehla futsi enyuke tintsaba naboJehu bawo aphindze ewele tigodzi kusuka eHokkaido lesenyakatfo kuya eKyushu leseningizimu.

Ikumatsu Ota lobekalihlahlandlela watsi: “Besitsi nasifika edolobheni lelitsite simise Jehu wetfu elusentseni lwemfula nobe ebaleni lelivulekile. Besicale sivakashele emadvodza lasetikhundleni letiphakeme kulelidolobha njengemphatsi walo, ngemuva kwaloko besiya emakhaya ebantfu kute sihambise tincwadzi tetfu. Nasesiyihlanganisile lensimi besibese sendlulela edolobheni lelilandzelako.”

‘Bekulilanga letintfo letincane’ ngesikhatsi lelicembu leBafundzi beliBhayibheli labangu-36 liba nemhlangano wesigodzi wekucala eKobe. (Zak. 4:10) Ngemuva nje kweminyaka lesihlanu​—nga-1932—​emahlahlandlela langu-103 nebamemeteli baseJapan babika umsebenti wekushumayela, futsi bahambisa tincwadzi letingetulu kwa-14 000. Lamuhla, kwentiwa umsebenti wekushumayela lohlelwe kahle etindzaweni letiphitsitelako taseJapan, futsi bamemeteli labangaba ngu-220 000 benta kukhanya kwabo kukhanye kulo lonkhe Live Lekuphuma Kwelilanga.​—Lokuvela emtatjeni wetfu eJapan.