Tikhonti LetingemaKhristu Kufanele Tithantaze
1. Yini ledzingekako kute sifeze inkonzo yetfu?
1 Angeke sikwati kuyifeza inkonzo sisodvwana. Jehova usiniketa emandla ekwenta lomsebenti. (Fil. 4:13) Ngetingilosi takhe, uyasisita ekufuneni bantfu labanjengetimvu. (Semb. 14:6, 7) NguJehova lobangela kutsi inhlanyelo yeliciniso lesiyihlanyelako futsi siyinisele ikhule. (1 Khor. 3:6, 9) Kubaluleke kakhulu-ke ngetikhonti letingemaKhristu kutsi tetsembele kuBabe wetfu wasezulwini ngemthantazo.
2. Ngutiphi letinye tintfo lesingatithantazela?
2 Singatithantazela Tsine: Kufanele sithantaze ngaso sonkhe sikhatsi nasishumayela. (Ef. 6:18) Ngutiphi letinye tintfo lesingatithantazela? Singathantazela kuba nembono lofanele ngensimi yetfu kanye nekuba nesibindzi. (Imis. 4:29) Singacela kutsi Jehova asicondzise kubantfu labafanelekako lesingafundza nabo liBhayibheli. Nangabe umnikati welikhaya asibuta umbuto, singenta umthantazo lomfishane sicela kutsi Jehova asisite kute simphendvule kahle. (Neh. 2:4) Singacela nekuhlakanipha kute sigcine inkonzo yetfu ita kucala ekuphileni kwetfu. (Jak. 1:5) Ngetulu kwaloko, Jehova uyajabula nangabe simbonga ngelilungelo lesinalo lekuba tikhonti takhe.—Khol. 3:15.
3. Kuthantazela labanye kuwuchubekisela njani embili umsebenti wekushumayela?
3 Singabathantazela labanye: Kufanele ‘sithantazelane,’ futsi nakufaneleka singate sifake ngisho nemabito etikhonti lesikanye nato emithantazweni yetfu. (Jak. 5:16; Imis. 12:5) Imphilo lehhohlokako iyakunciphisa yini loko longakwenta emsebentini wekushumayela? Ngako-ke, thantazela labo lokholwa nabo labanemphilo lenhle. Ungakubukeli phansi loko lokungafezwa kuthantazela kwakho labanye. Kuyafaneleka nekuthantazela labo labasemagunyeni kutsi bangamelani nemsebenti wekushumayela, kute bazalwane betfu ‘baphile imphilo yekuthula.’—1 Thim. 2:1, 2.
4. Kungani kufanele sicinisele njalo emthantazweni?
4 Kumemetela tindzaba letinhle emhlabeni wonkhe kusabelo lesingeke sikwati kusifeza ngemandla etfu. Nangabe ‘sicinisela njalo emthantazweni,’ sitawufeza lomsebenti ngelusito lwaJehova.—Rom. 12:12.