Gadla Ngekuhlakanipha
1. Singamsebentisa njani 1 Khorinte 9:26 ensimini?
1 Umphostoli Pawula wabhala: “Nami-ke angigijimisi kwemuntfu longenawo umgomo, futsi nangesibhakela angigadli nje kungatsi ngigadla umoya.” (1 Khor. 9:26) Pawula abekhuluma ngesimo sakhe sengcondvo sekunaka intfo leyodvwa kanye nekunamatsela emgomeni wakhe wekukhonta Nkulunkulu. Nobe kunjalo, lamavi aphindze asebente nasemsebentini wekushumayela. Sifuna ‘kugadla’ ngekuhlakanipha kute siphumelele. Singakwenta njani loko?
2. Singamlingisa njani Pawula kanye nebashumayeli bangetikhatsi tebaphostoli ekukhetseni indzawo lefanele nesikhatsi lesifanele sekushumayela?
2 Yani Lapho Kunebantfu Khona: Pawula kanye nebashumayeli bangesikhatsi sebaphostoli bebaya lapho bantfu bebatfolakala khona. (Imis. 5:42; 16:13; 17:17) Ngako-ke, nangabe linyenti lebantfu ensimini yetfu litfolakala kusihlwa, leso kungaba sikhatsi lesincono kakhulu sekuya emtini ngemuti. Siteshi sebhasi nobe sesitimela sasendzaweni yakini sicala kuphitsitela ekuseni kakhulu yini ngalesikhatsi bantfu baya emisebentini nobe entsambama kakhulu nasebabuyela emakhaya? Kunini lapho kuphitsitela khona etitolo tasensimini yenu? Kushumayela etindzaweni letinjalo ngaletotikhatsi kungaba nemiphumela lemihle.
3. Singagadla njani ngekuhlakanipha endleleni lesisebenta ngayo insimu yetfu?
3 Sebentani Insimu Ngekuhlakanipha: Kufanele sicaphele kute sigadle ngekuhlakanipha endleleni lesisebenta ngayo insimu yetfu. Esikhundleni sekutfumela licembu lelikhulu endzaweni letsite lapho kutawudzingeka khona sikhatsi lesinyenti nekutikhandla kute ligcinwe lihlelekile futsi lisebenta insimu, kungaba ncono kutsi lehlukaniswe. Ngendlela lefananako, nasisebenta insimu yasemakhaya, singayihlanganisa yonkhe ngekushesha futsi sibe nematfuba lamanyenti ekukhuluma nangabe emacembu lahamba ngetimoto angasimakhulu kakhulu. Ungaticelela yini insimu yakho lesedvutane nasekhaya letakunciphisela sikhatsi sekuhamba libanga lelidze?
4. Yini lengasisita kutsi sibe “badwebi bebantfu” labaphumelelako?
4 Jesu wafananisa bashumayeli ‘nebadwebi bebantfu.’ (Mak. 1:17) Umgomo wemdwebi awusiko kumane nje afake lidweba emantini, kepha kubamba tinhlanti. Ngako-ke, badwebi labaphumelelako baya endzaweni labatiko kutsi batawutfola kuyo tinhlanti futsi baya kuyo ngesikhatsi lesifanele, bese bacala kudweba bangaphotisi maseko. Ngekwenta njalo, basuke bagadla ngekuhlakanipha. Shengatsi natsi singenta njalo nasisebenta insimu yetfu.—Heb. 6:11.