“Lomsebenti Mkhulu Kabi”

SIKHATSI semhlangano lobaluleke kakhulu eJerusalema. INkhosi Davide ibite tonkhe tiphatsimandla tayo, tindvuna tasesigodlweni kanye nemadvodza lanemandla. Bajabulile ngekuva ngalesimemetelo lesikheketsekile. Jehova ukhetse indvodzana yaDavide lenguSolomoni kutsi yakhe indlu letawuniketelwa ekukhonteni Nkulunkulu weliciniso. Lenkhosi yaka-Israyeli leseyikhulile iniketwe ipulani ngekuphefumulelwa futsi yase iyinika Solomoni. Davide utsi: “Lomsebenti mkhulu kabi, ngobe lendlu akusiso sigodlo sekuhlala umuntfu. Kodvwa kutawuhlala Simakadze Nkulunkulu.”—1 Khr. 28:1, 2, 6, 11, 12; 29:1.

Davide wabese ubuta umbuto lotsi: “Ngubani lofuna kunikela kuSimakadze?” (1 Khr. 29:5) Kube bewulapho, bewutokwenta njani? Bewutawusekela yini lomsebenti lomkhulu nakangaka? Ema-Israyeli agcumagcuma ngesizatfu senjabulo. Ecinisweni, ‘ajabula kakhulu . . . ngobe abenikela ngenkhululeko nangenhlitiyo yawo yonkhe kuSimakadze.’—1 Khr. 29:9.

Eminyakeni leminyenti leyalandzela, Jehova wamisa lobekubaluleke kwendlula lelithempeli. Wamisa lithempeli lakhe, lokulilungiselelo lekutsi bantfu bakhone kumkhonta ngesihlengo saJesu. (Heb. 9:11, 12) Lamuhla Jehova ubasita njani bantfu kutsi babuyisane naye? Ubasita ngemsebenti wetfu wekwenta bafundzi. (Mat. 28:19, 20) Umphumela walomsebenti kutsi njalo ngemnyaka kuchutjwa tigidzi tetifundvo teliBhayibheli, kubhatjwatiswa tinkhulungwane tebafundzi labasha futsi kusungulwa emabandla lamanyenti lamasha.

Ngesizatfu saloko, kukhicitwa tincwadzi letengetiwe letisekelwe eBhayibhelini, kwakhiwe emaHholwa eMbuso futsi anakekelwe kuphindze kufunwe tindzawo tekubambela imihlangano lemincane nalemikhulu. Awuvumi yini kutsi lomsebenti wekumemetela tindzaba letimnandzi mukhulu futsi uyajabulisa?—Mat. 24:14.

Lutsandvo ngaNkulunkulu nangabomakhelwane kanye nekuphutfuma kwekushunyayelwa kwetindzaba teMbuso, kwenta tinceku taNkulunkulu kutsi ‘tifune kunikela kuSimakadze’ ngekwenta iminikelo yekutitsandzela. Maye kuyajabulisa ‘kudvumisa Simakadze ngalokuhle lesinako’ siphindze sibone kutsi leminikelo yetfu isetjentiswa njani ngekwetsembeka nangekuhlakanipha ekwenteni lomsebenti lomkhulu kangaka emlandvweni wesintfu!—Taga 3:9.

Indlela Labanye Labakhetsa Kuwunikelela Ngayo Umsebenti Wemhlaba Wonkhe

Bantfu labanyenti lamuhla ‘babekela eceleni lokutsite’ nobe imali labatayifaka ebhokisini lemnikelo wemsebenti wemhlaba wonkhe lelisebandleni labakulo. (1 Khor. 16:2) Inyanga ngayinye, emabandla atfumela leminikelo ehhovisini laBoFakazi BaJehova lelinakekela live labakulo. Ungakhona nekutfumela iminikelo ngalokucondzile enhlanganweni lesemtsetfweni lesetjentiswa BoFakazi BaJehova eveni lakini. Kute wati ligama lalenhlangano, sicela uye ku-www.jw.org futsi uchumane nelihhovisi leligatja laBoFakazi BaJehova lelidvute nawe. Tinhlobo letehlukene teminikelo longayitfumela ngalokucondzile tihlanganisa leti:

IMINIKELO

Iminikelo ingentiwa kusetjentiswa luhlelo lwekutfumela imali ngetintfo tebucwephesha (electronic bank transfer), likhadi lasebhange nobe likhadi lekutsenga ngesikweleti. Kulamanye emave ingentiwa kusetjentiswa i-jw.org nobe lenye i-Web site.
Iminikelo lefaka ekhatsi imali, tintfo letinjengebucwebe nobe letinye tintfo takho letiligugu. Kufanele ubhale incwadzi letawuchaza kutsi lemali nobe letintfo titipho letite imibandzela.

IMINIKELO LENEMIBANDZELA

Ngiminikelo yemali lehambisana nemibandzela yekutsi ingaphindze ibuyiselwe kuwe nangabe sewuyidzinga.
Bhala incwadzi lechazako kutsi kunemibandzela letsite ngalomnikelo.

LETINYE TINDLELA LONGANIKELA NGATO

Lapha ngentasi kunaletinye tindlela longanikela ngato kute usekele umsebenti wekushumayela emhlabeni wonkhe. Ngaphambi kwekunikela, sicela uchumane nelihhovisi leligatja lelinakekela live lakini kute utfole kutsi ngumiphi iminikelo leyemukelekako lapho uhlala khona. Njengobe imitsetfo yemave nemitsetfo yemtselo yehlukahlukene, khuluma nalotsite loyatiko lemitsetfo ngaphambi kwekutsi unikele.

Umshwalensi: Nangabe umuntfu anemshuwalensi wekuphila nobe wemhlalaphansi, anganikela ngekutsi abhalise inhlangano lesemtsetfweni lesetjentiswa BoFakazi BaJehova njengendlalifa.

Ema-account Asebhange: Umuntfu angaba ne-account yasebhange, timphepha letifakazela kufakwa kwemali nobe ema-account emuntfu emhlalaphansi, ngekuvumelana netimfuneko telibhange talelo live. Angase asho nekutsi inhlangano lesemtsetfweni lesetjentiswa BoFakazi BaJehova itawutfola lemali nakwenteka ashona.

Emasheya Nema-bond: Umuntfu anganikela ngemasheya nema-bond enhlanganweni lesemtsetfweni lesetjentiswa BoFakazi BaJehova. Angaphindze abhale nesivumelwano lesishoko kutsi lamasheya nema-bond angandluliselwa kulenhlangano nasekafile.

Tindzawo Netakhiwo: Nangabe umuntfu anendzawo langayitsengisa nobe sakhiwo, anganikela ngako enhlanganweni lesemtsetfweni lesetjentiswa BoFakazi BaJehova. Nangabe ahlala kuleso sakhiwo, angase achubeke ahlala kuso kuze kube ngulapho afa.

Umshuwalensi Lowentiwa Njalo Ngemnyaka: Umuntfu unikela ngemali enhlanganweni lesemtsetfweni lesetjentiswa boFakazi BaJehova lapho lona lonikele atfola imali letsite ekupheleni kwemnyaka kuphila kwakhe konkhe. Lona lonikele angatfola imali letsite ye-income-tax ngalowo mnyaka lemali lenikelwe ngawo.

Tincwadzi Temafa Kanye Nema-Trust: Umuntfu angase ahlele kutsi kunikelwe ngendzawo yakhe nobe imali nasekafile. Angakwenta loko ngekutsi abhale incwadzi yelifa lesemtsetfweni, kuyo asho kutsi inhlangano lesemtsetfweni lesetjentiswa BoFakazi BaJehova ngiyo letawutfola lelifa. Lelilungiselelo lingahle libe netinzuzo temtselo letitsite.

Imininingwane leyengetiwe mayelana nendlela yekunikelela umsebenti wemhlaba wonkhe waBoFakazi BaJehova ungayitfola kulencwajana letsi Charitable “Planning to Benefit Kingdom Service Worldwide,” letfolakala ngesiNgisi nangeSipanishi. Lencwajana icuketse imininingwane yetindlela letehlukahlukene umuntfu langanikela ngato. Lemininingwane lekulencwajana ingase ingasebenti yonkhe esimeni sakho ngenca yemitsetfo yemtselo nobe leminye imitsetfo yaseveni lakini. Bantfu labanyenti basitile ekusekeleni umsebenti wemhlaba wonkhe futsi batfole tinzuzo letitsite temtselo ngekunikela ngalenye yaletindlela. Nangabe lencwajana itfolakala eveni lakini, ungacela ikhophi kumabhalane welibandla lakini.

Kute utfole iminingwane leyengetiwe chafata i-link letsi: “Nikelela Umsebenti Lowentiwa Emhlabeni Wonkhe” letfolakala ekugcineni kwelikhasi lekucala le-jw.org nobe uchumane nelihhovisi laBoFakazi BaJehova lodvutane nalo.