Indlela Yekufakaza Usebentisa Litafula Lekukhangisa

Kufakaza usebentisa incola yekukhangisa nobe litafula kubonakala kuyindlela lephumelela kakhulu yekudvonsa bantfu labanetinhlitiyo leticotfo kutsi bete ecinisweni. (Joh. 6:44) Ngako-ke, labadzala bakhutsatwe kutsi bahlele kutsi kusetjentiswe lendlela yekufakaza etindzaweni letiphitsitelako letisensimini yenu. Njengobe letincola kanye nalamatafula ekukhangisa kumelula kukususa, esikhatsini lesinyenti kute sidzingo sekucela imvume yekukubeka endzaweni letsite. Bobani lokufanele bahlanganyele kulendlela yekushumayela? Kufanele kube bamemeteli labanekucondza lokuhle, labatiphatsa ngendlela lehloniphekile kanye nalabanelikhono lelihle lekukhuluma nebantfu. Lamaphuzu lalandzelako aveta tintfo lokufanele tentiwe netintfo lokungakafaneli tentiwe futsi atawusita bamemeteli kutsi baphumelele kakhulu kulendlela yekufakaza.

Lokufanele Kwentiwe:

Bani nebungani, ubemukele bantfu labendlulako futsi ubasite ngetincwadzi letikhangiswako. Labanye bamemeteli bayamoyitela futsi babe nebungani nababingelela umuntfu. Nangabe umuntfu abuka loko lokukhangiswako nakendlula ungase utsi: “Ungatsatsa nome nguyiphi incwadzi nawuyifuna.”
Mela bucadlwana naletintfo. Kuletinye tindzawo, bamemeteli batfole kutsi loku kuba nemiphumela lemihle. Labanye bona batfole kutsi lokuma bucadlwana naletintfo kwenta bantfu labendlulako bangakhululeki, ngaleso sizatfu labamemeteli bema khashanyana balindze aze umuntfu eme kuletintfo letikhangiswako. Nangabe umuntfu sekafikile kulelitafula, yetama kumcocisa, mhlawumbe umbute nangu umbuto: “Uke wacabanga yini ngalowo mbuto?”
Sebentisa liBhayibheli ngaso sonkhe sikhatsi nawungakhona.
Chaza luhlelo lwesifundvo seliBhayibheli kunobe ngubani lotsatsa lenye yetincwadzi lokuchutjwa ngayo sifundvo seliBhayibheli, njengaleletsi Lokufundziswa LiBhayibheli. Cela kumdlalela i-video letsi: Kungani Kufanele Utadishe LiBhayibheli? usebentisa intfo yebucwephesha.
Nakungenteka, tsatsa imininingwane yemuntfu lokhombise inshisekelo, kuze ukhone kuchumana naye.