IMIBUTO YELIBHAYIBHELI IYAPHENDVULWA
Yini lesenta sithantazele kutsi uMbuso waNkulunkulu ufike?
Uyafuna yini kwati kabanti ngeMbuso waNkulunkulu nangaloko lotakufeza?
UMbuso waNkulunkulu unguhulumende wasezulwini. Jesu watjela balandzeli bakhe kutsi bathantazele kutsi loMbuso ufike ngobe utawuletsa kulunga kanye nekuthula emhlabeni. Kute hulumende webantfu longakhona kubucedza ngalokuphelele budlova, kungalungi, nobe tifo, kodvwa nguMbuso waNkulunkulu longakhona kwenta loko futsi nome kanjani utakwenta. Nkulunkulu ukhetse Jesu, iNdvodzana yakhe, kutsi abe yiNkhosi kuloMbuso. Jehova uphindze wakhetsa nelicembu lebalandzeli baJesu kutsi babe babusi kanye naJesu kuloMbuso.—Fundza Lukha 11:2; 22:28-30.
Madvutane, uMbuso waNkulunkulu utabacedza bonkhe labo labaphikisa kubusa kwakhe. Ngako-ke lomthantazo lotsi uMbuso waNkulunkulu awufike, ucela hulumende waNkulunkulu kutsi utsatse sikhundla sabo bonkhe bohulumende bebantfu.—Fundza Danyela 7:13, 14; Sembulo 11:15, 18.
Kungani uMbuso waNkulunkulu utawubazuzisa bantfu?
Jesu uyiNkhosi lekahle ngobe unemusa. Njengobe ayiNdvodzana yaNkulunkulu, unawo emandla ekusita bonkhe labakhalako bacela lusito kuNkulunkulu.—Fundza Tihlabelelo 72:8, 12-14.
UMbuso waNkulunkulu utawuzuzisa bonkhe labawuthantazela ngebucotfo kutsi ufike kanye nalabo labaphila ngekuvumelana nentsandvo yaNkulunkulu. Angeke uze utisole ngekufundza loko lokushiwo liBhayibheli ngeMbuso waNkulunkulu.—Fundza Lukha 18:16, 17; Johane 4:23.