Shumayela Ensimini Yemabhizinisi Ngesibindzi
1. Kungani kungakafaneli siphelelwe litsemba nangabe kusishayisa luvalo kushumayela ensimini yemabhizinisi?
1 Ukutfola kukwetfusa yini kushumayela ensimini yemabhizinisi? Nangabe kunjalo, ungaphelelwa litsemba, ngobe naPawula lobekangumshumayeli lonesibindzi nalongesabi kwadzingeka kutsi acunge ‘sibindzi’ kute ashumayele. (1 Thes. 2:2) Sitawucoca ngetinsayeya lesivame kuhlangabetana nato kanye naloko lesingakwenta kute sitincobe.
2. Kungani kungakafaneli sikhatsateke ngekutsi sitawucansula tisebenti?
2 Kuphatamisa Tisebenti Kutawuticansula Yini? Emabhizinisini lamanyenti, tisebenti tihlale tikulungele kusita bantfu kanye nekubanaka. Tivame kuba nemusa ngobe tisuke tikutsatsa njengemuntfu lotawutsenga. Kugcoka ngendlela lehloniphekile kanye nekuba nemusa nebungani kungabangela kutsi tikuhloniphe.
3. Ungakubalekela njani kuwaphatsa kabi emakhasimende?
3 Kutawudzingeka Yini Kutsi Ngishumayele Embikwemakhasimende? Nakungenteka, khetsa sikhatsi lapho titolo tisuke tingakagcwali, njengalapho tisandza kuvulwa. Mela umphatsi wesitolo nobe lisekela lakhe kutsi acedze kusita emakhasimende ngembikwekutsi ukhulume naye. Inshumayelo yakho kufanele ibe yimfisha.
4. Yini lesingase siyisho nasisebenta insimi yemabhizinisi?
4 Ngingatsini? Khuluma nemuntfu lophetse nangabe kunetisebenti letinyenti. Ungase utsi: “Kulukhuni kutfola bantfu bemabhizinisi emakhaya, kungako sinivakashela emisebentini yenu. Ngiyati kutsi nisemsebentini kodvwa ngitawukhuluma kafishane.” Kute bangacabangi kutsi uyatsengisa, kuhle kungakhulumi ngemnikelo ngaphandle kwalapho bakubuta kutsi umsebenti wetfu usekelwa njani ngetimali. Kuye ngeluhlobo lwebhizinisi lokulo, ungase ucele umphatsi kutsi akunike imvume yekukhuluma kafishane netisebenti. Yiphindze nakuto lenshumayelo loyisebentise kumphatsi walelibhizinisi. Nangabe sisebenti sibonakala simatasatasa, khuluma kafishane bese usishiyela lipheshana. Nalingaveli litfuba lekukhuluma netisebenti, ungase uvunyelwe kushiya tincwadzi endzaweni lokuphumulela khona tisebenti nobe kulenye indzawo.
5. Ngutiphi tizatfu letisibangela kutsi sihlanganyele ensimini yemabhizinisi ngesibindzi?
5 Jesu kanye naPawula bashumayela ngesibindzi kubantfu labebasetindzaweni temabhizinisi, futsi nawe ungenta lokufananako. (Mat. 4:18-21; 9:9; Imis. 17:17) Thandaza kuJehova kute akusite kutsi ungesabi futsi ube nesibindzi. (Imis. 4:29) Insimi yemabhizinisi ayikavami kungabi namuntfu, ngako-ke kungani ungetami kushumayela kulensimi lebonakala ikhicita?