Incwadzi Levela ESigungwini Lesibusako
Bazalwane Betfu Labatsandzekako:
Kusijabulisa kakhulu kunibhalela lencwadzi njengetikhonti taJehova letetsembekile, lesetingetulu kwetigidzi letisikhombisa. Nawuhlangana nalesinye sikhonti saJehova kulelinye live, uvele utive usondzelene naso. (Joh. 13:34, 35) Asingabati kutsi nawufundza kulandzisa lokukhutsatako lokumayelana nekukholwa kanye nebucotfo bebazalwane kanye nabodzadzewetfu labasemaveni lahlukahlukene lokusencwadzini yemnyaka ya-2012, utawutiva usondzelana kakhulu nabo.
Imibiko levela emhlabeni wonkhe iveta kutsi linyenti lenu liba neKukhonta Kwemndeni njalo. Labo labanebantfwana labancane kini, basebentise tindlela letinyenti letikhangako kute babente balalelisise. (Ef. 6:4) Bantfu labashadile bayasondzelana njengobe batadisha ndzawonye. (Ef. 5:28-33) Bantfu kanye nemindeni bayazuza kuloluhlelo lwekutadisha liVi laNkulunkulu ngalokujulile.—Josh. 1:8, 9.
Siyabavela bonkhe labalahlekelwe kakhulu etinhlekeleleni temvelo letisandza kuba khona. Sifuna nekubonga bonkhe labahlanganyele ngekungatigodli emitamweni yekusita bazalwane ngesikhatsi setinhlekelele. (Imis. 11:28-30; Gal. 6:9, 10) Ngetulu kwaloko, kuwo onkhe emabandla kunalabo labacaphela tidzingo tebazalwane babo bese batsatsa tinyatselo tekubasita. Njenga-Dokhasi, lokukhulunywa ngaye eBhayibhelini, nihlale ‘nenta lokuhle futsi nisita’ labanye. (Imis. 9:36) Cinisekani kutsi Jehova uyakubona loko futsi utanibusisa.—Mat. 6:3, 4.
Kulamanye emave, bantfu labasebentisa kabi umtsetfo banyatsela emalungelo enu ngekutsi ‘bente bubi kube shengatsi ngumtsetfo.’ (Hla. 94:20-22) Njengobe nicaphela kutsi Jesu wakubiketela kushushiswa lokunjena, nibeketela ngesibindzi futsi netsembela kuJehova njengesiphephelo senu. (Joh. 15:19, 20) Cinisekani kutsi sihlale sinithandazela njengobe nichubeka ‘nibaphendvula bonkhe labanibuta ngelitsemba lelikini.’—1 Phet. 3:13-15.
Sinincoma kakhulu nonkhe nine lenichubeka nihlantekile ekutiphatseni umnyaka nemnyaka, ngisho nobe Sathane akhutsata kutiphatsa lokubi ngetindlela letinganakeki. Kulesikhatsi lapho timiso tekutiphatsa talelive tihhohloka, nine ‘niyacina eNkhosini nasemandleni ayo lamakhulu.’ (Ef. 6:10) ‘Nihlome ngato tonkhe tikhali taNkulunkulu,’ ngesizatfu saloko ninemandla ekumelana “nebucili baSathane.” (Ef. 6:11, 12) Khumbulani kutsi Jehova usebentisa indlela leniphila ngayo kute aphendvule Sathane, lomedzelelako.—Taga 27:11.
Sakujabulela kwati kutsi nga-2011, bantfu labangu-19 374-737 baba khona eSikhumbutweni sekufa kweNkhosi yetfu. Lelinani lelihle kangaka lebantfu lababakhona lingumphumela wekutenta kwenu nitfolakale njengemahlahlandlela lasitako emnyakeni lowendlulile nga-April. Tigidzi tebantfu emhlabeni wonkhe taweva emavi ekudvumisa Jehova, lavela kuboFakazi bakhe labetsembekile. (Rom. 10:18) Nangabe bowungulomunye walabangu-2 657 377 lababa ngemahlahlandlela lasitako nga-April nobe nangabe wetama kwandzisa umsebenti wakho ngendlela letsite, nonkhe nasenta sajabula kakhulu ngekutimisela kanye nekukhutsala kwenu kulomsebenti.—Hla. 110:3; Khol. 3:23.
Emnyakeni lowendlulile, bantfu labangu-263 131 baveta kutinikela kwabo kuJehova ngekubhajatiswa. Siyambonga Jehova ngaloko, futsi sinibonga nonkhe ngekuhlanganyela natsi ekusakateni lesimemo kulabanye, lesitsi: “‘Kota!’ Wonkhe umuntfu lovako akatsi: ‘Kota!’ Lowo lowomile akete; nalowo lofuna emanti ekuphila, akawanatse mahhala.” (Semb. 22:17) Ngemuva kwekufundza ngetici teMbuso waNkulunkulu lobusako emihlanganweni yetfu yesigodzi ya-2011, sisho ngekuciniseka lokukhulu sitsi: “UMbuso WaNkulunkulu Awute!” Njengobe sikhutsatwa sicinisekiso saJesu lesitsi: “Ngiyeta masinyane,” siphendvula ngetinhlitiyo tonkhe njengemphostoli Johane, sitsi: “Amen! Kota, Nkhosi Jesu!”—Semb. 22:20.
Njengobe nisilindzele lesentakalo lesimangalisako, sicela niciniseke kutsi sinitsandza nonkhe bazalwane kanye nabodzadzewetfu, leniveta lutsandvo lwenu ngaJehova “ngetento nangeliciniso”!—1 Joh. 3:18.
Bazalwane benu,
Sigungu Lesibusako SaboFakazi BaJehova