Kutfutfukisa Emakhono Etfu Emsebentini Wekushumayela—Kucalisa Incociswano Kute Ufakaze Ungakahleli

Kubaluleke Ngani?: Nasishumayela emtini ngemuti, sivame kukhandza bantfu labanyenti bangekho emakhaya. Nome kunjalo, bantfu siba nabo nasigibele tintfo letitfutsa sive, nasimele dokotela, nasivalile esikolweni noma emsebentini, kanye nakuletinye tindzawo. Kuyintsandvo yaJehova kutsi bonkhe bantfu balitfole litfuba lekuva umlayeto weMbuso. (1 Thim. 2:3, 4) Esikhatsini lesinyenti, kute sifakaze, kufanele kube ngitsi lesicala incociswano.

Indlela Yekukwenta:

Bukisisa simo. Lomuntfu unebungani yini? Uyafuna yini kukhuluma? Timo tendzawo lenikuyo tiyavuma yini kutsi nicoce nikhululeke? Labanye bamemeteli bacale bambuke loyo muntfu bese bayamoyitela. Nangabe nalomuntfu amoyitela, betama kucalisa incociswano.
Thantaza kafishane ngenhlitiyo nangabe ute sibindzi sekukhuluma.—Neh. 2:4; Imis. 4:29.
Cala ngekukhuluma kafishane, mhlawumbe ubingelele. Jesu akazange acalise incociswano yakhe nemfati waseSamariya ngekukhuluma ngeMbuso. (Joh. 4:7) Ngaletinye tikhatsi, kucoca kungacaliswa ngemavi ekuncoma, njengekutsi: “Maye vele bayahlonipha bantfwana bakho.” Kubuta umbuto kungulenye indlela longacalisa ngayo incociswano, njengekutsi: “Utibukele yini tindzaba itolo ebusuku?”
Nangabe senicalile kucoca, funa litfuba lekufaka tindzaba letimnandzi, kodvwa ungajaki. Yenta lencociswano itichubekele. Mhlawumbe ungahle usho lokutsite lokujabulisako lokutamenta afune kwati kabanti futsi abute. Nasi sibonelo: Nangabe incociswano yenu imayelana nemndeni, ungase utsi: “Ngitfole kwatiswa lesingakwetsemba nalokungasisita ekukhuliseni bantfwana.” Nangabe nicoca ngalokuvele etindzabeni, ungase utsi: “Ngisandza kufundza tindzaba letimnandzi.” Ungadvumali nangabe lencociswano iphela ungakashumayeli.
Phatsa emapheshana nome lokunye kwekufundza longakunika lotsite lonenshisekelo.

Yetama Loku Kulenyanga:

Njalo ngeliviki, yetama kucalisa incociswano unemgomo wekufakaza ungakahleli.