Indlela Lensha Nalejabulisako Yekushumayela Etindzaweni Tawonkhe Wonkhe
1. Emabandla lanetindzawo letiphitsitelako akhutsatwe kutsi enteni?
1 Emabandla lanetindzawo letiphitsitelako akhutsatwe kutsi ahlele kushumayela kuleto tindzawo asebentisa ematafula nobe incola lenetintfo tekukhangisa ngetincwadzi. Nangabe kusetjentiswe incola yekukhangisa, lokungenani ummemeteli munye angema nobe ahlale eceleni kwayo. Kodvwa kufanele kube nebamemeteli lababili nakusetjentiswa litafula. Labo lababelwe kutsi babe lapho kufanele babe nemusa, babe nebungani futsi babemukele bantfu. Nangabe umuntfu abuka loko lokukhangiswako, munye kulabamemeteli angacala kucoca naye, mhlawumbe atsi: “Wake watibuta yini kutsi liBhayibheli litsini ngalendzaba?” Ummemeteli munye nobe lababili bangase bachubeke bashumayela bangakahleli bahle baphonsa liso kuloko lokukhangiswako.
2. Landzisa lokuhlangenwe nako lokukhombisa kubaluleka kwekushumayela etindzaweni tawonkhe wonkhe ngekukhangisa tincwadzi tetfu.
2 Tinyenti tifundvo teliBhayibheli letibe ngumphumela walendlela yekushumayela. Lomunye umfundzi wasekolishi wakhetsa kubhala indzaba lemayelana naBoFakazi BaJehova, kodvwa akazange alitfole liHholwa LeMbuso. Evikini lelilandzelako wabona lelitafula lekukhangisa khona kulelikolishi. Kwacaliswa sifundvo seliBhayibheli, nyalo sewungummemeteli lobhajatisiwe futsi naye sewuhlanganyela kulendlela yekushumayela.
3. Labanye bativa njani ngalendlela yekushumayela etindzaweni tawonkhe wonkhe?
3 Lomunye dzadze loyijabulelako lendlela yekushumayela etindzaweni tawonkhe wonkhe watsi: “Labanye bantfu bayeta kute batsatse bomagazini labasha. Labanye babo abakaze beve ngaBoFakazi BaJehova. Ngiyabona kutsi banyenti bantfu labangatfolakala ngalendlela yekushumayela.” Lomunye dzadze watsi: “Lena yindlela lensha nalejabulisako yekushumayela ngobe bantfu beta kuwe, futsi ngisho nobe bete inshisekelo lengakanani, baba nayo imibuto.”
4. Kungani kuzuzisa kubeka tintfo tekukhangisa ngetikhatsi letifanako kanye nasendzaweni lefanako liviki ngalinye?
4 Kuyazuzisa kubeka letintfo tekukhangisa endzaweni yinye, ngemalanga lafanako nangetikhatsi letifanako liviki ngalinye. Loko kwenta kutsi bantfu betayele kutibona letintfo futsi basheshe bakhululeke kutsi bete babute imibuto nobe batfole tincwadzi. Tikhona yini tinhlelo tekushumayela kuletindzawo tawonkhe wonkhe ebandleni lakini? Nangabe kunjalo, mhlawumbe nawe ungahlanganyela kulendlela lejabulisako nalenemiphumela lemihle ‘yekumemetela ngeMbuso waNkulunkulu kuto tonkhe tindzawo.’—Luk. 9:60.