Nangabe Sekulukhuni Kubeketelela Kuphila

Adriana, waseBrazil utsi: “Imicabango yekuphelelwa litsemba nekuva buhlungu beyifika njalo engcondvweni yami. Ngako ngancuma kutsi ngitibulale.”

Uke wabuva yini buhlungu ekuphileni kwakho waze waphetsa ngekutsi awusafuni kuchubeka nekuphila? Nangabe kunjalo, kungenteka uyicondze indlela abetiva ngayo Adriana. Bekanesifo sekuhlala atfukutsele, akhatsatekile futsi angenalitsemba.

Kaoru, waseJapan lobekanakekela batali bakhe labagulako kantsi futsi sebakhulile nakachaza utsi: “Ngaleso sikhatsi bengitiva ngicindzeteleke kakhulu nangisemsebentini. Ngekuhamba kwesikhatsi ngativa ngingasakutsandzi kudla futsi bengingasalali nakahle ebusuku. Ngase ngicala kucabanga kutsi tonkhe letinkinga tami betitophela nangingafa.”

Lenye indvodza yase Nigeria lengu-Ojebode itsi: “Bengihlala ngitfukutsele kangangekutsi bengize ngikhale tinyembeti, ngako ngacabanga indlela yekucedza kuphila kwami.” Siyajabula kutsi Ojebode, Kaoru, na-Adriana abazange batibulale. Noma kunjalo, njalo ngemnyaka tinkulungwane tebantfu tiyatibulala.

UNGALUTFOLAPHI LUSITO?

Kubantfu labatibulalako, linyenti labo ngemadvodza lawo lesabako kucela lusito. Jesu watsi bantfu labagulako badzinga dokotela. (Lukha 5:31) Ngako nangabe ufikelwa yimicabango lenjena, sicela ungabi nemahloni ekucela lusito. Labanyenti labacindzetelekile baye basitakala ngekucela lusito lwabodokotela futsi bakhonile kubeketelela timo lababhekene nato. Ojebode, Kaoru, na-Adriana batfola lusito lwabodokotela futsi nyalo sebativa bancono kakhulu.

Bodokotela bangase basebentise imitsi, kucocisana nesigulane nome kokubili kuze belaphe kucindzeteleka. Labo labacindzetelekile badzinga kunakekelwa yimindeni yabo kanye nebangani babo labasicondzako simo labakuso, bababeketelele futsi baphindze babasekele. Umngani lomkhulu umuntfu langabanaye nguNkulunkulu Jehova, losiniketa lusito lolukhulu ngeliVi lakhe liBhayibheli.

LIKHONA YINI LIKHAMBI LETINKINGA LESINATO LELITAWUHLALA PHAKADZE?

Ngalokuvamile bantfu labakhatsatekile kuyaye kudzingeke kutsi batfole kwelashwa lokuchubekako kuze babhekane naleto timo letibacindzetelako, baphindze bashintje netindlela tabo tekuphila. Nangabe ungulomunye walabacindzetelekile, ungacabanga ngelikusasa lelihle lapho utojabula khona njengoba kwenta Ojebode. Utsi: “Ngiyakulangatelela kubona kugcwaliseka kwemavi laku-Isaya 33:24, labiketela sikhatsi lapho kutawubabete umuntfu emhlabeni lotsi ‘Ngiyagula.’” Njenga-Ojebode, tfola indvudvuto esetsembisweni saNkulunkulu ‘semhlaba lomusha,’ lapho kungeke kusaba khona ‘buhlungu.’ (Sembulo 21:1, 4) Lesetsembiso sifaka ekhatsi kuphela kwabobonkhe buhlungu lobutsintsa ingcondvo kanye nemizwelo. Ngeke uphindze ubuve buhlungu. Tonkhe tintfo letikuvisa buhlungu “tingeke tikhunjulwe futsi tingeke tisabuya nasengcondvweni.”—Isaya 65:17.

Emavesi EliBhayibheli Lalusito

Nkulunkulu uyakucondza kukhatsateka kwakho.

“Ngobe mine nginguSimakadze, Nkulunkulu wakho, lobamba sandla sakho sangesekudla, atsi kuwe: ‘Ungesabi, ngitakusita.’”—Isaya 41:13.

Jehova uyakucondza kukhatsateka kwetfu kwendlula nome ngabe ngubani lomunye umuntfu, futsi ufuna kusisita.

Cabangisisa ngeliVi laNkulunkulu.

“[Elija] wathandazela kutsi asale asafela khona lapho. Wathandaza watsi: ‘Simakadze, sekwenele, sale utsatsa kuphila kwami.’”—1 Emakhosi 19:4.

Ojebode utsi: “Kucabangisisa ngeliVi laNkulunkulu kwangisita. Ngafundza kutsi nemphrofethi Elija wake wakhatsateka njengami.”

Fundza etibonelweni letiseBhayibhelini.

‘Mine [Jesu] ngikuncusele kutsi wena [Phetro] kukholwa kwakho kungapheli.’—Lukha 22:32.

Ngemuva kwekutsi Phetro aphike Jesu tikhatsi letintsatfu, wakhatsateka kakhulu kangangekutsi wakhala kabuhlungu. Kaoru utsi: “Lokwenteka kuPhetro kwangisita ngabona kutsi Jehova naJesu bamkhatsalela Phetro ebuhlungwini bakhe. Loku kwangikhutsata nami.”

Tonkhe tintfo letikuvisa buhlungu “tingeke tikhunjulwe futsi tingeke tisabuya nasengcondvweni.”—Isaya 65:17