Ungahlanganyela Yini Ensimini Yakusihlwa?
1. Ngekusho kwalesinye sati, umphostoli Pawula abeshumayela nini emtini ngemuti?
1 Ngekusho kwencwadzi letsi: “Daily Life in Bible Times” umphostoli Pawula abeshumayela emtini ngemuti “kusukela nga-4 ntsambama kuze kube sebusuku.” Asati kutsi lesi bekusikhatsi labehlale ashumayela ngaso yini kodvwa lesikwatiko kutsi ‘abenta konkhe ngesimanga seliVangeli.’ (1 Khor. 9:19-23) Kungenteka kutsi kwenta loko bekudzinga kutsi ahlele timo takhe kuze akhone kuyoshumayela emtini ngemuti ngesikhatsi bantfu labanyenti labatfolakala ngaso.
2. Kungani kusikhatsi lesikahle kuya ensimini kusihlwa?
2 Etindzaweni letinyenti bamemeteli bavamise kushumayela emtini ngemuti ekuseni emkhatsini weliviki. Nome kunjalo, sikhatsi lesikahle yini leso endzaweni yakini? Lelinye lihlahlandlela litsi: “Bantfu abatfolakali emakhaya emini kodvwa kusihlwa banyenti labatfolakalako.” Kushumayela kusihlwa kungaba litfuba lelihle kakhulu lekutfola emadvodza sicoce nawo ngetindzaba letimnandzi. Lesibatfolako basuke bangakajakeli ndzawo futsi banemdlandla wekucoca. Nangabe ningakhona kushumayela kusihlwa, labadzala kufanele bahlele kutsi kube nemhlangano wangembikwekuya ensimini entsambama.
3. Singakhombisa njani kutsi sinekucondza nasishumayela kusihlwa?
3 Bani Nekucondza: Nangabe siya ensimini kusihlwa kubalulekile kuvumelana netimo. Nasi sibonelo: nangabe kwenteka kutsi leso akusiso sikhatsi lesikahle kumuntfu lomtfolile, mhlawumbe umkhandze adla, kungaba kuhle kutsi ucele kuphindze ubuye. Nangabe sekumnyama, mani endzaweni latawukhona kukubona kuyo uphindze utisho ngekushesha kutsi ungubani usho nenjongo yekumvakashela. Kukuhlakanipha nekuhamba ngababili nobe njengelicembu futsi nisebente sitaladi lesinetibane temgwaco letikhanya kahle. Ningayi emtini sekusebusuku kuze ningabaphatamisi sebalungiselela kuyolala. (2 Khor. 6:3) Nangabe kuvakashela bomakhelwane nasekumnyama kungakaphephi, shumayela ngetikhatsi tantsambama.—Taga 22:3.
4. Ngutiphi tibusiso letitfolakala ngekushumayela kusihlwa?
4 Tibusiso: Kushumayela kujabulisa kakhulu nasibatfola bantfu. Nangabe sibatfola lesitawufakaza kubo, sitawuba nematfuba lamanyenti ekubasita kuze “basindziswe bafinyelele ekulatini liciniso.” (1 Thim. 2:3, 4) Ungakhona yini kuhlela timo takho kuze uhlanganyele ensimini yakusihlwa?