Libhokisi Lembuto
◼ Nangabe sifuna kutsi tonkhe tintfo tetfu nome incenye yato itfolwe yinhlangano yaJehova nasifa, yini lokufanele sicabange ngayo?
Nangabe bantfu sebafile, abakhoni kulawula tintfo tabo. (Shu. 9:5, 6) Ngaleso sizatfu, labanyenti babhala incwadzi yelifa lesemtsetfweni kusenesikhatsi, lechaza tifiso tabo tekwabiwa kwelifa. (2 Khos. 20:1) Lencwadzi yelifa iphindze ikhombise nekutsi ngubani lofuna abe ngulophatsiswe lifa (trustee) nalotawuba ngumabi walo (executor). Nangabe ungakayibhali lencwadzi yelifa, kutawuncuma bemtsetfo kutsi ngubani etihlotjeni takho lokufanele abe lelifa. Ngako-ke, nangabe unesifiso sekutsi tonkhe tintfo takho nobe incenye yato itfolwe yinhlangano yaJehova, kubalulekile kutsi ubhale incwadzi lesemtsetfweni lekucinisekisako loko uphindze umkhetse kahle lotamphatsisa lifa nemabi walo. Ciniseka kutsi uyawatjela emalunga emndeni wakho ngetifiso takho ikakhulukati nangabe angahlanganyeli. Kwenta njalo kutawenta kutsi kungabi nembango nemndeni nangabe wona ucabanga kutsi tintfo takho kufanele titfolwe ngiwo kuphela.
Lophatsiswe lifa nemabi walo banemsebenti lobaluleke kakhulu. Kugcogca lelifa nekulabela labafanele, kungaba nemidanti futsi kungatsatsa sikhatsi kuye ngekutsi tingakanani tintfo takho nobe imali. Ngetulu kwaloko, bemtsetfo bavama kuba neticondziso lokufanele tilandzelwe. Ngaleso sizatfu, kungase kudzingeke utfole umuntfu lonelwati lotakusita, lokungafaka ekhatsi ummeli nome umuntfu lonelwati ngetimali. Akusibobonkhe labangemalunga elibandla lokubafanelako kuphatsiswa lifa nome kulaba. Umuntfu lomkhetsako kufanele kube ngumunfu lomatiko kutsi utawukhona kwenta lomcela kona, lometsembako nalotakwenta lokufisako.—Fundza sihloko lesitsi: “Ukuhlakanipha Nezinzuzo Zokwaba Ifa,” ku-“Phaphama!” ya-December 8, 1998.
Nawucelwa Kutsi Ube Ngulophetse Lifa Nobe Umabi Walo: Nangabe ucelwa ngulotsite kutsi unakekele tintfo takhe nasekashonile, cala ngekubala tindleko uphindze uthandaze ngalendzaba nawutawuvuma. (Luk. 14:28-32) Nasekashonile lowo muntfu, kufanele watise bonkhe labatawutfola lifa. Ngemuva kwaloko, kutawuba ngumsebenti wakho kwaba lelifa ngendlela levunyelwa ngumtsetfo ngekuvumelana nencwadzi yelifa. Lophatsiswe lifa nemabi walo kufanele bakhumbule kutsi nome ngabe imali netintfo titincane nobe titinyenti kangakanani, kufanele tabiwe njengobe kubhalwe kulencwadzi yelifa. Onkhe emafa laphiwe inhlangano yaJehova kufanele aye kuyo.—Luk. 16:10; 21:1-4.