Jehova Uyajabula Nawutsi “Amen”
KUKHONTA kwetfu Jehova kuligugu kuye. Konkhe lesikwentako nasimkhonta kuligugu kuye ngisho noma kukuncane kangakanani. (Mal. 3:16) Cabanga ngeligama lelitsi “Amen,” lokungenteka sivame kulisho tikhatsi letinyenti. Ligama lelitsi “amen” libalulekile kuJehova ngisho noma kumelula kulisho. Ase sihlole kutsi lisho kutsini leligama nekutsi lisetjentiswa njani eBhayibhelini. Loko kutasisita sibone kutsi kubaluleke ngani.
“BONKHE BANTFU BAYAWUPHENDVULA BATSI: ‘AMEN’”
Ligama lesingisi lelitsi “amen” lisho kutsi “akube njalo,” noma “ngalokucinisekile.” Lisuselwa egameni lesiHebheru lelisho “kwetsembeka” noma “kwetsenjwa.” Ngaletinye tikhatsi leligama belisetjentiswa nakutekwa emacala. Ngemuva kwekutsi umuntfu ente sifungo, bekatsi “amen” kute acinisekise kutsi loko lakushito kuliciniso, nekutsi utayemukela imphumela yaloko lakushito. (Num. 5:22) Kutsi “amen”embikwebantfu bekusizatfu lesicinile lebesimenta atimisele kufeza tetsembiso takhe.—Neh. 5:13.
Sibonelo lesikhulu sekusebentisa leligama lelitsi “amen” sitfolakala encwadzini yaDutheronomi sehluko 27. Ngemuva kwekutsi ema-Israyeli angene eVeni Lesetsembiso, bekufanele ahlangane emkhatsini wentsaba iNtsaba i-Ebhali kanye neNtsaba iGerizimu kute alalele nakufundvwa uMtsetfo. Ema-Israyeli bekangagcini nje ngekulalela, kodvwa bekaphindze akhombise kutsi ayakwemukela loko bekushiwo nguMtsetfo. Loko bebakukhombisa ngekutsi batsi “amen!” nabeva kufundvwa imiphumela yekungalaleli. (Dut. 27:15-26) Cabanga ngemsindvo lomkhulu wetinkhulungwane temadvodza, bafati kanye nebantfwana labamemeta ngeliphimbo lelikhulu kute bakhombise kutsi bayawemukela loMtsetfo! (Josh. 8:30-35) Asingabati kutsi abazange bawakhohlwe emavi labawasho ngalelolanga. Onkhe ema-Israyeli akufeza loko labekushito, ngobe liBhayibheli litsi: “Baka-Israyeli bakhonta Simakadze kuso sonkhe sikhatsi sekuphila kwaJoshuwa kanye nebaholi labasala emvakwakhe labakubona konkhe loko Simakadze lakwentela sive sema-Israyeli.”—Josh. 24:31.
Jesu wasebentisa ligama lelitsi “amen” kute agcizelele kutsi loko lakushoko kuliciniso, futsi loko wakwenta ngendlela lekhetsekile. Esikhundleni sekutsi atsi “amen” (ngesiNgisi lisho kutsi “ngicinisile”) ngemuva kwemavi lashiwo ngulomunye umuntfu, Jesu bekatsi “amen” ngaphambi kwekutsi asho lokutsite kuze agcizelele kutsi abecinisile kuloko lakushoko. Ngaletinye tikhatsi bekasho kabili kutsi “amen amen.” (Mat. 5:18; Joh. 1:51) Ngekwenta njalo wacinisekisa balandzeli bakhe kutsi bekakhuluma liciniso leliphelele. Jesu bekakhuluma ngekuciniseka ngobe bekanikwe lilungelo lekufeza tonkhe tetsembiso taNkulunkulu.—2 Khor. 1:20; Semb. 3:14.
“SONKHE SIVE SATSI: ‘AMEN!’ SADVUMISA SIMAKADZE”
Ema-Israyeli bekaphindze asebentise ligama lelitsi “amen” nakadvumisa Jehova futsi athantaza. (Neh. 8:6; Hla. 41:13) Ngekutsi “amen” ngemuva kwemthantazo, ema-Israyeli bekakhombisa kutsi ayavumelana naloko lokushiwoko. Bonkhe lebebakhona bebahlanganyela, futsi loko bekubenta bakujabulele kukhonta Nkulunkulu. Nguloko lokwenteka ngesikhatsi iNkhosi Davide iletsa Libhokisi lesivumelwane eJerusalema. Kulomkhosi, iNkhosi Davide yasho umthantazo loyingoma losuka enhlitiyweni lobhalwe encwadzini ya-1 Tikhronike 16:8-36. Lamavi aDavide abatsintsa labebakhona, futsi “sonkhe sive satsi: ‘Amen!’ sadvumisa Simakadze.” Loko kwabenta bajabula njengobe bakhonta Jehova ngebunye.
EmaKhristu angelikhulu lekucala nawo bekasebentisa ligama lelitsi “amen” nawadvumisa Jehova. Babhali beliBhayibheli balisebentisa leligama nababhala liBhayibheli. (Rom. 1:25; 16:27; 1 Phet. 4:11) Incwadzi yeSembulo ikhuluma ngetidalwa tasezulwini letidvumisa Jehova ngekutsi titsi: “Amen! Dvumisani Jah!” (Semb. 19:1, 4) EmaKhristu angelikhulu lekucala bekavame kutsi “amen” ngemuva kwemithantazo leshiwo emihlanganweni yelibandla. (1 Khor. 14:16) Nanobe kunjalo, leli bekungasilo ligama lebekufanele bamane balisho bangakacabangi.
KUBALULEKA KWEKUTSI “AMEN”
Njengobe sesifundzile kutsi tinceku taJehova betilisebentisa njani ligama lelitsi “amen” singabona kutsi kubaluleke ngani kutsi sephetse umthantazo ngaleligama. Nasitsi “amen” nasephetsa imithantazo yetfu, sikhombisa kutsi siyaciniseka ngaloko lesikushoko. Nangabe sikhutsateka kutsi sitsi “amen” ngisho nangenhlitiyo emthantazweni lowentelwa linyenti, sikhombisa kutsi siyakusekela loko lokushiwoko. Cabanga ngaletinye tizatfu letenta kubaluleke kutsi “amen.”
Siyalalelisisa nangabe lomunye athantaza ngoba loku kuyincenye yekukhonta kwetfu. Nasithantaza sisuke sidvumisa Jehova, hhayi ngalesikushoko kuphela, kodvwa nangendlela lesitiphatsa ngayo nakuthantazwa. Sifiso setfu sekutsi “amen” ngalokusuka enhltiyweni, sisenta sicabange ngendlela lekahle futsi sikunakisise lokushiwoko.
Siba nebunye njengobe sikhonta Nkulunkulu. Umthantazo lowentelwa bantfu labanyenti usenta sinake loko loko lokuviwa ngilo lonkhe libandla. (Imis. 1:14; 12:5) Nangabe sikhutsateka kutsi sitsi “amen” kanye nebazalwane nabodzadzewetfu, siba nebunye. Ngisho noma sitsi “amen” ngalokuvakalako noma simusho enhltiyweni, sisuke siniketa Jehova lesinye sizatfu sekuphendvula ticelo tetfu.
Kutsi “amen” kunesandla ekudvumiseni Jehova
Sidvumisa Jehova. Jehova uyakubona konkhe lesikwentako nasimkhonta. (Luk. 21:2, 3) Ubona tisusa tetfu kanye nalokusetinhlityweni tetfu. Ngisho noma kufanele sisebentise lucingo kute silalele imihlangano, Jehova uyamuva “amen” lesimusho ngalokusuka enhlitiyweni. Nasitsi “amen sisuke sidvumisa Jehova ngebunye.
Kutsi “amen” kubaluleke kakhulu ngisho noma ngaletinye tikhatsi kungabonakala kungakabaluleki. Lenye i-“Bible encyclopedia” itsi: “ngekusebentisa leligama, tinceku taNkulunkulu tingakhombisa kutsi tiyaciniseka, tiyavumelana nalokushiwo ngumthantazo futsi tinelitsemba lelicinile.” Shengatsi kuchubeka kwetfu sitsi “amen” kungahlale kujabulisa Jehova.—Hla. 19:14.