Sisebentise Kahle Sikhatsi Losicitsa Emsebentini Wekushumayela
Ngemnyaka wemsebenti wa-2014, BoFakazi BaJehova bacitse ema-awa langu-1 945 487 604 emsebentini wekushumayela, futsi loku kubufakazi lobucacile bekutsi sitimisele kuhlala simatasatasa emsebentini waJehova! (Hla. 110:3; 1 Khor. 15:58) Njengobe “sikhatsi lesisele sesinciphile,” singakhona yini kusisebentisa kahle sikhatsi setfu lesisicitsa emsebentini wekushumayela ngekutsi sifune bantfu labengetiwe?—1 Khor. 7:29.
Kuze sisisebentise kahle sikhatsi lesisicitsa emsebentini wekushumayela, kudzingeka kutsi sikhone kushintjashintja. Nasi sibonelo: Nangabe uvame kucitsa li-awa nobe ngetulu ungakakhulumi ngisho namunye umuntfu nawusebentisa lenye yetindlela tekushumayela, lukhona yini lushintjo longalwenta kuze utfole bantfu labengetiwe futsi ucoce nabo? Timo tiyehluka kuye ngendzawo. Kodvwa-ke lamaphuzu lalandzelako angakusita kutsi usisebentise kahle sikhatsi sakho kuze ‘ungashayi lite.’—1 Khor. 9:26.
Kushumayela Emtini Ngemuti: Sekuphele emashumi eminyaka bamemeteli bashumayela emtini ngemuti ekuseni. Kodvwa-ke njengobe emkhatsini welilanga bantfu labanyenti basuke basemsebentini, kungani ungetami kushumayela emtini ngemuti entsambama nobe kusihlwa, ngobe bantfu labanyenti basuke basemakhaya futsi baphumulile? Emkhatsini welilanga ungatfola imiphumela lemihle nawushumayela emgwacweni nobe ensimini yemabhizinisi.
Kushumayela Etindzaweni Letiphitsitelako: Ematafula kanye netincola tekukhangisa ngetincwadzi kufanele kubekwe etindzaweni lapho kwendlula khona bantfu labanyenti, kodvwa kube sensimini yelibandla. (Fundza Umsebenti Wetfu WeMbuso waJuly 2013, likh. 5.) Nangabe indzawo lokuhlelwe kutsi kutawubekwa kuyo letintfo tekukhangisa ingasaphitsiteli, iKomidi Yemsebenti ingancuma kutsi letintfo tingasabekwa khona kodvwa tisale tibekwa kulenye indzawo lephitsitelako.
Kubuyela Kuloke Wacoca Nabo Nekuchuba Tifundvo TeliBhayibheli: Ungakhona yini kuhlela kubuyela kubantfu loke wacoca nabo futsi uchube tifundvo teliBhayibheli ngetikhatsi lapho letinye tindlela tekushumayela tingaphumeleli kangako? Nasi sibonelo: Nangabe kushumayela emtini ngemuti kuba nemiphumela lemihle nakwentiwa ngeMigcibelo ekuseni, ungakhona yini kutsi tifundvo takho teliBhayibheli utichube ntsambama nobe kusihlwa? Nakubuyelwa kubantfu lokucocwe nabo, bamemeteli bangakhona yini kwehlukana ngemacembu lamancane kute bafeze lokunyenti emsebentini wekushumayela?
Nanobe sisibala sikhatsi nasenta umsebenti wekushumayela, kodvwa lokusijabulisa kakhulu kutfola imiphumela lemihle. Nangabe utfola kutsi lenye indlela yekushumayela ite imiphumela ngesikhatsi lesitsite, yetama lenye indlela. Thantaza kuJehova, “iNkhosi yekuvuna” ucele sicondziso sakhe kuze usisebentise kahle sikhatsi losicitsa emsebentini wekushumayela!—Mat. 9:38.