Uke Waba Yini Lihlahlandlela Lelivamile?
1. Nguliphi litfuba labanyenti labaye balijabulela, kodvwa yini lokuye kwadzingeka kutsi labanye babo bayente?
1 Kuleminyaka leyengcile, bantfu labanyenti baye bajabulela litfuba ‘lekufundzisa kanye nekushumayela liVangeli’ njengetikhonti tasikhatsi sonkhe. (Imis. 5:42) Nanobe kunjalo, kuye kwadzingeka kutsi labanye bayekele kuba ngemahlahlandlela ngetizatfu letehlukehlukene. Nangabe uke waba lihlahlandlela lelivamile, sewutihlolile yini timo takho kute ubone kutsi ungakwati kuphindze ube ngilo?
2. Kungani kufanele labo labake baba ngemahlahlandlela baphindze bahlolisise timo tabo?
2 Timo Tiyashintja: Kungenteka kutsi loko lokwakubangela kutsi uyekele kuba lihlahlandlela sekwalunga. Nasi sibonelo: Nangabe wayekela kuba lihlahlandlela ngesizatfu sekutsi bewungakwati kuhlanganisa umgomo wema-awa langu-90 ngenyanga, ungakwati yini kuphindze ubuyele njengobe umgomo sewuncishisiwe waba ngema-awa langu-70? Sidzingo sekwenta umsebenti wekutiphilisa nobe sekunakekela imitfwalo yemndeni sesincono yini kunaloko lebesingiko ngesikhatsi uyekela kuba lihlahlandlela? Lomunye dzadze lowayekela kuba lihlahlandlela ngesizatfu setinkinga temphilo wakwati kubuyela asaneminyaka lengu-89. Besekuphele sikhatsi lesingetulu kwemnyaka angakake walaliswa esibhedlela, ngako wabona kutsi angakwati kuphindze abe lihlahlandlela.
3. Emalunga emndeni angabambisana njani kute asite lomunye emndenini kutsi abe lihlahlandlela?
3 Mhlawumbe awuzange uke ube lihlahlandlela, kodvwa lomunye ekhaya uyekele ngesizatfu sekutsi kufanele anakekele lilunga lemndeni, njengemtali losakhulile. (1 Thim. 5:4, 8) Nangabe kunjalo, wena kanye nalabanye ekhaya ningakwati yini kwenta lokwengetiwe kute nimsite? Kungani ningacoci ndzawonye ngalendzaba? (Taga 15:22) Nangabe emalunga emndeni abambisana kute lomunye akwati kuba lihlahlandlela, bonkhe bangayitfola injabulo.
4. Kutsiwani nangabe usengakakwati kuphindze ube lihlahlandlela?
4 Ungapheli emandla nangabe timo takho solo ativumi kutsi uphindze ube lihlahlandlela. Kutimisela kwakho kubuyela kuyamjabulisa Jehova. (2 Khor. 8:12) Emakhono lowawatfola ngesikhatsi uselihlahlandlela wasebentise nawushumayela. Thandaza ngalesifiso sakho, futsi uhlale uwaphaphamele ematfuba ekulungisa timo takho. (1 Joh. 5:14) Mhlawumbe ngekuhamba kwesikhatsi, Jehova utawukuvulela “litfuba lekusebenta” kute ukwati kuphindze utfole injabulo yekuba lihlahlandlela lelivamile.—1 Khor. 16:9.