Jehova Ubabusisa Kakhulu Labo Labanemoya Wekupha

UMDALI wetfu unikete bantfu sipho lesiligugu senkhululeko yekutikhetsela. Ngetulu kwaloko, ubabusisa kakhulu labo labasebentisa inkhululeko yabo yekutikhetsela kute batfutfukise kukhonta kweliciniso ngekungatigodli, futsi bente konkhe lokusemandleni abo kute bangcwelise libito lakhe lelingcwele baphindze basekele injongo yakhe lebalulekile. Jehova akafuni kutsi simlalele ngobe sesatjiswa nobe siphocelelwa. Esikhundleni saloko, ujabula kakhulu nangabe sitinikela kuye ngekutitsandzela, sichutjwa lutsandvo lolucotfo nekubonga lokukhulu.

Nasi sibonelo, ngesikhatsi ema-Israyeli asehlane laseSinayi, Jehova wawayala kutsi akhe indzawo yekumkhonta. Watsi: “Tsatselani Simakadze umnikelo kuloko leninako. Wonkhe lonenhlitiyo levumako akaletse umnikelo kuSimakadze.” (Eks. 35:5) UmIsrayeli ngamunye abenganikela ngaloko lanako, futsi yonkhe leminikelo yekutitsandzela​—ngisho nobe bewuyini nobe ungakanani—​beyingasetjentiswa kahle kute kufezwe injongo yaNkulunkulu. Yini bantfu labayenta?

‘Ngulowo nalowo lotsintsekako enhlitiyweni yakhe’ ‘nalowo nalowo lotsintsekako emoyeni wakhe’ wenta umnikelo wekutitsandzela ‘ngenhlitiyo levumako.’ Emadvodza nebafati banikela ngetintfo lebetitawusetjentiswa kulomsebenti waJehova: ticobosho temhlobiso, emacici, tindandatho, ligolide, lisiliva, litfusi, insontfo leluhlata njengesibhakabhaka, nalebukhwebeletane, nalebovu ngalokutopele, indvwangu yelineni lecolisakele, boya bembuti, tikhumba tetihhanca letishukiwe taguculwa taba bovu, tikhumba temahhashi aselwandle, umgamba, ematje laligugu, ibhalisamu, nemafutsa. Ekugcineni, “loko bebakuletsile kwase kwenele kwaze kwendlula kutsi kungawucedza wonkhe lomsebenti.”​—Eks. 35:21-24, 27-29; 36:7.

Intfo leyenta Jehova wajabula kakhulu bekungasiyo leminikelo lebebayiletsa, kodvwa bekungumoya wekupha lobewuvetwa ngulabo lebebasekela kukhonta kweliciniso. Baphindze banikela ngesikhatsi sabo nangemandla abo. Lokulandzisa kutsi: ‘Bonkhe labasikati lebebanelikhono bebaphotsa.’ Ecinisweni, ‘bonkhe labasikati lebebanetinhlitiyo letitsintsekile nalebebanelikhono, baphotsa boya betimbuti.’ Ngetulu kwaloko, Jehova waniketa Besaleli “likhono, nekuhlakanipha, nelwati emisebentini yonkhe yebungcweti.” Nkulunkulu waniketa Besaleli na-Oholiyabi likhono lebebalidzinga kute bente yonkhe lemisebenti lebekabayale kutsi bayente.​—Eks. 35:25, 26, 30-35.

Ngesikhatsi Jehova acela ema-Israyeli kutsi ente iminikelo, abenelitsemba lekutsi “bonkhe lababenetinhlitiyo letivumako” bebatawusekela kukhonta kweliciniso. Labo labebanemoya wekupha wababusisa kakhulu ngekutsi abanikete sicondziso nenjabulo lenkhulu. Ngaleyo ndlela, Jehova wakhombisa kutsi nakabusisa tinceku takhe letinemoya wekupha uyaciniseka kutsi utinika konkhe letikudzingako nobe emakhono letiwadzingako kute tifeze injongo yakhe. (Hla. 34:9) Njengobe ukhonta Jehova ngekungatigodli, utakubusisa ngenca yekutsi unemoya wekupha.