Nangabe Kugadla Inhlekelele

Andrew wase Sierra Leone utsi: “Ekucaleni, saphelelwa litsemba. Tonkhe tintfo lebesinato tahamba neludzaka lebeludzilika kanye netikhukhula.”

David wase Virgin Islands utsi: “Ngemuva kwalesiphepho lesikhulu, sabuyela emtini wetfu, satfola kungenalutfo. Setfuka kakhulu. Indvodzakati yami yaguca phansi ngemadvolo yakhala.”

NANGABE wake wasindza enhlekeleleni, uyakucondza loko lokwehlele labanye, lokufaka ekhatsi: kumangala, kungakukholwa lokwentekile, kusangana, kukhatsateka, kanye nekuphupha kabi ebusuku. Labanyenti labasindze enhlekeleleni baphuka tinhlitiyo baphindze badzinwe futsi bakutfola kumatima kuchubeka nemphilo.

Nangabe ulahlekelwe ngiko konkhe lonako enhlekeleleni, kungenteka utive shengatsi angeke usakhona kubeketelela lesimo. Kungenteka utibute kutsi usaphilelani. Nome kunjalo, liBhayibheli litsi kuphila kusebalulekile futsi ungaba nalo litsemba lemphilo lencono.

KWATI LICINISO LELISEBHAYIBHELINI KWENTA UKUJABULELE KUPHILA

Umshumayeli 7:8 utsi: “Siphetfo sentfo sincono kunesicalo sayo.” Nawusandza kululama enhlekeleleni kungenteka utive ulahlekelwe litsemba. Kodvwa njengoba uchubeka ulungisa umbono wakho ngekuphila, tintfo tingaba ncono kancane kancane.

LiBhayibheli litsi esikhatsini lesitako “umsindvo wekulila newekukhala awuyiwuphindza uvakale.” (Isaya 65:19) Lamavi atawugcwaliseka ngalesikhatsi umhlaba sewuguculwe waba lipharadisi nasekubusa uMbuso waNkulunkulu. (Tihlabelelo 37:11, 29) Tinhlekelele ngeke tiphindze tibe khona. Bonkhe buhlungu lesabuva nekukhatsateka kutawucedvwa phakadze ngobe Nkulunkulu Somandla utsembisa kutsi: “Tintfo takadzeni tingeke tikhunjulwe, futsi tingeke tisabuya nasengcondvweni.”—Isaya 65:17.

Asewucabange ngaloku: UMdali uhlele ‘kukunika litsemba nelikusasa’—lokuyimphilo lenekuthula ngeMbuso waNkulunkulu. (Jeremiya 29:11) Kuba nelwati ngalamaciniso kungakusita yini ubone bumcoka bekuphila? Sally, lesikhulume ngaye esihlokweni sekucala, utsi, “Kutikhumbuta ngato tonkhe tintfo letinhle letitawuletfwa nguMbuso waNkulunkulu ngesikhatsi lesitako, kungakusita ukhohlwe ngalokwenteka esikhatsini lesendlulile futsi uchubeke nekuphila.”

Ungatsandza yini kufundza ngaloko uMbuso waNkulunkulu lotakwentela bantfu masinyane? Kwenta kanjalo kungakunika litsemba lekutsi ngisho nome ngabe esikhatsini lesendlulile wehlelwa yinhlekelele, imphilo yakho ibalulekile njengobe ulindzele ngekulangatelela sikhatsi lapho tinhlekelele tiyobe tingasekho khona. Kwanyalo liBhayibheli lisinika ticondziso lesingatisebentisa kuze sibeketelele buhlungu benhlekelele. Asesicoce ngetibonelo letimbalwa.

Emavesi EliBhayibheli Lalusito

Lala Ngalokwanele.

“Kuncono kubamba ngesandla sinye ube nekuthula emoyeni, kunekubamba emabhabha ngemshikashika nekucosha umoya.”—Umshumayeli 4:6.

Bacwaningi batsi: “Ngemuva kwekubhekana nesimo lesibuhlungu, kungalali ngalokwanele kungandzisa kukhatsateka futsi kukwente ube butsakatsaka.” Ngako kubalulekile kutsi ulale ngalokwanele.

Khuluma nalotsite ngendlela lotiva ngayo.

“Kukhatsateka kuyamondzisa umuntfu; kodvwa livi lemusa limenta ajabule.”—Taga 12:25.

Tfululela sifuba sakho kumngani lometsembako nome lilunga lemndeni. Emalunga emndeni noma bangani bangenta lokungetulu kwekukulalela, bangakukhutsata ngemavi lakhako baphindze bakusite ngetintfo lotidzingako.a

Cabanga ngelikusasa lelite tinhlekelele.

“Kunemazulu lamasha nemhlaba lomusha lesikulindzele ngekwesetsembiso sakhe, futsi kuko kutawuba nekulunga.”—2 Phetro 3:13.

a Umuntfu losacindzeteleke kamatima sikhatsi lesidze kungase kudzingeke ayobonana nabodokotela labangamsita.