Umuntfu “Lowephanako Utawubusiswa”

IMINIKELO beyisolo iyincenye lebalulekile yekukhonta kweliciniso. Ema-Israyeli bekanikela ngetilwane, futsi emaKhristu bekasolo atiwa ngekunikela ‘ngemhlatjelo wekudvumisa.’ Kepha ikhona naleminye iminikelo lemjabulisako Jehova. (Heb. 13:15, 16) Njengobe sitawubona kuletibonelo letilandzelako, leminikelo isiletsela injabulo kanye netibusiso.

Hana, lobekasisebenti saJehova lesetsembekile bekafisa mbamba kuba nemntfwana, kepha bekangakhoni ngobe bekangabatfoli bantfwana. Wathantaza kuJehova wafunga kutsi nakangamupha indvodzana, ‘uyawunikela ngayo kuye tonkhe tinsuku tekuphila kwayo.’ (1 Sam. 1:10, 11) Ngekuhamba kwesikhatsi, Hana wakhulelwa futsi watala indvodzana layibita ngekutsi nguSamuweli. Ngemuva kwekutsi Samuweli alunyulwe, Hana wamtsatsa wamyisa ethempelini njengobe bekafungile. Jehova wambusisa Hana ngemoya wakhe wekutidzela. Waphindze wambusisa ngebantfwana labanye labasihlanu futsi Samuweli waba ngumphrofethi nembhali weliBhayibheli.—1 Sam. 2:21.

NjengaHana naSamuweli, emaKhristu lamuhla anelilungelo lelifanako lekusebentisa kuphila kwawo kute asebentele uMdali wawo. Ngetulu kwaloko, Jesu wetsembisa kutsi sitawubusiswa kakhulu nasitidzela kute sikhonte Jehova.—Mak. 10:28-30.

Ngelikhulu lekucala umfati longumKhristu lobitwa ngekutsi nguDokhasi, bekatiwa ‘ngekwenta tintfo letinyenti letinhle futsi ephana ngetipho’ kute asite labanye. Lokubuhlungu kutsi “wagula wase uyafa” futsi loko kwalivisa buhlungu libandla. Batsi nabeva kutsi Phetro usedvute nalendzawo lebebakuyo, bafundzi bamcela kutsi ete masinyane. Cabanga ngenjabulo lababa nayo ngesikhatsi Phetro efika futsi avusa Dokhasi—bekukwekucala ngca kutsi umphostoli avuse umuntfu lofile! (Imis. 9:36-41) Jehova bekangakatikhohlwa tento letinhle taDokhasi. (Heb. 6:10) Indzaba yakhe yabhalwa eBhayibhelini kute silingise sibonelo sakhe lesihle.

Ngalokufanako, umphostoli Pawula wasibekela sibonelo lesihle ngekunikela ngesikhatsi sakhe. Nakabhalela bazalwane bakhe eKhorinte, Pawula watsi: “Mine ngitawusebentisa konkhe lenginako, futsi nami ngitawusetjentiswa ngalokugcwele ngenca yemiphefumulo yenu.” (2 Khor. 12:15) Pawula wafundza kutsi kutinikela kute usite labanye kwenta umuntfu enetiseke, kodvwa lokubaluleke kakhulu kutsi kumenta emukelwe nguJehova futsi ambusise.—Imis. 20:24, 35.

Kuyacaca kutsi Jehova uyajabula nasisebentisa sikhatsi nemandla etfu kute sisekele uMbuso wakhe futsi sisite lesikholwa nabo. Kepha tikhona yini letinye tindlela lesingasekela ngato umsebenti wekushumayela ngeMbuso? Yebo. Ngetulu kwekunikela ngesikhatsi nemandla etfu, singadvumisa Nkulunkulu ngekutsi sinikele ngekutitsandzela ngetintfo lesinato. Leminikelo isetjentiselwa kusekela umsebenti wekushumayela lowentiwa emhlabeni wonkhe, lokufaka ekhatsi kusekela titfunywa telivangeli kanye naletinye tisebenti letisenkonzweni lekhetsekile yesikhatsi lesigcwele. Ngetulu kwaloko, leminikelo iphindze isite ekuhumusheni nasekukhiciteni tincwadzi nema-video, lapho kuvele khona tinhlekelele, kanye nasekwakhiweni kwemaHholo eMbuso lamasha. Singaciniseka kutsi umuntfu “lowephanako utawubusiswa.” Ngetulu kwaloko, nangabe sinikela ngetintfo tetfu letiligugu, sisuke sidvumisa Jehova.—Taga 3:9; 22:9.

Indlela Labanye Labakhetsa Kuwunikelela Ngayo Umsebenti Wemhlaba Wonkhe

Njengasesikhatsini semphostoli Pawula, bantfu labanyenti lamuhla ‘babekela eceleni’ imali letsite labatayifaka ebhokisini lemnikelo lelibhalwe kutsi “Umsebenti Wemhlaba Wonkhe” lelisebandleni labakulo. (1 Khor. 16:2) Inyanga ngayinye, emabandla atfumela leminikelo ehhovisini laBoFakazi BaJehova lelinakekela live lakulo. Ungakhona nekutfumela iminikelo ngalokucondzile enhlanganweni lesemtsetfweni lesetjentiswa BoFakazi BaJehova eveni lakini. Kute wati ligama lalenhlangano, sicela uye ku-www.jw.org futsi uchumane nelihhovisi leligatja laBoFakazi BaJehova lelidvute nawe. Tinhlobo letehlukene teminikelo longayitfumela ngalokucondzile tihlanganisa leti:

IMINIKELO

Iminikelo ingentiwa kusetjentiswa luhlelo lwekutfumela imali ngetintfo tebucwephesha (electronic bank transfer), likhadi lasebhange nobe likhadi lekutsenga ngesikweleti. Kulamanye emave ingentiwa kusetjentiswa i-jw.org nobe lenye i-website.
Iminikelo lefaka ekhatsi imali, tintfo tekutihlobisa letinjengebucwebe nobe letinye tintfo takho letiligugu. Kufanele ubhale incwadzi letawuchaza kutsi lemali nobe letintfo titipho letite imibandzela.

IMINIKELO LENEMIBANDZELA

Yiminikelo yemali lehambisana nemibandzela yekutsi ingaphindze ibuyiselwe kuwe nangabe soyidzinga.
Bhala incwadzi lechazako kutsi kunemibandzela letsite ngalomnikelo.

LETINYE TINDLELA LONGANIKELA NGATO

Lapha ngentasi kunaletinye tindlela longanikela ngato kute usekele umsebenti wekushumayela ngeMbuso emhlabeni wonkhe. Ngaphambi kwekunikela, sicela uchumane nelihhovisi leligatja lelinakekela live lakini kute utfole kutsi ngumiphi iminikelo leyemukelekako lapho uhlala khona. Njengobe imitsetfo yemave nemitsetfo yemtselo yehlukahlukene, khuluma nalotsite loyatiko lemitsetfo ngaphambi kwekutsi ukhetse indlela lotawunikela ngayo.

Umshwalensi: Nangabe umuntfu anemshwalensi wekuphila nobe wemhlalaphansi, anganikela ngekutsi abhalise inhlangano lesemtsetfweni lesetjentiswa BoFakazi BaJehova njengendlalifa.

Ema-account Asebhange: Umuntfu lone-account yasebhange angahle atsi inhlangano lesemtsetfweni lesetjentiswa BoFakazi BaJehova itawutfola lemali nakwenteka ashona, ngekuvumelana netimfuneko telibhange talelo live.

Emasheya Nema-bond: Umuntfu anganikela ngemasheya nema-bond enhlanganweni lesemtsetfweni lesetjentiswa BoFakazi BaJehova. Angaphindze abhale nesivumelwano lesishoko kutsi lamasheya nema-bond angandluliselwa kulenhlangano nasekafile.

Tindzawo Netakhiwo: Nangabe umuntfu anendzawo langayitsengisa nobe sakhiwo, anganikela ngako enhlanganweni lesemtsetfweni lesetjentiswa BoFakazi BaJehova. Nangabe ahlala kuleso sakhiwo, angase achubeke ahlala kuso kuze kube ngulapho afa.

Tincwadzi Temafa Kanye Nema-Trust: Umuntfu angase ahlele kutsi kunikelwe ngendzawo yakhe nobe imali nasekafile. Angakwenta loko ngekutsi abhale incwadzi yelifa lesemtsetfweni, kuyo asho kutsi inhlangano lesemtsetfweni lesetjentiswa BoFakazi BaJehova ngiyo letawutfola lelifa. Lelilungiselelo lingahle libe netinzuzo temtselo letitsite.

Kuze ukhone kunikela ngetinhlobo letingenhla, kudzingeka uhlele kusengaphambili. Imininingwane leyengetiwe mayelana nendlela yekunikelela umsebenti wemhlaba wonkhe waBoFakazi BaJehova ungayitfola kulencwajana letsi “Charitable Planning to Benefit Kingdom Service Worldwide,” letfolakala ngesiNgisi nangeSipanishi. Lencwajana icuketse imininingwane yetindlela letehlukahlukene umuntfu langanikela ngato nyalo noma esikhatsini lesitako. Lemininingwane lekulencwajana ingase ingasebenti yonkhe esimeni sakho ngenca yemitsetfo yemtselo nobe leminye imitsetfo yaseveni lakini. Bantfu labanyenti basitile ekusekeleni umsebenti wemhlaba wonkhe futsi batfole tinzuzo letitsite temtselo ngekunikela ngalenye yaletindlela. Nangabe lencwajana itfolakala eveni lakini, ungacela ikhophi kumabhalane welibandla lakini.

Kute utfole iminingwane leyengetiwe chafata incenye letsi, “Nikelela Umsebenti Lowentiwa Emhlabeni Wonkhe” lesekugcineni kwelikhasi le-jw.org, noma utsintsane nelihhovisi leligatja.