Kushumayela Emgwacweni Ngendlela Lephumelelako
1. Nguyiphi indlela lesingamlingisa ngayo Jesu?
1 Ngesikhatsi alapha emhlabeni, Jesu abengangabati kucoca nebantfu labehlangana nabo emgwacweni kanye nakuletinye tindzawo. (Luk. 9:57-61; Joh. 4:7) Abefuna kutjela bantfu labanyenti ngemlayeto wakhe lobalulekile. Lamuhla, kushumayela emgwacweni kuyindlela lenhle kakhulu yekusita bantfu kutsi batfole kuhlakanipha lokuvela kuNkulunkulu. (Taga 1:20) Sitawuphumelela kakhulu nangabe sitsatsa sinyatselo kucala futsi sisebentisa kucondza.
2. Kutsatsa sinyatselo kucala kusebenta njani nasishumayela emgwacweni?
2 Tsatsa Sinyatselo Kucala: Kuncono kakhulu kuya kubantfu kunekutsi ume nobe uhlale ndzawonye, futsi ulindzele kutsi labo labendlulako bete kuwe. Moyitela, ubabuke, futsi ukhulume ngemusa nangebungani. Nangabe usebenta nalabanye bamemeteli, etikhatsini letinyenti kuba ncono kutsi ukhulume nebantfu uwedvwa. Kudzingeka nekutsi utsatse sinyatselo kute ukwati kuphindze ucoce nebantfu labanenshisekelo. Nangabe kufaneleka, ungatsi nawucedza kucoca nalomuntfu bese umbuta ngemusa kutsi ungaphindze umtfole njani. Labanye bamemeteli bahambisa magazini endzaweni lefananako kute bakwati kuphindze babone bantfu labake bacoca nabo futsi batfutfukise inshisekelo yabo.
3. Singakusebentisa njani kucondza nasishumayela emgwacweni?
3 Sebentisa Kucondza: Yehlulela kahle nawukhetsa indzawo lotawuma kuyo kanye nekutsi bobani lotawukhuluma nabo. Akudzingeki kutsi ushumayele bonkhe bantfu labendlulako. Kufanele unakisise. Nasi sibonelo: Nangabe umuntfu ajakile, kungaba ncono kutsi simyekele endlule. Nangabe sishumayela embikwetindzawo temabhizinisi, kufanele sisebentise kucondza kute singenti baphatsi bakhatsateke nobe basisole. Kuncono kucoca nebantfu nasebaphuma kunekutsi sicoce nabo nabasangena. Yani kubantfu ngendlela lengeke ibamangalise nobe ibetfuse. Kufanele wehlulele kahle nawuhambisa bomagazini. Nangabe umuntfu ete inshisekelo lengako, ungase umnikete lipheshana kunekutsi umnikete magazini.
4. Kungani kushumayela emgwacweni kungumsebenti lozuzisako nalojabulisako?
4 Kushumayela emgwacweni kusiniketa litfuba lekutsi sisakate inhlanyelo yeliciniso ngesikhatsi lesincane. (Shu. 11:6) Labanye bantfu lesihlangana nabo kungaba ngulabo lesingabatfoli emakhaya nasishumayela emtini ngemuti. Kungaba njani kutsi uhlele kuhlanganyela emsebentini wekushumayela emgwacweni, lokungumsebenti lojabulisako nalophumelelako?