Batinikela Ngekutitsandzela

Emkhatsini waBoFakazi labakhutsele labafakaza etincenyeni temhlaba lapho kunesidzingo khona, labanyenti babo kuba bodzadze labasengakashadi. Labanye babo sebakhonte emaveni lakhashane iminyaka leminyenti. Yini lebasitile kutsi bakhone kutfutsela kulawo mave? Yini labayifundzile ngekukhonta kulamanye emave? Kuphila kwabo kwashintja kanjani? Sicocisene nalabanye babo lesebanesikhatsi lesidze benta lomsebenti. Nangabe ungudzadze losengakashadi futsi unesifiso sekungenela inkonzo letakwenetisa, siyaciniseka kutsi utawuzuza kuletincociswano. Siyaciniseka kutsi bonkhe bantfu baNkulunkulu batawuzuza nabafundza ngaletibonelo talabodzadze.

INDLELA LABALWISANA NGAYO NEKUNGABATA

Mhlawumbe uyatibuta kutsi ngikulungele yini kuyokhonta kulelinye live njengelihlahlandlela lelingakashadi? Anita, nyalo loseminyakeni lengetudlwana kwalengu-70 abenenkinga yekungabata emakhono akhe. Wakhulela eNgilandi lapho acala khona kuba lihlahlandlela nakaneminyaka lengu-18 budzala. Utsi: “Bengikutsandza kufundzisa bantfu ngaJehova, kodvwa bengingakaze ngicabange kutsi ngingakhona kuyokhonta eveni lelikhashane. Bekute lulwimi lwalesinye sive lebengilifundzile futsi bengititjela kutsi kute lengiyoke ngikhone kulifundza. Ngako ngetfuka lapho ngimenyelwa esikolweni saseGiliyadi. Ngamangala kutsi bengingubani nje mine kutsi ngingamenyelwa kulesikolwa. Kodvwa ngabuye ngacabanga kutsi ‘Nangabe Jehova angibona ngifaneleka, ngitawukuya.’ Loko kwenteka eminyakeni lengetulu kwalengu-50 leyengcile. Yonkhe leminyaka bengisolo ngikhonta njengesitfunywa selivangeli eJapan.” Anita uphindze atsi: “Ngalesinye sikhatsi, ngebuso lobumoyitelako ngiyaye ngitjele labanye bodzadze labasebasha ngitsi ‘Ningasaphotisi maseko, nani kulungeleni kuyokhonta emaveni langephandle.’ Ngiyajabula kusho kutsi labanyenti bakwentile loko.”

LOKWABENTA BABA NESIBINDZI

Bodzadze labanyenti labakhonta emaveni lakhashane bacale bangabata kuyokhonta kulawo mave. Basitfolaphi sibindzi?

Maureen loseminyakeni yabo-60 nakachaza utsi: “Nangisakhula bengilangatelela kuphila lokunenjongo, kuphila lobekutangenta ngikhone kusita labanye bantfu.” Nasaneminyaka lengu-20 budzala watfutsela e-Quebec lese-Canada lapho bekunesidzingo lesikhulu semahlahlandlela. Waphindze watsi: “Kamuva ngatfola simemo sekuya esikolweni saseGiliyadi, kodvwa bengesaba kuya endzaweni lengingayati, bangekho bangani bami. Bekungikhatsata kushiya make lobekanakekela babe wami lobekagula. Njalo ebusuku bengikhala futsi ngithantaza kuJehova ngaletintfo letingikhatsatako. Nangikhuluma nebatali bami ngetintfo lebetingikhatsata, bangincenga kutsi ngisemukele lesimemo. Ngaphindze ngabona nendlela libandla lebelibasekela ngayo batali bami. Kubona indlela Jehova lasikhatsalela ngayo kwangisita ngabona kutsi nami utanginakekela. Ngenca yaleso sizatfu besengikulungele kuhamba!” Kusukela nga-1979 Maureen wakhonta e-West Africa iminyaka lengetulu kwalengu-30 asitfunywa selivangeli. Lamuhla, nanobe anakekela make wakhe lohlala e-Canada, Maureen usachubeka alihlahlandlela lelikhetsekile. Nakakhumbula iminyaka layicitsa akhonta eveni lelikhashane, utsi: “Jehova abehlale angisekela nganoma ngabe yini lengiyidzingako ngesikhatsi lengiyidzinga ngaso.”

Wendy, naye loseminyakeni yabo-60 budzala, wacala kuba lihlahlandlela e-Australia aseminyakeni yakhe yekutfomba. Nakakhumbula utsi: “Bengingumuntfu lonemahloni kakhulu futsi ngesaba kukhuluma nebantfu lengingabati. Kodvwa umsebenti webuhlahlandlela wangisita ngakhona kucoca nato tonkhe tinhlobo tebantfu futsi ngacala kutetsemba. Kamuva ngabona kutsi besengite emahloni. Kuba lihlahlandlela kwangifundzisa kwetsembela kuJehova, futsi ngacala kukutsandza kuyokhonta emaveni langesheya kwetilwandle. Ngaphindze ngamenywa ngulomunye dzadze lobekangakashadi lebekasitfunywa selivangeli e-Japan iminyaka lengu-30 kutsi ngiyoshumayela naye kuleyonsimu tinyanga letintsatfu. Kusebenta naye kwangifaka umdlandla wekufuna kutfutsela kulamanye emave ngiyoshumayela khona.” Eminyakeni yabo-1980, Wendy watfutsela e-Vanuatu, sichingi lesikhweshe ngemakhilomitha langu-1 770 ngasemphumalanga yase-Australia.

Wendy solo usaseVanuatu futsi sewukhonta ehhovisini lekuhumusha. Nakachaza utsi: “Kungijabulisa kakhulu kubona indlela emacembu kanye nemabandla lakhula ngayo etindzaweni letisemaphandleni. Kuba nesandla emsebentini waJehova kuletindzawo, ngikubheka njengelilungelo lelingachazeki.”

Kumiko, loseminyakeni yabo-60, bekakhonta njengelihlahlandlela lelivamile e-Japan ngesikhatsi lelinye lihlahlandlela lebebashumayela nalo lisikisela kutsi batfutsele e-Nepal. Nakachaza utsi: “Abesolo angincenga kutsi sihambe, kodvwa bengisolo ngitsi ngeke ngikhone. Bengikhatsateke ngekufundza lulwimi lolusha futsi ngesaba kutsi kutawudzingeka ngente lushintjo endleleni lebengiphila ngayo. Bengikadze nginanetinkinga tetimali lebetenta ngingakhoni kuyokhonta kulelinye live. Njengobe bengisacabangisisa ngekwenta sincumo lesikahle, ngabese ngitfola ingoti yesidududu futsi ngalaliswa esibhendlela. Njengobe ngiselele lapho, ngatibuta kutsi: ‘Ngubani lowatiko kutsi yini letawulandzela? Kungenteka ngigule kakhulu kunaloku bese angisalitfoli sanhlobo litfuba lekuyokhonta njengelihlahlandlela eveni lelingesheya kwelwandle. Noma sengiya nje umnyaka ube munye.’ Ngako ngathantaza ngebucotfo kuJehova kutsi angisite ngente sincumo lesikahle.” Ngemuva kwekutsi Kumiko sekakhishiwe esibhendlela, wavakashela eNepal futsi wabese uncuma kutsi yena nalelelinye lihlahlandlela batfutsele khona.

Kumiko losacedze cishe iminyaka lelishumi akhonta e-Nepal, utsi: “Letinkinga lebengikhatsateka ngato takhwesha kimi, kuhle kweLwandle Lolubovu naluhlukana ekhatsi. Ngiyajabula kutsi ngenta sincumo sekuyokhonta lapho kunesidzingo lesikhulu khona. Ngalokuvamile, nangifundza liBhayibheli nemndeni lotsite, bomakhelwane labangaba sihlanu noma labasitfupha bavama kuta batolalela. Ngisho nebantfwana labancane bayaye bacele kutsi ngibanike emapheshana etfu lasekelwe eBhayibhelini. Kuyajabulisa kushumayela insimu lenebantfu labalalelako.”

INDLELA LABABEKETELA NGAYO

Labodzadze labakhutsele lesicoce nabo, bahlangabetana netinkinga. Babhekana kanjani nato?

Diane waseCanada utsi: “Ekucaleni bekulukhuni kwehlukana nemndeni wami.” Nanobe nyalo aseminyakeni lengetudlwana kwalengu-60, sewukhonte iminyaka lengu-20 asitfunywa selivangeli e-Ivory Coast (leseyibitwa ngekutsi yi-Côte d’Ivoire). Nakachaza utsi; “Ngacela Jehova kutsi angisite ngitsandze bantfu balensimu lebengikuyo. Lomunye thishela wetfu eGiliyadi longuMzalwane Jack Redford, watsi ekucaleni kungenteka setfuswe simo lesitawusitfola ensimini lesabelwe kuyo ikakhulukati nangabe kuleyo ndzawo bantfu baphuyile. Kodvwa watsi: ‘Ningabunaki lobuphuya. Kunaloko ninake labantfu, nibabuke ebusweni nasemehlweni. Futsi ninake indlela labenta ngayo nabeva emaciniso laseBhayibhelini.’ Nguloko kanye lengakwenta, futsi kuye kwangiletsela tibusiso letinyenti! Nangicocela bantfu ngeMbuso waNkulunkulu, ngivele nje ngibone injabulo igcwala emehlweni abo!” Yini lenye leyasita Diane kutsi akhone kuchubeka akhonta kulelinye live? Utsi: “Ngiye ngasondzelana nebantfu lengifundza nabo liBhayibheli futsi ngajatjuliswa kubabona baba tikhonti taJehova letetsembekile. Kulendzawo lebengikhonta kuyo besekungatsi kusekhaya. Njengobe Jesu asetsembisa, ngatfola bobabe nabomake, bomnaketfu nabodzadzewetfu.”​—Mak. 10:29, 30.

Anne loseminyakeni yabo-40, ukhonta e-Asia lapho umsebenti wekushumayela uvinjelwe khona. Utsi: “Kuyo yonkhe leminyaka ngikhonta emaveni lehlukene, bengihlala nabodzadze labakhuliswe ngendlela leyehlukile kuleyami futsi labanebuntfu lobungafani nebami. Ngalesinye sikhatsi, loko ngiko lobekwenta kutsi singevani futsi sivisane buhlungu. Nakwenteka loku, bengivele ngitame kusondzelana nabo kakhulu kute ngetame kuwacondza kahle emasiko abo. Ngetama kamatima kute ngibakhombise kutsi ngiyabatsandza futsi ngibabeketelele. Ngiyajabula kutsi leyo metamo yami yaba nemiphumela lemihle futsi kwenta saba bangani labasondzelene kakhulu lokuyintfo leyangenta ngakhona kukhutsatela esabelweni sami.”

Nga-1993, Ute, waseGermany, losandza kwendlula eminyakeni lengu-50, wabelwa kutsi ayoba sitfunywa selivangeli eMadagascar. Utsi: “Ekucaleni bekulukhuni kufundza lulwimi lwakhona, kulukhuni kumelana nesimo selitulu lesishintjashintja ngendlela lengachazeki, sifo samalaleveva, sifo se-amoebas lesitfolaka emantini langcolile kanye nekuba netilo. Kodvwa ngalutfola lusito. Bodzadze bakulendzawo kanye nebantfwababo kuhlanganise nebantfu lebengifundza nabo liBhayibheli bangisita kutsi ngifundze lulwimi lwakhona. Dzadze lebesititfunywa telivangeli naye bekanginakekela nangigula. Kodvwa ngetulu kwako konkhe, Jehova wangisita kakhulu. Bengihlale ngimtjela loko lokungikhatsatako. Ngalesinye sikhatsi bengilindza emalanga nobe tinyanga, solo ngigadze kutsi Jehova aphendvule imithantazo yami. Jehova waticatulula tonkhe tinkinga tami.” Ute sewukhonte eMadagascar iminyaka lengu-23.

TIBUSISO LABATITFOLA

Njengalabanye labakhonta lakunesidzingo lesikhulu khona, bodzadze labasengakashadi labakhonta kulamanye emave bahlale bakhuluma ngetibusiso labatitfolile nabakhonta kulawo mave. Ngutiphi letinye tibusiso labatitfolile?

Heidi, waseGermany, nyalo loseminyakeni yabo-70, bekasolo asitfunywa selivangeli e-Ivory Coast (nyalo leseyibitwa ngekutsi yiCôte d’Ivoire) kusukela nga-1968. Utsi: “Lokungijabulise kakhulu kubona bantfu lebengifundza nabo liBhayibheli ‘bachubeka bahamba ecinisweni.’ Labanye lebengifundza nabo liBhayibheli nyalo sebangemahlahlandlela kanye nemadvodza lamadzala elibandla. Labanyenti babo bangibita batsi Make nobe Gogo. Lomunye walamadvodza lamadzala akanye nemndeni wakhe bangitsatsa njengelilunga lemndeni wabo. Ngako Jehova ungiphe indvodzana, malukatana kanye nebatukulu labatsatfu.”​—3 Joh. 4.

Karen waseCanada, nyalo loseminyakeni yabo-70, wakhonta iminyaka lengetulu kwalengu-20 eWest Africa. Utsi: “Kuba sitfunywa selivangeli kungifundzise kutidzela, kuba nelutsandvo kanye nekubeketela. Kusebenta nebazalwane bakulamanye emave kuwuvulile umcondvo wami. Ngafundza kutsi kunetindlela letinyenti tekwenta tintfo. Kusibusiso lesikhulu kuba nebangani emhlabeni wonkhe. Ngisho nobe imphilo yetfu netabelo tetfu sekushintjile, kodvwa solo sisebangani.”

Margaret, waseNgilandi, losetawufika eminyakeni yabo-80, waba sitfunywa selivangeli eLaos. Utsi: “Kukhonta kulamanye emave kwangenta ngatibonela indlela Jehova labadvonsa ngayo bantfu bakuto tonkhe tinhlanga kutsi bete enhlanganweni yakhe. Loko kwakucinisa kakhulu kukholwa kwami. Nyalo ngiyaciniseka kutsi nguJehova locondzisa lenhlangano nekutsi tinjongo takhe titawugcwaliseka.”

Kuliciniso kutsi bodzadze labangakashadi labakhonta kulamanye emave babe nencenye lenkhulu emsebentini webuKhristu loye wentiwa. Ngako kufanele banconywe ngemsebenti wabo. (Khu. 11:40) Lokuhle nakakhulu kutsi linani labo liyakhula. (Hla. 68:11) Ungakhona yini nawe kuhlela timo takho kuze wente ngendlela labente ngayo labodzadze labakhutsele lesicoce ngabo kulesihloko? Nawungakhona kwenta kanjalo, ‘utawunambitsa, ubone kutsi Simakadze muhle.’​—Hla. 34:8.