Tiphrofetho Lesetifezekile

Sike sakhuluma ngemlandvo wa-Croesus lowadukiswa ngumfundisi wase-Delphi lokwamenta wancotjwa yinkhosi yasePheresiya. Ngakulolunye luhlangotsi, liBhayibheli linetiphrofetho letimangalisako letihlanganisa siphrofetho senkhosi yasePheresiya lesagcwaliseka ngendlela lebesibiketelwe ngayo.

Umphrofethi Isaya longumHebheru, wakhuluma ngenkhosi Khuresi kusesele iminyaka lengu-200 kutsi italwe, wachaza kutsi beyitalincoba kanjani lidolobha lelikhulu laseBhabhulona.

Isaya 44:24, 27, 28 utsi: “Naku lokushiwo nguSimakadze, . . . lokhuluma nekujula kwemanti atsi: ‘Yoma, ngitakomisa imifudlana yakho.’ Ngimi futsi lokhuluma ngaKhuresi atsi: ‘Ungumelusi wami, uyawukwenta konkhe loko lengikutsandzako; uyawukhuluma ngeJerusalema, atsi: “Ayakhiwe kabusha,” nangelithempeli atsi: “Akwakhiwe tisekelo talo.”’”

Herodotus, losati semlandvo lesingumGriki watsi libutfo laKhuresi belitawuphambukisa umfula iYufrathe lebeyivikele lidolobha laseBhabhulona. Ngebuciko, Khuresi nelibutfo lakhe lemphi, bangena kulelidolobha kalula nje, bahamba lapho bekuhamba emanti alomfula khona. Ngemuva kwekuncoba lelidolobha, Khuresi wakhulula emaJuda lebekatfunjwe eBhabhulona futsi wawavumela kutsi abuyele emuva ayokwakha kabusha iJerusalema lebesekuphele iminyaka lengu-70 ibhujisiwe.

Isaya 45:1 utsi: “Naku lokushiwo nguSimakadze kulogcotjiwe wakhe, kuKhuresi, lengibambe sandla sakhe sangasekudla, ngentela kwehlula tive embikwakhe, ngemuke emakhosi tikhali tawo, ngivule neminyango embikwakhe, kuze emasango angetiwuvalwa.”

EmaPheresiya angena kulelidolobha ngemagede alo lebekashiywe avuliwe ngebudlabha. Kube bantfu baseBhabhiloni bebati kutsi Khuresi uhlela kwentani, ngabe bawavala lamagede lebekangasemfuleni. Ngesizatfu sekutsi abawavalanga, lelidolobha belingakavikeleki.

Lesiphrofetho lesimangalisako singulesinye setiphrofetho letinyenti letiseBhayibhelini letafezeka ngendlela lebetibiketelwe ngayo.a Tiphrofetho letiseBhayibhelini tehlukile kuleto letentiwa bantfu labatsembele kubonkulunkulu bemanga, tona tivela kuloyo lotsi: “Ngimemetela siphetfo kusukela ekucaleni, kusukela etikhatsini takadzeni ngimemetela loko lokutakwenteka.”​—Isaya 46:10.

NguNkulunkulu weliciniso ligama lakhe lokunguJehova longasho emavi lanjena. Ligama lakhe lisho kutsi “Ubangela Kutsi Kube Khona.” Liveta kutsi uyakwati kuhlela likusasa futsi alente livumelane nenstandvo yakhe. Lisicinisekisa kutsi konkhe lakwetsembisile utakufeza.

TIPHROFETHO LETENTEKA LAMUHLA

Ungatsandza yini kwati loko tiphrofetho letiseBhayibhelini letikushoko mayelana nesikhatsi setfu? Eminyakeni lengu-2 000 leyendlulile, liBhayibheli labiketela kutsi “emalangeni ekugcina kutawuba netikhatsi letibucayi lokumatima kubhekana nato.” Emalanga ekuphela kwani? Kutawuphela kutondzana, kucidzeteleka, kanye nekuhlupheka, lokutintfo lesetihluphe bantfu tinkhulungwane teminyaka, hhayi kuphela kwemhlaba nobe bantfu. Asesicoce ngetiphrofetho letimbalwa letikhombisa kutsi ‘sisemalangeni ekugcina.’

2 Thimothi 3:1-5 utsi: “Emalangeni ekugcina . . . , bantfu batawutitsandza bona, batsandze imali, batigabatise, batigcabhe, bahlambalate, bangalaleli batali, bangabongi, bangetsembeki, babe bete lutsandvo, bangavumi kwenta tivumelwane, banyundzele, bangatibambi, babe nelulaka, bangakutsandzi lokuhle, batsengise ngalabanye, babe nenkhani, bagcwale umgcabho, batsandze injabulo kunekutsandza Nkulunkulu, babonakale shengatsi bayamhlonipha Nkulunkulu kodvwa babe bawaphika emandla ako; bantfu labanjalo ubobafulatsela.”

Awuvumi yini kutsi imikhuba lenjena seyandze ngelizinga lelikhulu kubantfu lamuhla? Uyabona yini kutsi bantfu lesiphila nabo batitsandza bona, batsandza imali futsi bayatigcabha? Unakile yini kutsi bantfu bafuna tintfo ngenkhani futsi abafuni kuvumelana nalabanye? Uyanaka yini kutsi uyandza lomkhuba wekutsi bantfwana bangalaleli batali nekutsi bantfu batsandza kutijabulisa kakhulu kunekutsi batsandze Nkulunkulu? Futsi njengoba sikhatsi sichubeka, tintfo tiya ngekuba timbi kakhulu.

Matewu 24:6, 7 utsi: “Niyawukuva ngetimphi etindzaweni letehlukahlukene . . sive siyawuvukela lesinye sive, nembuso uvukele lomunye umbuso.”

Kulinganiselwa kutsi bantfu labafa etimphini kusukela nga-1914 bangetulu kwetigidzi letingu-100, lokusibalo lesikhulu lesendlula bantfu labasemaveni lamanyenti. Cabanga ngelinani lebantfu labakhalako, labaselusizini lwekufelwa kanye nalabahluphekako. Tive letinyenti tifundzile yini emaphutseni ato ngekutsi tiyekele kulwa?

Matewu 24:7 utsi: “Kuyawuba khona indlala.”

I-World Food Programme yatsi: “Etindzaweni lapho sikhicita khona kudla lokungenela wonkhe muntfu, kulabangu-9 munye ulala angakadli. Lokubi nakakhulu, munye kulabatsatfu akondleki kahle.” Kulinganiselwa kutsi bantfwana labatigidzi letintsatfu babulawa yindlala.

Lukha 21:11 utsi: “Kuyawuba khona kutamatama lokukhulu kwemhlaba.”

Njalo ngemnyaka kutamama kwemhlaba lokwenteka tikhatsi letingu-50 000 kutsintsa bantfu labanyenti ngenca yebukhulu bako. Lokulikhulu kwako kubhidlita takhiwo letinyenti. Bese kutsi unyaka ngemnyaka kuhlale kunekutamatama kwemhlaba lokukhulu kwendlula konkhe. Kutsiwa kusukela nga-1975 kuya ku-2000, kungenteka kutamatama kwemhlaba kubulele bantfu labangu-471 000.

Matewu 24:14 utsi: “Letindzaba letimnandzi teMbuso tiyawushunyayelwa emhlabeni wonkhe, kuze kube bufakazi etiveni tonkhe, bese-ke kuphela kuyefika.”

BoFakazi baJehova labangetulu kwetigidzi letingu-8 bashumayela tindzaba letimnandzi teMbuso waNkulunkulu emhlabeni wonkhe emaveni lacishe abe ngu-240. Bashumayela tindzaba letimnandzi emadolobheni lamakhulu, etindzaweni tasemakhaya, emahlatsini kanye nasetintsabeni. Nasekanetisekile Nkulunkulu ngalomsebenti futsi sewuphelile, lesiphrofetho sitsi: ‘Kuphela kutawubese kuyefika.’ Loku kutawube kusho kutsini? Kutawusho kutsi kubusa kwebantfu sekuphelile, sekutawubusa umbuso waNkulunkulu. Ngutiphi tibusiso letitawugcwaliseka ngaphansi kweMbuso waNkulunkulu? Chubeka ufundza kute utfole lokunyenti.