Kulalela Secwayiso Kungasindzisa Kuphila Kwakho!

NGA-December 26, 2004 kutamatama kwemhlaba lokunemandla langu-9.1 bukhulu kwahlasela sichingi sase-Indonesia lokutsiwa yiSmeulue. Bonkhe bantfu labebaselusentseni bebabuke elwandle. Lamagagasi abemakhulu ngendlela lengaketayeleki. Kusenjalo bonkhe bantfu bacala kubalekela etintsabeni bamemeta batsi, “Smong! Smong!” lokusho kutsi i-tsunami. Kungakapheli imizuzu lengu-30 emagagasi lanemandla acala kukhuphukela elusentseni abhidlita emakhaya lamanyenti nemadolobha.

Sichingi saseSimeulue yindzawo yekucala leyahlaselwa nguleTsunami lenemandla lamakhulu. Kodvwa kubantfu labangu-78,000 kwafa labasikhombisa nje kuphela. Yini leyabangela kutsi kufe bantfu labambalwa kangaka?a Kunesisho lesivamile kulesichingi lesitsi: ‘Nangabe kutamatama umhlaba bese kutsi emanti laselwandle abuyele emuva, balekela etintsabeni ngobe lamanti atawubuya ngemandla lamakhulu.’ Njengobe bekungasikwekucala bahlaselwa tiphepho, bantfu baseSimeulue besebakwati kubona kutsi kuta i-tsunami ngekubuka lushintjo lolwenteka elwandle. Lokunakisisa kushintja kwelwandle kwasindzisa kuphila kwabo.

LiBhayibheli likhuluma ngalenye inhlekelele letako, ‘kuhlupheka lokukhulu lokungazange sekwenteke kusukela kwaba khona umhlaba, nalokungeke kuphindze kube khona.’ (Matewu 24:21) Kodvwa loko akusho kutsi umhlaba utawubhujiswa bantfu labawumoshako nome ubhujiswe tehlakalo temvelo, ngobe injongo yaNkulunkulu ngemhlaba kutsi ube khona kuze kube phakadze. (Umshumayeli 1:4) Kunaloko lokuhlupheka lokutako kusinyatselo Nkulunkulu latasitsatsa kute ‘abhubhise labo labamosha umhlaba.’ Butawuphela bonkhe bubi nekuhlupheka. (Sembulo 11:18; Taga 2:22) Lesi kutawube sibusiso lesikhulu kakhulu!

Ngetulu kwaloko, lenhlekelele letako ayifani nematsunami, kutamatama kwemhlaba nobe ema-volcano labulala bantfu labangenacala. LiBhayibheli litsi “Nkulunkulu ulutsandvo.” Nkulunkulu Jehova wetsembisa kutsi bantfu “labalungile bayawudla lifa lemhlaba, bahlale kulo kuze kube phakadze.” (1 Johane 4:8; Tihlabelelo 37:29.) Ungasindza njani kulokuhlupheka lokukhulu futsi utfole letibusiso lesetsenjiswe tona? Naku lokubalulekile: Lalela secwayiso!

KUNAKE KUSHINTJA KWETIMO

Angeke silati ngalokucondzile lilanga lokutawuphela ngalo bonkhe bubi kanye nekuhlupheka, ngobe Jesu watsi: “Macondzana nalelo langa neli-awa, kute lowatiko, tingilosi ezulwini atati ngisho neNdvodzana ayati, kodvwa nguBabe kuphela lowatiko.” Kunaloko Jesu wasikhutsata kutsi ‘sihlale silindzile.’ (Matewu 24:36; 25:13) Silindze ini? LiBhayibheli lisichazela ngetintfo letitawenteka emhlabeni ngaphambi kwekutsi Nkulunkulu aletse kuphela. Njengoba kushintja kwelwandle kwenta takhamuti taseSemeulue tabona kutsi kuta itsunami, kushintja kwetimo emhlabeni kutasikhombisa kutsi kuphela sekusedvute. Libhokisi lelihambisana nalesihloko likhuluma ngelushintjo liBhayibheli lelatsi lutawenteka.

Kuliciniso kutsi letinye taletintfo lokukhulunywa ngato kulelibhokisi setivele setentekile ngelizinga lelitsite. Jesu watsi nasibona “tonkhe letintfo,” sibokwati kutsi kuphela sekusedvute. (Matewu 24:33) Tibute, ‘Kunini lapho khona letintfo lokukhulunywe ngato kulelibhokisi (1) tenteka emhlabeni wonkhe, (2) tenteka ngesikhatsi lesifanako, futsi (3) tenteka ngelizinga lelikhulu kakhulu?’ Kuyacaca kutsi siphila esikhatsini sekuphela.

INDLELA NKULUNKULU LAKHOMBISA NGAYO KUTSI UYASITSANDZA

Lobekangumengameli wase Melika watsi, “kwecwayiswa kusenesikhatsi kusindzisa kuphila.” Ngemuva kwekugadla kwaletsunami nga-2004, kwentiwa luhlelo lwekwecwayisa bantfu kulendzawo lakwagadla khona letsunami kuze esikhatsini lesitako kugwenywe kufa kwebantfu. NaNkulunkulu wente lokufananako ngekutsi ahlele kutsi bantfu bacwayiswe ngaphambi kwekutsi kufike kuphela. LiBhayibheli latsi: “Letindzaba letimnandzi teMbuso tiyawushunyayelwa emhlabeni wonkhe, kuze kube bufakazi etiveni tonkhe, bese-ke kuphela kuyefika.”—Matewu 24:14.

Emnyakeni lophelile BoFakazi BaJehova basebente ema awa langetulu kwetigidzigidzi letingu-1.9 bashumayela tindzaba letimnandzi emaveni langu-240 ngetilwimi letingetulu kwa-700. Loku kubufakazi lobuphatsekako bekutsi kuphela sekusedvute. Ngenca yekutsi BoFakazi BaJehova bayabatsandza bomakhelwane babo, benta konkhe lokusemandleni abo kute bacwayise bantfu ngelilanga laJehova lelisondzela ngekushesha. (Matewu 22:39) Lokutsi nje ufundza lesihloko, loko kubufakazi bekutsi Jehova uyakutsandza. Khumbula kutsi “[Nkulunkulu] akafisi kutsi kubhubhe ngisho namunye, kepha ufisa kutsi bonkhe bantfu baphendvuke.” (2 Phetro 3:9) Utambonga yini Nkulunkulu lokhombise kutsi uyakutsandza ngekutsi ulalele lesecwayiso?

BALEKELA ENDZAWENI LEPHEPHILE

Khumbula kutsi bantfu basendzaweni yaseSimeulue babalekela endzaweni lephakeme kuze baphephe, loko bakwenta nababona lolwandle lucala kutfukutsela. Lesinyatselo labasitsatsa sabenta basindza. Kuze usindze kulokuhlupheka lokukhulu lokutako nawe kufanele ubalekele endzaweni lephakeme kungakephuti kakhulu. Singakwenta njani loko? Umphrofethi Isaya waphefumulelwa kutsi abhale emavi lasimemo lamayelana ‘nemalanga ekugcina’ lesiphila kuwo lamuhla. Lesimemo sitsi: “Wotani, senyukele entsabeni yaSimakadze [Jehova] . . . Utasifundzisa tindlela takhe, khona sitewuhamba emikhondvweni yakhe.”—Isaya 2:2, 3.

Nawusetulu entsabeni ukhona kubona kahle futsi usuke usendzaweni lephephile. Ngendlela lefanako, kwati tindlela taNkulunkulu ngekufundza liBhayibheli kusite tigidzi tebantfu lamuhla kutsi tikhone kushintja indlela letiphila ngayo. (2 Thimothi 3:16, 17) Ngekwenta njalo basuke bacala kuhamba ‘etindleleni taNkulunkulu’ bese uyabemukela futsi abavikele.

Utasemukela yini lesimemo futsi uvumele Nkulunkulu lonelutsandvo akuvikele kuletikhatsi letimatima? Sikucela kutsi unakisise bufakazi lobusemiBhalweni lobumayelana ‘nemalanga ekugcina’ lobukhulunywe ngabo kulelibhokisi lelihambisana nalesihloko. BoFakazi BaJehova labasendzaweni yangakini batakujabulela kukusita kutsi ucondze loko lokushiwo ngulemiBhalo lekulelibhokisi nekutsi ungayisebentisa njani. Ungaphindze utitfole timphendvulo temibuto lonayo ngekutsi ungene ku-website yetfu i-www.jw.org. Chafata lakutsi khona IZIMFUNDISO ZEBHAYIBHELI > IZIMPENDULO ZEMIBUZO YEBHAYIBHELI..

a Letsunami leyenteka nga-2004 yabulala bantfu labangetulu kwa-220,000 futsi ibalwa kumatsunami labulala bantfu labanyenti emlandvweni.

TIGIGABA LETENTEKA EMHLABENI LETIKHOMBISA KUTSI KUPHELA SEKUSEDVUTE

KWANDZA KWETIMPHI KANYE NEKWANDZA KWETIPHIPHITSI

“Niyawukuva ngetimphi etindzaweni letehlukahlukene, kepha akukafaneli nesabe. Ngobe letintfo kufanele tenteke, kodvwa kuphela kutawube kusengakefiki. Ngobe sive siyawuvukela lesinye sive, nembuso uvukele lomunye umbuso . . . Tonkhe letintfo tiyawube tikucala kwemihelo.”—Matewu 24:6-8.

TIFO NENDLALA EMHLABENI WONKHE

“Kube netifo letingumshayabhuce kanye nendlala etindzaweni letehlukahlukene.”—Lukha 21:11.

KWANDZA KWEBUBI KANYE NEKUDIDEKA NGENDZABA YETINKHOLO

“Kuyawuvela baphrofethi bemanga labanyenti badukise incumbi yebantfu, futsi ngenca yekwandza kwebubi, lutsandvo lwalabanyenti luyawuphola.”—Matewu 24:11, 12.

KWEHLA LOKUKHULU KWELIZINGA LEKUTIPHATSA NEMIKHUBA LEMIHLE

“Emalangeni ekugcina kutawuba netikhatsi letibucayi lokumatima kubhekana nato. Ngobe bantfu batawutitsandza bona, batsandze imali, . . . bangetsembeki, babe bete lutsandvo, bangavumi kwenta tivumelwane, banyundzele, bangatibambi, babe nelulaka, bangakutsandzi lokuhle, batsengise ngalabanye, babe nenkhani, bagcwale umgcabho.”—2 Thimothi 3:1-4.

KUSHUNYAYELWA KWETINDZABA LETIMNANDZI TEMBUSO WANKULUNKULU EMHLABENI WONKHE

“Letindzaba letimnandzi teMbuso tiyawushunyayelwa emhlabeni wonkhe, kuze kube bufakazi etiveni tonkhe, bese-ke kuphela kuyefika.”—Matewu 24:14.

BANTFU LABANGAKHOLWA KUTSI KUPHELA SEKUSONDZELE

“Emalangeni ekugcina kutawufika baphukuti nekuphukuta kwabo, . . . batsi: ‘Kuphi lokuba khona kwakhe lokwetsenjiswa? Ngobe kusukela ngesikhatsi bokhokho betfu labafa ngaso, tonkhe tintfo tisachubeka njengobe betinjalo ekucaleni kwendalo.’”—2 Phetro 3:3, 4.