Nakubonakala Kumatima Kubeketelela Tinkinga Tekuphila

Cabanga ngesibonelo sa-Sallya waseMelika, lowalahlekelwa ngiko konkhe labekanako ngesikhatsi kuhlasela siphepho lesikhulu. Nakachaza utsi: “Ngativa ngingasakhoni kububeketelela buhlungu lebengibhekene nabo. Ngalamanye emalanga ngangiva shengatsi ngabe sengiyafa.”

Lobunye bumatima ekuphileni, kungalesikhatsi ufelwa ngumuntfu lomtsandzako. Janice wase-Australia utsi: “Ngesikhatsi ngifelwa ngemadvodzana ami lamabili ngekulandzelana, ngativa ngifana nembita lephihlike yaba ticucu. Ngancenga Nkulunkulu ngatsi: ‘Ngicela ungisite, angisakhoni kububeketelela lobuhlungu lobu! Ngicela ungivumele ngife nami. Angisafuni kuphila.’”

Daniel weva buhlungu kakhulu ngesikhatsi atfola kutsi umfati wakhe uphingile. Utsi: “Ngalesikhatsi umfati wami avuma kutsi bekasolo aphinga, ngeva shengatsi ngigwazwa ngesikhali ekhatsi enhlitiyweni. Kwaba shengatsi lobuhlungu bekugwazwa buyaphindzelela—futsi kwangitsatsa tinyanga solo ngitiva ngaleyondlela.”

Le-Sicongosekulindza sitawucoca ngekutsi kungani singakujabulela kuphila ngisho nobe

• Sivelelwa tinhlekelele

• Sifelwa ngumuntfu lesimtsandzako

• Umuntfu loshade naye aphinga

• Uphetfwe kugula lokumatima

• Singasakwati kubeketelela kuphila

Kwekucala, asesicoce ngekutsi singasitwa yini nakuvela inhlekelele.