Nangabe Loshade Naye Aphingile

Maria, waseSpain utsi: “Ngeva shengatsi ngabe ngiyafa ngesikhatsi indvodza yami ingitjela kutsi iyangishiya kuze iyohlala nalomunye wesifazane lobekamncane kunami. Ngeva buhlungu kakhulu, ikakhulukati nangicabanga ngako konkhe kutidzela kwami ngenca yakhe.”

Bill, waseSpain utsi: “Ngesikhatsi umfati wami angishiya ngenca yekutsi abesaganile, ngeva buhlungu kakhulu. Emaphupho etfu, ematsemba lebesinawo, kanye netintfo lebesihlele kutenta, konkhe kwavele kwaphelela emoyeni. Ngalamanye emalanga bengiva shengatsi ngincono, kepha ngingakalindzeli bengivele ngitive ngicindzeteleke kakhulu.”

KUPHINGA kwemuntfu loshade naye kuvisana buhlungu kakhulu. Kuyavunywa, labanye bayabacolela bantfu labashade nabo labaphingile nangabe bacolisa, futsi baphindze bahlale nabo.a Ngisho nome labo labashadile bacolelana nobe bangacolelani, labo labangenacala emshadweni basala balimele kakhulu enhlitiyweni. Bantfu labanjalo bangakhona njani kubhekana naleso simo lesibuhlungu?

EMAVESI ELIBHAYIBHELI LANGASITA

Ngetulu kwalobuhlungu, labanyenti labangenacala emshadweni bayadvudvuteka nabafundza liBhayibheli. Babonile kutsi Nkulunkulu uyakubona kukhala kwabo futsi uyavelana nabo.—Malakhi 2:13-16.

“Ngesikhatsi inhlitiyo yami iphitsiteliswa ngimicabango, kudvudvuta kwakho kuyawutfokotisa umphefumulo wami.”—Tihlabelelo 94:19.

Bill, nakakhumbula utsi: “Njengoba bengifundza lelivesi, ngeva shengatsi Jehova utfoba silondza sami ngesineke, njengoba kungenta babe lonelutsandvo.”

“Kulowetsembekile wena utibonakalisa wetsembekile.”—Tihlabelelo 18:25.

Carmen, loweva sekuphele tinyanga letinyenti kutsi indvodza yakhe beyisolo iphinga, utsi: “Indvodza yami beyingaketsembeki. Kodvwa bengetsemba kutsi Jehova wetsembekile kimi. Bekangeke angijabhise.”

“Ningakhatsateki ngalutfo, kodvwa kuko konkhe ticelo tenu atatiwe nguNkulunkulu ngekuthantaza, ngekuncusa. . . kuthula kwaNkulunkulu lokwendlula konkhe kucondza kutawulondza tinhlitiyo tenu.”—Filiphi 4:6, 7.

Sasha utsi: “Ngalifundza ngalokuphindzaphindziwe lelivesi. Njengoba ngangichubeka ngithantaza, Nkulunkulu wanginika kuthula.”

Bonkhe labo lesesicoce ngabo, ngaletinye tikhatsi bebeva shengatsi ngabe bayafa. Kodvwa batsembela kuJehova futsi batfola nemandla eVini lakhe liBhayibheli. Bill uyibeka ngalendlela: “Kuba nekukholwa kwangisita ngabona kubaluleka kwekuphila ngisho nobe bekubonakala kungatsi konkhe sekuphelile. Ngisho nobe sikhatsi lesitsite ‘ngangihamba esigodzini lesinelitfunti lekufa,’ Nkulunkulu bekanami.”—Tihlabelelo 23:4.

a Kuze utfole kwatiswa lokwengetiwe mayelana nekutsi ungamcolela yini nobe ungamcoleli umuntfu loshade naye lophingile, fundza luchungechunge lwaletihloko ku-Phaphama! ya-April 22, 1999, lenesihloko lesitsi “Lapho Umngane Womshado Engathembekile” letfolakala ngesiZulu.

Yini Lesite Labanye Kutsi Babeketele?

Fundza uphindze ucabangisise ngemibhalo letakudvudvuta.

Bill utsi: “Ngafundza incwadzi yaJobe ngase ngifundza neTihlabelelo, futsi bengidvwebela onkhe emavesi labekakhuluma ngesimo lebengikuso. Njengoba ngifundza, ngacondza kutsi lababhali beliBhayibheli nabo babhekana nebuhlungu nekucindzeteleka lengangibuva.”

Tfola indvudvuto ngekulalela umculo.

Carmen utsi: “Bengitsi nangingakhoni kulala ebusuku, ngilalele umculo. Lena bekuyindlela lebengidvudvuteka ngayo kakhulu.” Daniel utsi: “Ngafundza kudlala ligitali futsi ngatfola kutsi lomculo bewunginika kuthula.”

Khuluma nalabanye ngendlela lotiva ngayo.

Daniel utsi: “Bengingakakwetayeli kutjela labanye indlela lebengitiva ngayo, kodvwa benginebangani labakahle futsi bengicoca nabo onkhe emalanga. Ngatfululela sifuba sami kubo ngekubabhalela kanye nangekucoca nabo. Loko kwangisita kakhulu.” Sasha utsi: “Lusito lwemndeni wami belubaluleke kakhulu. Make wami abehlala akulungele kungisita nekungilalela. Nobe nini lapho ngifuna lebengingacoca naye, abehlala akhona. Nababe bekangenta ngitive ngitsandvwa futsi ngilondzekile. Wangisita ngakhona kululama kancane kancane.”

Chubeka uthantaze.

Carmen utsi: “Bengihlala ngithandaza. Bengiva kutsi Nkulunkulu usedvute nami, ungilalele, futsi uyangisita. Kuleso sikhatsi lesimatima, ngasondzela kakhulu kuNkulunkulu.”