IMIBUTO YELIBHAYIBHELI IYAPHENDVULWA
Sitawuke sibe naye yini hulumende munye lobusa umhlaba wonkhe?
Hulumende lobusa umhlaba wonkhe ungabenta njani kutsi babe munye bantfu bato tonkhe tive? Isaya 32:1, 17; 54:13
Asewucabange ngendlela hulumende lobusa umhlaba wonkhe longabazuzisa ngayo bantfu. Lamuhla bantfu labanyenti bayahlupheka ngenca yebuphuya, kodvwa labanye bona banjinge kakhulu. Kodvwa-ke hulumende loneluvelo ungaciniseka kutsi bonkhe bantfu bayakutfola loko labakudzingako. Ucabanga kutsi bantfu bayoke bakhone yini kwakha hulumende lonjalo?—Fundza Jeremiya 10:23.
Kuwo wonkhe umlandvo, bohulumende behlulekile kunakekela bantfu labangephansi kwabo, ikakhulukati labo labaphuyile. Labanye balabohulumende bete luvelo. (Umshumayeli 4:1; 8:9) Kodvwa Nkulunkulu Somandla wetsembise kuletsa hulumende lotawutsatsa sikhundla sabo bonkhe lalabanye bohulumende. UMbusi wawo utawubanakekela mbamba bantfu.—Fundza Isaya 11:4; Danyela 2:44.
Yini letawufezwa nguMbuso waNkulunkulu?
Jehova Nkulunkulu ukhetse uMbusi lokahle wemhlaba—iNdvodzana yakhe Jesu. (Lukha 1:31-33) Ngesikhatsi asemhlabeni, Jesu abekutsandza kusita bantfu. NasayiNkhosi, utawubenta babe nebunye bantfu bato tonkhe tive futsi utawubakhulula kuko konkhe kuhlupheka.—Fundza Tihlabelelo 72:8, 12-14.
Bonkhe bantfu batakwemukela yini kutsi Jesu unguMbusi? Cha. Kodvwa Jehova uyabeketela. (2 Phetro 3:9) Uniketa bantfu litfuba lekwemukela kutsi Jesu unguMbusi. Ngekushesha Jesu utawubasusa bantfu lababi emhlabeni, futsi aletse kuthula nekulondzeka emhlabeni wonkhe.—Fundza Mikha 4:3, 4.