Unasiphi Sizatfu ‘Sekutibonga’?
1. Yini lesenta sijabule ekupheleni kwenyanga ngayinye ngaloko lesikwentile?
1 Nakufika kuphela kwenyanga ngayinye futsi sonkhe sicelwa kutsi siletse imibiko yasensimini, wena uba nasiphi sizatfu ‘sekutibonga’? (Gal. 6:4) Ngisho nobe singemahlahlandlela lakhetsekile labika ema-awa langu-130, nome ungummemeteli lovunyelwe kutsi abike imizuzu lengu-15, sonkhe kufanele sijabule ngekutsi sinikete Jehova inkonzo yemphefumulo wonkhe.—Hla. 100:2.
2. Sinasiphi sizatfu sekwenta konkhe lokusemandleni etfu emsebentini lesiwuniketwe nguJehova?
2 Njengobe ayiNkhosi lenguMbusi wendzawo yonkhe, Jehova ufanelwa kutsi simnikete lokuncono kakhulu. (Mal. 1:6) Ngelutsandvo lesinalo ngaye, sinikele kuphila kwetfu kuye kute sente intsandvo yakhe. Ngaleso sizatfu, ekushoneni kwelilanga nome ekupheleni kwenyanga, nasiciniseka kutsi simnikete “titselo tekucala” tesikhatsi setfu, emathalenta nemandla etfu emsebentini lasinikete wona, loko kusenta sijabule. (Taga 3:9) Nakwenteka nembeza wetfu usitjela kutsi singenta lokuncono, kufanele sicabange ngalesingakwenta kute sitfutfukise.—Rom. 2:15.
3. Yini leyenta kungabi kuhlakanipha kuticatsanisa nalabanye?
3 “Hhayi Ngekwalomunye Umuntfu”: Akusiko kuhlakanipha kuticatsanisa nalabanye bantfu nobe kucatsanisa lesikhona kukwenta nyalo nalebesikhona kukwenta esikhatsini lesengcile nasisenemandla. Timo tiyashintja. Emakhono awafanani. Kucatsanisa kuvame kubangela kuncintisana nobe umuva wekuba sehluleki. (Gal. 5:26; 6:4) Jesu bekangawacatsanisi emakhono ebantfu. Esikhundeni saloko, bekancoma umuntfu ngaloko labekhona kukwenta.—Mak. 14:6-9.
4. Ngusiphi sifundvo lesibalulekile lesingasifundza emfanekisweni waJesu wemathalenta?
4 Emfanekisweni waJesu wemathalenta, sisebenti ngasinye satfola emathalenta “njengemandla aso.” (Mat. 25:15) Ngesikhatsi inkhosi ibuya icela imiphumela yemsebenti wato, tisebenti lebetisebente ngekukhutsala ngalokulingene emandla ato tanconywa taphindze tangena ekujabuleni kwenkhosi yato. (Mat. 25:21, 23) Njengobe natsi sihlale simatasa ekushumayeleni ngeMbuso, singaciniseka kutsi Nkulunkulu uyasemukela futsi loko kusenta sijabule.