Liciniso Ngelikusasa

Uke wacabanga yini kutsi likusasa lisiphatseleni? LiBhayibheli lisitjela ngetintfo letibalulekile letitawukwenteka madvutane futsi letitawutsintsa bonkhe bantfu labasemhlabeni.

Jesu wachaza indlela lesitawubona ngayo “kutsi uMbuso waNkulunkulu sewusondzele.” (Lukha 21:31) Wabiketela kutsi bekutawuba netimphi, kutamatama lokukhulu kwemhlaba, indlala kanye netifo letingumshayabhuce, lokutintfo letentekako lamuhla.—Lukha 21:10-17.

LiBhayibheli liphindze likhombe kutsi “emalangeni ekugcina” bantfu bebatawutiphatsa kabi. Ungafundza ngaloku embhalweni wa-2 Thimothi 3:1-5. Nawubona lendlela yekutiphatsa lamuhla, kungenteka uyavumelana nalesiphrofetho seliBhayibheli lesitichaza kahle letintfo letentekako lamuhla.

Kusho kutsini loku? Sekusedvute kutsi uMbuso waNkulunkulu wente tingucuko letinkhulu letitawushintja kuphila emhlabeni. (Lukha 21:36) EBhayibhelini, Nkulunkulu wetsembisa tintfo letinhle ngemhlaba nangebantfu labatawuhlala kuwo. Nati tibonelo letimbalwa.

KUBUSA KAHLE

“[Jesu] wanikwa emandla ekubusa, nenkhatimulo, nebukhosi. Bonkhe bantfu, netive, nebantfu bato tonkhe tilwimi bakhotsama kuye bamkhonta. Kubusa kwakhe kukubusa kwaphakadze naphakadze lokungasoze kwaphela, nembuso wakhe ngulowo longasoze wacitfwa.”—DANYELA 7:14.

Kusho kutsini loku: Utawujabulela kuphila ngaphansi kweMbuso lomkhulu Nkulunkulu lawulungiselele iNdvodzana yakhe kutsi ibe yiNkhosi yawo.

IMPHILO LENHLE

Intfombatanyana lesukume ku-wheelchair yayo iyahamba

‘Kute lohlala khona loyakutsi: “Ngiyagula.’”—ISAYA 33:24.

Kusho kutsini loku: Ngeke ugule nobe ukhubateke; uyophila ungasafi.

KUTHULA MBAMBA

“Uvimba acedze timphi kutsi tichubeke emhlabeni wonkhe jikelele.”—TIHLABELELO 46:9.

Kusho kutsini loku: Ngeke kusaba netimphi nekuhlupheka lokubangwa timphi.

UMHLABA UTAWUGCWALA BANTFU LABALUNGILE

“Benti balokubi bayawunyamalala . . . labamnene bayawulidla lifa lemhlaba.”—TIHLABELELO 37:10, 11.

Kusho kutsini loku: Ngeke kusaba nebantfu lababi, kutawuba nebantfu labalangatelela kulalela Nkulunkulu.

UMHLABA WONKHE UTAWUBA LIPHARADISI

“Bantfu bayakwakha tindlu, bahlale kuto, bayawuhlanyela tivini, badle titselo tato.”—ISAYA 65:21, 22.

Kusho kutsini loku: Umhlaba wonkhe utawentiwa ube muhle. Nkulunkulu utawuphendvula umthantazo wetfu wekutsi intsandvo yakhe yenteke “emhlabeni.”—Matewu 6:10.